1. Чаԝа се Шәʹдед Йаһоԝа амьнийа хԝә Йаһоԝарʹа хԝәй кьрьнә?

БЬДЬНӘ бәр чʹәʹве хԝә се дәрәщед кӧ рʹасти Шәʹдед Йаһоԝа тен: 1) Дәрсдар мәкʹтәбеда һʹәму шагьртарʹа дьбежә, ԝәки бона фьлан щәжьне тьштәки бькьн. Ле ԛизькәк кӧ Шәʹде Йаһоԝа йә, занә кӧ Хԝәде әԝе щәжьне ԛәбул накә. Ләма жи әԝ бь ԛәдьр дьбежә, ԝәки әԝ тʹәви ве щәжьне набә. 2) Гәдәки щаһьл мал бь мал хьзмәт дькә, у дьвинә ԝәки мала дьн әԝ һәйә мала һәвалдәрсхане ԝи, йе кӧ ԛәрфе хԝә Шәʹдед Йаһоԝа дькә. Әԝ шәрм дькә у һьнәки дьтьрсә, ле йәкә дьчә ве мале у дәри дьхә. 3) Малхек кӧ анщах әʹбура нәфәред хԝә дькә, дьчә хәбате. Щарәке мәзьне хәбата ԝи жерʹа дьбежә, ԝәки дәрәԝа бькә йан жи тьштәки нәԛануни бькә. Әԝ занә кӧ дькарә хәбата хԝә ӧнда кә, ле йәкә мәзьне хәбатерʹа шьровәдькә, ԝәки әԝ тʹәне рʹастийе дьбежә у гӧрʹа ԛануне дькә, чьмки Хԝәде жь хьзмәткʹаред хԝә ве йәке дәʹԝа дькә (Рʹом. 13:1-4; Ибрн. 13:18).

2. Әме кʹижан пьрса шеԝьр кьн, у чьрʹа?

² Һун ча дьфькьрьн, бал ԝан һәрсека чь һʹӧнӧр һәйә? Дьбәкә һуне бежьн, ԝәки ԝана чәнд һӧнӧр данә кʹьфше, бәʹса хәбәре мерхаси у һʹәлали. Ле һʹӧнӧрәкә лапә мәхсус кӧ ԝана да кʹьфше, әԝ һәйә беԛьсурти. Һәр йәк жь ԝан Йаһоԝарʹа амьн ма у принсипед Йаһоԝа нәтʹәрьбандьн. Беԛьсуртийе әԝана һелан кьрьн, ԝәки ӧса бькьн. Йаһоԝа бешьк ԝан мәрьварʹа фьрнаԛ буйа, кӧ ԝана һʹӧнӧрәкә ӧса данә кʹьфше. Әм жи дьхԝазьн ԝәки Баве мә мәрʹа фьрнаԛ бә. Ләма жи ԝәрә әм ԝан се пьрса шеԝьр кьн: Чь йә беԛьсурти? Чьрʹа әм гәрәке беԛьсур бьн? У чаԝа ԝәʹде тәнгасийа, әм дькарьн беԛьсуртийа хԝә хԝәй кьн?

3. а) Чь те һʹәсабе беԛьсурти? б) Мәсәле биньн, кӧ әʹйан дькә чь те һʹәсабе беԛьсурти.

