1. Йаһоԝа һьндава хьзмәткʹаред хԝәда чаԝа нә?

 ЙАҺОԜА һәр тьшти дьвинә, һьм шабуна мә һьм жи дәрдед мә (Зәбур 37:18). Гава әԝ дьвинә кӧ әм чәтьнайада жи бәрдәԝам дькьн жерʹа хьзмәт кьн, әԝ гәләки ша дьбә. Ӧса жи әԝ һазьр ә бәр дьле мәда бе у али мә бькә.

2. Йаһоԝа бона кәсед дьлтәнг чь дькә, у әм чаԝа дькарьн жь аликʹарийа ԝи кʹаре бьстиньн?

² Зәбур 147:3 дьбежә, ԝәки Йаһоԝа бьринед дьлшкәстийа дьпʹечʹә. Әв рʹез нишан дькә, кӧ Йаһоԝа чаԝа кәсед хәмгин дьбә хԝәйи. Гәло әм гәрәке чь бькьн, ԝәки жь аликʹарийа Йаһоԝа кʹаре бьстиньн? Ԝәрә әм дина хԝә бьдьнә ве мәсәле: Дохдьрәки баш у һостә дькарә али кәсәки бьриндар бькә, ԝәки әԝ ԛәнщ бә. Ле диса жи лазьм ә, ԝәки кәсе бьриндар рʹьнд гӧһ бьдә тʹәмийед дохдьр. Ве готареда әме бьвиньн кӧ бь сайа Кʹьтеба Пироз, Йаһоԝа мәрьвед дьлтәнгрʹа чь дьбежә, у әм чаԝа дькарьн гӧһ бьдьнә ширәтед ԝи.

ЙАҺОԜА МӘ ԚИМӘТ ДЬКӘ

3. Һьнә мәрьв чьрʹа хԝә беԛимәт һʹәсаб дькьн?

³ Иро нава мәрьвада һʹәзкьрьн сар буйә у гәләк кәс хԝә беԛимәт һʹәсаб дькьн. Хушкәкә бь наве Һелен, a ӧса дьбежә: «Әз малбәтәкә ӧсада мәзьн бумә кʹидәреда һʹәзкьрьн тʹӧнә бу. Баве мьн йәки сәрт бу у тʹьме дьготә мьн, кӧ әз һежайи тьштәки ниньм». Гәло тьштед ӧса һатьнә сәре тә жи? Һәрге әре, дьбәкә тәрʹа чәтьн ә баԝәр ки, кӧ кәсәк бь рʹасти тә һʹәз дькә.

4. Ль гора Зәбур 34:18, Йаһоԝа чь соз дьдә мә?

 ⁴ Һәрге һьнә мәрьва хьраби ль тә кьрьнә, диса жи баԝәр бә ԝәки Йаһоԝа гәләки тә һʹәз дькә у тә ԛимәт дькә. Бәле, Әԝ «незики дьлшкәстийа йә» (Бьхунә Зәбур 34:18). Һәрге тӧ хԝә беԛимәт һʹәсаб дьки, бинә бира хԝә ԝәки Йаһоԝа чаԝа дьле тәда ԛәнщи дит у тӧ кʹьшанди бәрбь хԝә (Йуһʹәнна 6:44). Әԝ һәртʹьм һазьр ә бе һәԝара тә, чьмки тӧ бона ԝи гәләк ԛимәт и.

5. Әм чь һин дьбьн жь ве йәке, кӧ Иса һьндава ван мәрьвада чаԝа бу, йед кӧ хԝә ньмьз һʹәсаб дькьрьн?

⁵ Жь мәсәла Иса әм дькарьн дәрһәԛа һәстед Йаһоԝа пебьһʹәсьн. Чахе Иса сәр әʹрде бу, әԝи дина хԝә дьда ԝан мәрьва, кʹижан кӧ хԝә ньмьз һʹәсаб дькьрьн, у дьле ԝи сәр ԝан дьшәԝьти (Мәтта 9:9-12). Гава жьнькәкә нәхԝәш дәст да кʹьнще ԝи, чьмки дьфькьри кӧ ӧса әԝе жь нәхԝәшийа хԝә ԛәнщ бә, Иса бәр дьле ԝеда һат у бона баԝәрийа ԝе пʹайе ԝе да (Маркос 5:25-34). Иса бь тʹәмами чʹәʹв дьдә баве хԝә Йаһоԝа (Йуһʹәнна 14:9). Ләма жи баԝәр бә кӧ Йаһоԝа тә ԛимәт дькә у һʹӧнӧред тәйә баш дьвинә. Мәсәлә, әԝ баԝәрийа тә дьвинә у занә ԝәки тӧ ԝи һʹәз дьки.

