1-2. Чьрʹа һәр сал әм дьчьн сәр Евара Биранине?

 ԜӘКӘ 2 000 сал пешда, Иса Мәсиһ бона һʹалхԝәшийа мә әʹмьре хԝә ԛӧрбан кьр, у бь ве йәке рʹийа жийина һʹәта-һʹәтайе бона мә вәкьр. Шәва пешийа мьрьна хԝә, Иса Мәсиһ нишани шагьртед хԝә кьр, ԝәки әԝана гәрәке чаԝа бь нан у шәраве, ԛӧрбанбуна ԝи биньн бира хԝә (1 Корьнтʹи 11:23-26).

² Әм гӧһ дьдьнә ве тʹәмийа Иса, чьмки әм ԝи гәләк һʹьз дькьн (Йуһʹәнна 14:15). Һәр сал ԝәʹде Биранина мьрьна Иса, әм дьхԝазьн шекьрдарийа хԝә нишан кьн. Ләма жи әм дӧа дькьн у кʹур дьфькьрьн, ԝәки ԛӧрбанбуна ԝи бона мәрийа чь те һʹәсабе. Һьм жи чь кӧ жь дәсте мә те әм дькьн, сәва кӧ һʹәму мәрьва тʹәглифи сәр ве щьвина мәхсус кьн. Һәмьки әме изьне нәдьн ԝәки тьштәк рʹийа мә бьгьрә у бьбә мәʹни, кӧ әм нәчьн сәр Евара Биранине.

3. Ве готареда, әме дина хԝә бьдьнә чь?

³ Ве готареда әме бьвиньн кӧ хьзмәткʹаред Йаһоԝа чаԝа хирәт дькьн, ԝәки (1) Евара Биранине ль гора рʹебәрийа Иса дәрбаз кьн, (2) мәрьва тʹәглифи сәр Евара Биранине кьн у (3) нава чәтьнайада жи Евара Биранине дәрбаз кьн.

4. Һәр сал ԝәʹде Евара Биранине, әм щаба кʹижан пьрса дьстиньн, у чьма әм гәрәке ван рʹастийед Кʹьтеба Пироз гәләк ԛимәт кьн? (Луԛа 22:19, 20)

⁴ Һәр сал ԝәʹде Евара Биранине, әм гӧһ дьдьнә готарәке, кӧ ль сәр һʹиме Кʹьтеба Пироз ә, у зәлал щаба чәнд  пьрсед фәрз дьдә. Әм педьһʹәсьн кӧ мәрьв чьма һʹәԝще ԛӧрбане нә у мьрьна мәрьвәки чаԝа дькарә һәԛе гӧнед гәләка бьдә. Әв готар тинә бира мә, кӧ мәʹна нан у шәраве чь йә у кʹи гәрәке симбола бьхԝә у вәхԝә (Бьхунә Луԛа 22:19, 20). У әм дәрһәԛа ԝан кʹәрәмед ахьрийе дьфькьрьн, йед кӧ әԝ мәрьв ԝе бьстиньн, һевийа кʹижана жийина һʹәта-һʹәтайе сәр әʹрде йә (Ишайа 35:5, 6; 65:17, 21-23). Әм гәрәке ԝан рʹастийед Кʹьтеба Пироз гәләк ԛимәт кьн. Бь милйарда мәрьв ван рʹастийа фәʹм накьн у ньзаньн кӧ ԛӧрбана Иса чьԛас ԛимәт ә. Ӧса жи әԝана Биранина Мьрьна Иса Мәсиһ ль гора рʹебәрийа ԝи дәрбаз накьн. Гәло чьма?

5. Паши мьрьна һʹәчʹи зәʹф шандийа, чь ԛәԝьми?

