«Отʹобус дькарә дәрбаз бә, ле әԝ хорте Чинайи, на!» Әв гьли Александрайе бьһист, йа кӧ отʹобуседа рʹуньштьбу. Отʹобуса ԝан гәрәке жь синоре ԝәлатәки Амәрикайа Башуре, дәрбази алийе дьн буйа. Александрайе дина хԝә дайе у дит кӧ хорте Чинайи бь зьмане Испани, дькә-накә нькарʹә рʹьнд шьроԝәкә синорванрʹа кӧ чь һатийә сәре ԝи. Александра дьчу сәр щьватед Шәʹдед Йаһоԝайә Чинайи у зьмане ԝи хорти заньбу, ләма жи әԝе хԝәст аликʹарийе бьдә ԝи у хәбәрдана ԝи ԝәлгәрʹинә.

Әԝи хорти гот кӧ әԝ бь ԛануни һатийә ль ԝьр, у ԝәки кʹахас у пʹәред ԝи дьзинә. Пешийе синорван ԝи баԝәр нәдькьр у һәла һе дьфькьри жи ԝәки Александра жи кʹома ԛачахада нә, йед кӧ мәрийа дьфрошьн. Хьлазийе синорван баԝәрийа хԝә ԝи хорте Чинайи ани, ле йәкә әԝ хорт сәва щазакьрьна хԝә гәрәке һьнә пʹәрә бьда, чьмки ԝе дәме кʹахас щәм ԝи тʹӧнә бун. Йазьх ле пʹәре ԝи тʹӧнә бун, ләма жи Аләксандрайе 20$ да ԝи. Әв хорт гәләк жь ԝе рʹази бу у гот ԝәки паше ԝе 20$ зедәтьр пашда бьдә ԝе. Александрайе шьровәкьр кӧ әԝ һивийе нинә хәлатәке жь ԝи бьстинә; әԝе бь шабун аликʹари дьда чьмки дьфькьри ԝәки әԝ тьштәки баш дькә. Александрайе һьнә әʹдәбйәтед сәр һʹимә Кʹьтеба Пироз да ԝи хорти у әԝ һелан кьр тʹәви Шәʹдед Йаһоԝа Кʹьтеба Пироз һин бә.

Бь рʹасти жи дьлгәрмийа чьԛас мәзьн дьдә, чахе әм педьһʹәсьн кӧ һьндава мәрьвед хәриб, мәрʹдани у ԛәнщи дьдьнә кʹьфше. Кьред ԝи щурʹәйи бәлабуйи йә нава мәрьвед жь һʹәму религийа у һәла һе нава ԝан мәрьвада жи, йед кӧ тʹӧ религийакеда ниньн. Ле һуне һазьр бьн аликʹарийе бьдьнә кәсәки? Әв пьрсәкә һәԝас ә, чьмки Иса гот: «Хԝәзи ль дайийа, нә кӧ ль стандийа» (Кʹаред Шандийа 20:35). Зандар жи дьбежьн ԝәки чахе мәрьв тьштәки дьдә, әԝ йәк ԝирʹа кʹар ә. Ԝәрен әм бьньһерʹьн ԝәки кʹара ԝе йәке чьда нә.

Зәлал ә ԝәки чахе мәрьв аликʹарийе дьдә йед дьнена, әԝ хԝәха шабуне дьстинә. Паԝлосе шанди ньвиси кӧ «Хԝәде йе бь дьл у әшԛ дьдә һʹьз дькә». Әԝи хәбәр дьда дәрһәԛа ԝан Мәсиһийа йед кӧ ԛӧрбанед рʹәзәдьли кьрьн, сәва кӧ аликʹарийе бьдьнә баԝәрмәнда йед кӧ дәсттәнг бун (2 Корьнтʹи 8:4; 9:7). Паԝлос нә дьгот кӧ ԝана аликʹари да чьмки ида бәхтәԝар бун. Ле бь рʹасти әԝана бәхтәԝар бун, чьмки карьбун тьштәки жь алийе хԝәда бькьн.

