1. Мире-щьна ча мина нечʹирванәки йә?

НЕТА нечʹирван әв ә кӧ һʹәйԝана бьгьрә йан жи бькӧжә. Чаԝа кӧ Кʹьтеба Пироз жи нишан дькә, нечʹирван щурʹә-щурʹә тʹәлька дьдә хәбате кӧ бьгьһижә нета хԝә (Ибо 18:8-10). Гәло нечʹирван чь дькә кӧ һʹәйԝанәки бькә тʹәльке? Йа пешьн, әԝ дина хԝә дьдә ве һʹәйԝане. Мәсәлә, һʹәйԝан кʹӧда дьчә? Әԝ чь һʹьз дькә? Әԝ чаԝа дькарә ньшкева бе гьртьн? Мире-щьна мина ви нечʹирвани йә. Әԝ жи дина хԝә дьдә мә у мә леколин дькә. Әԝ дьвинә кӧ әм кʹӧда дьчьн у чь һʹьз дькьн. Паше, әԝ тʹәлькәке датинә у һивийе дьсәкьнә кӧ әм бькʹәвьн ве тʹәльке. Ле Кʹьтеба Пироз дьбежә кӧ һәгәр әм бен гьртьн жи, әм дькарьн хԝә хьлаз кьн. Ӧса жи, Кʹьтеба Пироз мә һин дькә кӧ әм ча дькарьн хԝә жь ван тʹәлька дур бьгьрьн.

2. Дӧ тʹәлькед ԛәԝи йед Мире-щьна чь нә?

² Нав тʹәлькед Мире-щьнада, ԛӧрʹәти у тьмайи * дӧ  тʹәлькед лапи ԛәԝи нә. Бь һʹәзара сала, Мире-щьна әв һʹӧнӧред хьраб дьдә хәбате. Әԝ мина нечʹирванәки йә кӧ чʹьвика бь сайа тʹәлька йан тʹорʹәке дьгьрә (Зәбур 91:3). Ле әм дькарьн хԝә жь ван тʹәлька бьпарезьн, чьмки Йаһоԝа мәрʹа методед Мире-щьна әшкәрә кьрийә (2 Корьнтʹи 2:11).

3. Чь дькарә али мә бькә кӧ әм жь тʹәлькед Мире-щьна хьлаз бьн йан жи хԝә дур бьгьрьн?

³ Бь сайа сәрһатийед кәсед дьн, Йаһоԝа мә дәрһәԛа  ԛӧрʹәти у тьмайе һʹьшйар дькә у ширәт дькә. Жь сәрһатийед кӧ әме шеԝьр кьн, әме бьвиньн ԝәки Мире-щьна һьнә хьзмәткʹаред Йаһоԝа йед гьһишти жи кьрийә тʹәльке. Гәло әв йәк те һʹәсабе кӧ әм нькарьн жь ве йәке бьрʹәвьн? Әм дькарьн. Йаһоԝа сәрһатийед ԝан мәрьва Кʹьтеба Пирозда бона мә «чаԝа ширәт» данә ньвисаре (1 Корьнтʹи 10:11). Йаһоԝа занә кӧ әм дькарьн жь сәрһатийед бәре дәрса бьстиньн у бь ве йәке жь тʹәлькед Мире-щьна хьлаз бьн йан жи хԝә дур бьгьрьн.

4. Ԛӧрʹәти бәрбь чь дьбә?

⁴ Мире-щьна дьхԝазә кӧ ԛӧрʹәти бькʹәвә дьле мә. Әԝ занә кӧ һәгәр әм мина ԝи ԛӧрʹә бьн, әме нькарьбьн жийина һәрһәйи бьстиньн (Мәтʹәлок 16:18). Ләма жи, Паԝлосе шанди гот кӧ кәсе ԛӧрʹә ԝе мина Мире-щьна бе диԝанкьрьне (1 Тимотʹейо 3:6, 7). Фьрԛи тʹӧнә кӧ әм тʹәзә һатьнә сәр рʹийа рʹастийе йан ида гәләк сал ә әм Йаһоԝарʹа хьзмәт дькьн, лазьм ә кӧ әм гьшк һаш жь хԝә һәбьн ԝәки нәкʹәвьн ве тʹәльке.

5. Ль гора Ԝаиз 7:16, 20, гәрәке әм чь нәкьн?