⁵ Зутьрәке паши ԝе йәке чахе һʹәчʹи зәʹф шандийед Иса мьрьн, Мәсиһийед ԛәлп кʹәтьн нав щьвате (Мәтта 13:24-27, 37-39). Әԝана «тьштед хельф» хәбәр дьдан, сәва кӧ «шагьрта пәй хԝә бьбьн» (Кʹаред Шандийа 20:29, 30). Мәсәлә, әԝ Мәсиһийед ԛәлп дьготьн, кӧ жь бо бахшандьна гӧнед мәрьва, бәс нинә кӧ бәдәна Иса Мәсиһ «щарәке бона гӧнәһьлдана гәләка» ча ԛӧрбан бе дайине. Ԝана дьгот кӧ ԛӧрбанбуна Иса диса у диса гәрәке бе дайине (Ибрани 9:27, 28). Иро жи гәләк мәрьв баԝәрийа хԝә ве һинкьрьна ԛәлп тиньн. Әԝана һәр һʹәфте, йан жи щарна һәр рʹож дереда тʹоп дьбьн, сәва кӧ ԛӧрбанбуна Иса Мәсиһ дәрбаз кьн. b Ле һьнә деред дьнда, мьрьна Иса Мәсиһ дьһа кем дәрбаз дькьн, у һʹәчʹи зәʹф жь ԝана зәлал фәʹм накьн, ԝәки ԛӧрбанбуна Иса Мәсиһ чь те һʹәсабе. Дьбәкә һьнә мәрьв жь хԝә дьпьрсьн: «Гәло мьрьна Иса бь рʹасти те һʹәсабе, кӧ гӧнед мә дькарьн бенә бахшандьне?» Гәло чьма әԝана әве пьрсе дьдьн? Мәʹник әв ә, кӧ әԝана дькʹәвьн бәр байе ԝан мәрийа, йед кӧ дӧдьли дьбьн, ԝәки бь сайа ԛӧрбанбуна Иса бь рʹасти гӧнед мәрьва дькарьн бенә бахшандьне. Гәло Мәсиһийед рʹаст чаԝа али мәрьва дькьн, ԝәки әԝана мәʹна Евара Биранине фәʹм бькьн у әве щәжьне рʹаст дәрбаз кьн?

6. Сала 1872-да кʹома леколинкʹаред Кʹьтеба Пироз чь фәʹм кьр?

⁶ Сала 1870-да, кʹомәкә леколинкʹаред Кʹьтеба Пироз, бьн рʹебәрийа Чарлз Расселда, дәстпекьр Ньвисаред Пироз кʹур леколин кә. Ԝана дьхԝәст фәʹм бькьн, кӧ ԛимәта ԛӧрбанбуна Иса Мәсиһ бь рʹасти чьда йә у биранина мьрьна ԝи гәрәке чаԝа дәрбаз кьн. Сала 1872-да, бь сайа леколина Кʹьтеба Пироз ԝана фәʹм кьр, кӧ Иса Мәсиһ әʹмьре хԝә бона һʹәму мәрьва ча ԛӧрбан да. Ԝана әв рʹасти вәнәдьшарт, ле бь сайа кʹьтеба, рʹожнәʹма у журнала бәла дькьрьн. У ԝәʹдә шунда, мина Мәсиһийед пешьн, ԝана дәстпекьр Евара Биранине сале щарәке дәрбаз кьн.

7. Әм жь шьхӧле леколинкʹаред Кʹьтеба Пироз чь кʹаре дьстиньн?

⁷ Һʹәта рʹожа иро, әм жь леколина ԝан меред амьн кʹарәкә гәләк мәзьн дьстиньн. Йаһоԝа ча бежи чʹәʹве мә вәкьр, кӧ әм мәʹна ԛӧрбанбуна Иса Мәсиһ һе рʹьнд фәʹм кьн у бьзаньбьн кӧ әв чь кʹаре мәрʹа тинә (1 Йуһʹәнна 2:1, 2). Ӧса жи мә фәʹм кьрийә, кӧ Кʹьтеба Пироз дӧ һеви дьдә мәрьвед амьн. Демәк һьнә кәс ԝе ль әʹзмана бьжин, ле бь милйона мәрьвед дьн ԝе һʹәта-һʹәтайе ль сәр әʹрде бьжин. Гава әм дьфькьрьн кӧ Йаһоԝа  чьԛас мә һʹьз дькә у кʹара ԛӧрбанбуна Иса Мәсиһ сәва мә чь йә, әм дьһа незики Йаһоԝа дьбьн (1 Пәтрус 3:18; 1 Йуһʹәнна 4:9). Мина хушк-бьред амьн йед ԝәʹде бәре, әм жи мәрьва тʹәглиф дькьн кӧ тʹәви мә Евара Биранине дәрбаз кьн, чаԝа кӧ Иса Мәсиһ тʹәми дабу шагьртед хԝә.

