ЛУЙИЗА НЬГӘКИ ХWӘДА ТʹОПАЛ Ә. Чахе әw бьчʹук бу, әw бь нәхwашийа полиомийелит нәхwаш кʹәт. Әв нәхwашийа öса нә, кö зийане дьдә система нервед бәдәне. Чахе әw 16 сали бу, кʹöлфәтәке, щәм кʹижани Луйиза дьхәбьти, готә wе: «Хwәде тә щәза кьрийә бь wе нәхwашийе, чьмки тә гöрʹа дийа хwә нәдькьр у нәʹс буйи». Паши wе йәке wәʹдә дәрбаз бу, ле диса жи, бира Луйизайе нәдьчу кö чаwа әwан гьлийа дьле wе ешандьн.

ЧАХЕ ДАМАРИС ПЕҺʹӘСИЙА КÖ КʹАНСӘР СӘРЕ WЕДА ҺӘЙӘ, һьнге баве wе жь wе пьрси: «Тә чь кьрийә, кö әв йәк һатә сәре тә? Дьбәкә тә тьштәкә гәләк хьраб кьрийә, ләма жи Хwәде тә щәза дькә». Дамарис жь бо wан гьлийе баве хwә, гәләк дьлшкәсти бьбу.

Нава һʹәзар салада мәрьва баwәр дькьрьн, кö нәхwаши щәзакьрьна жь Хwәде йә. Кʹьтеба «Mannеrs and Customs of Biblе Lands», öса дьбежә: «Гәләк мәрьвед һена Исада, баwәр дькьрьн кö «нәхwаши йан жь бо гöне мәрьва те, йан жь бо гöнед мәрьвед wани незик. Демәк әw те щәзакьрьне жь бо wи гöнәйи». Кʹьтеба «Mеdiеval Mеdicinе and thе Plaguе» дьбежә, wәки паши Иса гәләк qьрнә шунда, «һьнә мәрьва баwәр дькьрьн кö Хwәде бәла тинә сәре wан, чьмки wана щәза дькә бона гöнед wан». Wәки öса нә, ле чахе бь милйона мәрьв нав тʹәмамйа Әwрупайе дьмьрьн жь бо бәла qьрна 14-да, әw йәк жь Хwәде бу? Ле дьбәкә әw бәла жь бо бактерийед инфексийон пешда һатьн, чаwа кö медисина готьбу? Һьнә мәрьв дьqәwьмә öса дьфькьрьн: «Гәло Хwәде мәрьва пе нәхwашийа дьдә чәрчьрандьне бона гöнед wан?» a

ШЕWЬР КЬН: Һәрге нәхwәши у тәнгаси щәзакьрьна жь Хwәде нә, ле чьма Кöрʹе wи, демәк Иса мәрьвед нәхwәш qәнщ дькьр? Һәрге нәхwаши жь Хwәде буйа, öса дәрдькʹәт кö Әw, нә йәки һәq у рʹаст ә (Мәтта 4:23, 24). Иса wе тʹö щар мьqабьли Хwәде дәрнәкʹәта. Әwи гот: «Әз һәр гав кьрьнед кö wи хwәш тен, дькьм . . . у Баве чаwа т′әми ль мьн кьрийә әз öса дькьм» (Йуһʹәнна 8:29; 14:31).

Кʹьтеба Пироз дәрһәqа Йаһоwа Хwәде зәлал дьбежә: «Нәһәqи щәм wи т′öнәйә» (Qануна Дöщари 32:4, ПКʹМ). Мәсәлә, Хwәде wе тʹö щар öса нәкә кö тәйарә бькʹәвә qәзийе, у кö öса гәләк мәрьвед нәнәһәq бьмьрьн! Дәрһәqа рʹастийа Хwәде, Бьраһим пʹехәмбәр у qöльхкʹаре Хwәдейи амьн жи гот, кö әwе «т′әви нәqәнща . . . р′аста» нәкöжә (Дәстпебун 18:23, 25, ПКʹМ). Кʹьтеба Пироз öса жи дьбежә, wәки набә «кö Хwәде хәрабийе бькә у Йе кö һеза wи тʹера һәр тьшти дькә, нәһәqийе пек бинә!» (Ибо 34:10-12).

Тәʹли-тәнгийед кö рʹасти мә тен, щәзакьрьна жь Хwәде ниньн, бона һьнә гöнед мә. Иса хwәха зәлал әв йәк да кʹьфше, чахе әwи у шагьртед wи дитьн мәрьве кö жь зькмакийеда кор бу. Һьнге «шагьртед wи же пьрсин: «Дәрсдар, гöне к′е йә кö әв мәрьва кор жь дийа хwә буйә? Гöне wи йә, йан йе де у баве wи?» Иса ль wан вәгәр′анд у гот: «Нә гöне wи йә, нә жи йе де у баве wи, ле әв йәк аһа буйә, wәки кьред Хwәде ль сәр wи бенә ә′йанкьрьне›»(Йуһʹәнна 9:1-3).

Дьqәwьмә шагьртед Иса гәләк әʹщебмайи ман, гава Иса гот кö нә әв мәрьве кор, нә жи де-баве wи гöнә нәкьрьбун, кö әw öса һатийә буйине. Фькьра бона щәзакьрьне, wан чаха бәлабуйи бу.  Иса нә кö тʹәне әw мәрьв qәнщ кьр, ле бь wе йәке әwи öса жи wанарʹа зәлал кьр, кö Хwәде мәрийа щәза накә бь нәхwашийед гьран (Йуһʹәнна 9:6, 7). Әwед кö иро бь нәхwашийед гьран нәхwаш ьн, дькарьн бәрдьлийе бьвиньн чахе пебьһʹәсьн кö Хwәде сәбәбе тәʹли-тәнгийед мә нинә.

Әw Рʹезед Кʹьтеба Пироз мә qәwи дькьн

• «Хwәде хьрабийада найе щер′ьбандьне у нә жи йәки дьщер′ьбинә» (АQУБ 1:13). Бь рʹасти жи «тьштед хьраб», чь кö нава гәләк qьрнада тенә сәре мәрийа, мәсәлә нәхwаши, еш у мьрьн wе зутьрәке бенә һьлдане.

• Иса Мәсиһ «һ′әму нәхwәш qәнщ кьрьн» (МӘТТА 8:16). Иса һʹәму мәрийа qәнщ дькьр, йед кö дьһатьнә щәм wи, öса Әw да кʹьфше кö Пʹадшатийа Хwәде wе ль сәр тʹәмамийа дьнйайе чь бькә.

• «Әwе [Хwәде] жь ч′ә′вед wан һ′әму һесьред wан паqьж кә у иди мьрьне т′öнәбә, нә шин, нә гьри, нә еш-ешук, чьмки тьштед бәре дәрбаз бун» (ӘʹЙАНТИ 21:3-5).

Гәло чьма инсанәт һаqас дьчәрчьрә у еше дькʹьшинә? Нава тʹәрихийа инсанәтеда, һәта ньһа гәләк мәрьв әве пьрсе дьдьн. Демәк мә фәʹм кьр кö Хwәде сәбәбе тәʹли-тәнгийед мә нинә. Ле wәки öса нә, кʹи йә сәбәб? Щаба wан пьрса готара дьнда wе бе шеwьркьрьне.