⁵ Мәрьвед ԛӧрʹә һәри зедә хԝә һʹьз дькьн. Мире-щьна дьхԝазә кӧ әм һәри зедә нә кӧ Йаһоԝа, ле хԝә һʹьз бькьн – илаһи гава әм рʹасти тәнгасийа тен. Мәсәлә, гәло ԛә бӧхдан авитьнә тә? Гәло тӧ ԛәт рʹасти нәһәԛийе һатьбуйи? Мире-щьна дьхԝазә кӧ тӧ сәва тьштед ӧса Йаһоԝа йан хушк у бьра нәһәԛ бьки у һерс кʹәви. Ӧса жи, Мире-щьна дьхԝазә кӧ тӧ бьфькьри ԝәки лазьм ә тӧ ве проблеме нә ль гора рʹебәрийа Кʹьтеба Пироз, ле ль гора аԛле хԝә сафи ки (Ԝаиз 7:16, 20 бьхунә).

6. Тӧ жь сәрһатийа хушка жь Нидерланде чь һин буйи?

⁶ Дина хԝә бьдьн сәрһатийа хушкәкә мә, жь Нидерланде. Әԝ сәва кемасийед һьнә хушк у бьра һерс дькʹәт, у хԝә жь ԝана дур дьгьрт. Әԝ дьбежә: «Мьн хԝә тʹәне тʹәхмин дькьр, у мьн нькарьбу  бьбахшанда ԝан. Ләма жи, мьн мере хԝәрʹа гот кӧ әм дәрбази щьватәкә дьн бьн». Ле паше, әԝе бәрнама JW Бродкастинге йа мәһа Адаре 2016, ньһерʹи, йа кӧ нишан дькьр ԝәки гәрәке әм сәр кемасийед кәсед дьн ча бьньһерʹьн. Хушка мә ӧса дьбежә: «Дәԝса кӧ хушк у бьра бьгӧһезьм, мьн фәʹм кьр кӧ гәрәке әз бь һʹәлали у мьлукти сәр шашийед хԝә бьхәбьтьм. Ве бәрнаме али мьн кьр кӧ әз жь һәр тьшти зедәтьр дина хԝә бьдьм Йаһоԝа у сәрԝертийа ԝи». Бәле, гава тӧ рʹасти тәнгасийа тейи, дина хԝә бьдә Йаһоԝа. Әԝ шашийед мәрьва дьвинә, ле диса жи һазьр ә кӧ бьбахшинә ԝан. Ләма, жь Йаһоԝа аликʹарийе бьхԝазә кӧ тӧ жи бькарьби ӧса бьки (1 Йуһʹәнна 4:20).

7. Чь һат сәре Узийа Пʹадша?

⁷ Узийа Пʹадша сәва ԛӧрʹәтийе, ширәт ԛәбул нәкьр у мьԛабьли Йаһоԝа рʹабу. Бь әʹсле хԝә, Узийа мәрьвәки гәләк аԛьл у сәрхԝә бу. Әԝ шәрʹада сәркʹәти бу, әԝи гәләк бажар ава кьрьн у әԝи ише щоткʹарийе пешда дьбьр. Бәле, «Хԝәде кʹаре ԝи сәрфьраз кьр» (2 Дирок 26:3-7, 10). Ле Кʹьтеба Пироз дьбежә ԝәхта кӧ әԝ бу йәки ԛәԝи, ԛӧрʹәти кʹәтә дьле ԝи. Ль гора ԛануна Йаһоԝа, тʹәне кʹаһина дькарьбун пʹарьстгәһеда бьхуре бьшәԝьтиньн. Ле Узийа Пʹадша диса жи ль гора хԝәстьна хԝә кʹәтә пʹарьстгәһе кӧ бьхуре бьшәԝьтинә. Әв йәк Йаһоԝа хԝәш нәһат, ләма әԝи әв мере ԛӧрʹә бь кʹотибуне щәза кьр. Узийа һʹәта хьлазийа әʹмре хԝә кʹоти ма (2 Дирок 26:16-21).

8. Ль гора 1 Корьнтʹи 4:6, 7, гәрәке әм чь бир нәкьн?