³ Чь щурʹәйи хьзмәткʹаред Хԝәде беԛьсуртийе дьдьнә кʹьфше? Әԝана бь тʹәмамийа дьле хԝә Йаһоԝа һʹьз дькьн у жерʹа амьн дьминьн, у тʹьме пе кьред хԝә дьле ԝи ша дькьн. Дина хԝә бьдьне, хәбәра беԛьсур чь те һʹәсабе. Кʹьтеба Пирозда хәбәра кӧ һатийә ԝәлгәрʹандьне «беԛьсур», те һʹәсабе «тʹам» йан жи «бекемаси». Бәʹса хәбәре, чахе Исраелийа Йаһоԝарʹа һʹәйԝан ԛӧрбан дькьрьн, Ԛануне жь ԝан дәʹԝа дькьр, ԝәки һʹәйԝан бекемаси бьн * (Ԛан. Кʹаһ. 22:21, 22). Щьмәʹта Хԝәдерʹа изьн тʹӧнә бу, ԝәки һʹәйԝанед ӧса ԛӧрбан кьрана, кʹижан мәсәлә, беньг, бегӧһ, бечʹәʹв буна, йан нәхԝәш буна. Бона Йаһоԝа гәләк фәрз бу, ԝәки әԝ һʹәйԝан тʹам у сах-сьламәт буна (Малх. 1:6-9). Әм дькарьн Йаһоԝа фәʹм кьн, кӧ чьрʹа бона ԝи әԝ йәк фәрз бу. Чахе әм дьхԝазьн тьштәки бькʹьрʹьн, мәсәлә емиш, кʹьтеб, йан жи һащәтәке, әм нахԝазьн кемасийа ԝи тьшти һәбә, йан ԛӧл йан жи хьраббуйи бә. Әм дьхԝазьн әԝ тьшт тʹам у рʹьнд бә. Йаһоԝа жи дьхԝазә, ԝәки һʹьзкьрьн у амьнийа мә һьндава ԝида, тʹам у бекемаси бә.

4. а) Чьрʹа мәрьве гӧнәкʹар дькарә беԛьсур бә? б) Ль гора Зәбур 103:12-14, Йаһоԝа ча нә һьндава мә?

⁴ Ле гәло сәва беԛьсур бьн, әм гәрәке бегӧнә бьн? Нә әм гәләк шашийа дькьн у кемасийед мә һәнә! Дина хԝә бьдьнә дӧ мәʹнийа, кӧ чьрʹа әʹсәйи нинә әм бегӧнә бьн, сәва бәр чʹәʹве Хԝәде беԛьсур бьн. Йа пешьн, Йаһоԝа дина хԝә надә сәр шашийед мә. Хәбәра ԝи дьбежә: «Хӧдан, һәгәр дина Хԝә бьди гӧнәйед мә, кʹи ԝе бькарьбә бәр Тә бьсәнә, Хԝәйо?» (Зәб. 130:3). Әԝ занә ԝәки әм гӧнәкʹар ьн у кемасийед мә һәнә, ле йәкә әԝ бь мәрʹдани мә дьбахшинә (Зәб. 86:5). Йа дӧда, Йаһоԝа занә синоред мә, у әԝ жь мә һаԛас дәʹԝа накә чьԛас әм нькарьн. (Бьхунә Зәбур 103:12-14.) Ԝәки ӧса нә, чь те һʹәсабе чʹәʹве ԝида тʹам у бекемаси бьн?

5. Бона хьзмәткʹаред Йаһоԝа чьрʹа һʹьзкьрьн фәрз ә сәва беԛьсур бьн?

⁵ Сәва хьзмәткʹаред Йаһоԝа беԛьсур бьн, һʹьзкьрьн гәләк фәрз ә. Һʹьзкьрьна мә у амьнийа мә һьндава Баве мәйи әʹзмана, гәрәке тʹам у бекемаси бә. Һәрге ԝәʹде щерʹьбандьна у тәнгасийа әм һʹьзкьрьна хԝә һьндава ԝи ӧнда накьн, әԝ те һʹәсабе ԝәки әм беԛьсур ьн (1 Дир. 28:9; Мәт. 22:37). Дина хԝә диса бьдьнә сәр се дәрәщед Шәʹдед Йаһоԝа, бәʹса кʹижана мә жоре кьр. Бьфькьрьн, ԝана чьрʹа ӧса кьр. Фәʹмдари йә, ԝе ԛизьке хԝәш нәһата, ԝәки мәкʹтәбеда пекʹәни бә, әԝ гәде щаһьл жи нәдьхԝәст бәр дәри шәрми бә, у малхе мале жи нәдьхԝәст, ԝәки хәбата хԝә ӧнда кә. Ле ԝана принсипед Йаһоԝайи рʹаст заньбун, у һʹьш-аԛьле ԝан тʹәне сәр ве йәке бу, кӧ дьле Баве хԝәйи әʹзмана ша кьн. Һʹьзкьрьна ԝан һьндава Хԝәде, ԛәԝат да ԝан, ԝәки ԝи сәр һʹәму тьштирʹа бьгьрьн. Ԝи щурʹәйи ԝана избат кьр, ԝәки беԛьсур ьн.

