1-2. Ль гора 1 Тимотʹейо 6:20, Тимотʹейорʹа чь һатьбу дайин?

ӘМ ГӘЛӘК щара тьштед хԝә йед бьԛимәт тʹәсмили кәсед дьн дькьн. Мәсәлә, әм бәлки пʹәред хԝә тʹәсмили банкайе дькьн, у әм баԝәр ьн кӧ пʹәред мә ԝе ль ԝе дәре ӧнда нәбьн у нәйен дьзин. Ләма әм рʹьнд фәʹм дькьн кӧ чь те һʹәсабе тьштәки тʹәсмили кәсәки бькьн.

² 1 Тимотʹейо 6:20 бьхунә. Паԝлосе шанди ани бира Тимотʹейо кӧ ԝи тьштәки бьԛимәт стандьбу – занәбуна зәлал йа ль сәр нета Хԝәде. Ӧса жи, ԛәдьрәки ӧса жерʹа һатьбу дайине кӧ «хәбәре даннасин кә» у «кьре мьзгиндар бькә» (2 Тимтʹ. 4:2, 5). Паԝлосе шанди Тимотʹейо тʹәми кьр кӧ бьра әԝ ве йәке чь кӧ жерʹа һатьбу дайине хԝәй кә. Ԝәк Тимотʹейорʹа, һьнә тьштед бьԛимәт мәрʹа жи һатьнә дайине. Гәло әв тьштед бьԛимәт чь нә? У чьма лазьм ә ԝәки әм хьзна кӧ Йаһоԝа дайә мә, бьпарезьн?

3-4. Рʹастийед Кʹьтеба Пироз чьма пʹьрʹ бьԛимәт ьн?

³ Йаһоԝа занәбуна зәлал йа ль сәр рʹастийед бьԛимәт йед Кʹьтеба Пироз дайә мә. Рʹастийед Кʹьтеба Пироз пʹьрʹ бьԛимәт ьн, чьмки әԝ мә һин дькьн, кӧ әм чаԝа дькарьн бьбьн достед Йаһоԝа у бәхтәԝарийа рʹасти ԛазанщ кьн. Гава әм ван рʹастийа ԛәбул дькьн у ль гора ԝан дьжин, әм жь бьндәстийа һинкьрьнед ԛәлп у жь жийанәкә бенамус дьфьльтьн (1 Корн. 6:9-11).

⁴ Ӧса жи, рʹастийед Кʹьтеба Пироз пʹьрʹ бьԛимәт ьн жь бәр кӧ Йаһоԝа ԝана тʹәне кәсед мьлукрʹа әʹйан дькә, «йед кӧ дьле ԝан жь бо жийана һәрһәйи һазьр» ә (Кʹар. Шанд. 13:48, ДТʹ). Кәсед ӧса тьштед кӧ «хӧламе  амьн у сәрԝахт» дәрһәԛа Кʹьтеба Пирозда һин дькә, ԛәбул дькьн (Мәт. 11:25; 24:45). Бәле, мәйе нькарьбуйа әв рʹастийед бьԛимәт хԝә бь хԝә фәʹм бькьрана (Мәтʹлк. 3:13, 15).

5. Йаһоԝа чь ԛәдрәки дьн жи дайә дәсте мә?

⁵ Йаһоԝа ӧса жи шьхӧләки фәрз дайә мә. Әԝ дьхԝазә кӧ әм рʹастийа дәрһәԛа ԝи у нетед ԝи бьгьһиньн инсана (Мәт. 24:14). Мьзгина кӧ әм бәла дькьн пʹьрʹ бьԛимәт ә, чьмки бь сайа ве мьзгине, мәрьв дькарьн бькʹәвьн малбәта Йаһоԝа, у жийана һʹәта-һʹәтайе ԛазанщ кьн (1 Тимтʹ. 4:16). Ләма, бьра әм һʹәта кӧ жь дәсте мә те пьштгьрийа ви ише һәри фәрз бькьн! (1 Тимтʹ. 2:3, 4). Чь ԛәдрәки мәзьн ә кӧ әм һәвалкʹаред Хԝәде нә! (1 Корн. 3:9)

6. Чь һат сәре һьнә кәсед кӧ һаш жь хԝә тʹӧнәбун?