⁸ Гәло әм жи дькарьн сәва ԛӧрʹәтийе мина Узийа бькʹәвьн тʹәльке? Дина хԝә бьдә сәрһатийа бьраки бь наве Хосе. Әԝ һьм бизнесменәки пешдачуйи бу, һьм жи щьватеда рʹуспики баш бу. Әԝи сәр щьватед мәзьн готар дьхԝәнд, у һьнә бәрпьрсийаред мьһале жь ԝи ширәт дьхԝәстьн. Хосе ӧса дьбежә: «Сәд һʹәйф кӧ мьн хԝә дьспарт аԛьл у щерʹьбандьна хԝә. Мьн хԝә ида нәдьспарт Йаһоԝа. Әз дьфькьрим кӧ әз ԛәԝи мә, ләма мьн гӧһ нәдьда ширәтед Йаһоԝа». Хосе гӧнәки гьран кьр у жь щьвате һат дәрхьстьн. Чәнд сал шунда, әԝ вәгәрʹийа щьвате. Хосе дьбежә: «Йаһоԝа мьн һин кьр кӧ тьште һәри фәрз нә әв ә ԝәки сәрнавед  мә йед мәзьн һәбьн, ле әв ә кӧ әм гӧһ бьдьн ԝи». Бьра әм тʹӧ щар бир нәкьн кӧ һʹәму һʹӧнӧр, фәрәсәт у щабдарийед кӧ әм щьватеда дьстиньн жь Йаһоԝа тен (1 Корьнтʹи 4:6, 7 бьхунә). Һәгәр әм ԛӧрʹә бьн, Йаһоԝа ԝе мә шьхӧле хԝәда нәдә хәбате.

9. Мире-щьна у Һеԝайе сәва тьмайе чь кьрьн?

⁹ Алийе тьмайеда, мәсәла пешьн Мире-щьна ә. Әԝ йәк жь мәләкед Йаһоԝа бу, у бешьк гәләк шьхӧлед ԛимәт жерʹа һатьбун дайине. Ле әԝ бь тьштед кӧ дәсте ԝида һәбун, нә рʹази бу. Әԝи дьхԝәст кӧ мәләк у инсан нә кӧ Йаһоԝарʹа, ле ԝирʹа хьзмәт кьн. Мире-щьна дьхԝазә кӧ әм жи мина ԝи бьн, ләма әԝ һәр тьшти дькә ԝәки тьмайе бькә дьле мә. Ль бахче Едене, әԝи әв метод щара пешьн да хәбате. Йаһоԝа тʹер-тʹьжә хԝарьн дабу Адәм у Һеԝайе. Изна ԝан һәбу кӧ жь һʹәму даред бахче бьхԝьн; тʹәне дарәк һатьбу ԛәдәхәкьрьн (Дәстпебун 2:16). Диса жи, Мире-щьна Һеԝа хапанд кӧ әԝ бәре ԛәдәхәкьри бьхԝазә у бьхԝә. Һеԝайе бь тьштед кӧ дәсте ԝеда һәбун, нә рʹази бу. Сәва тьмайе, Һәԝайе гӧнә кьр у хьлазийеда мьр (Дәстпебун 3:6, 19).

10. Даԝьд Пʹадша чаԝа кʹәт тʹәлька тьмайе?

¹⁰ Даԝьд Пʹадша сәва тьмайе бир кьр кӧ Йаһоԝа чьԛас мал у мьлкʹ, навдари у сәркʹәтьна сәр дьжмьна, дабу ԝи. Даԝьд бь рʹазибуне готьбу кӧ пʹешкʹешед Йаһоԝа беһʹәсаб ьн (Зәбур 40:5). Ле щарәке, Даԝьд бь тьштед кӧ дәсте ԝида һәбун, нә рʹази бу. Рʹаст ә чәнд жьнед Даԝьд һәбун, йәкә диса жи дьле ԝи кʹәтә Бат-Шәба, демәк жьна мерәки дьн, жьна Урийайе Һитти. Даԝьд тʹәви Бат-Шәбайе зьне кьр, у Бат-Шәба һʹәмлә ма. Сәрда жи, Даԝьд Урийа да кӧштьне! (2 Самуйел 11:2-15) Гәло Даԝьд чьрʹа ӧса кьр? Гәло әԝ дьфькьри кӧ Йаһоԝа ԝи навинә? Рʹаст ә Даԝьд гәләк Йаһоԝа һʹьз дькьр, ле ижар, әԝи сәва тьмайе гӧнед гьран кьрьн. Ахьрийеда, тьштед гәләк хьраб һатьн сәре ԝи. Чьԛас баш ә кӧ ԝәхт шунда, Даԝьд сәва гӧнед хԝә пʹошман бу у тʹобә кьр, у Йаһоԝа бахшандә ԝи. Бьдьнә бәр чʹәʹве хԝә кӧ Даԝьд бона рʹәʹма Йаһоԝа чьԛас рʹази бу! (2 Самуйел 12:7-13)

11. Ль гора Әфәси 5:3, 4, чь дькарә али мә бькә кӧ тьмайи нәкʹәвә дьле мә?

