1-2. Әм чаԝа дькарьн пʹегәһа Иса Мәсиһда һәрʹьн? Мәсәле бинә.

БЬДӘ бәр чʹәʹве хԝә кӧ тӧ у кәсед дьн, һун чоләкә хофрʹа нав бәрфеда рʹе дьчьн. Рʹебәрәки щерʹьбанди рʹебәрийа ԝә дькә, ле әԝ щарна жь бо мьж у думане бәр чʹәʹва ӧнда дьбә. Диса жи, тӧ натьрси, чьмки һун пʹегәһа ԝи дьвиньн, у һун хирәт дькьн кӧ пʹегәһа ԝида һәрʹьн.

² Әв дьнйа хьраб мина чоләкә хоф ә. Шькьр кӧ Иса Мәсиһ Рʹебәре мә йә, у әм дькарьн «пʹегәһа ԝида һәрʹьн» (1 Пәтрус 2:21). Ль гора канике, Пәтрусе шанди ль ве рʹезе Иса Мәсиһ бәрамбәри рʹебәрәки дькә. Чаԝа кӧ рʹебәр пʹегәһа хԝә дьһелә, Иса Мәсиһ жи пʹегәһа хԝә һиштийә, ԝәки әм бькарьбьн «пʹегәһа ԝида һәрʹьн». Гәло әԝ чь те һʹәсабе, чьрʹа фәрз ә кӧ әм ве йәке бькьн у әм чаԝа дькарьн ве йәке бькьн?

3. Чь те һʹәсабе пʹегәһа кәсәкида һәрʹьн?

³ Дь Ньвисаред Пирозда, готьнед «рʹе чуйин» у «гав авитьн» щар щара жь бо рʹийа жийине тенә хәбьтандьне (Дәстпебун 6:9; Зәбур 119:59). Кәсе кӧ мәсәла дьһелә, ча бежи пʹегәһа хԝә дьһелә гава әԝ рʹе дьчә. Ләма, һәгәр әм ль сәр пʹегәһа кәсәки дьчьн, әв йәк те һʹәсабе кӧ әм ԝи хԝәрʹа дькьн мәсәлә у чʹәʹв дьдьнә ԝи.

4. Чь те һʹәсабе пʹегәһа Иса Мәсиһда һәрʹьн?

⁴ Гәло чь те һʹәсабе пʹегәһа Иса Мәсиһда һәрʹьн? Кьн бежьн, әԝ те һʹәсабе чʹәʹв бьдьнә мәсәла Иса. Ль рʹеза сәрәкә йа ве готаре, Пәтрусе шанди һәри зедә дина мә дькʹьшинә сәр сәбра Иса Мәсиһ. Ле һьлбәт лазьм ә кӧ әм Иса дь алийед дьнва жи хԝәрʹа бькьн мәсәлә (1 Пәтрус 2:18-25). Бь рʹасти, тʹәмамийа әʹмьре Иса, һʹәму готьн у кьрьнед ԝи мәрʹа мәсәлә нә.

5. Гәло дьбә кӧ мәрьвед гӧнәкʹар ль гора мәсәла беԛьсур йа Иса Мәсиһ бьжин?

 ⁵ Әм мәрьвнә гӧнәкʹар ьн, гәло әм дькарьн чʹәʹв бьдьн мәсәла Исайе беԛьсур? Бәле! Әм һьлбәт нькарьн бь щурʹәки беԛьсур чʹәʹв бьдьнә Иса, ле йәкә әм дькарьн пʹегәһа ԝида һәрʹьн. Бона ве йәке, лазьм ә кӧ әм чь жь дәсте мә те бькьн ԝәки чʹәʹв бьдьнә ԝи. Йуһʹәннайе шанди ӧса готьбу: «Әԝе кӧ дьбежә: ‹Әз нава ԝида мә›, гәрәке ӧса бьжи, чаԝа Иса жит» (1 Йуһʹәнна 2:6).

6-7. Әм чьрʹа дькарьн бежьн кӧ һәгәр әм пʹегәһа Исада һәрʹьн, әме дьһа незики Йаһоԝа бьн?

