Дәрһәԛа ве тʹемайе гәләк ширәт һәнә. Ле һʹәму ширәт нькарьн аликʹарийе бьдьн. Мәсәлә, һьнәк мәрьв дькарьн бежьн, ԝәки нәлазьм ә бьгьрин, йан жи бь щурʹед дьн һәстед хԝә бьдьнә кʹьфше. Һьнәк жи дькарьн пашопе бежьн. Ле Кʹьтеба Пироз тьштәки әʹйан дькә у гәләк пьштгьрийа ԝе йәке дькьн.

Һьнә културада нәмеранти йә, һәрге мер бьгьри. Ле гәло шәрм ә бәр мәрийа бьгьрин? Һьнә дохдьр дьбежьн, кӧ әв тьштәкә нормал ә чахе мәрьв ԝәʹде шине дьгьри. Чахе бәндә һәстед хԝә дьдә кʹьфше, ԝирʹа даһа һеса дьбә тәйах кә. Ле чахе мәрьв һʹәму тьшти нав хԝәда дьгьрә, бь ԝе йәке әԝ зийане дьдә хԝә. Дь Кʹьтеба Пирозда тʹӧ щийа найе готьне, ԝәки ԝәʹде шине нәрʹаст ә у нәмерʹанти йә, һәрге кәсәк бьгьри. Һәла дәрһәԛа Иса бьфькьрьн. Чахе һәвале ԝи Лазар мьрьбу, ԛәԝата Иса дьгьһиште кӧ һәвале хԝә Лазар вәгәрʹинә жийине, ле йәкә әԝ бәр һʹәмуйа гьрийа! (Йуһʹәнна 11:33-35).

Чахе кәсәк шине дькә, ԝи ԝәʹдәйда әԝ дькарә сәрт у һерс бә. Илаһи ԝи чахи, гава мәрьве ԝийи нас тьштәки бефәми дьбежә. Мәрьвәки жь Африкайа Башуре бь наве Майк, гьлийе ӧса дьбежә: «Әз ԝәкә 14 сали бум чахе баве мьн мьр. Ԝәʹде шине кʹаһинәки мьнрʹа гот, ԝәки Хԝәдерʹа мәрьвед баш лазьм ьн, ләма жи әԝ ԝана һьлдьдә щәм хԝә. * Жь бо ве йәке әз гәләк һерс кʹәтьм, чьмки бь рʹасти әм һʹәԝще баве хԝә бун. Ида 63 сал дәрбаз бу у һʹәта ньһа әԝ гьли дьле мьн дешиньн».

Ле әм чь дькарьн бежьн дәрһәԛа хԝәнәһәԛкьрьне? Чахе мәрьве незик ньшкева дьмьрә, фькьре ӧса пешда те, ‹Әԝ йәк ԝе нәԛәԝьмийа, һәрге мьн ӧса, йан щурʹәки майин бькьра›. У һәрге пешийа мьрьна ԝи мәрьви, тә тʹәви ԝи шәр кьрьбу, әв йәк еша дьле тә һе зедә дькә.

Һәрге фькьред хԝәнәһәԛкьрьне йан һерс щәм тә һәйә, гәләк фәрз ә әԝе йәке нав хԝәда нагьри. Ԝе баш бә хәбәрди тʹәви һәваләки хԝә, йе кӧ ԝе гӧһ бьдә тә у тә бьдә баԝәркьрьне, кӧ һәстед ӧса тьштәкә нормал ә. Кʹьтеба Пироз дьбежә: «Һәвал һәр тʹьм һʹәз дькә у бьра дь рʹожа тәнгда хӧйа дьбә» (Мәтʹәлок 17:17).

Чахе бәндә шина кәсәки дькә, ԝи ԝәʹдәйида Досте ԝийи лапи баш дькарә Әʹфьрандаре мә бә, демәк Йаһоԝа Хԝәде. Дӧада дьле хԝә ԝира вәкьн, «чьмки әԝ бона ԝә хәм дькә» (1 Пәтрус 5:7). Йаһоԝа ӧса жи соз дьдә, ԝәки әԝ мәрьв ԝе фькьред хԝәда у дьле хԝәда архайин бьн, чьмки «әʹдьлайийа Хԝәде . . . жь һәр һʹьш-аԛьли дәрбазтьр ә» (Филипи 4:6, 7). Демәк әм гәрәке бьһельн, ԝәки Хԝәде бь сайа Кʹьтеба Пироз али мә бькә у дьлбинийе бьдә мә. Хԝәрʹа һʹьнә рʹеза бьньвисә йед кӧ дьле тә рʹьһʹәт дькьн. (Бьньһерʹә  чаргошә). Тӧ дькари һьнә жь ԝан, бь әзбәри һин би. Чахе тӧ бьфькьри дәрһәԛа ԝан реза, әԝе али тә бькьн ԝи чахи, мәсәлә гава еваре тӧ тʹәне йи у нькари хәвра һәрʹи (Ишайа 57:15).

 Мерәки 40 сали, ԝәрен ԝи нав кьн Щек, жьна хԝә ӧнда кьр, йа кӧ жь рәԛе (кʹансәре) мьр. Щек щарна тʹәнебуне тʹәхмин дькә, ле дӧа али ԝи дькә. Әԝ дьбежә: «Чахе әз Йаһоԝарʹа дӧа дькьм, әз ида хԝә тʹәне тʹәхмин накьм. Гәләк щар әз ниве шәве һʹьшийар дьбьм у ида нькарьм рʹазем. Һьнге әз дәстпедькьм һьнә рʹеза жь Ньвисаред Пироз бьхуньм у ль сәр бьфькьрьм. Әԝ мьн дьлрʹьһʹәт дькьн. Паше әз Йаһоԝарʹа дӧа дькьм у дьле хԝә ԝирʹа вәдькьм. Дьле мьн архайин дьбә у әʹдьлайа Хԝәде һʹьш-аԛьле мьн ӧса рʹьһʹәт дькә, кӧ паше әз дькарьм рʹьһʹәт рʹазем».

Кʹӧлфәтәкә щаһьл бь наве Ванеса, дийа хԝә жь бо нәхԝәшийе ӧнда кьр. Әԝе жи ль сәр хԝә ԛәԝата дӧакьрьне тʹәхмин кьр. Әԝ дьбежә: «Ԝәʹде лапи чәтьнда, мьн гази наве Хԝәде дькьр у кʹәлә-кʹәл дьгьрийам. Йаһоԝа гӧһ дьда дӧайед мьн у тʹьме әз ԛәԝи дькьрьм».

Һьне дохдьр ширәт дьдьн, кӧ һәрге тӧ дьлтәнгийе тʹәхмин дьки, ԝе баш бә кӧ тʹьштәкива мьжул би. Мәсәлә дькари тьштәкида али кәсәки бьки. Әв йәк дькарә шабуне тәрʹа бине у дьлтәнгийа дьле тә жи сьвьк кә (Кʹаред Шандийа 20:35). Гәләк Мәсиһийа дь ԝе йәкеда аликʹари у бәрдьли хԝәрʹа дитьнә (2 Корьнтʹи 1:3, 4).