6. Һәрге әм хԝә беԛимәт һʹәсаб дькьн, әм чь дькарьн бькьн?

⁶ Һәрге тӧ щарна хԝә беԛимәт һʹәсаб дьки, тӧ чь дькари бьки? Рʹезед кӧ нишан дькьн, ԝәки Йаһоԝа чьԛаси мә ԛимәт дькә, бьхунә у сәр ԝан кʹур бьфькьрә b (Зәбур 94:19). Хԝә бәрамбәри кәсед дьн нәкә у дина хԝә нәдә сәр ван тьшта, чь кӧ тӧ нькари бьки. Йаһоԝа йәки дьлован ә у ван тьшта жь мә дәʹԝа накә, чь кӧ жь ԛәԝата мә дәр ә (Зәбур 103:13, 14). Һәрге кәсәки хьраби ль тә  кьрийә, бона ве йәке хԝә сущдар нәкә. Әв йәк нәһәԛийа тә нинә! Бир нәкә кӧ Йаһоԝа ԝе диԝана кәсед нәһәԛ бькә, нә кӧ йед зьрардити (1 Пәтрус 3:12). Сандра, йа кӧ зарʹотийеда рʹасти нәһәԛийе дьһат, ӧса дьбежә: «Әз тʹьме жь Йаһоԝа аликʹарийе дьхԝазьм, ԝәки ван хәйсәт-һʹӧнӧред баш нав хԝәда бьвиньм, йед кӧ Әԝ нав мьнда дьвинә».

7. Чь дькарә али мә бькә һʹале мәрьва фәʹм кьн?

⁷ Йаһоԝа дькарә тә бьдә хәбате, ԝәки али кәсед дьн бькә. Шьхӧле бәлакьрьна мьзгинийеда тӧ һәвалкʹаре Йаһоԝа йи (1 Корьнтʹи 3:9). Әв йәк кӧ тӧ әʹмьре хԝәда рʹасти гәләк тәнгасийа һати, тӧ дькари һʹале кәсед дьн дьһа баш фәʹм ки. Тӧ дькари щурʹә-щурʹә алийада али мәрьва бьки. Хушка мә Һелене жь кәсед дьн аликʹари стандийә у ньһа хԝәха жи һазьр ә али кәсед дьн бькә. Әԝ дьбежә: «Бәре мьн хԝә беԛимәт һʹәсаб дькьр, ле Йаһоԝа нишани мьн кьр, ԝәки кәсед дьн мьн һʹәз дькьн у әз йәкә ԛимәт ьм». Ньһа Һелен бь шабуне ча пешәнге һәртʹьм хьзмәт дькә.

ЙАҺОԜА ДЬБАХШИНӘ МӘ

8. Ишайа 1:18-да Йаһоԝа чь дьбежә мә?

⁸ Һьнә хьзмәткʹаред Йаһоԝа жь бо шашийен, кӧ ԝана йан бәре йан паши ньхӧмандьне кьрьбун, гәләк дьлтәнг ьн. Ле әм гәрәке бир нәкьн, ԝәки Йаһоԝа ԛӧрбанәкә ԛимәт бона мә дайә, чьмки әԝ мә һʹәз дькә у әԝ дьхԝазә кӧ әм пʹешкʹеша ԝи ԛәбул кьн. Йаһоԝа мәрʹа дьбежә, кӧ һәрге мә ‹доза›, c демәк проблема ортʹа хԝә у ԝида сафи кьрийә, әԝ гӧнед мә бь тʹәмами дьбахшинә (Бьхунә Ишайа 1:18). Бәле, Йаһоԝа гәләк дьлован ә у әԝ гӧнед мәйә бәре найнә бира хԝә! Һьм жи әԝ тʹӧ щар ԛәнщийа мә бир накә (Зәбур 103:9, 12; Ибрани 6:10).

9. Чьма фәрз ә ԝәки әм һʹьш-аԛьле хԝә нәдьнә сәр тьштед бәре?