 ¹¹ Гәло әм жь сәрһатийа Даԝьд Пʹадша чь һин дьбьн? Әм һин дьбьн кӧ һәгәр әм бона тьштед кӧ Йаһоԝа данә мә, шькьрдар бьн, тьмайи ԝе нәкʹәвә дьле мә (Әфәси 5:3, 4 бьхунә). Бәле, гәрәке әм бона тьштед кӧ дәсте мәда һәнә, рʹази бьн. Гава тӧ тʹәви кәсәки һинбуна Кʹьтеба Пироз дәстпедьки, ԝи һин кә кӧ әԝ бона ԛәнщийед кӧ Йаһоԝа сәва ԝи кьрийә, рʹази бә. Һәгәр әԝ һәр рʹож бона тьштәки шекьрдар бә, әԝе нава һʹәфтекеда бона һʹәфт тьшта шькьри бьдә Йаһоԝа (1 Тʹесалоники 5:18). Ԝе баш бә кӧ тӧ жи кʹур бьфькьри, ԝәки тә жь Йаһоԝа чь кʹәрәма стандьнә у бона ван тьшта шькьри бьдә ԝи. Бь ви щурʹәйи, тӧйе бь тьштед кӧ дәсте тәда һәнә, рʹази би, у тьмайи ԝе нәкʹәвә дьле тә.

12. Сәва тьмайе, Щьһуда чь кьр?

¹² Гава Иса Щьһудайе Исхәрйоти ча шандийе хԝә бьжарт, әԝ мәрьвәки баш бу (Луԛа 6:13, 16). Әшкәрә йә кӧ әԝ мәрьвәки аԛьл у зен бу, чьмки Иса Мәсиһ ԛӧтʹийа пʹәра тʹәсмили ԝи кьр. Мина ԛӧрбанед кӧ иро бона шьхӧле бәлакьрьна мьзгине тен дайин, Иса у шандийед ԝи әв пʹәрә бона хәрщед хьзмәте дьданә хәбате. Ле сәд һʹәйф кӧ ԝәʹдә шунда, Щьһуда ширәтед Иса йед дәрһәԛа тьмайе пьшт гӧһе хԝәва авит у дәстпекьр дьзийе бькә (Марԛос 7:22, 23; Луԛа 11:39; 12:15).

13. Тьмайа Щьһуда кʹәнге әшкәрә бу?

¹³ Чәндәк пешийа мьрьна Иса Мәсиһ, тьмайа Щьһуда ида әшкәрә бу. Иса, Мәртʹа, хушка ԝе Мәрйәм у чәнд шагьртед дьн меванти чубунә мала мәрьвәки бь наве Шьмһʹун. Ԝәʹде хԝарьне, Мәрйәме рʹунәки бинхԝәш у бьһа ль сәре Иса рʹьжанд. Һьнге шагьртед ԝи һерс кʹәтьн, чьмки әԝана дьфькьрин кӧ әв рʹун дькарьбун бона нетәкә дьһа баш бьһата хәбьтандьн. Ле нета Щьһуда тьштәки дьн бу. «Чьмки әԝ дьз бу», әԝи дьхԝәст әв пʹәрә бьдьзийа. Паше, тьмайа Щьһуда бу сәбәб кӧ әԝи Иса бь һәԛе хӧламәки да дәсте дьжмьна (Йуһʹәнна 12:2-6; Мәтта 26:6-16; Луԛа 22:3-6).

14. Жьн у мерәки чаԝа гӧһ данә дәрса жь Луԛа 16:13?

¹⁴ Иса шагьртед хԝәрʹа ӧса гот: «Һун нькарьн һьн Хԝәдерʹа, һьн жи һәбукерʹа хӧламтийе бькьн» (Луԛа 16:13 бьхунә). Бь рʹасти жи ӧса йә. Бьдә бәр чʹәʹве хԝә кӧ чаԝа готьнед Иса сәр жьн у мерәки жь Руманйайе, һʹӧкӧм бун. Щарәке, жь ԝәлатәки дәԝләмәнд ԝана тʹәглифи хәбатәке кьрьн. Әԝана дьбежьн: «Серида, әм дьфькьрин кӧ әв хәбат кʹәрәмәкә жь Йаһоԝа йә, чьмки мә кредитәкә мәзьн жь банке һьлдабу у лазьм бу кӧ әм дәйне хԝә бьдьн». Ле проблемәк һәбу. Әв хәбат ԝе рʹийа хьзмәта ԝан бьгьрта. Паши кӧ ԝана готарәкә бь наве «Бь Дьләки Тʹам Амьн Бьминә» хԝәнд, ԝана сафикьрьнәкә баш кьрьн («Бьрща Ԛәрәԝьлийе», йа 15 Тʹәбахе, 2008). Әԝана дьбежьн: «Әм дьфькьрин кӧ һәгәр әм бона хатьре хәбатәкә баш дәрбази ԝәлатәки дьн бьбьн, әме достийа хԝә тʹәви Йаһоԝа дайньн сәр щийе дӧда. Мә заньбу кӧ һәгәр әм ӧса бькьн, әв йәк ԝе сәр сьһʹәта мәйә рʹӧһʹани хьраб һʹӧкӧм кә». Ләма, ԝана әв хәбат ԛәбул нәкьр. Гәло паше чь ԛәԝьми? Бьре мә ԝәлате хԝәда хԝәрʹа хәбатәк дит, йа кӧ бәси һʹәԝще ԝан бу. Хушка мә ӧса дьбежә: «Дәсте Йаһоԝа кьн нинә». Әв жьн у мер ша нә кӧ әԝана нә кӧ пʹәрарʹа, ле Йаһоԝарʹа хӧламтийе дькьн.

