1. Йаһоԝа дьхԝазә кӧ хьзмәткʹаред ԝи чь бькьн? (Бьньһерʹә ӧса жи шькьл.)

 ГАВА әм һʹәԝще рʹебәрийе у бәрдьлийе нә, гәло әм дькарьн аликʹарийе жь кʹе бьхԝазьн? Әм щаба ве пьрсе заньн, әм дькарьн Йаһоԝа Хԝәдерʹа дӧа бькьн. Йаһоԝа дьхԝазә кӧ әм «һәр гав дӧа бькьн» (1 Тʹесалоники 5:17). Әм дькарьн аза дьле хԝә ԝирʹа вәкьн у жь ԝи лава кьн, кӧ рʹебәрийа мә бькә (Мәтʹәлок 3:5, 6). Йаһоԝа гәләк мәрʹд ә, ләма жи әм кʹәнге у чьԛас бьхԝазьн дькарьн ԝирʹа дӧа бькьн.

2. Ве готареда әме дина хԝә бьдьнә чь?

² Әм гәләк жь Йаһоԝа рʹази нә, кӧ әԝи изьн дайә мә ԝирʹа дӧа бькьн. Ле жь бо ве йәке кӧ шьхӧлед мә гәләк ьн, мәрʹа һеса нинә ԝәʹдә бона дӧакьрьне бьвиньн. Ӧса жи дьбәкә әм тедәрдьхьн, кӧ әм гәрәке дӧайед хԝә дьһа баш кьн. Ве йәкеда Кʹьтеба Пироз дькарә али мә бькә. Ве готареда әме пебьһʹәсьн, кӧ чаԝа мина Иса бона дӧакьрьне ԝәʹдә бьвиньн. Ӧса жи, әме дина хԝә бьдьнә пенщ тьштед фәрз, йед кӧ дькарьн али мә бькьн дӧайед хԝә баш кьн.

3. Иса дәрһәԛа дӧа чь заньбу?

³ Иса заньбу ԝәки Йаһоԝа дӧайед мә гәләк ԛимәт дькә. Пешийа кӧ әԝ һатә сәр әʹрде, әԝи дьдит кӧ Баве ԝи Йаһоԝа, чаԝа щаба дӧайед мәрьвед амьн дьдә. Мәсәлә, гава Иса кʹеләка Баве хԝә бу, әԝи дьдит кӧ Әԝ чаԝа щаба дӧайед Һанна, Даԝьд у Елйас дьдә, чахе ԝана жь дьл дӧа дькьр (1 Самуйел 1:10, 11, 20; 1 Пʹадшати 19:4-6; Зәбур 32:5). Ләма жи, Иса шагьртед хԝәрʹа гот, ԝәки әԝана тʹьме дӧа бькьн у баԝәр кьн, кӧ Хԝәде дәнге ԝан дьбьһе! (Мәтта 7:7-11)

4. Әм жь дӧайед Иса чь һин дьбьн?

 ⁴ Иса мәсәләкә баш шагьртед хԝәрʹа һишт, кӧ чаԝа дӧа бькьн. Әԝи гәләк щар дӧа дькьр. Иса ԛә бәтал нәдьма, чьмки гәләк мәрьв дьһатьн щәм ԝи, у ләма жи лазьм бу, кӧ әԝ бона дӧакьрьне ԝәʹдә бьвинә (Марԛос 6:31, 45, 46). Мәсәлә, әԝ бәрбанге рʹадьбу, ԝәки башԛә дӧа бькә (Марԛос 1:35). Щарәке, пешийа кӧ сафикьрьнәкә фәрз бькә, әԝи тʹәмамийа шәве дӧа дькьр (Луԛа 6:12, 13). Ӧса жи, шәва пешийа мьрьна хԝә Иса гәләк щара дӧа дькьр, сәва кӧ щабдарийа хԝәйә һәрә фәрз бинә сери (Мәтта 26:39, 42, 44).

5. Гава әм дӧа дькьн, әм чаԝа дькарьн чʹәʹв бьдьнә Иса?