⁹ Һәрге тӧ жь бо шашийед хԝәйә бәре дьлтәнг дьби, хирәт бькә ԝәки тӧ һʹьш-аԛьле хԝә бьди сәр рʹожа иройин у ахьрийе, нә кӧ сәр тьштед бәре. Ԝәрә әм мәсәла Паԝлосе шанди шеԝьр кьн. Һәмьки әԝ пʹошман дьбу жь бо ве йәке, кӧ әԝи Мәсиһи дьзерандьн, ле әԝи заньбу кӧ Йаһоԝа бахшандийә ԝи (1 Тимотʹейо 1:12-15). Паши ве йәке, гәло әԝ диса жи сәр гӧнед хԝәйә бәре дьфькьри? Әм заньн кӧ Паԝлос сәр пешдачуйинед хԝәйә бәре нәдьфькьри, чахе әԝ Ферьсики хԝәйиԛәдьр бу. Бе шьк, әԝи ӧса жи һʹьш-аԛьле хԝә нәдьда сәр шашийед хԝәйә бәре (Филипи 3:4-8, 13-15). Паԝлос дьһа зедә һʹьш-аԛьле хԝә дьда сәр хьзмәтийа хԝә у дина хԝә дьда сәр ахьрийе. Чаԝа Паԝлос, тӧ жи нькари кьред хԝәйә бәре бьгӧһези. Ле тӧ дькари ирода рʹумәте бьди Йаһоԝа у һивийе би һʹәта әԝ созед хԝә бинә сери.

10. Һәрге мә бәре зьрар дайә һьнә кәса, әм чь дькарьн бькьн?

¹⁰ Дьбәкә тӧ дьлтәнг дьби, чьмки тә зьрар дайә кәсед дьн, йан дьле ԝан ешандийә. Дәрәща ӧсада гәло тӧ чь дькари бьки? Чьԛас жь дәсте тә те, һәр тьшти бькә ԝәки һәләԛәтийа хԝә тʹәви ԝан баш ки у жь дьл бахшандьне бьхԝази (2 Корьнтʹи 7:11). Хенщи ве йәке, жь Йаһоԝа һиви кә, ԝәки әԝ али ԝан мәрьва бькә, дьле кʹижана тә ешандийә. Йаһоԝа дькарә сәбьр у әʹдьлайе һьм бьдә тә, һьм жи кәсед кӧ тә дьле ԝан ешандийә.

11. Әм дькарьн жь сәрһатийа Уньс пʹехәмбәр чь һин бьн? (Бьньһерʹә ӧса жи шькьл.)

 ¹¹ Жь шашийед хԝәйә бәре дәрсе һин бә у изьне бьдә, кӧ Йаһоԝа тә ль гора нета хԝә бьдә хәбате. Сәрһатийа Уньс пʹехәмбәр биньн бира хԝә. Дәԝса кӧ гӧһ бьдә Хԝәде у һәрʹә Нинәԝайе, Уньс рʹәви чу алики дьн. Әԝ жь алийе Йаһоԝава һатә ширәткьрьне у жь шашийа хԝә дәрс станд (Уньс 1:1-4, 15-17; 2:7-10). Йаһоԝа әԝ инкʹар нәкьр, ле диса мәщал да ԝи, ԝәки әԝ һәрʹә Нинәԝайе. Һьнге ида Уньс гӧһ да Хԝәде. Рʹаст ә әԝ бона шашийа хԝә пʹошман дьбу, ле әԝ диса жи һазьр бу, кӧ ве щабдарийе жь Йаһоԝа ԛәбул кә (Уньс 3:1-3).

ЙАҺОԜА БЬ САЙА РʹӦҺʹЕ ПИРОЗ ДЬЛБИНИЙЕ ДЬДӘ МӘ

12. Гава әм рʹасти дәрдәки гьран тен, Йаһоԝа чаԝа дьлбинийе дьдә мә? (Филипи 4:6, 7)

¹² Гава тьштәки хьраб те сәре мә, Йаһоԝа бь сайа рʹӧһʹе пироз дьлбинийе дьдә мә. Дина хԝә бьдьнә сәрһатийа Карол у Рон. Әԝана гәләк дьлшкәсти бун, чьмки кӧрʹе ԝан хԝә кӧшт. Әԝана дьбежьн: «Бәре жи әм рʹасти һьнә тәнгасийа һатьбун, ле әԝ дәрдәки лапи гьран бу. Гәләк щара хәԝ нәдькʹәтә чʹәʹве мә у мә Йаһоԝарʹа дӧа дькьр. Һьнге әʹдьлайикә ӧса дькʹәтә дьле мә, чаԝа Филипи 4:6, 7-да те готьне» (Бьхунә). Гава тӧ рʹасти дәрдәки гьран тейи, тӧ дькари дьле хԝә Йаһоԝарʹа вәки у чьԛас дьхԝази жерʹа хәбәр ди (Зәбур 86:3; 88:1). Тʹьме лава кә, ԝәки әԝ рʹӧһʹе хԝәйи пироз бьдә тә. Йаһоԝа ԝе тʹӧ щар хԝәстьна тә пьшт гӧһе хԝәва нәвежә (Луԛа 11:9-13).

