Әз һатьмә буйине шәһәре Кԝебекеда (Канада), кʹидәре зьмане сәрәкә Франси йә. Де-баве мьн Зейла у Луис әз бь һʹьзкьрьн мәзьн кьрьмә. Баве мьн мәрьвәки шәрмокә бу у әԝи хԝәндьн гәләк һʹьз дькьр. Ле мьн һʹьз дькьр бьньвисьм у нета мьн әԝ бу, кӧ рʹожәк бе әз бьбьмә журналист.

Чахе әз ԝәкә 12 сали бум, һәвалхәбатчики баве мьн Родолф Соуси у һәвале ԝи, йед кӧ Шәʹдед Йаһоԝа бун, меванти һатьнә мала мә. Мьн дәрһәԛа Шәʹдед Йаһоԝа һьндьк заньбу у һʹәԝаса мьн нәдьһат, кӧ дәрһәԛа рʹелигийа ԝан һе зедә пебьһʹәсьм. Ле йәкә әз әʹщебмайи мам, кӧ ԝана ча бь нәрми у логики пе Кʹьтеба Пироз щаба пьрсед мә дьдан. Әԝ йәк де-баве мьн жи хԝәш һат, ләма мә һинбуна Кʹьтеба Пироз дәстпекьр.

Һьнге әз дьчумә мәкʹтәба Католики. Ԝедәре мьн щар-щара һәвал-дәрсханед хԝәрʹа гьли дькьр, чь кӧ әз жь Кʹьтеба Пироз педьһʹәсийам. Ахьрийеда, дәрсдаред кӧ кʹәшиш бун, дәрһәԛа ве йәке пеһʹәсийан. Дәԝса кӧ пе Кʹьтеба Пироз мьнрʹа избат кьрана, кӧ әз нәрʹаст ьм, дәрсдарәки бәр һʹәму һәвал-дәрсханед мьн, әз нәһәԛ кьрьм ча мәрьвәки рʹабәр! Рʹаст ә ԝи чахи әз кʹәтьмә стресе, ле ахьрийа ве йәке баш бу. Мьн бь сайа ве ԛәԝьмандьне дит, ԝәки әв мәкʹтәба рʹелиги ль гора Кʹьтеба Пироз һин накә. Мьн фәʹм кьр, ԝәки әва щийе мьн нинә. Ләма мьн жь де-баве хԝә изьн хԝәст, у әз кʹәтьмә мәкʹтәбәкә дьн.

Мьн бәрдәԝам дькьр Кʹьтеба Пироз һин бьм, ле рʹӧһʹанида әз зу пешда нәдьчум, чьмки әз дьтьрсийам мал бь мал хьзмәт кьм. Һʹӧкӧме Дера Католики мәзьн бу у әԝ гәләк  мьԛабьли шьхӧле мәйи хьзмәтийе бу. Маурис Дуплесис кӧ Кԝебекеда политик бу, пьштгьре ве дере бу. Пе пьштгьрийа ԝи щьмәʹт пәй Шәʹдед Йаһоԝа дькʹәт у һәла һе жи дьзерандьн. Һьнге сәва хьзмәт кьн рʹасти жи гәләк мерхаси лазьм бу.

Пе аликʹарийа бьраки мә Щон Рае, йе кӧ мәкʹтәба Гиләд хьлаз кьрьбу, мьн тьрсе жь дьле хԝә дәрхьст. Щон бьраки гәләк щерʹьбанди, нәрм, мьлук у шкәсти бу. Әԝи гәләк ширәт нәдьда мьн, ле жь мәсәла ԝи әз гәләк тьшт һин бум. Щонрʹа чәтьн бу сәр зьмане Франси хәбәр дә, ләма жи әз гәләк щар тʹәви ԝи дәрдькʹәтьм хьзмәтийе у зьманда али ԝи дькьр. Әԝ ԝәʹде кӧ мьн тʹәви Щон дәрбаз дькьр, али мьн кьр кӧ алийе рʹастийе бьгьрьм у бьбьмә Шәʹде Йаһоԝа. Дәһ сал паши ве йәке, кӧ әз рʹасти Шәʹдед Йаһоԝа һатьм, әз һатьмә ньхӧмандьне, 26 Гӧлане, сала 1951.