15. Әм жь кʹӧ заньн кӧ әм дькарьн жь тʹәлькед Шәйтʹан бьрʹәвьн?

¹⁵ Һәгәр әм тедәрхьн кӧ әм кʹәтьнә тʹәлька ԛӧрʹәти йан тьмайе, гәрәке әм чь бькьн? Гәрәке әм ле бьрʹәвьн! Паԝлосе шанди готьбу ԝәки йед кӧ жь алийе Мире-щьнава һатьнә гьртьне, диса жи дькарьн жь тʹәлькед ԝи бьрʹәвьн (2 Тимотʹейо 2:26). Мәсәлә, паши кӧ Даԝьд Пʹадша кʹәтьбу тʹәлька тьмайе, әԝи гӧһ да ширәта Натʹан пʹехәмбәр у тʹобә кьр. Бь ви щурʹәйи, Даԝьд диса бу досте Йаһоԝа. Бир нәкә кӧ Йаһоԝа жь Мире-щьна ԛәԝитьр ә. Ләма, һәгәр әм аликʹарийа Йаһоԝа ԛәбул бькьн, әм дькарьн жь тʹәлькед Шәйтʹан бьрʹәвьн.

16. Сәва кӧ әм хԝә жь тʹәлькед Мире-щьна дур бьгьрьн, гәрәке әм чь бькьн?

¹⁶ Дәԝса кӧ әм бькʹәвьн тʹәлькед Мире-щьна у паше жь ԝан бьрʹәвьн, ԝе һьлбәт баш бә кӧ әм хԝә жь тʹәлькед ԝи бь тʹәмами дур бьгьрьн. Бона ве йәке, әм һʹәԝще аликʹарийа Йаһоԝа нә. Гәрәке әм бь зедәйи хԝәбаԝәр нибьн у нәфькьрьн кӧ әме тʹӧ щара нәкʹәвьн ван тʹәлька. Чаԝа мә дит, һьнә хьзмәткʹаред Йаһоԝа, йед кӧ гәләк сала ԝирʹа хьзмәт кьрьбун, кʹәтьн ван тʹәлька. Ләма, һәр рʹож жь Йаһоԝа аликʹарийе бьхԝазә кӧ тӧ тедәрхи һәла әв һʹӧнӧред хьраб сәр фькьр у рʹабун-рʹуньштьна тә һʹӧкӧм дькьн йан на (Зәбур 139:23, 24). Тʹӧ щара изне нәдә кӧ ԛӧрʹәти йан тьмайи сәр тә һʹӧкӧм бькьн!

17. Зутьрәке чь ԝе бе сәре Мире-щьна?

¹⁷ Мире-щьна нечʹирванәки щерʹьбанди йә, у әԝ бь һʹәзара сала һәр тьшти дькә, ԝәки хьзмәткʹаред Йаһоԝа бькә тʹәлькед хԝә. Ле зутьрәке әԝе бе гьртьне, у хьлазийеда ԝе бе ԛьрʹкьрьне (Әʹйанти 20:1-3, 10). Әм һʹьзрәта ԝе рʹоже нә! Ле һʹәта әԝ рʹож бе, мьԛабьли тʹәлькед Мире-щьна һʹьшйар бьминьн. Һаш жь хԝә һәбьн кӧ ԛӧрʹәти у тьмайи нәкʹәвә дьле ԝә. Бәле, «мьԛабьли Мирещьн бьсәкьньн у әԝе жь ԝә бьрʹәвә» (Аԛуб 4:7).