⁶ Һәгәр әм пʹегәһа Исада һәрʹьн, әме дьһа незики Йаһоԝа бьн. Ле чаԝа? Бь жийина хԝә, Иса мәрʹа мәсәлә һишт кӧ әм чаԝа дькарьн дьле Хԝәде ша бькьн (Йуһʹәнна 8:29). Ләма, һәгәр әм пʹегәһа Исада һәрʹьн, Йаһоԝа ԝе жь мә рʹази бә. Әм дькарьн баԝәр бьн кӧ һәгәр әм хирәт бькьн кӧ бьбьн достед Хԝәде, әԝе дьһа незики мә бә (Аԛуб 4:8).

⁷ Иса Мәсиһ беԛьсур бу у бь тʹәмами чʹәʹв дьда Баве хԝә. Ләма жи, Иса ӧса гот: «Йе кӧ әз дитьмә, Бав дитийә» (Йуһʹәнна 14:9). Ԝе баш бә кӧ әм чʹәʹв бьдьнә рʹабун-рʹуньштьна Иса Мәсиһ. Мәсәлә, дьле ԝи бь мерәки кʹоти, бь жьнькәкә нәхԝәш у бь кәсед кӧ шине дькьр, шәԝьти. Гава әм чʹәʹв дьдьнә Иса, әм ӧса жи чʹәʹв дьдьнә Йаһоԝа (Марԛос 1:40, 41; 5:25-34; Йуһʹәнна 11:33-35). Чьԛас зедә әм чʹәʹв бьдьнә хәйсәт-һʹӧнӧред Йаһоԝа, һаԛас һе зедә әме незики ԝи бьн.

8. Чуйина ль сәр пʹегәһа Иса чаԝа дькарә али мә бькә кӧ әм ве дьнйайе «бьндәст» бькьн?

⁸ Һәгәр әм пʹегәһа Исада һәрʹьн, әв йәк ԝе али мә бькә кӧ әм нәкʹәвьн бәр  байе ве дьнйа хьраб. Ль шәва пашьн пешийа мьрьна хԝә, Иса Мәсиһ ӧса гот: «Мьн дьнйа кьрә бьндәсте хԝә» (Йуһʹәнна 16:33). Демәк, әԝ нәкʹәтә бьн һʹӧкӧме фькьр, нет у кьрьнед ве дьнйайе. Әԝи тʹӧ щара бир нәдькьр кӧ әԝ һатә дьнйайе сәва кӧ наве Йаһоԝа пироз бькә. Ве дьнйайеда, гәләк тьшт дькарьн дина мә бькʹьшиньн сәр хԝә. Ле һәгәр әм мина Иса Мәсиһ дина хԝә бьдьн ԛьрара Хԝәде, әме жи ве дьнйайе «бьндәст» бькьн (1 Йуһʹәнна 5:5).

9. Сәва кӧ әм ль сәр рʹийа жийина һʹәта-һʹәтайе бьминьн, гәрәке әм чь бькьн?

⁹ Һәгәр әм ль сәр пʹегәһа Исада һәрʹьн, әме жийина һʹәта-һʹәтайе бьстиньн. Щарәке, гава хортәки дәԝләмәнд пьрси кӧ әԝ гәрәке чь бькә ԝәки жийина һәрһәйи бьстинә, Иса Мәсиһ ӧса щаб да: «Пәй мьн ԝәрә» (Мәтта 19:16-21). Гава һьнә Щьһуйа баԝәр нәдькьр кӧ Иса бь рʹасти Мәсиһе создайи йә, әԝи ԝанрʹа гот: «Пәзед мьн . . . пәй мьн тен. Әз жийина һʹәта-һʹәтайе дьдьмә ԝан» (Йуһʹәнна 10:24-29). Иса Мәсиһ Ферьсики бь наве Никодеморʹа гот кӧ «һәр кәсе кӧ ԝи баԝәр бькә» ԝе жийина һәрһәйи бьстинә (Йуһʹәнна 3:16). Гава әм ль гора мәсәлә у һинкьрьнед Иса Мәсиһ дьжин, әм нишан дькьн кӧ әм баԝәрийа хԝә ԝи тиньн. Һәгәр әм ӧса бькьн, әме ль сәр рʹийа жийина һʹәта-һʹәтайе бьминьн (Мәтта 7:14).

10. Гәло әм чаԝа дькарьн Иса рʹьнд нас бькьн?

