На, мәʹнийа ве рʹезе нә әв ә. Әв рʹез бәʹса ван кәса дькә, йед кӧ сәва тәнгасийе дькʹәвьн, ле паше диса рʹадьбьн, демәк тен сәр хԝә.

Рʹезед бәре у паши ве рʹезе ӧса дьбежьн: «Һәй нәпʹако! Хԝә ль мала рʹастада нәтәлинә у һеԝаргәһа ԝи ԝеран нәкә, чьмки, һәгәр йе рʹаст һʹәфт щара бькʹәвә, ԝе диса рʹабә, ле нәпʹаке хьрабийеда сәрсери бен. Гава дьжмьне тә бькʹәвә ша нәбә у гава ньге ԝи бьлькʹӧмә, дьле хԝә ԝи ша нәкә» (Мәтʹлк. 24:15-17).

Һьнә кәс дьфькьрьн кӧ рʹеза 16 бәʹса ван кәса дькә, йед кӧ гӧнә дькьн ле паше тʹобә дькьн. Мәсәлә, дӧ кʹәшишед дере ньвисийә кӧ әв рʹез жь алийе гәләк кәсава ӧса те зәлал кьрьн. Ль гора ве ньһерʹандьне, мәрьв һәр чь бькә жи, әԝ һʹьзкьрьна Хԝәде тʹӧ щара ӧнда накә, ле һәр тʹьм дькарә тʹобә бькә у диса рʹабә. Әв фькьр дькарә ль кәсед кӧ нахԝазьн гӧнед хԝә тʹобә бькьн, хԝәш бе. Әԝ бәлки дьфькьрьн кӧ әԝ һәр чьԛас гӧнә бькьн жи, Хԝәде ԝе ԝан һәр тʹьм әʹфу бькә.

Ле бәле, мәʹнийа рʹеза 16 нә әв ә.

Хәбәра Ибрани, йа кӧ ль рʹезед 16 у 17 ԝәк «кʹәтьн» һатийә ԝәлгәрʹандьн, дькарә бь щурʹә-щурʹә аԝайа бе хәбьтандьн. Әв хәбәр дькарә бе һʹәсабе кʹәтьна рʹастә-рʹаст, мәсәлә гава кәсәк жь сәрханийе хԝә дькʹәвә, йан кәвьрәк дькʹәвә әʹрде (Ԛан. Дщр. 22:4, 8; Амс. 9:9). Әв хәбәр бь аԝайәки симболик жи дькарә бе хәбьтандьн, ԝәк ль ве рʹезе: «Хӧдан гавед ԝи мәрьви дьшьдинә рʹийа кʹижани әԝ бәгәм дькә. Һәгәр әԝ бьлькʹӧмә, ԝе нәкʹәвә, чьмки Хӧдане дәсте ԝи бьгьрә» (Зәб. 37:23, 24; Мәтʹлк. 11:5; 13:17; 17:20).

Ле бәле, Професор Едԝард Пламптр ӧса дьбежә: «Хәбәра Ибрани, йа кӧ ԝәк [«кʹәтьн»] те ԝәлгәрʹандьн, тʹӧ щара жь бо гӧнә найе хәбьтандьне». Ләма, зандарәки дьн мәʹнийа рʹеза 16 ӧса зәлал дькә: «Һәгәр кәсәк хьзмәткʹаред Хԝәдерʹа хьрабийе бькә жи, әԝана һәр тʹьм ль сәр пʹийа дьминьн, ле бәле кәсед хьраб ль сәр пʹийа наминьн!»

Бәле, Мәтʹәлок 24:16 бәʹса кәсед кӧ гӧнә дькьн накә, ле бәʹса ван кәса дькә, йед кӧ диса у диса рʹасти чәтьнайа тен. Ль ве дьнйайа хьраб, кәсед рʹаст жи дькарьн нәхԝәш бькʹәвьн йан рʹасти хәмед дьн бен. Ӧса жи, әԝ дькарьн жь алийе дәԝләтева рʹасти зӧльм у зордарийе бен. Диса жи, әԝ дькарьн баԝәр бьн кӧ Хԝәде ԝе пьштгьрийа ԝан бькә у али ԝан бькә кӧ әԝ сәбьр бькьн у сәркʹәти бьбьн. Кʹа бьфькьрә кӧ тә чьԛас щар дитийә кӧ һʹале хьзмәткʹаред Хԝәде ахьрийеда баш дьбә. Бәле, әм дькарьн баԝәр бьн кӧ «Хӧдан дәст давежә һʹәму кʹәтийа у йе тәԝийайи дьдә сәкьнандьне» (Зәб. 41:1-3; 145:14-19).

«Кәсе рʹаст» ша набә чахе кәсед дьн рʹасти проблема тен, ле әԝ дьлрʹьһʹәт дьбә, чьмки Хԝәде пьштгьрийа хьзмәткʹаред хԝә дькә (Ԝаиз 8:11-13; Иб. 31:3-6; Зәб. 27:5, 6).