⁶ Ль рʹожед Тимотʹейо, һьнә шагьртед Иса ви ԛәдьри ԛимәт нәдькьр кӧ әԝ һәвалкʹаред Хԝәде нә. Димас дьнйа һаԛас һʹьз дькьр кӧ әԝи ԛәдьрәки ӧса кӧ тʹәви Паԝлос хьзмәт кә, жь дәсте хԝә бәрʹда (2 Тимтʹ. 4:10). Ӧса те фәʹм кьрьн кӧ Фугәло у Һермохенис дәст жь хьзмәте бәрʹда, жь бәр кӧ әԝана дьтьрсийан кӧ әԝе ԝәк Паԝлос рʹасти зӧльме бен (2 Тимтʹ. 1:15). Һумәнайо, Скәндәр у Фьлито ль һьмбәри рʹастийе дәркʹәтьн (1 Тимтʹ. 1:19, 20; 2 Тимтʹ. 2:16-18). Әшкәрә йә кӧ әв мәрьв дь сәрида рʹастийеда ԛәԝи бун, ле ԝана пәй зәманрʹа бир кьр кӧ чь бь рʹасти бьԛимәт ә.

7. Мире-щьна чь метода бь кʹар тинә кӧ мә бьхапинә?

⁷ Мире-щьна чь метода бь кʹар тинә кӧ мә бьхапинә, ԝәки әм чь кӧ Йаһоԝа спартийә мә, бьһельн? Мәсәлә, бь сайа телевизйон, синәма, интернет, рʹожнамә, кʹьтеб у журнала, әԝ дьхԝазә фькьр, һʹал у һәрәкʹәтед мә бьгӧһезә, ԝәки әм рʹастийе бьһельн. Ӧса жи бь сайа һʹӧкӧме һәвала у зерандьна, әԝ дьхԝазә мә бьдә сәкьнандьне кӧ әм мьзгине бәла нәкьн. Һьн жи, әԝ дьхԝазә кӧ әм гӧһ бьдьн тьштед «кӧ бь дәрәԝ жь ԝанрʹа ‹занин› те готьн» у жь рʹийа рʹастийе дәркʹәвьн (1 Тимтʹ. 6:20, 21).

8. Сәрһатийа бьрайәки чь мә һин дькә?

⁸ Һәгәр әм һаш жь хԝә тʹӧнә бьн, әм дькарьн һеди-һеди жь рʹастийе дур бькʹәвьн. Сәрһатийа бьраки мә, йе кӧ листькед компӧтәре һʹьз дькьр, бинә бәр чʹәʹве хԝә. Әԝ ӧса дьбежә: «Гава әз ԝәкә 10 сали бум, мьн дәст бь листькед компӧтәре кьрьбу. Сәрида, листькед кӧ мьн  дьлистьн нә хьраб бун. Ле һеди-һеди, әз дәрбази листькед зордар у щьндар дьбум». Ахьрийеда, әԝи һәр рʹож ԝәкә 15 сьһʹәт бь ван листька мьжул дьбу. Бьрайе мә дьбежә: «Дьле хԝәда, мьн заньбу кӧ листькед мьн у ԝәхта кӧ мьн сәр ԝан хәрщ дькьр әз жь Йаһоԝа дур дьхьстьм. Ле бәле, исафа мьн ида һʹьшк бу, у әз дьфькьрим кӧ принсипед Кʹьтеба Пироз нә бона мьн ьн». Бәле, мьжулийед мә дькарьн сәр мә һʹӧкӧм кьн у мә жь рʹастийе дур хьн. Әԝ дькарә бьбә сәбәб кӧ әм тьштед бьԛимәт, йед кӧ Йаһоԝа дайә мә, ӧнда бькьн.

9. Ль гора 1 Тимотʹейо 1:18, 19, Паԝлосе шанди Тимотʹейо бәрамбәри кʹе дькьр?

