1. Йаһоԝа хьзмәткʹаред хԝәйә амьн чаԝа дьһа ԛәԝи дькә?

 ХӘБӘРА Хԝәдеда гәләк щар меред амьн ча кәсед ԛәԝи тенә навкьрьне. Ле щара ԝана жи хԝә бе ԛәԝат тʹәхмин дькьр. Мәсәлә, һьнә дәрәщада Даԝьд Пʹадша хԝә мина чʹийаки ԛәԝи тʹәхмин дькьр, ле һьнә дәрәщада хоф у тьрс дькʹәтә дьле ԝи (Зәбур 30:7). Йаһоԝа бь сайа рʹӧһʹе пироз ԛәԝатәкә мәзьн дабу Шьмшон. Ле Шьмшон заньбу кӧ бе ԛәԝата Хԝәде, әԝе сьст бә у бьбә мина мәрьвед дьн (Һʹакьмти 14:5, 6; 16:17). Әв меред амьн ԛәԝи бун, чьмки Йаһоԝа ԛәԝат дьда ԝан.

2. Паԝлосе шанди чьрʹа гот, кӧ әԝ һьм сьст бу, һьм жи ԛәԝи бу? (2 Корьнтʹи 12:9, 10)

² Паԝлосе шанди заньбу, ԝәки әԝ жи һʹәԝще ԛәԝата Йаһоԝа бу (Бьхунә 2 Корьнтʹи 12:9, 10). Мина гәләка жь мә, Паԝлос жи рʹасти чәтьнайед сьһʹәт-ԛәԝатева гьредайи дьһат (Галати 4:13, 14). Щара ԝирʹа жи чәтьн бу тьштед рʹаст бькә (Рʹомайи 7:18, 19). У щара әԝ бәр хԝә дькʹәт, кӧ ахьрийа ԝи ԝе чаԝа бә (2 Корьнтʹи 1:8, 9). Ле, гава Паԝлос сьст дьбу, әԝ диса жи ԛәԝи дьбу. Гәло чаԝа? Йаһоԝа һаԛас ԛәԝат дьда ԝи, чьԛас ԝирʹа лазьм бу. Әԝи Паԝлос ԛәԝи дькьр.

3. Ве готареда, әме щабед кʹижан пьрса бьстиньн?

³ Йаһоԝа соз дьдә, ԝәки Әԝе мә жи ԛәԝи кә (1 Пәтрус 5:10). Ле бона ве йәке, әм жи гәрәке алийе хԝәда тьштәки  бькьн. Ԝәрә әм дина хԝә бьдьнә мәсәләке: Әʹрәбә бь сайа ԛәԝата моторе дькарә бьхәбьтә. Ле сәва кӧ әʹрәбә пешда һәрә, гәрәке әм пʹели педала газе бькьн. Ԛәԝата Йаһоԝа жи әм дькарьн бәрамбәри ве йәке бькьн. Сәва кӧ әм ве ԛәԝате бьстиньн, гәрәке әм гавед лазьм бавежьн. Демәк әм гәрәке кʹар бькьн, ԝәки Йаһоԝа мә кʹәрәм кә. Гәло Йаһоԝа чаԝа ԛәԝате дьдә мә? Әм гәрәке чь бькьн, ԝәки ве ԛәԝате бьстиньн? Сәва кӧ щабед ван пьрса пебьһʹәсьн, әме дәрһәԛа се сәрһатийа жь Кʹьтеба Пироз шеԝьр кьн, демәк дәрәща Уньс пʹехәмбәр, Мәрйәма дийа Иса у Паԝлосе шанди. Әме ӧса жи шеԝьр кьн, кӧ ча Йаһоԝа иро ԛәԝате дьдә хьзмәткʹаред хԝә.

4. Әм чаԝа дькарьн жь Хԝәде ԛәԝате бьстиньн?

