Паԝлосе шанди сәр Йаһоԝа * дьбежә, «Хԝәдейе һʹәму бәрдьлийе», йе кӧ «нава һʹәму тәʹли-тәнгийада дьл дьдә бәр мә» (2 Корьнтʹи 1:3, 4). Кʹьтеба Пироз мә дьдә баԝәркьрьне, кӧ Хԝәде аликʹарийе дьдә һʹәмуйа. Фьрԛи тʹӧнә әм рʹасти чь чәтьнайа йан ԛәзийа бен, ԛәԝата Баве мәйи әʹзмана дьгьһиже бәрдьлийе бьдә мә.

Һәмьки әм жи гәрәке тьштәки бькьн, сәва кӧ бәрдьлийе жь Хԝәде бьстиньн. Мәсәлә һәрге әм нәхԝаш ьн у начьнә щәм дохдьр, әԝе нькарьбә али мә бькә, ӧса нинә? Ләма жи Ньвисаред Пироз мә һелан дькьн: «Хԝә ль Хԝәде бьгьрьн, Хԝәде жи ԝе хԝә ль ԝә бьгьрә» (Аԛуб 4:8).

Әм чьма баԝәр дькьн, кӧ Хԝәде ԝе хԝә ль мә бьгьрә? Бәри әʹԝльн әԝ ә, кӧ Хԝәде хԝәха мәрʹа дьбежә, кӧ дьхԝазә али мә бькә. (Дина хԝә бьдьнә  чаргоше.) Йа дӧда жи әԝ ә, кӧ һәйә избаткьрьна ԝе йәке, ԝәки чаԝа ԝәʹде бәре у ньһа, гәләк мәрьв , бәрдьли жь Хԝәде дьстандьн.

Иро гәләк мәрьв аликʹарийа Хԝәде дьгәрʹьн. Анәгори ве йәке Даԝьд Пʹадша жи йе кӧ кʹәтьбу ԛәзийе, жь Хԝәде рʹәща дькьр: «Бьбьһизә дәнге һаԝара мьн». Гәло Хԝәде әԝ бьһист? Бәле. Даԝьд сәрда зедә дькә: «Дьле мьн ль ԝи әԝлә бу у мьн аликʹари дит» (Зәбур 28:2, 7, ИМ).

Хԝәде ԛьрар кьрьбу, ԝәки Иса бәрдьлийе бьдә мәрийа. Бь ԛьрара Хԝәде Иса гәрәке гәләк тьшт бькьра. Шьхӧләки ԝи әԝ бу, ԝәки «бьрине йед дьлшькәсти» ԛәнщ кә у бәрдьлийе бьдә ԝан, йед кӧ дьлбьриндар ьн (Ишайа 61:1, 2). Чаԝа кӧ һатьбу пʹехәмбәртикьрьне, Иса бь рʹасти хәм дькьр дәрһәԛа мәрьвед «ԝәстийайи у баргьран» (Мәтта 11:28-30).

Иса бь ширәтед аԛьлайи бәр дьле мәрьвада дьһат у һьндава ԝанда дьлшәԝат бу. Әԝи һәла һе нәхԝәшийед ԝан жи ԛәнщ дькьр. Щарәке мәрьвәк кʹоти рʹәща Иса кьр: «Һәгәр тӧ бьхԝази, дькари мьн паԛьж ки». Гӧне Иса пе һат, у жерʹа гот: «Әз дьхԝазьм. Паԛьж бә!» (Марк 1:40, 41). Һьнге мәрьве кʹоти ԛәнщ бу.

Рʹаст ә кӧрʹе Хԝәде иро ль сәр әʹрде нинә, ԝәки али мә бькә, ле Баве ԝи Йаһоԝа демәк «Хԝәдейе  һʹәму бәрдьлийе», диса жи аликʹарийе дьдә мә (2 Корьнтʹи 1:3). Ԝәрен әм хәбәр дьн дәрһәԛа чар тьшта, йед кӧ Хԝәде дьдә хәбате сәва бәрдьлийе бьдә мәрийа.

• Хәбәра Хԝәде. «Чь кӧ пешда кʹьтебада һатә ньвисаре, бона һинбуна мә һатә ньвисаре, ԝәки әм бь сәбьре у ԝан готьнед ньвисарада кӧ бине дьдьнә бәр мә, хԝәйигӧман бьн» (Рʹомайи 15:4).

• Рʹӧһʹе Хԝәдейи Пироз. Пәй мьрьна Исарʹа һьнә ԝәʹдә дәрбаз бу у тʹәмамийа щьвата Мәсиһтийада әʹдьлайи һәбу. Бь сайа чь әʹдьлайи чебу? «Бь хофа Хӧдан у бь дьлдайина Рʹӧһʹе Пироз» (Кʹаред Шандийа 9:31). Рʹӧһʹе пироз, демәк ԛәԝата Хԝәде, гәләк ԛәԝи йә. Хԝәде дькарә ве бьдә хәбате, сәва кӧ һʹәму дәрәщада бәрдьлийе бьдә һәркәса.

• Дӧа. Кʹьтеба Пирозда ньвисар ә: «Бона тʹӧ тьшти хәм нәкьн». Ле дәԝсе «хԝәстьна ԝә бьра . . . Хԝәдева әʹйан бә. У әʹдьлайийа Хԝәде кӧ жь һәр һʹьш-аԛьли дәрбазтьр ә, ԝе дьл у фькьред ԝә . . . хԝәй кә» (Филипи 4:6, 7).

• Хьзмәткʹаред Хԝәдейи Рʹаст дькарьн сәва ԝә бьбьнә дост, йед кӧ ԝәʹде чәтьнайа ԝе бәрдьлийе бьдьнә ԝә. Паԝлосе шанди дәрһәԛа достед хԝә гот, кӧ «нава һʹәму тәʹли у тәнгийада» әԝана сәва ԝи бунә канийа бәрдьлийе у һеланкьрьне (Колоси 4:11; 1 Тʹесалоники 3:7).

Дьбәкә тӧ дьфькьри, ле гәло рʹасти әв тьшт бәрдьли у аликʹари дьдьн? Ԝәрен әм һе рʹьнд дина хԝә бьдьнә мәсәла мәрийа, йед кӧ рʹасти чәтьнайа һатьбун у дәрһәԛа кʹижана кӧ мә ида хәбәр дайә. Тӧ жи мина ԝан, дькари бәрдьлийа Хԝәде сәр хԝә тʹәхмин ки. У жь Хәбәра хԝә, Хԝәде мәрʹа дьбежә ԝәки чаԝа кӧ де у бав бәр дьле зарʹед хԝә тен, ӧса жи Әԝ ԝе бәр дьле мәда бе (Ишайа 66:13).