⁹ 1 Тимотʹейо 1:18, 19 бьхунә. Паԝлосе шанди Тимотʹейо бәрамбәри әскәрәки кьр, у ԝи әԝ тʹәми кьр кӧ бьра әԝ «шәрʹе . . . ԛәнщ », демәк шәрʹе рʹӧһʹани бәрдәԝам бькә. Шагьртед Иса чьда мина әскәра нә? Әскәред Мәсиһ һʹәԝщәйи кʹижан һʹӧнӧра ньн? Ньһа әме дина хԝә бьдьн пенщ дәрса, йед кӧ әм дькарьн жь мәсәла Паԝлос һин бьн. Әв дәрс дькарьн али мә бькьн кӧ әм хԝә ԛайим ль рʹастийе бьгьрьн.

10. Амьни чьма фәрз ә?

¹⁰ Амьнийа хԝә зедә бькә. Әскәре баш, йәки амьн ә. Әԝ һʹьзкьрийед хԝә у тьштед бьԛимәт бь амьни дьпарезә. Ләма Паԝлосе шанди Тимотʹейорʹа гот кӧ бьра әԝ амьнийа хԝә зедә бькә (1 Тимтʹ. 4:7). Һәгәр әм Хԝәде жь дьл һʹьз дькьн, әме бьхԝазьн хԝә дь рʹастийеда ԛайим бьгьрьн (1 Тимтʹ. 4:8-10; 6:6).

11. Чьма мәрʹа дисиплин лазьм ә?

¹¹ Дисиплина хԝә зедә бькә. Жь бо кӧ әскәрәк һәр тʹьм бона шәрʹкьрьне һазьр бә, ԝирʹа дисиплин лазьм ә. Тимотʹейо ль һьмбәри һʹӧкӧме Мире-щьна ԛәԝи дьсәкьни, жь бәр кӧ ԝи гӧһ да ширәта Паԝлос кӧ жь хԝәстьнед нәрʹаст бьрʹәвә, һʹӧнӧред баш бь пеш бьхә у хушк-бьрарʹа һәвалтийе бькә (2 Тимтʹ. 2:22). Жь бо ве, Тимотʹейо һʹәԝщәйи дисиплине бу. Мәрʹа жи дисиплин лазьм ә кӧ әм мьԛабьли хԝәстьнед бәдәне сәр кʹәвьн (Рʹом. 7:21-25). Хенщи ве, әм һʹәԝщәйи дисиплине нә кӧ әм мәрьве кәвьн жь хԝә бехьн у мәрьве ну ль хԝә бькьн (Әфәс. 4:22, 24). Ӧса жи, гава әм паши рʹожәкә чәтьн ԝәстийайи нә, дьбәкә дисиплин лазьм бә кӧ әм диса жи һәрʹьн щьвине (Ибрн. 10:24, 25).

12. Әм чаԝа дькарьн һе баш Кʹьтеба Пироз бьдьнә хәбате?

¹² Жь бо кӧ әскәрәк бьбә һостә, лазьм ә кӧ әԝ чʹәкед хԝә һәр тʹьм бь кʹар бинә. Мина ве, ԝәки әм бьбьн мамостәйед баш, гәрәке әм Хәбәра Хԝәде һәр тʹьм бьдьнә хәбате (2 Тимтʹ. 2:15). Әм һьлбәт дькарьн дь щьвинада һьнә һʹӧнӧра һин бьн. Ле бәле, һәгәр әм дьхԝазьн кәсед дьн бьдьнә баԝәркьрьне кӧ готьнед Кʹьтеба Пироз бона ԝан керһати нә, гәрәке әм бәрдәԝам кьн Кʹьтеба Пироз леколин бькьн. Сәва кӧ баԝәрийа мә һе ԛәԝи бә, гәрәке әм Хәбәра Хԝәде рʹьнд бьдьнә хәбате. Бәс нинә кӧ әм Кʹьтеба Пироз тʹәне бьхуньн. Гәрәке әм кʹур бьфькьрьн у дь әʹдәбйәтед мәда легәрине бькьн, ԝәки Ньвисаред Пироз рʹаст фәʹм бькьн у бь кʹар биньн (1 Тимтʹ. 4:13-15). Бь ви аԝайи, әме бькарьбьн рʹастийе бь аликʹарийа Хәбәра Хԝәде кәсед дьн һин бькьн. Жь бо ве, бәс нинә кӧ әм рʹеза тʹәне гӧһдаред хԝәрʹа бьхуньн. Гәрәке әм али ԝан бькьн кӧ әԝ манәйа рʹеза фәʹм бькьн у те дәрхьн  кӧ готьнед рʹеза жь бо ԝан чьма керһати нә. Бь сайа леколина шәхси, әм дькарьн һʹӧнӧред хԝә йед жь бо һинкьрьна Кʹьтеба Пироз чьԛас дьчә зедә бькьн (2 Тимтʹ. 3:16, 17).