¹⁰ Сәва кӧ әм бькарьбьн пʹегәһа Исада һәрʹьн, гәрәке әм ԝи рʹьнд нас бькьн (Йуһʹәнна 17:3 бьхунә). Пʹьрʹ фәрз ә кӧ әм ԝи дьһа баш нас бькьн у дәрһәԛа һʹӧнӧр, фькьр у принсипед ԝи һин бьн. Фьрԛи тʹӧнә кӧ әм чәнд сал сәр рʹийа рʹастийе нә, гәрәке әм бәрдәԝам кьн хирәт бькьн кӧ Йаһоԝа у Кӧрʹе ԝи рʹьнд нас бькьн.

11. Чар кʹьтебед пешьнә Мьзгини бәʹса чь дькьн?

¹¹ Йаһоԝа чар кʹьтебед жь Мьзгини данә мә, ԝәки әм Кӧрʹе ԝи рʹьнд нас бькьн. Әв чар кʹьтеб мә һин дькьн кӧ Иса чь дькьр, чь дьгот у чь тʹәхмин дькьр. Бь ви щурʹәйи, әԝ кʹьтеб али мә дькьн кӧ әм дина хԝә бьдьн мәсәла Иса Мәсиһ (Ибрани 12:3). Бәле, әм дькарьн бежьн кӧ «пʹегәһа» кӧ Иса мәрʹа һиштийе, ван кʹьтебада нә! Ләма, сәва кӧ әм дьһа баш Иса нас бькьн, гәрәке әм ԝан кʹьтеба рʹьнд леколин бькьн. Әв йәк ԝе али мә бькә кӧ әм чʹәʹв бьдьнә ԝи у пʹегәһа ԝида һәрʹьн.

12. Әм чаԝа дькарьн жь чар кʹьтебед Мьзгини кʹаре бьстиньн?

¹² Сәва кӧ әм жь ван чар кʹьтеба кʹаре  бьстиньн, нә бәс ә кӧ әм ван тʹәне бьхуньн. Гәрәке әм вана кʹур леколин бькьн у ль сәр ван кʹур бьфькьрьн (Йешу 1:8). Ньһа әме чәнд ширәта бьвиньн, кӧ әм чаԝа дькарьн ль сәр ван чар кʹьтеба кʹур бьфькьрьн у ль гора тьштед кӧ әм һин дьбьн, бьжин.

13. Тӧ чаԝа дькари готьнед жь чар кʹьтебед Мьзгини бьди бәр чʹәʹве хԝә?

¹³ Йа йәке, ԛәԝьмандьнед жь ԝан кʹьтеба бьдә бәр чʹәʹве хԝә. Бьвинә, бьбьһе у тʹәхмин кә кӧ ԝи чахи чь ԛәԝьми. Бона ве йәке, ль әʹдәбйәтед тʹәшкиләта Йаһоԝа легәрʹине бькә. Гава тӧ пʹарәке леколин дьки, дина хԝә бьдә контексте, демәк ԛәԝьмандьнед кӧ пешийа у паше ве йәке ԛәԝьмин. Информасийа дәрһәԛа мәрьв у щийед кӧ әв чар кʹьтеб бәʹса ԝан дькьн, бьгәрʹә. Ве пʹара кӧ тӧ леколин дьки бәрамбәри рʹезед маргинал бькә, йед кӧ бәʹса ве сәрһатийе дькьн. Щарна, кʹьтебәкеда ньвискʹар бәʹса һьнә тьштед фәрз дькә, йед кӧ кʹьтебед дьнда дәрбаз набьн.

14-15. Гәрәке әм чь бькьн кӧ дәрсед жь чар кʹьтебед Мьзгини, әʹмьре хԝәда бьдьнә хәбате?

¹⁴ Йа дӧда, дәрсед жь ԝан кʹьтеба әʹмьре хԝәда бьдә хәбате (Йуһʹәнна 13:17). Паши кӧ тӧ сәрһатики жь Мьзгини леколин ки, жь хԝә бьпьрсә: «Гәло әз дькарьм жь ве сәрһатийе чь дәрсе һин бьн, у әз чаԝа дькарьм ль гора тьштед кӧ әз һин дьбьм, бьжим? Әз чаԝа дькарьм ван готьна бьдьмә хәбате, ԝәки али кәсәки дьн бькьм?» Тӧ дькари пешда дәрһәԛа кәсәки бьфькьри, у ль ԝәхтәкә баш, бь һʹьзкьрьн у нәрми бәʹса дәрсед кӧ тӧ һин буйи, бьки.