Ль гора леколинәке һатә кʹьфше ԝәки дайин «аликʹарийе дьдә кӧ шанед мәжийед мә рʹьнд бьхәбьтьн, чь кӧ шабуне тинә, итʹбарийе пешда тинә у мә тʹәви мәрийа незик дькә. Әԝ һʹәму тьшт ԝәк рʹонайе йә, кӧ баш һӧкӧм дькә». Леколинәкә дьн жи да кʹьфше кӧ «чахе пʹәра дьди кәсәки, бь ве йәке даһа шабунәкә мәзьн ԛазанщ дьки, нә кӧ ԝи чахи гава пʹәра сәр хԝә хәрщ дьки».

Дьбәк жь бо һʹале хԝә, щарна тӧ нькари гәләк тьшт бьки сәва кәсәки. Ле бь рʹасти һәр кәс дькарә шабуне тʹәхмин кә у бьбә мәрьве кӧ бь дьл-әшԛ дьдә. Чахе тӧ бь ньһерʹандьна рʹаст тьштәки дьди кәсәки, һьнге тӧйе бәр хԝә нәкʹәви жь бо кʹаш у баһе пешкʹеше. Йәк жь Шәʹдед Йаһоԝа, нәширкʹаред ве журналерʹа нәʹмә ньвиси у жь алийе хԝәда һьнә ԛӧрбанед рʹәзәдьли тʹәви нәме шанд кʹидәре кӧ ньвисар бу: «Нава ԝан һʹәму салада мьн нькарьбу сәва ԛӧрбанед Ода Щьвате тьштәк бьда хенщи һәвәк пʹәрә. Йаһоԝа  Хԝәде жь ԝе зедәтьр да мьн. . . . Спас кӧ ԝә мәщал чекьр сәва кӧ әз бькарьбьм әве пешкʹеша бьчʹук ԝәрʹа бьшиньм. Әв шабунәкә мәзьн мьнрʹа тинә».

Дайин нә кӧ пʹәрава гьредайи йә. Бь рʹасти гәләк мәщалед дьн жи һәнә, кӧ чаԝа әм дькарьн дәстԝәкьри бьн.

Кʹьтеба Пироз дьбежә: «Мәрьве рʹәʹм ԛәнщийе ль хԝә дькә, ле мәрьве берʹәʹм хьрабийе ль хԝә дькә» (Мәтʹәлок 11:17). Мәрьве рʹәʹм мәрʹд ә, у әԝ һазьр ә сәва йед дьнена хәм бькә, һьм жи ԝәʹдә у ԛәԝата хԝә сәр ԝан хәрщ кә. Ньһерʹандьна ӧса, нә кӧ тʹәне сәва сьһʹәт-ԛәԝата мә ԝе баш бә, ле һʹәму алийава жийина мәда керһати йә.

Ль гора леколине һатә кʹьфше ԝәки әԝед кӧ бь рʹәзәдьли аликʹарийе дьдьнә йед дьнена һьндьк дьлтәнг дьбьн у тәнгасийа хԝәда һеса тәйах дькьн. Хенщи ԝе йәке жийина ԝан даһа баш дьбә. Дайина мәрʹдани дькарә баш кә һʹале ԝан мәрийа, йед кӧ гьран нәхԝәш ьн, мәсәлә нәхԝәшийа скләроз әнифьрәһ (HIV), демәк әԝ һәйә нәхԝәшийа систәма нәвроложик. Ӧса жи һатә кʹьфше ԝәки мәрьвед ичкәһʹьз йед кӧ ичкә тʹәрькандьнә, у паше аликʹари данә мәрьвед дьн, һьндьк дьлтәнг бунә у ԝанарʹа һеса буйә хәйсәтед хԝәйи хьраб бьтʹәрькиньн.