8. Гәло хьзмәткʹаред Йаһоԝа чь кьрьнә, кӧ мәрьва тʹәглифи сәр Евара Биранине бькьн? (Бьньһерʹә шькьл.)

⁸ Нава гәләк салада, хьзмәткʹаред Йаһоԝа мәрьва тʹәглифи сәр Евара Биранине дькьн. Сала 1881-да, хушк-бьред жь Дәԝләтед Йәкбуйи һатьнә тʹәглифкьрьне сәр щьватәкә мәхсус, мала бьраки ль бажаре Алегейни (Пәнсилванйа). Зутьрәке һәр щьватәке Евара Биранине ида хԝәха дәрбаз дькьр. Мәһа Гӧлане, сала 1940-да, мьзгинванарʹа готьн, кӧ әԝана дькарьн һʹәмуйа тʹәглиф кьн, йед кӧ дьхԝазьн һе зедә пебьһʹәсьн. Сала 1960-да щара пешьн, Бәйтʹәле щьватарʹа тʹәглифед нәшьркьри бона бәлакьрьне шанд. Һьнгева бь милйарда тʹәглифед сәр Евара Биранине һатьнә бәлакьрьне. Гәло әм чьма һаԛас ԛәԝат у ԝәʹде хԝә хәрщ дькьн, сәва кӧ мәрийа тʹәглиф кьн?

9-10. Әм кʹе тʹәглифи сәр Евара Биранине дькьн? (Йуһʹәнна 3:16)

⁹ Хԝәстьна мә әв ә, ԝәки мәрьвед кӧ щара пешьн тенә сәр Евара Биранине, пебьһʹәсьн ԝәки Йаһоԝа у Иса Мәсиһ бона мә чь кьрьнә (Бьхунә Йуһʹәнна 3:16). Әм һевидар ьн, ԝәки тьштед кӧ әԝана ԝедәре бьвиньн у бьбьһен ԝе дьле ԝан бьгьрә у әԝана ԝе бьхԝазьн һе зедә һин бьн у бьбьнә хьзмәткʹаред Йаһоԝа.

 ¹⁰ Әм ӧса жи ԝан мәрийа тʹәглифи сәр Евара Биранине дькьн, йед кӧ ида Йаһоԝарʹа хьзмәт накьн. Әм әве йәке дькьн, сәва кӧ биньнә бира ԝан, ԝәки Йаһоԝа диса жи ԝана һʹьз дькә. Гәләк жь ԝан тенә сәр Евара Биранине, у әм һатьна ԝанрʹа гәләк ша дьбьн. Биранин тинә бира ԝан, кӧ чахе ԝана Йаһоԝарʹа хьзмәт дькьр, жийина ԝан чьԛас хԝәш бу. Ԝәрен әм дина хԝә бьдьнә сәрһатийа хушка мә Моникайе. c Ԝәʹде пандемийа COVID-19 әԝе диса хьзмәтийа хԝә дәстпекьр. Паши Евара Биранине, сала 2021-да, әԝе ӧса гот: «Әв Евара Биранине гәләк дьле мьн гьрт. Паши 20 сала мьн диса хьзмәтийа хԝә дәстпекьр у мәрьва тʹәглифи сәр Евара Биранине дькьр. Мьн әв йәк бь дьл у щан дькьр, чьмки әз гәләк жь Йаһоԝа у Иса Мәсиһ рʹази мә, сәва тьштед кӧ ԝана бона мьн кьрийә» (Зәбур 103:1-4). Фьрԛи тʹӧнә мәрьв ԝе әве тʹәглифе ԛәбул кьн йан на, әм диса жи бь хирәт ԝана тʹәглифи сәр Евара Биранине дькьн. Йа лапә фәрз әԝ ә, кӧ Йаһоԝа хирәт у щәфе мә ԛимәт дькә.