¹⁵ Гәло әм чаԝа дькарьн ван дӧ метода бьдьнә хәбате? Ньһа, әме ль сәрһатийа жьнәбикә бәләнгаз бьньһерʹьн, йа кӧ Иса Мәсиһ бәʹса ԝе кьрьбу.

16. Дәрәща жь Марԛос 12:41 гьли кьн.

¹⁶ Сәрһатийе бинә бәр чʹәʹве хԝә (Марԛос 12:41 бьхунә). Ве дәрәще бьдә бәр чʹәʹве хԝә: 11 Нисане сала 33 Д.М. йә, чәнд рʹож пешийа мьрьна Иса Мәсиһ. Иса һатийә пʹарьстгәһе, ԝәки мәрьва һин бькә. Сәрԝеред дине Щьһуйа дьхԝәстьн ԝи бь пьрса бькьнә тʹәльке. Мәсәлә, ԝана пьрси кʹа әԝи һʹӧкӧме хԝә жь кʹӧ дәре стандийә (Марԛос 11:27-33; 12:13-34). Паше, Иса ль пʹарьстгәһе дәрбази щики дьн дьбә. Ча те кʹьфше, әԝ ньһа ль Һәԝша Жьнада йә. Ль ԝе дәре, дина ԝи сәр пʹәрәданка йә, йед кӧ ль бәр диԝаред һәԝше һатьнә данин. Әԝ рʹудьне у дина хԝә дьдә мәрьвед кӧ пʹәра давежьн ван пʹәрәданка. Гәләк мәрьвед дәԝләмәнд гәләк пʹәра давежьн. Дьԛәԝьмә дәнге шьнгәшьнга пʹәра кӧ дькʹәвьн пʹәрәданка дькʹәвә гӧһе ԝи.

17. Ль гора Марԛос 12:42, жьнәбийа кʹәсиб чь кьр?

¹⁷ Марԛос 12:42 бьхунә. Паши дәмәке, Иса дина хԝә дьдә «бәләнгазәкә жьнәби» (Луԛа 21:2). Жийина ԝе гәләк зәʹмәт ә. Ча те кʹьфше жерʹа чәтьн ә кӧ әʹбура хԝә бькә. Диса жи, әԝ незики пʹәрәданке дьбә у дӧ полед бьчʹук давежә һӧндӧр. Әв пʹәрә һаԛас сьвьк ьн кӧ әԝ бе дәнг дькʹәвьн бьне пʹәрәданке. Иса занә кӧ әԝе чь авитийә – дӧ пол, демәк пʹәред һәри бьчʹук, йед кӧ ль ԝе дәме һәбун. Әв дӧ пол тʹера чʹьвикәкә бьчʹук жи нәдькьр, йед кӧ бона хԝарьне дьһатьн фьротьн.

18. Ль гора Марԛос 12:43, 44, Иса дәрһәԛа жьнәбийе чь гот?

¹⁸ Марԛос 12:43, 44 бьхунә. Кьрьнед ве жьнәбийе дьле Иса Мәсиһ дьгьрьн. Ләма, әԝ гази шагьртед хԝә дькә у дина ԝан дькʹьшинә сәр ԝе. Әԝ дьбежә: «Әве жьнәбийа бәләнгаз жь ван һʹәмуйа зәʹфтьр авитә пʹәрәданге, ван [илаһи йед дәԝләти] һʹәмуйа жь зедәйа һәбука хԝә авитьне. Ле әве ве бәләнгазийа хԝәда чи ԝе һәбу кӧ пе әʹбуре хԝә бькьра һʹәму авите». Гава ве жьнәбийа амьн пʹәре хԝә йе пашьн авитә пʹәрәданке, әԝе нишан кьр кӧ бь тʹәмами итʹбарийа хԝә Йаһоԝа тинә кӧ әԝ ԝе бона ԝе хәм бькә (Зәбур 26:3).