13. Рʹӧһʹе пироз ча дькарә али мә бькә, кӧ әм бь амьни Йаһоԝарʹа хьзмәт кьн? (Әфәси 3:16)

¹³ Гәло тӧ жь бо тәнгасикә хԝә ԛьдум кʹәти? Рʹӧһʹе пироз дькарә ԛәԝате бьдә тә, ԝәки тӧ бькарьби бь амьни Йаһоԝарʹа хьзмәт ки (Бьхунә Әфәси 3:16). Дина хԝә бьде, чь һатьбу сәре хушкәкә мә бь наве Флора. Әԝе тʹәви мере хԝә ча мисйонер хьзмәт дькьр. Ле паше мере ԝе ле һишт у әԝана жь һәв ԛәтийан. Флора дьбежә: «Жь бо нәамьнийа ԝи, әз гәләк дьлшкәсти бум у әԝ йәк жь һʹьше мьн дәрнәдькʹәт. Мьн жь Йаһоԝа лава дькьр, кӧ әԝ рʹӧһʹе пироз бьдә мьн, ԝәки әз бькарьбьм тәйах кьм. Йаһоԝа бьрина дьле мьн ԛәнщ кьр у әз жь ви һʹале бечʹарә дәрхьстьм». Баԝәрийа Флорайе дьһа ԛәԝи бу, у әԝ занә кӧ әԝ рʹасти чь тәнгасийа жи бе, Йаһоԝа ԝе кʹеләка ԝе бә у али ԝе бькә. Әԝ дьбежә ԝәки әв гьлийед Кʹьтеба Пироз нишан дькьн, кӧ ча Йаһоԝа али ԝе кьрийә: «Әзе бьбәзьм рʹийа әʹмьред Тәда, гава зедә ки мьн аԛьлда» (Зәбур 119:32).

14. Әм ча дькарьн изьне бьдьн, ԝәки рʹӧһʹе пироз али мә бькә?

¹⁴ Һәрге тӧ дьхԝази кӧ Йаһоԝа рʹӧһʹе пироз бьдә тә, гәло тӧ чаԝа дькари ль гора ве хԝәстьне һәрәкʹәт бьки? Жь бо ве йәке, гәрәке тӧ кьред ӧсава мьжул би, йед кӧ рʹе вәдькьн ԝәки тӧ һе зедә рʹӧһʹе пироз бьстини. Мәсәлә, гәрәке тӧ һәрʹи щьвина у мәрьварʹа мьзгинийе бәла ки. Ӧса жи тӧ гәрәке Кʹьтеба Пироз һәр рʹож бьхуни, ԝәки фькьред Йаһоԝа бькʹәвьнә дьле тә (Филипи 4:8, 9). Гава тӧ Кʹьтеба Пироз дьхуни, дина хԝә бьдә кәсед кӧ рʹасти тәнгасийа дьһатьн, у тедәрхә кӧ Йаһоԝа чаԝа али ԝан дькьр, ԝәки әԝана сәбьр кьн. Сандра, йа кӧ рʹасти чәнд тәнгасийед гьран һатьбу, ӧса дьбежә: «Сәрһатийа Усьв бь рʹасти жи дьле мьн ԛәԝи дькә. Әԝи изьн нәдьда кӧ тәнгаси у нәһәԛи достийа ԝи тʹәви Йаһоԝа сьст кьн» (Дәстпебун 39:21-23).

 ЙАҺОԜА БЬ САЙА ХУШК-БЬРА ДЬЛБИНИЙЕ ДЬДӘ МӘ

15. Әм жь кʹе дькарьн бәрдьлийе бьстиньн, у әԝана чаԝа дькарьн али мә бькьн? (Бьньһерʹә ӧса жи шькьл.)