Ве леколинеда ӧса жи һатьбу готьне ԝәки «чахе мәрьв рʹәʹмти у ԛәнщийе дьдә кʹьфше бь ԝе йәкә әԝ щи наһелә сәва емосийа у фькьред нәрʹаст». Чахе мәрьв тьштәки дьдә, бь ве йәке әԝ стреса хԝә кем дькә у хуна ԝи бьльнд набә, демәк тʹансийона хуне щида нә. Ӧса жи мәрьвед кӧ жьн йан мере хԝә ӧнда кьрьнә, карьбунә нәкʹәвнә депресийе чьмки али мәрьвед дьн кьрьнә.

Дь ве йәкеда әм накʹәвнә шьке. Бь расти жи дайин һʹалә мә баш дькә.

Иса шагьртед хԝәрʹа гот: «Бьдьн, ԝәрʹа ԝе бе дайине, бь пиванәкә тʹьжи һʹәжанди, дәԝьсанди, сәри ԛучʹ ԝе бькьнә пʹеша ԝә. Чьмки бь чь чапе һун бьпивьн, бь ԝе жи ԝәрʹа ԝе бе пиване» (Луԛа 6:38). Чахе тӧ сәва кәсәки тьштәки дьки, һʹьнге мәрьв ԝе даһа рʹазибуна хԝә тәрʹа бьдьнә кʹьфше у ԝе хԝәха жи мәрʹд бьн. Демәк мәрʹдани мәрийа һелан дькә һәврʹа шьхӧлкʹарийе у һәвалтийе бькьн.

Зандаред кӧ дәрһәԛа һәләԛәтийа мәрийа леколин дькьн, дьбежьн ԝәки «әԝ мәрьв йед кӧ тʹьме мәрʹданийе дьдьнә кʹьфше, йед дьнена жи һелан дькьн ԝәки мәрʹд бьн. Бь расти «чахе мәрьв дәрһәԛа ԛәнщи у мәрʹданийа кәсәки дьхунә, әԝ хԝәха жи даһа мәрʹд дьбә». Һʹәсабәкида һатә кʹьфше кӧ «һәр мәрьвәк дь интәрнәтеда дькарә ль сәр сәда мәрьва һӧкӧм кә, рʹасти кʹижани кӧ әԝ ԛә нәһатийә у нас накә». Һәрге бь гьлийед майин бежьн, чахе мәрʹданийе дьди кʹьфше әԝ жь мәрьвәки дәрбази мәрьвед дьн дьбә у ӧса дәрәщәкә баш чедьбә. Ԝәйе бьхԝәста нава мәрьвед ӧсада бьжита? Бәле, һәрге һе зедә мәрьв мәрʹданйе бьдьнә кʹьфшә, һьнгә кʹара ве йәке жи ԝе даһа мәзьн бә.

Мәрʹдани рʹьнд те кʹьфше жь мәсәла ԝәлате Флорида (Амәрика Йәкбуйи). Кʹома Шәʹдед Йаһоԝа  бь рʹәзәдьли аликʹари дьдан авакьрьна ханийада, йед кӧ жь фьртоне һьлшийа бун. Һʹәта кӧ хушк-бьред мә һивийа һащәта бун, сәва кӧ дәстпекьн хани чекьн, ԝана дина хԝә да кӧ сура мала щинарәки һьлшийайи бу. Ләма жи ԝана хԝәст али щинаре бькьн у сура ԝи чекьн. Һьнә ԝәʹдә шунда әв щинар нәʹмә шанд филиала Шәʹдед Йаһоԝайә һʹәмдьнйайерʹа у нәʹмеда ньвиси бу: «Әзе тʹьме ԝан мәрьварʹа спасдар бьм. Мәрьвед ӧса баш, ԛә рʹасти мьн нәһатьнә». Жь бо рʹазибуне әԝи мерьки бь мәрʹданийа хԝә һьнә ԛӧрбан шандьн, ԝәки ча әԝи гот бьдьнә хәбате бона шьхӧлед Шәʹдед Йаһоԝа.