19. Әм дькарьн жь готьнед Иса Мәсиһ йед дәрһәԛа жьнәбийа бәләнгаз чь дәрса фәрз һин бьн?

¹⁹ Жь ве сәрһатийе дәрсе һин бә. Жь хԝә бьпьрсә: «Гәло әз чь дәрсе жь готьнед Иса Мәсиһ дәрһәԛа жьнәбийа бәләнгаз дькарьм бьстиньм?» Дәрһәԛа ве жьнәбийе бьфькьрә. Әԝе бешьк дьхԝәст дьһа зедә тьшт бьда Йаһоԝа. Диса жи, әԝе чь жь дәсте ԝе дьһат, кьр. Әԝе тьште һәри баш, йе кӧ дәсте ԝеда һәбу, да Йаһоԝа. Ӧса жи, Иса заньбу кӧ Баве ԝи ԛӧрбанкьрьна ве жьнәбийе ԛимәт дькьр. Дәрсәкә фәрз әв ә: һәгәр әм бь дьл у щан Йаһоԝарʹа хьзмәт бькьн, әԝ ԝе жь мә рʹази бә (Мәтта 22:37; Колоси 3:23). Гава әм ԝәхт у ԛәԝата хԝә чьԛас жь дәсте мә те бона хьзмәт у щьвина хәрщ дькьн, Йаһоԝа гәләк ша дьбә.

20. Тӧ чаԝа дькари дәрса жь сәрһатийа жьнәбийа бәләнгаз бьди хәбате?

²⁰ Тӧ чаԝа дькари дәрса жь сәрһатийа жьнәбийе бьди хәбате? Дәрһәԛа ԝан һьнә хушк-бьра бьфькьрә, йед кӧ хәмгин ьн, чьмки әԝана ида нькарьн ча бәре Йаһоԝарʹа хьзмәт бькьн. Мәсәлә, дьбәкә ль щьвата тә хушкәкә әʹмьрда мәзьн һәйә, йа кӧ хԝә бекер һʹәсаб  дькә, чьмки сьһʹәта ԝе ида изне наде кӧ әԝ ча бәре дәркʹәвә хьзмәте. Йан жи, бьрак дьбәкә сәва нәхԝәшикә кʹроники нькарә бе һʹәму щьвина. Бь гьлийед ширьн, әм дькарьн хушк-бьред ӧса бьшьдиньн у бь ԝи щурʹәйи «аликʹарийа һәвдӧ бькьн» (1 Тʹесалоники 5:11). Ԝанрʹа бәʹса тьштед кӧ әм жь сәрһатийа жьнәбийа бәләнгаз һин бунә, бькә. Готьнед тә дькарьн дьл бьдьнә ԝан у нишан кьн кӧ Йаһоԝа жь ԝан рʹази йә, гава әԝана бона ԝи чь жь дәсте ԝан те дькьн (Мәтʹәлок 15:23). Бәле, хьзмәта хушк у бьра гәләк бә йан һьндьк бә, гава тӧ пʹайе хирәта ԝан дьди, тӧ бь ви щурʹәйи чʹәʹв дьди Иса.

21. Ԝе баш бә кӧ әм чь бькьн?

²¹ Әм гәләк ша нә кӧ чар кʹьтебед жь Мьзгини дәрһәԛа жийина Иса Мәсиһ һаԛас тьштед һур гьли дькьн. Бь сайа ве йәке, әм дькарьн чʹәʹв бьдьнә Иса у пʹегәһа ԝида һәрʹьн. Тӧ дькари ван кʹьтебед жь Мьзгини ԝәʹде леколина хԝәйә шәхси йан ԝәʹде Ԛӧльхкьрьна тʹәви Малбәте леколин бьки. Бир нәкә, сәва кӧ тӧ жь леколинәкә ӧса кʹаре бьстини, гәрәке тӧ ԝан сәрһатийа бьди бәр чʹәʹве хԝә у дәрсед кӧ тӧ һин дьби дь жийина хԝәда пек бини. Ле хенщи ве йәке кӧ әм кьрьнед Иса Мәсиһ хԝәрʹа дькьн мәсәлә, гәрәке әм гӧһ бьдьн готьнед ԝи жи. Готара дьнда, әме дина хԝә бьдьн готьнед хьлазийе, йед кӧ Иса пешийа мьрьна хԝә гот.