¹⁵ Гава әм дәрдәки дькʹьшиньн, әм дькарьн жь хушк-бьра дьлбиникә мәзьн бьстиньн (Колоси 4:11). Йаһоԝа һʹәзкьрьна хԝә мәрʹа бь сайа хушк-бьред мә әʹйан дькә. Гава хушк-бьра гӧһ дьдьнә мә, кʹеләка мә дьсәкьньн, рʹезәкә хԝәш нишани мә дькьн, йан тʹәви мә дӧа дькьн, әм бәрдьлийе дьстиньн d (Рʹомайи 15:4). Щарна дьбәкә хушк йан бьрак бинә бира мә, кӧ ньһерʹандьна Йаһоԝа Хԝәде чь йә, у бь ви щурʹәйи дьле мә рʹьһʹәт кә. Һьнә хушк-бьра бь щурʹед дьн жи дькарьн али мә бькьн. Мәсәлә, гава әм тәнгасийеда ньн, дьбәкә әԝана бона мә хԝарьне һазьр кьн, йан жи бона һʹәԝщед мәйә дьн хәм бькьн.

16. Сәва кӧ әм аликʹарийе бьстиньн, дьбәкә лазьм бә әм чь бькьн?

¹⁶ Сәва кӧ әм аликʹарийа кәсед дьн бьстиньн, дьбәкә лазьм бә ԝәки әм рʹастә-рʹаст аликʹарийе жь ԝан бьхԝазьн. Хушк-бьра мә һʹәз дькьн у һазьр ьн али мә бькьн (Мәтʹәлок 17:17). Ле дьбәкә әԝана ньзаньн кӧ әм чь тʹәхмин дькьн, йан һʹәԝще чь нә (Мәтʹәлок 14:10). Ләма жи дьле хԝә  һәвалед хԝәрʹа вәкә у дәрде хԝә ԝанрʹа гьли кә. Ԝанрʹа бежә тӧ һʹәԝще чь йи. Тӧ ӧса жи дькари тʹәви рʹуспик йан дӧ рʹуспийа хәбәр ди, тʹәви кʹижана тӧ незик и. Һьнә хушк дьлбини стандьнә, гава тʹәви хушкәкә гьһишти хәбәр данә.

17. Чь дькарә бьбә сәбәб, кӧ әм жь хушк-бьра һелане нәстиньн, у әм гәрәке чь бькьн?

¹⁷ Жь бо проблемед хԝә, дьбәкә тӧ щарна дьхԝази тʹәне бьмини. Дьԛәԝьмә хушк-бьра щарна тә нәрʹаст фәʹм кьн йан жи бь гьлийед хԝә дьле тә бешиньн (Аԛуб 3:2). Диса жи хԝә жь хушк-бьра дур нәгьрә. Рʹуспики бь наве Гавин, йе кӧ жь депресийайе дьчәрчьрә, ӧса дьбежә: «Гәләк щар әз ԛә нахԝазьм тʹәви һәвалед хԝә ԝәʹдә дәрбаз кьм». Диса жи Гавин накʹәвә һʹәйра һәстед хԝә, у әԝ жь хәбәрдана тʹәви һәвалед хԝә кʹаре дьвинә. Хушкәкә бь наве Еми ӧса дьбежә: «Рʹуйе тьштед бәреда кӧ һатьбун сәре мьн, мьнрʹа чәтьн ә итʹбарийа хԝә мәрьва биньм. Ле әз һин дьбьм, кӧ мина Йаһоԝа хушк-бьра һʹәз бькьм у итʹбарийа хԝә ԝан биньм. Әз заньм кӧ әв йәк дьле Йаһоԝа ша дькә, у әв йәк дьле мьн жи ша дькә».

СОЗЕД ЙАҺОԜА ДЬЛБИНИЙЕ ДЬДЬНӘ МӘ

18. Зутьрәке Йаһоԝа ԝе чь бькә, у иро әм чь дькарьн бькьн?

¹⁸ Зутьрәке Йаһоԝа ԝе мә бь тʹәмами ԛәнщ кә у жь һʹәму кӧл-дәрда хьлаз кә (Әʹйанти 21:3, 4). Һьнге тьштед бәре ԝе ида нәйенә бира мә (Ишайа 65:17). Чаԝа мә дит, Йаһоԝа ньһа жи бьринед мә дьпʹечʹә. Әԝ бь гәләк щурʹа али мә дькә у дьлбинийе дьдә мә. Ләма жи аликʹарийа ԝи ԛәбул кә у тʹӧ щар дӧдьли нәбә, кӧ ‹әԝ бона тә хәм дькә›! (1 Пәтрус 5:7)