Шәһәре Кԝебекеда щьвата мәйә бьчʹукда һʹәчʹи зәʹф пешәнг бун. Хирәта ԝан гәләк сәр мьн һʹӧкӧм бу у әз жи бумә пешәнг. Һьнге мә тʹәне пе Кʹьтеба Пироз мал бь мал хьзмәт дькьр, чьмки әʹдәбйәтед мә тʹӧнә бун. Әз гәрәке рʹезед Кʹьтеба Пироз рʹьнд һин бума, сәва бь һостәти бьдьмә хәбате у рʹастийе бьпарезьм. Ле һәрге сәр кʹьтебе нишана дәрхьстьна фәрми йа Дера Католики тʹӧнә буйа, гәләка һәла һе жи нәдьхԝәстьн рʹеза ԝанрʹа бьхуньн.

Сала 1952 мьн жь щьвата хԝә хушкәкә амьн станд, наве ԝе Симона Патри бу. Әм дәрбази Монреале бун, у саләкеда мә кʹәрәм станд, мәрʹа ԛиз бу, мә наве ԝе дани Лиз. Рʹаст ә һьнә ԝәхт пешийа зәԝаща мә мьн пешәнгти да сәкьнандьне, ле мә һәрда жи хԝәрʹа нет дани, кӧ нәкʹәвьнә пәй һәбуке, сәва щьватеда у хьзмәтийеда һе зедә шьхӧл бькьн.

Дәһ сал дәрбаз бу, мьн ида хԝәрʹа  сафи кьр кӧ хьзмәтийа хԝәйә һәртʹьм диса дәстпекьм. Сала 1962, әз сәр мәһәке чумә Бәйтʹәла Канадайе, сәва Мәкʹтәба Хьзмәтийе бона рʹуспийа дәрбаз бьм. Әз тʹәви бьраки мә Камил Аулет отʹахәкеда дьмам. Малбәта Камил жи һәбу, ле әԝ ӧса хирәт бу кӧ әз әʹщебмайи дьмам. Һьнге Кԝебекеда лап һьндьк хушк-бьред ӧса һәбун, йед кӧ һьн зарʹед хԝә мәзьн дькьрьн, һьн жи пешәнг бун, ле Камил йәкә дьхԝәст бьбә пешәнг. Чахе әм тʹәвайи бун, әԝи әз һелан дькьрьм, ԝәки сәр дәрәща хԝә бьфькьрьм. Паши чәнд мәһа мьн фәʹм кьр, ԝәки әз диса дькарьм бьбьмә пешәнг.  Һьнәка мьнрʹа дьготьн, ԝәки әв сафикьрьн аԛьлайи нинә, ле йәкә әз бумә пешәнг, чьмки мьн итʹбарийа хԝә Йаһоԝа дьани, кӧ әԝ ԝе али мьн бькә һе зедә хьзмәт бькьм.

Сала 1964, әз у Симона шәһәре Кԝебекеда һатьнә кʹьфшкьрьне ча пешәнгед мәхсус. Ԝедәре мә чәнд сала хьзмәт кьр. Ԝи ԝәʹдәйи хьзмәтийеда ида һьндьк пәй мә дькʹәтьн.