11. Йаһоԝа чаԝа хирәта мә кʹәрәм кьрийә? (Һагай 2:7)

¹¹ Йаһоԝа хирәта мә кӧ әм мәрийа тʹәглифи сәр Евара Биранине дькьн, кʹәрәм кьрийә. Сала 2021-да жь бо пандемийа COVID-19 һьнә ԛәдәхәкьрьн һатьбун кьрьне, ле йәкә 21 367 603 кәс һатьн сәр Евара Биранине. Тʹәрихийеда әв һʹәсабәки лапә бьльнд бу у ԝәкә дӧ щар у нива жь һәжмара Шәʹдед Йаһоԝа зедәтьр ә! Һәмьки бона Йаһоԝа нә кӧ һәжмара мәрьва фәрз ә, ле һәр мәрьвәк кӧ те сәр Евара Биранине (Луԛа 15:7; 1 Тимотʹейо 2:3, 4). Әм баԝәр ьн, кӧ бь сайа ви шьхӧли кӧ әм мәрийа тʹәглиф дькьн, Йаһоԝа али мә дькә кӧ мәрьвед дьлсах бьвиньн (Бьхунә Һагай 2:7).

12. Чь чәтьнайи дькарьн рʹийа мә бьгьрьн, ԝәки әм Евара Биранине дәрбаз нәкьн? (Бьньһерʹә шькьл.)

¹² Иса Мәсиһ пʹехәмбәрти кьрьбу, кӧ рʹожед ахьрийеда, әме рʹасти щурʹә-щурʹә чәтьнайа бен. Мәсәлә, пәйкʹәтьн алийе малбәтеда, зерандьн, шәрʹ, нәхԝәшийед гьран у гәләк тьштед дьн (Мәтта 10:36; Марԛос 13:9; Луԛа 21:10, 11). Щарна, дьбәкә жь бо ԝан мәʹнийа мәрʹа чәтьн бә бенә сәр Евара Биранине. Гәло, хушк-бьред мә, нава ԝан тәнгасийада чь кьрьнә у Йаһоԝа чаԝа али ԝан кьрийә?

13. Йаһоԝа чаԝа мерхаси у хирәта Артйом кʹәрәм кьр?

¹³ Гьртьна хушк-бьра. Хушк-бьред мә, йед кӧ сәва баԝәрийа хԝә дькʹәвьнә кәле, һәр тьшти дькьн сәва кӧ Евара Биранине дәрбаз кьн. Ԝәрен әм дина хԝә бьдьнә сәрһатийа бьре мә Артйом. Ԝәʹде Евара Биранине сала 2020-да, бьре мә тʹәви чар мәрьвед дьн кәледа щики гәләк бьчʹукда рʹуньштьбу. Диса жи әԝи мәщал дит, ԝәки симболед бона Евара Биранине дәст хә у готаре һазьр кә. Ле гьртийед дьн кӧ тʹәви ԝи бун, щьхарә дькʹьшандьн у тʹьме хәбәрдана хԝәда чʹерʹ дьданә хәбате. Гәло Артйом чь кьр? Әԝи жь ԝана рʹәща кьр, ԝәки ԝәʹде Биранине һʹәма сьһʹәтәке щьхаре нәкʹьшиньн у чʹерʹа нәкьн. Артйом әʹщебмайи ма кӧ ԝана әв йәк ԛәбул кьр. Әԝ дьбежә: «Мьн жь ԝан пьрси: ‹Һун дьхԝазьн һьнә тьшта дәрһәԛа Биранине пебьһʹәсьн?›» Пешийе ԝана нәдьхԝәст, ле чахе ԝана дит кӧ Артйом чаԝа Биранин дәрбаз кьр, ԝана гәләк пьрс данә ԝи.

14. Ԝәʹде пандемийа COVID-19, чь һатә кьрьне, сәва кӧ Евара Биранине бе дәрбазкьрьне?