⁵ Мәсәла Иса нишан дькә, кӧ чьԛас жи шьхӧлед мә һәбьн, әм гәрәке бона дӧакьрьне ԝәʹдә бьвиньн. Мина Иса, әм жи дькарьн бона дӧакьрьне мәщала бьвиньн. Мәсәлә, әм дькарьн шәбәԛе һьнәки зу рʹабьн, йан жи пешийа рʹазане ԝәʹдә бона дӧакьрьне вәԛәтиньн. Ӧса әме Йаһоԝарʹа бьдьнә кʹьфше, кӧ әм мәщала дӧакьрьне ԛимәт дькьн. Хушкәкә бь наве Лин, чахе пеһʹәсийа ԝәки дӧа чьԛас ԛимәт ә, әԝ гәләк ша бу. Әԝ дьбежә: «Гава әз пеһʹәсийам, кӧ әз дькарьм һәр гав Йаһоԝарʹа дӧа кьм, мьн дәстпекьр Ԝи ча досте хԝәйи незик һʹәсаб кьм у мьн хԝәст дӧайед хԝә дьһа баш кьм». Бешьк, гәләк жь мә ӧса тʹәхмин дькьн. Ньһа әме дина хԝә бьдьнә пенщ тьшта, дәрһәԛа кʹижана әм дькарьн дӧа бькьн.

6. Ль гора Әʹйанти 4:10, 11, Йаһоԝа һежа йи чь йә?

⁶ Пәсьне Йаһоԝа бьдә. Дитьнокеда Йуһʹәннайе шанди дит, кӧ 24 рʹуспи сәр әʹзмана сәре хԝә бәр Йаһоԝа датиньн. Ԝана пәсьне Хԝәде дьда у дьгот кӧ тʹәне Хԝәде һежа йә ԝәки «рʹумәт, һӧрмәте у ԛәԝате» бьстинә (Бьхунә Әʹйанти 4:10, 11). Бәле, гәләк мәʹнийед мәләка жи һәнә, кӧ пәсьн у рʹумәте бьдьнә Йаһоԝа. Әԝана сәр әʹзмана кʹеләка ԝи нә у ԝи рʹьнд нас дькьн. Әԝана һʹӧнӧред Хԝәде бь сайа кьред ԝи дьвиньн. У әв йәк ԝана һелан дькә пәсьне Йаһоԝа бьдьн (Ибо 38:4-7).

7. Әм дькарьн бона чь пәсьне Йаһоԝа бьдьн?

 ⁷ Әм жи гәрәке дӧайед хԝәда пәсьне Йаһоԝа бьдьн у ԝирʹа бежьн, кӧ әм чьрʹа ԝи һʹьз дькьн у ԛәдьре ԝи дьгьрьн. Чахе тӧ Кʹьтеба Пироз дьхуни у сәр дьфькьри, дина хԝә бьдә һʹӧнӧред Йаһоԝа, кʹижанарʹа тӧ фьрнаԛ дьби (Ибо 37:23; Рʹомайи 11:33). Паше Йаһоԝарʹа бежә, кӧ әв һʹӧнӧр ча сәр һʹьш у дьле тә һʹӧкӧм дькьн. Ӧса жи, әм дькарьн пәсьне Йаһоԝа бьдьн, чьмки әԝ али мә у хушк-бьра дькә. Әԝ һәртʹьм мә дьбә хԝәйи у мә дьпарезә (1 Самуйел 1:27; 2:1, 2).

8. Әм дькарьн бона чь рʹазибуна хԝә Йаһоԝарʹа бьдьнә кʹьфше? (1 Тʹесалоники 5:18).

⁸ Йаһоԝарʹа рʹазибуна хԝә бьдә кʹьфше. Дӧайед хԝәда, әм дькарьн бона гәләк тьшта рʹазибуна хԝә Йаһоԝарʹа бьдьнә кʹьфше (Бьхунә 1 Тʹесалоники 5:18). Һәр тьште ԛәнщ жь ԝи йә, ләма жи әм дькарьн бона гәләк тьшта рʹазибуна хԝә ԝирʹа бьдьнә кʹьфше (Аԛуб 1:17). Мәсәлә, әм дькарьн рʹазибуна хԝә ԝирʹа бьдьнә кʹьфше, бона бәдәԝийа дьнйайе у щурʹә-щурʹә әʹфрина. Ӧса жи, әм дькарьн рʹазибуне бьдьнә кʹьфше, бона жийине, малбәта хԝә, һәвалед хԝә у һевийа кӧ Хԝәде дайә мә. У әм дьхԝазьн рʹазибуна хԝә Йаһоԝарʹа бьдьнә кʹьфше, кӧ әԝи изьн дайә мә, ԝәки әм бьбьнә достед ԝи.

9. Чьрʹа әм гәрәке рʹазибуна хԝә Йаһоԝарʹа бьдьнә кʹьфше?