Рʹожәке Шәмийе, Сан-Марида әз һатьмә гьртьне, әԝ шәһәрәки бьчʹук ә незики шәһәре Кԝебеке. Офисәр әз бьрьм полисхане у әз кьрьмә кәле, чьмки мьн бе изьн мал бь мал хьзмәт дькьр. Паше әз бьрьм диԝане бәр һʹакьме, кӧ мәрьвәки саԝ бу, наве кʹижани Баилларгон бу. Әԝи жь мьн пьрси, кӧ кʹе ԝе бьбә адвокате мьн. Чахе мьн наве Глен Һау * һьлда, әԝ һьнге адвокате Шәʹде Йаһоԝа бу, әԝ тʹәвһәв бу у гот: «Тʹәне әԝ на!» Глен Һау әʹйан бу ча ԛанунзане ԛәԝи, кӧ Шәʹдед Йаһоԝа диԝанеда дьпараст. Зутьрәке диԝане мьнрʹа әʹлам кьр, кӧ әз нәһәԛ ниньм у әз аза кьрьм.

Кԝебекеда жь бо мьԛабьлибуна шьхӧле мә, мәрʹа ӧса жи чәтьн бу щийе лайиԛ бьвиньн сәва щьвина дәрбаз кьн. Мә бона щьвата хԝәйә бьчʹук тʹәне гаражәкә кәвьн дит, кʹидәре кӧ гәләк сар бу. Илаһи зьвьстане гәләк сар бу, ләма бьра плитәкә бь бьзьр дьданә хәбате, сәва һьнәки гәрм бә. Әм гәләк щар чәнд сьһʹәт пешийа щьвате дор бәре плите тʹоп дьбун, у ԛәԝьмандьнед һʹәԝас һәврʹа гьли дькьрьн, сәва һәв ԛәԝи кьн.

Чьԛас баш ә кӧ нава гәләк салада шьхӧле мә ԝедәре ча пешда чу. Салед 1960-да шәһәре Кԝебекеда, региона Кот-Нордеда у Гаспе Пенинсуледа, тʹәне чәнд щьватед бьчʹук һәбун. Ле иро ԝан щийада һәжмара хушк-бьра гәләк зедә буйә, у әԝана ида Одед Щьватед бәдәԝда тʹәвайи тʹоп дьбьн.

Әз у Симона сала 1970-да һатьнә кʹьфшкьрьне, кӧ шьхӧле бәрпьрсийартийе бькьн. Паше, сала 1973-да, әм һатьнә кʹьфшкьрьне кӧ шьхӧле нәһитийе бькьн. Ԝан салада, әз гәләк тьшт жь бьред щерʹьбанди һин бум, мәсәлә жь Лауриер Саумур * у Девид Сплейн *. Паши һәр щьватәкә мәзьн, мә тʹәви Девид шеԝьр дькьр, кӧ ча һинкьрьнеда һе пешда һәрʹьн. Те бира мьн щарәке Девид готә мьн: «Леонс готара тәйә хьлазийе баш бу, мьн хԝәш һат. Ле мьне пе һаԛас информасийа се готар чекьра!» Мьн готаред хԝәда гәләк информасийа дьгот, ләма әз гәрәке һин бума готаред хԝә кьн бьгота.

Бәрпьрсийаред нәһийе щабдари стандьн, ԝәки бәрпьрсийаред мьһале бьшьдиньн. Ле гәләк хушк-бьред Кԝебеке әз рʹьнд нас дькьрьм, у ләма чахе мьн тʹәсәлийа бәрпьрсийаред мьһале дькьр, гәләк щар ԝана дьхԝәст тʹәви мьн хьзмәт кьн. Рʹаст ә мьн шабун  дьстанд чахе тʹәви ԝан дәрдькʹәтьм хьзмәтийе, ле мьн тʹәви бәрпьрсийаре мьһале епʹещә ԝәʹдә дәрбаз нәдькьр. Щарәкә, бәрпьрсийарәки мьһале бь һʹьзкьрьн мьнрʹа гот: «Баш ә кӧ тӧ ԝәʹде хԝә тʹәви хушк-бьра хәрщ дьки, ле бир нәкә, ԝәки ве һʹәфтийе тӧ һати кӧ тʹәсәлийа мьн бьки. Әз жи һʹәԝще дьлдайине мә!» Әз гәләк тьшт һин бум жь ве ширәта баш.