13. Ль гора Ибрани 5:14, чьма фәрз ә кӧ әм «тегьһиштьна» хԝә, демәк фәʹмдарийа хԝә зедә бькьн?

¹³ Фәʹмдар бә. Лазьм ә кӧ әскәр тʹәлька пешда бьвинә у хԝә жь ԝан бьпарезә. Мина ве, гәрәке әм жи фәʹм бькьн кӧ чь дькарә зьраре бьдә мә, у гәрәке әм хԝә жь тьштед ӧса бьпарезьн (Мәтʹлк. 22:3; Ибрани 5:14 бьхунә). Мәсәлә, гәрәке әм мьжулийед хԝә рʹьнд һьлбьжерьн. Дь гәләк филм у бәрнамәйед телевизйонеда бенамуси һәйә. Тьштед ӧса дьле Хԝәде хԝәш найен у ԝе зу йан дәрәнг зьраре бьдьн мә. Ләма, гәрәке әм хԝә жь мьжулийед кӧ дькарьн һʹьзкьрьна Хԝәде дьле мәда һеди-һеди сьст бькьн, дур бьгьрьн (Әфәс. 5:5, 6).

14. Фәʹмдарийе чаԝа али бьраки мә кьр?

¹⁴ Бьрайе кӧ мә бәʹса ԝи кьрьбу фәʹм кьр, кӧ листькед зордар у щьндар нә баш ьн. Әԝ дь «Кʹьтебханәйа Бьрща Ԛәрәԝьлийеда» информасийа гәрʹийа, йед кӧ ԝе али ԝи бькьра кӧ әԝ проблема хԝә сафи бькә. Ахьри чь бу? Әԝи тʹәрька листькед хьраб да у һәвалтийа бь листькванед дьнрʹа ԛәтандьн. Әԝ ӧса дьбежә: «Дәԝса кӧ әз бь листькед компӧтәре мьжул бума, әз ида дьчум дәрва йан тʹәви хушк у бьра ԝәхт дәрбаз дькьр». Әв бьрайе мә ньһа пешәнг у рʹуспи йә.

15. Гәрәке әм хԝә чьма жь хәбәред дәрәԝин дур бьгьрьн?

¹⁵ Ԝәк Тимотʹейо, гәрәке әм фәʹм бькьн кӧ әʹламәтийа дәрәԝин, йа кӧ рʹабәр бәла дькьн, тʹәльк ә у хоф ә (1 Тимтʹ. 4:1, 7; 2 Тимтʹ. 2:16). Мәсәлә, әԝ бәлки дәрһәԛа хушк у бьра йан жи дәрһәԛа тʹәшкиләте хәбәред дәрәԝин бәла дькьн. Дәрәԝед ӧса дькарьн мә жь рʹийа рʹастийе дәрхьн. Ләма гәрәке әм һаш жь хԝә һәбьн кӧ әм сәва пропагандайа «мәрьвед кӧ һʹьше ԝан хьраб буйә у жь рʹастийе бепʹар бунә» нәйен хапандьн. Нета ԝан тʹәне әв ә кӧ шәрʹ-дәʹԝа пешда биньн (1 Тимтʹ. 6:4, 5, ИМ). Әԝана дьхԝазьн кӧ әм дәрәԝед ԝан баԝәр бькьн у итʹбарийа хԝә һьндава хушк у бьра ӧнда кьн.