⁹ Гәрәке әм кʹур бьфькьрьн, кӧ әм бона чь жь Йаһоԝа рʹази нә. Иро гәләк мәрьв бешекьр ьн. Мәрьв һʹәчʹи зәʹф дина хԝә дьдьнә хԝәстьнед хԝә, нә кӧ рʹази нә бона ван тьшта, чь кӧ щәм ԝан һәйә. Һәрге әм жи тʹәне бькʹәвьнә һʹәйра хԝә, дӧайед мәда ԝе тʹәне хԝәстьнед мә бьн. Сәва кӧ әв йәк нәйе сәре мә, гәрәке әм һәр тьшти, чь кӧ Йаһоԝа дьдә мә, бьшекьриньн у рʹазибуна хԝә бьдьнә кʹьфше (Луԛа 6:45).

10. Чь али хушкәкә мә дькьр, кӧ сәбьр бькә? (Бьньһерʹә ӧса жи шькьл.)

¹⁰ Һәрге әм шекьрдар бьн, әме бькарьбьн һьмбәри тәнгасийа сәбьр кьн. Ԝәрә әм дина хԝә бьдьнә сәрһатийа хушка мә Кйӧнг-сӧк, b йа кӧ бь кʹансәра пʹьшька нәхԝәш кʹәтьбу. Әԝ дьбежә: «Әԝ нәхԝәши гәләк гьран бу. Мьн хԝә ӧса тʹәхмин дькьр, кӧ те бежи мьн һәр тьшт ӧнда кьрьбу, у әз гәләк дьтьрсийам». Гәло чь али ԝе дькьр сәбьр кә? Әԝе гот, кӧ һәр шәв пешийа рʹазане, әԝ һьлдькʹьшийа сәр банийе мала хԝә у бь дәнге бьльнд бона пенщ тьшта дӧа дькьр, сәва чь жи әԝ ве рʹоже рʹази бу. Бь ви щурʹәйи, дьле ԝе рʹьһʹәт дьбу, у әԝе Йаһоԝарʹа дьгот, кӧ әԝ чьԛас ԝи һʹьз дькә. Әԝе фәʹм кьр, кӧ Йаһоԝа рʹожед чәтьнда али хьзмәткʹаред хԝә  дькә. Ӧса жи, әԝе фәʹм кьр, ԝәки жийина ԝеда дьһа зедә кʹәрәм һәнә нә кӧ дәрд. Мина хушка мә Кйӧнг-сӧк, тәнгасийада жи гәләк мәʹни һәнә кӧ әм рʹазибуна хԝә Йаһоԝарʹа бьдьнә кʹьфше. Һәрге әм дӧада рʹазибуна хԝә Хԝәдерʹа бьдьнә кʹьфше, әме бькарьбьн сәбьр кьн у шабуна хԝә ӧнда нәкьн.

11. Чахе Иса вәгәрʹийа әʹзмана, шагьртед ԝи чьрʹа һʹәԝще мерхасийе бун?

¹¹ Бона бәлакьрьна мьзгинийе, жь Йаһоԝа мерхасийе бьхԝазә. Пешийа кӧ Иса вәгәрʹийа әʹзмана, әԝи шагьртед хԝәрʹа диса гот, ԝәки әԝана «жь Оршәлимеда гьрти тʹәмамийа Щьһустане, Самәрйайе у һʹәта сәре дьне» дәрһәԛа ԝи шәʹдәтийе бьдьн (Кʹаред Шандийа 1:8; Луԛа 24:46-48). Һьнә ԝәхт шунда, сәрԝеред Щьһуйа, Пәтрус у Йуһʹәннайе шанди гьртьн у бьрьн бәр диԝана һәри бьльнд йа Щьһуйа. Ԝана әԝ гьртьн у ԝанрʹа готьн, кӧ мьзгинийе бәла нәкьн (Кʹаред Шандийа 4:18, 21). Гәло Пәтрус у Йуһʹәннайе шанди хԝә ча данә кʹьфше?

12. Ль гора Кʹаред Шандийа 4:29, 31, шагьрта чь кьр?

¹² Пәтрус у Йуһʹәннайе шанди ӧса щаба сәрԝеред Щьһуйа дан: «Кʹа һун хԝәха бьфькьрьн, гәло әв йәк бәр Хԝәде рʹаст ә кӧ әм гӧрʹа ԝә бькьн, нә йа Хԝәде? Әм нькарьн бона ԝан тьштед кӧ мә хԝәха дитьн у бьһистьн нәкьнә дәнги» (Кʹаред Шандийа 4:19, 20). Гава Пәтрус у Йуһʹәнна һатьнә бәрʹдане, шагьртед дьн ӧса дӧа кьрьн: «Кʹәрәме хӧламед хԝәрʹа бькә, ԝәки әм меркʹими хәбәра тә хәбәр дьн». Бәле, әв дӧайед ԝан ль гора хԝәстьна Йаһоԝа бун, ләма жи Әԝи щаба дӧайе ԝан да (Бьхунә Кʹаред Шандийа 4:29, 31).