⁴ Щурʹәк кӧ чаԝа әм дькарьн жь Йаһоԝа ԛәԝате бьстиньн, әԝ ә, ԝәки Ԝирʹа дӧа бькьн. Әԝ дькарә ԛәԝатәкә ӧса бьдә мә, кʹижан кӧ жь ԛәԝата мә дәр ә (2 Корьнтʹи 4:7). Ӧса жи, гава әм Хәбәра Хԝәде дьхуньн у кʹур сәр дьфькьрьн, әм ԛәԝате дьстиньн (Зәбур 86:11). Хәбәра Хԝәде «зор ә» (Ибрани 4:12). Һәрге тӧ Йаһоԝарʹа дӧа бьки у Хәбәра ԝи бьхуни, Әԝе ԛәԝате бьдә тә ԝәки тӧ чәтьнайада сәр кʹәви, шабуна хԝә ӧнда нәки, йан жи щабдарикә мәзьн бини сери. Әме ньһа бьвиньн, кӧ чаԝа Йаһоԝа али Уньс пʹехәмбәр дькьр.

5. Уньс пʹехәмбәр чьрʹа һʹәԝще ԛәԝате бу?

⁵ Щарәке Йаһоԝа щабдарикә нә һеса да Уньс, ле әԝи әв щабдари инкʹар кьр у пе гәмийе чу щики дьн. Ләма жи, жь бо ве сафикьрьне һьндьк мабу әԝ у мәрьвед кӧ тʹәви ԝи гәмийеда бун, фьртонеда бьмьрана. Чахе әԝ жь гәмийе һатә авитьне, мәʹсики гәләк мәзьн ԝи даԛӧртанд, у әԝ кʹәтә щийе тәʹри, демәк зьке мәʹси. Гәло һʹале Уньс чаԝа бу? Гәло әԝ дьфькьри кӧ әԝе ԝедәре бьмьрә? Гәло әԝ дьфькьри кӧ Йаһоԝа пьшта хԝә дайә ԝи? Бе шьк, әԝ пьрс гәләк Уньс дьчәрчьрандьн.

6. Ль гора кʹьтеба Уньс 2:1, 2, 7, чахе Уньс зьке мәʹсида бу, чь ԝи ԛәԝи дькьр?

⁶ Гәло Уньс чь кьр, чахе әԝ ве щийе тәʹри у хофда бу? Сәва кӧ ԛәԝате бьстинә, әԝи Хԝәдайе хԝә Йаһоԝарʹа дӧа кьр (Бьхунә Уньс 2:1, 2, 7). Рʹаст ә Уньс гӧһ нәда Хԝәде, ле диса жи әԝ баԝәр бу, ԝәки Йаһоԝа ԝе гӧһ бьдә дӧайе ԝи, чьмки әԝи бь мьлукти шашийа хԝә ани рʹуйе хԝә. Ӧса жи, Уньс сәр Ньвисаред Пироз кʹур дьфькьри. Чьрʹа әм дькарьн ве йәке бежьн? Дӧайе ԝи ньвиси йә кʹьтеба Уньс сәре 2-да, у гьлийед ви щурʹәйи кʹьтеба Зәбурда жи һәнә (Мәсәлә, бәрамбәр кә Уньс 2:2, 5 у Зәбур 69:1; 86:7). Әʹйан ә, ԝәки Уньс ван рʹеза рʹьнд заньбу. Ве дәрәща чәтьнда, әв рʹез баԝәрийа Уньс ве йәкеда ԛәԝи дькьрьн, кӧ Йаһоԝа ԝе әʹсә ԝи хьлаз кә. Чахе мәʹсийа мәзьн Уньс авитә бәр дәве бәʹре, әԝ һазьр бу әв щабдари, кʹижан кӧ Йаһоԝа дабу ԝи, бинә сери (Уньс 2:10–3:4).

7-8. Ԝәʹде чәтьнда, бьраки жь Тәуԝане ча ԛәԝат дьстанд?