16. Гәрәке әм хԝә жь чь бьпарезьн?

 ¹⁶ Бь тʹәмами дина хԝә бьдә ише Пʹадшатийе. Тимотʹейо «әскәре Мәсиһ Исайи ԛәнщ» бу, ләма лазьм бу кӧ әԝ бь тʹәмами дина хԝә бьдә нә ль сәр мал у мьлкʹ йан нетед дьнйайи, ле ль сәр хьзмәте (2 Тимтʹ. 2:3, 4). Ԝәк Тимотʹейо, гәрәке әм изне нәдьн кӧ һәбукһʹьзи бькʹәвә дьле мә. «Хапандьна дәԝләмәндийе» дькарә бьбә сәбәб кӧ һʹьзкьрьна Йаһоԝа дьле мәда сар бә, кӧ әм ида ԛимәте нәдьн Хәбәра Хԝәде у хԝәстьна хԝә ӧнда кьн кӧ мьзгине бәла бькьн (Мәт. 13:22). Гәрәке әм бь жийанәкә сьвьк бьжин у «бәри һәр тьшти ль Пʹадшатийа Хԝәде . . . бьгәрʹьн» (Мәт. 6:22-25, 33).

17-18. Әм чаԝа дькарьн хԝә жь тʹәлька бьпарезьн?

¹⁷ Ль һьмбәри тʹәлька һазьр бә. Әскәр гәрәке пешда бьзаньбә кӧ әԝ чаԝа дькарә хԝә бьпарезә. Сәва кӧ әм тьштед кӧ Йаһоԝа тʹәсмили мә кьрьнә, бьпарезьн, гәрәке әм тʹәлька тедәрхьн у дәрберʹа тьштәки бькьн. Чь дькарә али мә бькә кӧ әм һәр тʹьм һазьр бьн? Жь бо ве, пʹьрʹ фәрз ә кӧ әм пешда бьфькьрьн кӧ гава әм рʹасти тʹәлька бен, гәрәке чь бькьн.

¹⁸ Мәсәлә, гава мәрьв дьчьн консерте, ԝанрʹа щарна те готьн кӧ бьра әԝ ль щийе ӧса рʹунен кʹидәре дәри незик ә. Гәло чьма? Жь бо кӧ ԝәʹде ԛәзийе әԝ зу жь авайе дәрен бьрʹәвьн. Мина ве, гәрәке әм жи пешда бьзаньбьн кӧ әме кʹижан «дәрирʹа» бьрʹәвьн һәгәр әм ль интернете йан ль телевизйоне ньшкева тьштәки нәбаш бьвиньн, мәсәлә бенамуси, зордари йан әʹдәбйәтед кәсед кӧ ль һьмбәри рʹастийе дәркʹәтьнә. Һәгәр әм хԝә пешда һазьр бькьн, әме бькарьбьн хԝә зу бьпарезьн у дь чʹәʹве Йаһоԝада паԛьж бьминьн (Зәб. 101:3; 1 Тимтʹ. 4:12).

19. Һәгәр әм тьштед бьԛимәт, йед кӧ мә жь Йаһоԝа стандьнә, бьпарезьн, әме чь бәрәкʹәта бьстиньн?

¹⁹ Йаһоԝа рʹастийа Кʹьтеба Пироз у ԛәдьре бәлакьрьна мьзгине тʹәсмили мә кьрьнә. Гәрәке әм ван тьштед бьԛимәт рʹьнд бьпарезьн. Һәгәр әм ӧса бькьн, әме бьбьн хԝәйе исафа тʹәмьз у бь жийанәкә бәхтәԝар бьжин. Ӧса жи, әме бькарьбьн али кәсед дьн бькьн ԝәки әԝана Йаһоԝа нас бькьн, у әв йәк ԝе дьле мә ша бькә. Бь аликʹарийа Йаһоԝа, әме бькарьбьн ве йәке чь кӧ әԝи тʹәсмили мә кьрийә, бьпарезьн! (1 Тимтʹ. 6:12, 19).