13. Әм жь сәрһатийа бьре Жин-Һйук чь һин дьбьн?

¹³ Һәрге дәԝләт жь мә дәʹԝа кә, ԝәки әм бәлакьрьна мьзгинийе бьдә сәкьнандьне, гәрәке әм мина шагьртед ԛьрʹна йәке, бәрдәԝам кьн мьзгинийе бәла кьн. Ԝәрә әм дина хԝә бьдьнә сәрһатийа бьре мә Жин-Һйук. Әԝи инкʹар кьр әскәрийеда ԛӧльх кә, ләма жи ԝи кьрьнә кәле. Ԝедәре, әԝ кʹьфш кьрьбун, ԝәки бона һʹәԝщед һьнә гьртийа хәм бькә, йед кӧ кәледа башԛә гьрти бун. Ле изьна ԝи тʹӧнә бу дәрһәԛа Кʹьтеба Пироз тʹәви ԝан хәбәр дә. Әԝи Йаһоԝарʹа бона мерхасийе дӧа дькьр, ԝәки мәщала бьвинә ԝан гьртийарʹа шәʹдәтийе бьдә (Кʹаред Шандийа 5:29). Әԝ дьбежә: «Йаһоԝа щаба дӧайед мьн да. Әԝи мерхаси у билани да мьн, ԝәки әз бькарьбьм һинбунед Кʹьтеба Пирозә, ԝәкә пенщ дәԛа бәр дәре һәр гьртики дәрбаз кьм. Ле евара, мьн нәʹмә дьньвиси у рʹожа дьн дьда гьртийа». Әм дькарьн баԝәр бьн, кӧ Йаһоԝа ԝе али мә жи бькә, ԝәки әм хьзмәтийа хԝә биньн сери. Мина Жин-Һйук, әм жи дькарьн бона мерхаси у биланийе дӧа бькьн.

14. Чь дькарә али мә бькә һьмбәри проблема сәбьр кьн? (1 Пәтрус 5:6, 7)

¹⁴ Аликʹарийе жь Йаһоԝа бьхԝазә, ԝәки һьмбәри проблема сәбьр ки. Гәләк жь мә щурʹә-щурʹә дәрда дькʹьшиньн, мәсәлә нәхԝәши, дьлтәнги, мьрьна кәсе незик, дәрдед малбәте, зӧлм, пәйкʹәтьн у чәтьнайед дьн. У тьштед ӧса ча пандәмийа у шәрʹ, дәрдед мә дьһа гьран кьрьн. Дәрәщед ӧсада Йаһоԝарʹа дӧа бькә у дьле хԝә ԝирʹа вәкә. Чаԝа тӧ һәваләки хԝәйи незикрʹа бәʹса хәм у дәрдед хԝә дьки, бь ви щурʹәйи Хԝәдерʹа жи бәʹса хәм у дәрдед хԝә бькә. Тӧ  дькари баԝәр би, ԝәки Йаһоԝа Хԝәде бона тә хәм дькә (Бьхунә 1 Пәтрус 5:6, 7).

15. Дӧа чаԝа дькарә али мә бькә «тәнгасийада сәбьр кьн»? Мәсәләке бинә.

¹⁵ Һәрге әм тʹьме дӧа бькьн, әме «тәнгасийада сәбьр кьн» (Рʹомайи 12:12). Йаһоԝа рʹьнд занә, ԝәки хьзмәткʹаред ԝи чьԛас дәрда дькʹьшиньн, Әԝ «заринийа ԝан дьбьһе» (Зәбур 145:18, 19). Ԝәрә әм дина хԝә бьдьнә сәрһатийа хушка мә Кристина. Әԝ 29 сали йә у ча пешәнг хьзмәт дькә. Ньшкева әԝ ԛайим нәхԝәш кʹәт у кʹәтә депресийа гьран. Паше, әԝе бьһист кӧ дийа ԝе нәхԝәшикә ӧса кʹәтийә, йа кӧ найе ԛәнщкьрьне. Кристина дьбежә: «Сәва кӧ әз һәр рʹож сәбьр кьм, мьн жь дьл Йаһоԝарʹа дӧа дькьр у жь ԝи лава дькьр, кӧ ԛәԝате бьдә мьн. Мьн бәрдәԝам дькьр шьхӧлед рʹӧһʹанива мьжул бьм, һәрʹьм щьвина у һинбуна шәхси дәрбаз кьм». Ӧса жи әԝ дьбежә: «Дӧа али мьн дькьр, кӧ әз рʹожед һәри чәтьнда сәбьр кьм. Мьн заньбу, кӧ Йаһоԝа һәр гав тʹәви мьн ә у әв йәк ԛәԝат дьда мьн. Рʹаст ә, әз зу ԛәнщ нәбум, ле Йаһоԝа әʹдьлайи у дьләки рʹьһʹәт да мьн». Ԝәрә әм тʹӧ щара бир нәкьн, ԝәки Хԝәде ԝе амьнед хԝә «жь щерʹьбандьна хьлаз кә» (2 Пәтрус 2:9).