 ¹⁴ Пандемийа COVID-19. Чахе пандемийа коронавирусе дәстпебу, Шәʹдед Йаһоԝа нькарьбун сәр Евара Биранине тʹәвайи тʹоп бьн. Ле диса жи әве йәке рʹийа ԝан нәгьрт, кӧ Биранине дәрбаз кьн. d Ԝан щийа кʹидәре кӧ интернет һәбу, Евара Биранине пе видео-конференсийайе дәрбаз дьбу. Ле гәло әԝ мәрьв интернета кʹижана тʹӧнә бу, чаԝа Биранин дәрбаз кьрьн? Һьнә ԝәлатада бьред мә хәм кьрьн, ԝәки хушк-бьред мә бькарьбьн готара Биранине бь сайа телевизийоне бьньһерʹьн, йан жи бь радиойе бьбьһен. Хенщи ве йәке, әв готар сәр 500 зьмана зедәтьр һатә хԝәндьне. Бьред мәйи дәлал видеойа готаре шандьн щийед дур, ԝәки ԝедәре жи хушк-бьред мә бькарьбьн Биранине дәрбаз кьн.

15. Мәсәла Сйуйе чь мә һин дькә?

¹⁵ Пәйкʹәтьн алийе малбәтеда. Бона һьнә мәрьвед кӧ дьхԝазьн Биранине  дәрбаз кьн, тәнгасийа һәри мәзьн әв һәйә пәйкʹәтьн алийе малбәта ԝанда. Дина хԝә бьдә сәрһатийа хԝәндәкʹарәке бь наве Сйу. Сала 2021-да, рʹожәк пешийа Биранине, Сйуйе готә ԝе хушке йа кӧ тʹәви ԝе һинбуна Кʹьтеба Пироз дәрбаз дькьр, ԝәки жь бо пәйкʹәтьна алийе малбәтеда, әԝе нькарьбә бе сәр Биранине. Хушка мә ԝерʹа Луԛа 22:44 хԝәнд. Паше әԝе Сйуйерʹа гот, кӧ гава әм рʹасти пәйкʹәтьна тен, әм гәрәке чʹәʹв бьдьнә Иса Мәсиһ, Йаһоԝарʹа дӧа бькьн у баԝәрийа хԝә ԝи биньн. Рʹожа дьн, Сйуйе хԝәрʹа симболед бона Биранине һазьр кьр у сәр jw.org бәрнама Шеԝьркьрьна Кʹьтеба Пирозә Шәбәԛе ньһерʹи. Еваре, чахе әԝ отʹаха хԝәда тʹәне бу, әԝе бь сайа тʹеле гӧһ дабу готара Евара Биранине. Паши ԝе йәке, әԝе хушка мәрʹа ӧса ньвиси, йа кӧ тʹәви ԝе һинбуна Кʹьтеба Пироз дәрбаз дькьр: «Тә дӧһӧ дьле мьн гәләк ԛәԝи кьр. Һәр тьшт чь кӧ жь дәсте мьн һат мьн кьр, ԝәки бькарьбьм гӧһ бьдьмә готара Евара Биранине, у Йаһоԝа ве йәкеда али мьн кьр. Әз беһʹәсаб бәхтәԝар ьм у Йаһоԝарʹа рʹази мә!» Ле чахе тӧ рʹасти дәрәщед ви щурʹәйи тейи, тӧ баԝәр дьки, ԝәки Йаһоԝа ԝе али тә жи бькә?

16. Чьма әм дькарьн баԝәр бьн, кӧ Йаһоԝа ԝе хирәта мә кӧ Биранине дәрбаз кьн, кʹәрәм кә? (Рʹомайи 8:31, 32)

¹⁶ Йаһоԝа хирәта мә ԛимәт дькә, йа кӧ әм дьдьнә кʹьфше бона дәрбазкьрьна Биранина Мьрьна Иса Мәсиһ. Һәрге әм рʹазибуна хԝә бона тьштед кӧ Йаһоԝа сәва мә кьрийә, бьдьнә кʹьфше, әԝе мә кʹәрәм кә (Бьхунә Рʹомайи 8:31, 32). Чь жи һәбә, әм дьхԝазьн исал жи бенә сәр Биранине. Һьм жи әм дьхԝазьн, ԝәки һʹәфтийед пешийа у паши Евара Биранине, һе зедә хьзмәт кьн.