Йазьх, сала 1976-да ньшкева тьштәки хьраб ԛәԝьми. Жьна мьнә дәлал, Симона нәхԝәшикә гьран кʹәт у мьр. Әԝ кʹӧлфәтәкә гәләк баш бу, чьмки нә йәкә хԝәһʹьз бу у әԝе Йаһоԝа гәләк һʹьз дькьр. Мьн бәр ԝи дәрди тәйах кьр, чьмки мьн гәләк хьзмәт дькьр. Әз гәләк жь Йаһоԝа рʹази мә бона аликʹарийа ԝи ԝәʹдәки ӧса чәтьнда. Ԝәʹдә шунда, мьн пешәнгәкә хирәт станд, кӧ сәр зьмане Инглизи хәбәр дьдә, наве ԝе Каролина Әлиот ә. Әԝ дәрбази Кԝебеке бьбу, сәва ԝи щийи хьзмәт кә, кʹидәре һʹәԝщәти һәбу. Каролина мәрьвәкә һәвалһʹьз ә у бь дьл бона мәрьва хәм дькә, илаһи бона ԝан, йед кӧ шәрмокә нә йан тʹәне нә. Әԝе рʹасти жи гәләк али мьн кьр, чахе шьхӧле бәрпьрсийартийеда бу һәвалхьзмәткʹара мьн.

Мәһа Чьләйе сала 1978-да, мьнрʹа готьн, ԝәки Кԝебекеда Мәкʹтәба бона Пешәнга дәрбаз кьм. Әз сәва ве йәке гәләк бәрхԝә дькʹәтьм, чьмки әз әве мәкʹтәбе дәрбаз нәбьбум, у мьн нә жи дәрбаз кьрьбу. Чьԛас баш бу ԝәки ве мәкʹтәба пешьнда кӧ мьн дәрбаз дькьр, гәләк пешәнгед щерʹьбанди һәбун. Рʹаст ә әз дәрсдар бум, ле әз жь ван шагьрта гәләк тьшт һин бум!

Ԝәʹдә шунда, сала 1978-да сәр Стадйона Олимпики Монреаледа, щьвата мәзьнә һʹәмдьнйайе дәрбаз бу, бь наве «Баԝәрийа кӧ Сәрдькʹәвә». Кԝебекеда әԝ щьвата мәзьн йа лапә мәзьн бу, кʹидәре 80 000 мәрьва зедәтьр һатьбун. Щабдари данә мьн, кӧ тʹәви журналиста дәрһәԛа щьвата мәзьн хәбәр дьм. У мьн тʹәви гәләк журналиста хәбәр да. Әз әʹщебмайи мам у ша бум, кӧ  медйайеда гәләк тьштед баш дәрһәԛа мә готьн у ньвисин. Ԝана дәрһәԛа мә бь сәда готар нәшьр кьрьн. Ӧса жи ԝана пе телевисйоне у пе радиойе дәрһәԛа мә хәбәр дьдан, кӧ бь тʹәмами 20 сьһʹәта зедәтьр кʹьшанд. Бәле, шәʹдәтикә мәзьн һатьбу дайине!

Мьн жь ньхӧмандьна хԝә дәстпекьри, Кԝебекеда дәшта зьмане Франсида хьзмәт дькьр. Ле сала 1996-да гӧһастьнәкә мәзьн ԛәԝьми. Әз Торонтойеда дәшта зьмане Инглизида һатьмә кʹьфшкьрьне. Әз дьфькьрим, ԝәки әзе нькарьбьм сәр зьмане Инглизи готара бьхуньм, чьмки мьн әв зьман рʹьнд ньзаньбу. Сәва ве йәке мьн гәрәке гәләк дӧа бькьра у һе зедә итʹбарийа хԝә Йаһоԝа бьанийа.