Ль гора леколина зандарийе һатә кʹьфше, кӧ «инсанәт гәрәке нәсәкьнә у бьхәбьтә кӧ аликʹарийе бьдә йед дьнена». Зарʹ гәрәке һин бьн «мәрʹд бьн, һәла һе пешийа ԝе йәке ча әԝана хәбәрдане дәстпекьн». Чьма? Кʹьтеба Пироз щаба ԝе пьрсе дьдә у дьбежә кӧ мәрьв «дьлԛе Хԝәдеда» һатьне әʹфьрандьне у дькарьн хәйсәт-һӧнӧред Хԝәдейи сәрәкә бьдьнә кʹьфше (Дәстпебун 1:27).

Щәм Йаһоԝа Хԝәде Әʹфьрандаре мә гәләк һӧнӧред баш һәнә, ӧса жи мәрʹдани. Әԝи жийин дайә мә у һʹәму тьштед кӧ мәрʹа лазьм ьн сәва бәхтәԝар бьн (Кʹаред Шандийа 14:17; 17:26-28). Әм дькарьн дәрһәԛа Баве хԝәйи әʹзмана у ԛьрара ԝи сәва әʹрде, һе рʹьнд бьзаньбьн. Дь вә йәкеда ԝе али мә бьке Хәбәра ԝи демәк Кʹьтеба Пироз. Әԝ кʹьтеб ӧса жи әʹйан дькә кӧ Хԝәде пʹешкʹешәк дайә мә сәва әм ахьрийеда бәхтәԝар бьн * (1 Йуһʹәнна 4:9, 10). Чаԝа әм пеһʹәсийан Йаһоԝа Хԝәде канийа мәрʹданийе йә у әм дьлԛе ԝида һатьнә әʹфьрандьне. Ләма жи чахә әм мәрʹданийеда чʹәʹв дьдьнә Хԝәде әм сәва хԝә кʹаре дьстиньн у ԛәбулкьрьна Ԝи жи ԛазанщ дькьн (Ибрани 13:16).

Те бира ԝә Александрайе дәрһәԛа кʹижане кӧ дәстпека ве готареда һатьбу готьне? Гәло сәрһатийа ԝе чаԝа хьлаз бу? Әԝ хорте Чинайи йе кӧ тʹәви ве отʹобуседа дьһат, соз дабу ԝе кӧ пʹәра ԝәгәрʹинә. Әԝ хорт текли бу тʹәви һәвалед хԝә йед кӧ дьжитьн ԝи шәһәрида кʹидәре кӧ щийе сәкьнандьна ве отʹобусе бу, у әԝана дәрбера 20$ пашда Александрайерʹа ԝәгәрʹандьн. Хенщи ԝе йәке әԝ хорте Чинайи гӧһ да ширәта Александрайе у дәстпекьр кʹьтеба пироз һин бә. Александра пʹьрʹ ша бу чахе се мәһ шунда ль сәр щьвата мәзьнә Чинайи кӧ Шәʹдед Йаһоԝа дь Перуда дәрбаз дькьрьн, диса жи рʹасти ԝи хорти һат. Сәва кӧ рʹазибуна хԝә бона ԛәнщийа Александрайе бьдә кʹьфше, әԝи хорти, Александра у әԝ мәрьвед кӧ тʹәви ԝе һатьбун, тʹәглифи ресторана хԝә кьр.

Дайин у аликʹари шабунәкә пʹьрʹ мәзьн тинә. Ле һе фәрз әԝ ә, ку чахе тӧ тʹьме ӧса дьки, бь ве йәке тӧ али мәрийа дьки кӧ һе рʹьнд нас бькьн Йаһоԝа Хԝәде, йе кӧ һәйә Канийа һʹәму пʹешкʹешед баш! (Аԛуб 1:17). Бь рʹасти жи дайина ԝи щурʹәйи ләзәтәкә мәзьн тинә