⁷ Сәрһатийа Уньс дькарә али мә бькә, гава әм жи рʹасти чәтьнайа тен. Мәсәлә, бьре мә Зиминг b, кʹижан кӧ жь Тәйԝане йә, жь бо сьһʹәт-ԛәԝата хԝәйә хьраб, гәләк чәтьнайа дькʹьшинә. Ӧса жи нәфәред малбәта ԝи, һьндава ԝида нәбаш ьн, чьмки әԝ Йаһоԝарʹа хьзмәт дькә. Гава әԝ дӧа у лекʹолина дькә, әԝ ԛәԝате жь Йаһоԝа дьстинә. Әԝ дьбежә: «Щара, гава чәтьнайи пешда тен, әз  ӧса дьлтәнг дьбьм, кӧ ԛәԝата мьн тʹӧнә ԝәки лекʹолина шәхси бькьм». Ле әԝ хԝә дьсперә Йаһоԝа. Әԝ ӧса жи дьбежә: «Пешийе, әз Йаһоԝарʹа дӧа дькьм. Паше, әз пе бәргӧһка кʹьламед Пʹадшатийе дьбьһем. Щара әз һәла һе жи ԝан кʹьлама пе дәнге ньмьз дьстьрем, һʹәта кӧ дьле мьн рʹьһʹәт бә. У паши ве йәке, әз дәстпедькьм лекʹолина шәхси бькьм».

⁸ Лекʹолина шәхси ԛәԝат дьда бьре мә Зиминг, ԝәки әԝ һьмбәри чәтьнайед хԝә сәбьр кә. Мәсәлә, паши операсийа гьран, аликʹарчийа һʹәким гот, ԝәки ԝирʹа бәридайина хуне лазьм ә, чьмки еритросит хуна ԝида кем ьн. Шәва пешийа операсийа ԝи, Зиминг сәрһатийа хушкәке хԝәнд, дәрәща кʹижане мина йа ԝи бу, ле еритросит хуна ԝеда дьһа кем бун. Йәкә, әԝе бәридайина хуне ԛәбул нәкьр у ахьрийеда ԛәнщ бу. Әв сәрһати Зиминг ԛәԝи кьр, ԝәки әԝ амьн бьминә.

9. Һәрге тӧ жь бо чәтьнайики сьст буйи, тӧ дькари чь бьки? (Бьньһерʹә ӧса жи шькьл.)

⁹ Гәло щара ӧса дьбә, ԝәки тӧ жь бо чәтьнайа, гәләк бәр хԝә дькʹәви у нькари Йаһоԝарʹа дӧа бьки? Йан жи тӧ ӧса дьԝәсти, кӧ ԛәԝата тә тʹӧнә йә лекʹолине бьки? Бир нәкә, Йаһоԝа һʹале тә гәләк баш фәʹм дькә. Дӧайед тә чьԛас кьн бьн жи, тӧ дькари баԝәр би ԝәки Йаһоԝа ԝе бона тә хәм бькә (Әфәси 3:20). Һәрге тӧ жь бо сьһʹәт-ԛәԝата хԝәйә нәбаш, йан жи жь бо дьлтәнгийе нькарьби бьхуни у лекʹолина бьки, тӧ дькари гӧһ бьди аудиойа Кʹьтеба Пироз йан жи әʹдәбйәтед мә. Тӧ ӧса жи дькари сәр jw.org гӧһ бьди кʹьламед мә, йан жи видео бьньһерʹи. Чахе тӧ Йаһоԝарʹа дӧа дьки у щаба дӧайе хԝә әʹдәбйәтада дьгәрʹи, бь ве йәке тӧ мәщале дьди Йаһоԝа, ԝәки Әԝ тә ԛәԝи кә.

10. Хушк-бьред мә ча мә ԛәԝи дькьн?

¹⁰ Йаһоԝа дькарә бь сайа хушк-бьра мә ԛәԝи кә. Гава әм дькʹәвьнә тәнгасийе, йан жи мәрʹа чәтьн ә щабдарике биньн сери, хушк-бьред мә дькарьн бона мә бьбьнә канийа бәрдьлийе (Колоси 4:10, 11). Илаһи ԝәʹде «охьрме гьран» әм һʹәԝще һәвала нә (Мәтʹәлок 17:17). Гава әм хԝә сьст тʹәхмин дькьн, хушк-бьред мә  дькарьн һьм физикида, һьм жи емосийали у рʹӧһʹанида али мә бькьн. Ԝәрә әм дина хԝә бьдьне, кӧ Мәрйәма дийа Иса, ча жь кәсед дьн ԛәԝат дьстанд.