6. а) Чьрʹа әм гәрәке беԛьсур бьн? б) Чаԝа Адәм у Һеԝайе беԛьсуртийа хԝә хԝәй нәкьрьн?

⁶ Чьрʹа гәләк фәрз ә, ԝәки һәр кәс жь мә беԛьсур бә? Мәрʹа әԝ йәк лазьм ә, чьмки Шәйтʹан бӧхдан авитә Йаһоԝа у мә. Әԝ мьлйакʹәте рʹабәр ида бахче Әдәнеда хԝә кьрә Шәйтʹан, демәк «Мьԛабьл». Әԝи наве Йаһоԝа әʹрде хьст, чьмки гьлийед ԝи ӧса дәрдькʹәт, кӧ  Хԝәде Сәрԝере хьраб, хԝәһʹьз у ԛәлп ә. Ле йазьх, Адәм у Һеԝайе алийе Шәйтʹан гьртьн, у мьԛабьли Йаһоԝа дәркʹәтьн (Дәстп. 3:1-6). Бь рʹасти жийин бахче Әдәнеда беһʹәсаб мәщал дьда ԝан, сәва һʹьзкьрьна хԝә һьндава Йаһоԝа һе ԛәԝи кьн. Ле ԝи ԝәʹдәйи чахе Шәйтʹан ԝана щерʹьбанд, һʹьзкьрьна ԝан нәтʹам у ԛьсур бу. Ньһа пьрсәкә дьн пешда те: Гәло ԛә мәрьв дькарә жь һʹьзкьрьне Йаһоԝа Хԝәдерʹа амьн бьминә? Бь гьлийед майин бежьн, ԛә мәрьв дькарә беԛьсур бә? Щаба ве пьрсе әме жь сәрһатийа Ибо пебьһʹәсьн.

7. Чаԝа Ибо 1:8-11-да те кʹьфше, Йаһоԝа у Шәйтʹан дәрһәԛа беԛьсуртийа Ибо чь дьфькьрин?

⁷ Ибо ԝи ԝәʹдәйида дьжит, чахе Исраели Мьсьреда бун. Беԛьсуртийа ԝи, рʹасти жи мәхсус бу. Әԝ жи мина мә мәрьвәки гӧнәкʹар бу у шаши дькьр. Ле Йаһоԝа Ибо һʹьз дькьр бона беԛьсуртийа ԝи. Шәйтʹан һе бәреда дәрһәԛа беԛьсуртийа мәрьва, ԛәрф Йаһоԝа дькьр. У Йаһоԝа дина ԝи да сәр Ибо, чьмки әԝи бь әʹмьре хԝә избат дькьр, кӧ Шәйтʹан дәрәԝин ә! Ләма жи Шәйтʹан дәʹԝа кьр, ԝәки беԛьсуртийа Ибо бе щерʹьбандьне. Йаһоԝа итʹбарийа хԝә досте хԝә Ибо дьани, у изьн да Шәйтʹан, ԝәки ԝи бьщерʹьбинә. (Бьхунә Ибо 1:8-11.)

8. Шәйтʹан ча пәй Ибо кʹәт?

⁸ Шәйтʹан берʹәʹм ә у меркӧж ә. Әԝи һәбук у бәрдәстийед Ибо ле станд, у наве ԝи жи әʹрде хьст. Шәйтʹан ӧса жи пәй нәфәред Ибо кʹәт, у дәһ зарʹед ԝи кӧшт. Паше, әԝ пәй Ибо кʹәт, ԝи нәхԝәш хьст, у ӧса кьр кӧ сәр тʹәмамийа бәдәна ԝи, жь пәʹнийа ньга һʹәта сәре ԝи, тʹьжә пʹьзьк бун. Жьна Ибо жь тʹәвһәвбуне у дәрде  гьран, готә ԝи кӧ ньфьрʹа Хԝәде бькә у бьмьрә. Рʹаст ә Ибо хԝәха жи хԝәрʹа мьрьн дьхԝәст, ле йәкә әԝи диса хԝә ль беԛьсуртийа хԝә дьгьрт. Паши ве йәке, Шәйтʹан ида бь методәкә дьн Ибо щерʹьбанд, әԝи се һәвалед Ибо да хәбате. Әԝана сәр чәнд рʹожа чун тʹәсәлийа Ибо кьрьн, ле ԛә дьлбини нәданә ԝи. Дәԝсе, ԝана ломә ԝи дькьрьн у бӧхдан дьавитьнә ԝи. Ԝана дьгот, ԝәки йанчь Хԝәде әԝ бәла анийә сәре ԝи у беԛьсуртийа Ибо бәр чʹәʹве ԝи пʹучʹ ә. Ԝана һәла һе жи дьгот, кӧ Ибо мәрьвәки хьраб ә у һежайи ве йәке йә чь кӧ һатә сәре ԝи (Иб. 1:13-22; 2:7-11; 15:4, 5; 22:3-6; 25:4-6).