16. Чьрʹа щерʹьбандьнада мәрʹа аликʹарийа Йаһоԝа лазьм ә?

¹⁶ Аликʹарийе жь Йаһоԝа бьхԝазә, ԝәки щерʹьбандьнада амьн бьмини. Әм мәрьвнә гӧнәкʹар ьн, ләма жи әм гәрәке һәр тьшти бькьн, ԝәки һьмбәри щерʹьбандьна шәрʹ кьн. Дьжмьне мә Мире-щьна чь жь дәсте ԝи те дькә, ԝәки әм щерʹьбандьнада амьн нәминьн. Мәсәлә, әԝ ӧса дькә, ԝәки әм ԝәʹдәдәрбазкьрьнед нәщайизва мьжул бьн. Әԝ дьхԝазә кӧ һʹьше мә тьштед хьрабва тʹьжә бә, ԝәки әм  гӧнед гьран бькьн (Марԛос 7:21-23; Аԛуб 1:14, 15).

17. Һәрге мә дӧа кьрийә, сәва кӧ әм нәкʹәвьн щерʹьбандьне, паши ве йәке әм гәрәке чь бькьн? (Бьньһерʹә ӧса жи шькьл.)

¹⁷ Мәрʹа аликʹарийа Йаһоԝа лазьм ә, ԝәки әм хԝә жь тьштед нәрʹаст дур бьгьрьн. Щарәке Иса Хԝәдерʹа ӧса дӧа кьр: «Мә нәбә щерʹьбандьне, ле мә жь йе хьраб хьлаз кә» (Мәтта 6:13). Йаһоԝа һәртʹьм һазьр ә али мә бькә, ле әм гәрәке бона ве йәке ԝирʹа дӧа бькьн. Ӧса жи, гәрәке әм ль гора дӧайед хԝә һәрәкʹәт бькьн. Әм гәрәке ԛәԝате бьдьнә хәбате, ԝәки гӧһ нәдьн у нәхуньн ван тьшта, йед кӧ дьнйа Мире-щьнада бәла буйи нә, сәва кӧ нәкʹәвьнә бьн һʹӧкӧме фькьред хьраб (Зәбур 97:10). Гава әм Кʹьтеба Пироз дьхуньн у сәр дьфькьрьн, ви чахи фькьред баш дькʹәвьнә һʹьш у дьле мә. Чуйина сәр щьвата у бәлакьрьна мьзгинийе жи дькарьн фькьред мә бьпарезьн. У Йаһоԝа соз дьдә, кӧ әме жь ԛәԝата хԝә дәр нәйенә щерʹьбандьне (1 Корьнтʹи 10:12, 13).

18. Һәр рʹож әм гәрәке чь бькьн у чьрʹа әв йәк гәләк фәрз ә?

¹⁸ Ван рʹожед пашьн у чәтьнда, сәва кӧ әм Йаһоԝарʹа амьн бьминьн, һәр кәс жь мә гәрәке һе зедә дӧа бькә. Һәр рʹож бона дӧакьрьне ԝәʹдә вәԛәтинә. Йаһоԝа дьхԝазә кӧ «әм дьле хԝә ль бәр ԝи вәкьн» (Зәбур 62:8). Пәсьне Йаһоԝа бьдә у бона һʹәму кьред ԝи рʹазибуна хԝә жерʹа бьдә кʹьфше. Бона бәлакьрьна мьзгинийе, мерхасийе жь ԝи бьхԝазә. Жь Йаһоԝа лава бькә кӧ али тә бькә, сәва кӧ тӧ бькарьби һьмбәри һʹәму чәтьнайа сәбьр ки у һәр щурʹә щерʹьбандьнада амьн бьмини. Бьра тʹӧ тьшт у тʹӧ кәс рʹийа тә нәгьрә, ԝәки һәр рʹож Йаһоԝарʹа дӧа бьки. Ле гәло Йаһоԝа чаԝа щаба дӧайед мә дьдә? Готара дьнда, әме щаба ве пьрса фәрз бьстиньн.