11. Чьрʹа Мәрйәмерʹа ԛәԝат лазьм бу?

¹¹ Сәва кӧ Мәрйәме хԝәстьна Йаһоԝа бьанийа сери, жерʹа ԛәԝат лазьм бу. Мәрйәм һе меркьри нибу, ле мәләке Хԝәде, Щьбрайил, жерʹа гот кӧ әԝе һʹәмлә дәркʹәвә. Дә бьдьнә һʹәсабе хԝә, кӧ жерʹа чьԛас чәтьн бу. Рʹаст ә Мәрйәм ԛә зарʹ мәзьн нәкьрьбу, ле әԝе гәрәке бона кӧрʹәки хәм кьра, кʹижан кӧ ԝе бьбуйа Мәсиһ. Хенщи ве йәке, Мәрйәм бькʹьр бу, у әԝе гәрәке дәргистийе хԝә, Усьврʹа бьгота, кӧ зарʹ ԝе жерʹа бе буйине. Әв йәк бь рʹасти жи һеса нибу (Луԛа 1:26-33).

12. Ль гора Луԛа 1:39-45, Мәрйәме ԛәԝата кӧ жерʹа лазьм бу, чаԝа станд?

¹² Сәва кӧ Мәрйәме әв щабдарийа чәтьн бьанийа сери, гәло әԝе жь кʹе ԛәԝат станд? Әԝе жь кәсед дьн аликʹари станд. Мәсәлә, әԝе бона ве щабдарийе рʹебәри жь Щьбрайил хԝәст (Луԛа 1:34). Паши ԝәʹдәки кьн, әԝ чу дәшта чʹийайе Щьһудайе, сәва кӧ мәрьва хԝә, Елизабете бьвинә. Әв рʹеԝити кʹар жерʹа ани. Елизабете пʹайе Мәрйәме да у жь бина бәр Йаһоԝа, дәрһәԛа ахьрийа кӧрʹе ԝейә нәбуйи, пʹехәмбәртикә хԝәш гот (Бьхунә Луԛа 1:39-45). Мәрйәме гот, кӧ Йаһоԝа «ԛәԝата дәсте хԝә» жерʹа да кʹьфше (Луԛа 1:46-51). Бәле, Йаһоԝа бь сайа Щьбрайил мәләк у Елизабете, Мәрйәме ԛәԝи кьр.

13. Хушка мә Дасури чаԝа жь хушк-бьра аликʹари станд?

¹³ Мина Мәрйәме, тӧ жи дькари жь хушк-бьра ԛәԝате бьстини. Хушкәкә жь Боливйайе бь наве Дасури, һʹәԝще ԛәԝатәкә ӧса бу. Гава баве ԝе жь бо нәхԝәшикә кӧ ԛәнщ набә, кʹәтә нәхԝәшхане, әԝе дьхԝәст щәм ԝи бьминә ԝәки бона ԝи хәм бькә (1 Тимотʹейо 5:4). Әв йәк щара һеса нибу. Әԝ дьбежә: «Гәләк щар ԛәԝата мьн тʹӧнә бу у мьн хԝә бечʹарә тʹәхмин дькьр». Гәло әԝе жь кәсәки аликʹари хԝәст? Серида на. Әԝ дьбежә: «Мьн нәдьхԝәст бона хушк-бьра бьбьмә баргьрани. Мьн хԝәрʹа дьгот: ‹Йе кӧ ԝе али мьн бькә, Йаһоԝа йә›. Ле паше мьн фәʹм кьр, кӧ һәрге әз жь тʹӧ кәси аликʹари нәхԝазьм, әв йәк те һʹәсабе кӧ әз дьхԝазьм тʹьк-тʹәне чәтьнайед хԝә сафи кьм» (Мәтʹәлок 18:1). Дасури сафи кьр һьнә һәвалед хԝәрʹа бәʹса дәрәща хԝә бькә. Әԝ дьбежә: «Хәбәр тʹера мьн накьн бежьм, кӧ Хушк-бьра чьԛас мьн ԛәԝи кьрьн. Ԝана хԝарьн дьани нәхԝәшхане у бь сайа Кʹьтеба Пироз бәр дьле мьнда дьһатьн. Әм чьԛас бәхтәԝар ьн кӧ әм тʹәне ниньн. Әм пʹара малбәта Йаһоԝайә мәзьн ьн. Хушк-бьред мә тʹьме һазьр ьн али мә бькьн, тʹәви мә бьгьрин у пьштгьрийа мә бькьн».