Пешийа кӧ мьн дәстпекьра ве кʹьфшкьрьна тʹәзәда хьзмәт кьм, әз гәләк дьтьрсийам у бәрхԝә дькʹәтьм, ле әз дькарьм бежьм, ԝәки әԝ дӧ салед хԝәш Торонтойеда, гәләк шабун мьнрʹа анин. Каролине бь сәбьр али мьн дькьр, ԝәки шәрм нәкьм сәр зьмане Инглизи хәбәр дьм. Хушк-бьра жи пьштгьрийа мьн дькьрьн у дьл дьданә мьн. Мә зутьрәке хԝәрʹа һәвалед тʹәзә дит.

Организәкьрьна щьватед мәзьнда кӧ шәми-ләʹда дәрбаз дьбун, гәләк шьхӧлед мьн һәбун. Ле әз гәләк щар Инийе евара ԝәкә сьһʹәтәке дьчум мал бь мал хьзмәт кьм. Һьнәк дьбәкә дьфькьрин, кӧ чьрʹа һәма пешийа щьвата мәзьн, чахе гәләк шьхӧл сәр стуйе мьн бу, әз дьчьм хьзмәтийе. Ле чахе әз дьчумә хьзмәтийе әз дьшьдийам, чьмки һәбун мәрьвед ӧса, кӧ рʹьнд гӧһ дьданә мьн. Хьзмәти һʹәта иро мьнрʹа ԛәԝат у шабуне тинә.

Сала 1998-да, әз у Каролина Монреаледа ча пешәнгед һәртʹьм һатьнә кʹьфшкьрьне. Гәләк сала шьхӧле мьн әԝ бу, ԝәки щийед кӧ гәләк мәрьв һәбун, хьзмәтийе организә кьм, у ӧса жи медйайерʹа дәрһәԛа Шәʹдед Йаһоԝа информасийа рʹаст бьдьм, чьмки гәләк тьштед нәрʹаст дәрһәԛа мә бәла дькьрьн. Әз у Каролина ньһа мьзгинийе бәла дькьн ԝан хәрибарʹа, йед кӧ тʹәзә дәрбази Канадайе дьбьн у дьхԝазьн дәрһәԛа Кʹьтеба Пироз һе зедә пебьһʹәсьн.

Чахе әз дәрһәԛа 68 салед хԝәйә хьзмәтийе дьфькьрьм, әз дьвиньм Йаһоԝа ча әз кʹәрәм кьрьмә. Әз ӧса бәхтәԝар ьм, кӧ мьн хьзмәти һʹьз кьр у мьн али гәләка кьрийә кӧ бенә сәр рʹийа рʹаст. Һьн жи чахе ԛиза мьн Лиз у мере ԝе зарʹед хԝә мәзьн кьрьн, ԝана жи пешәнгти дәстпекьр. Хирәта ԝе хьзмәтийеда, шабуне дькә дьле мьн. Әз ӧса жи гәләк жь ԝан Мәсиһийа рʹази мә, йед кӧ мьнрʹа мәсәла баш бун у ширәтед билани дьданә мьн. Бь сайа ве йәке әз рʹӧһʹанида һе пешда чум у мьн щурʹә-щурʹә кʹьфшкьрьнада хьзмәт кьрийә. Мьн фәʹм кьр, ԝәки әм дькарьн бь амьни кʹьфшкьрьна хԝә бәрдәԝам кьн, тʹәне һәрге итʹбарийа хԝә ԛәԝата рʹӧһʹе Йаһоԝайи пироз биньн (Зәб. 51:11). Әз һәр гав рʹазибуна хԝә Йаһоԝарʹа дьдьм кʹьфше, чьмки әԝи ԛәдьрәки ӧса да мьн, ԝәки наве ԝи рʹумәт кьм (Зәб. 54:6).