14. Чьма гәрәке әм аликʹарийа рʹуспийа ԛәбул кьн?

¹⁴ Йаһоԝа бь сайа рʹуспийа жи ԛәԝате дьдә мә у мә дьшьдинә. Рʹуспи бона мә пʹешкʹешед жь Хԝәде нә (Ишайа 32:1, 2). Чахе тӧ бәр хԝә дькʹәви, дьле хԝә ԝанрʹа вәкә. Аликʹарийа ԝан бь дьл у щан ԛәбул кә. Бь сайа ԝан, Йаһоԝа дькарә тә ԛәԝи кә.

15. Кʹижан гӧман хьзмәткʹаред Хԝәде ԛәԝи дькә?

¹⁵ Созед Кʹьтеба Пироз гӧмане дьдьнә мә у мә ԛәԝи дькьн (Рʹомайи 4:3, 18-20). Чаԝа хьзмәткʹаред Хԝәде, гӧмана мә әԝ ә, кӧ һʹәта-һʹәтайе йан щьнәтеда сәр әʹрде, йан жи сәр әʹзмана бьжин. Гӧман  али мә дькә, ԝәки әм бәр чәтьнайа сәбьр кьн, мьзгинийе бәла кьн у щабдарийед щьватеда биньн сери (1 Тʹесалоники 1:3). Әԝ гӧман Паԝлосе шанди жи ԛәԝи дькьр.

16. Чьрʹа Паԝлосе шанди һʹәԝще ԛәԝате бу?

¹⁶ Паԝлос һʹәԝще ԛәԝате бу. Гава әԝи Корьнтʹийарʹа нәʹмә ньвиси, әԝи хԝә бәрамбәри дәрданәкә назьк кьр, кӧ жь һʹәрʹийе бу. Әԝ «тәʹли-тәнгийада» бу, «дәрәще бегӧманда» бу, рʹасти пәйкʹәтьна дьһат у «ледайи-кʹәти» бу. У щара әʹмьре ԝи һәла һе бьн хофеда бу жи (2 Корьнтʹи 4:8-10). Паԝлос ԝәʹде рʹеԝитийа хԝәйә сьсийа әв гьли ньвисин. Паши ньвисандьна ван гьлийа жи, тьштед дьһа хьраб һатьн сәре ԝи. Кʹомәкә мәрьва һʹьщуми сәр ԝи кьр, әԝ һатә гьртьне, гәмийа кӧ әԝ теда бу, нӧԛи аве бу у һьндьк мабу әԝ бьхәньԛә у ӧса жи ԝи авитьнә кәле.

17. Ль гора 2 Корьнтʹи 4:16-18, рʹожед чәтьнда чь ԛәԝат дьда Паԝлос?

¹⁷ Паԝлос дина хԝә дьда һевийа хԝә у әԝ йәк ԛәԝат дьда ԝи, ԝәки сәбьр кә (Бьхунә 2 Корьнтʹи 4:16-18). Әԝи Корьнтʹийарʹа ньвиси, кӧ бәдәна ԝи чьԛас бьрʹьзә жи, әԝе мерхасийа хԝә ӧнда нәкә. Паԝлос тʹьме дина хԝә дьда ахьрийе. Һевийа ԝийә жийина сәр әʹзмана «хԝәйийе рʹумәта» гьран бу. Әв һеви һежайи һәр ԛӧрбана бу. Паԝлос дәрһәԛа ве һевийе кʹур дьфькьри. Ләма жи әԝ «рʹож бь рʹож нуйәжийин» дьбу.

18. Һевийа дәрһәԛа ахьрийе чаԝа али Тихомир у малбәта ԝи дькьр?

¹⁸ Бьре мә бь наве Тихомир, йе кӧ жь Булгарьстане йә, бь сайа гӧмане ԛәԝат станд. Чәнд сал пешда, бьре ԝийи бьчʹук Здравко, кʹәтә ԛәзийе у мьр. Паши ве йәке, ԝәхтәки жь бо ве дәрде гьран, Тихомир ешәкә мәзьн дькʹьшанд. Ԝәʹде чәтьнда, әԝи тʹәви малбәта хԝә рʹабуна мьрийа дьданә бәр чʹәʹве хԝә. Әԝ дьбежә: «Мәсәлә, мә дәрһәԛа ве йәке хәбәр дьда, кӧ әме кʹидәре рʹасти Здравко бен, кʹижан хԝарьне жерʹа чекьн, кʹе тʹәглифи сәр кʹефе кьн у дәрһәԛа рʹожед пашьн,  әме чь жерʹа гьли кьн». Тихомир дьбежә, кӧ һеви али малбәта ԝи дькә сәбьр кьн у һивийа ԝе рʹоже бьн, кӧ чахе Йаһоԝа бьре ԝи жь мьрьне рʹакә.

19. Сәва кӧ тӧ һевийа хԝә ԛәԝи ки, тӧ чь дькари бьки? (Бьньһерʹә ӧса жи шькьл.)

¹⁹ Тӧ ча дькари һевийа хԝә дьһа ԛәԝи ки? Һәрге һевийа тә әԝ ә, кӧ һʹәта-һʹәтайе сәр әʹрде бьжийи, готьнед Кʹьтеба Пироз дәрһәԛа Щьнәте бьхунә у кʹур сәр бьфькьрә (Ишайа 25:8; 32:16-18). Бьфькьрә кӧ әʹмьр дьнйа тʹәзәда ԝе чаԝа бә. Бьдә бәр чʹәʹве хԝә, кӧ тӧ жи ԝедәре йи. Тӧ кʹе дьвини ԝедәре? Чь дәнг тенә тә? Тӧ ча хԝә тʹәхмин дьки? Сәва кӧ әԝ һʹәму тьшти бьдьнә бәр чʹәʹве хԝә, әʹдәбйәтед мәда дина хԝә бьдьнә шькьлед Щьнәте, йан жи ван видео-мьԛама бьньһерʹьн, Дьнйа Тʹәзә Незик ә, Әԝ Рʹож Бәр Шемике йә!, йан жи Бьдә бәр Чʹәʹве Хԝә. Һәрге әм тʹьме ԝәʹдә бьвиньн кӧ дьнйа тʹәзә бьдьнә бәр чʹәʹве хԝә, проблемед мә ԝе ԝәʹдәлу у сьвьк бенә кʹьфше (2 Корьнтʹи 4:17). Йаһоԝа ԝе бь сайа ве һевийе, тә ԛәԝи кә.

20. Гава әм сьст ьн жи, әм чаԝа дькарьн ԛәԝате бьстиньн?

²⁰ Щара ԛәԝата мә тʹӧнә, ле «әме пе Хԝәде мерхасийе» бьстиньн (Зәбур 108:13). Сәва кӧ тӧ ԛәԝате бьстини, Йаһоԝа гәләк тьшт бона тә һазьр кьрийә. Гава тӧ щабдарикә хԝә тини сери у рʹасти чәтьнайики тей, бь дьл у щан Йаһоԝарʹа дӧа бькә у бь сайа лекʹолина шәхси рʹебәрийа ԝи бьгәрʹә. Бе шьк, Әԝе али тә бькә, ԝәки тӧ шабуна хԝә ӧнда нәки. Аликʹарийа хушк-бьра ԛәбул кә. Тʹьме ԝәʹдә бьвинә, ԝәки дәрһәԛа һевийе бьфькьри. Паше «һун анәгори тʹәмамийа ԝе ԛәԝата [Хԝәде] кӧ жь зорайийа ԝийә хԝәйирʹумәт те ԛәԝат бьн, кӧ һун һәр тьштида бь думька дьреж сәбьр бькьн» (Колоси 1:11).