9. Ԝәʹде кӧл-дәрда Ибо чь нәкьр?

⁹ Ле ԝан кӧл-дәрдед гьранда, Ибо ча хԝә да кʹьфше? Ибо мәрьвәки гӧнәкʹар бу, у әԝи бь һерсе ԝан һәвалед ԛәлп сущдар кьр, у тьштед ӧса гот кӧ паше фәʹм кьр ԝәки әԝ бефәʹмти бу. Әԝи рʹастийа хԝә сәр рʹастийа Хԝәдерʹа гьрт (Иб. 6:3; 13:4, 5; 32:2; 34:5). Ле һәла һе ви ԝәхте гәләк хьрабда жи, Ибо пьшта хԝә нәда Йаһоԝа Хԝәде. Әԝи дәрәԝед ԝан һәвалед ԛәлп нә жи баԝәр кьр у готә ԝан: «Әзе тʹӧ щар ԝә һәԛ дәрнәхьм! Һʹәта мьрьне беԛьсуртийа хԝә наһельм!» (Иб. 27:5, ДТʹ). Әԝ гьли әшкәрә дьдьнә кʹьфше, ԝәки чь жи бьԛәԝьмийа, йәкә Ибо мьԛәрм хԝә ль беԛьсуртийа хԝә дьгьрт. Әм жи дькарьн ве йәкеда чʹәʹв бьдьнә ԝи.

10. Чаԝа бӧхдан кӧ Шәйтʹан авитә Ибо, мә жи дькʹәвә?

¹⁰ Шәйтʹан әԝан бӧхдана давежә һәр кәси. Ле чь щурʹәйи? Әԝ дьбежә ԝәки һун бь рʹасти Йаһоԝа Хԝәде һʹьз накьн, һуне тәнгасийада жерʹа хьзмәт нәкьн, у кӧ беԛьсуртийа ԝә ԛәлп ә (Иб. 2:4, 5; Әʹйан. 12:10). Һун чь сәр хԝә тʹәхмин дькьн жь бо ван бӧхдана? Әԝ йәк дьле ԝә дешинә, ӧса нинә? Ле һәла бьфькьрьн дәрһәԛа ве йәке: Йаһоԝа ӧса итʹбарийа хԝә ԝә тинә, кӧ мәщаләкә мәхсус дьдә ԝә. Әԝ дьһелә ԝәки Шәйтʹан беԛьсуртийа ԝә бьщерʹьбинә. Ле Йаһоԝа дӧдьли набә кӧ һун дькарьн беԛьсуртийа хԝә хԝәй кьн, у избат кьн кӧ Шәйтʹан дәрәԝин ә. У Йаһоԝа соз дьдә, кӧ ве йәкеда ԝе али ԝә бькә (Ибрн. 13:6). Бьдьнә һʹәсабе хԝә әԝ ԛәдьрәки чьԛас мәзьн ә, кӧ Хԝәйе тʹәмамийа гәрдуне итʹбарийа хԝә мә тинә! Һун дьвиньн чьԛас фәрз ә беԛьсур бьн? Чахе әм беԛьсур дьминьн, әм әшкәрә дькьн кӧ Шәйтʹан дәрәԝин ә у әм наве Баве хԝәйи ԛәнщ пироз дькьн у пьштгьрийа щурʹе сәрԝертийа ԝи дькьн. Ле чь али мә дькә, ԝәки әԝи һʹӧнӧри ӧнда нәкьн?

11. Әм жь Ибо чь дькарьн һин бьн?

¹¹ Шәйтʹан ван «рʹожед ахьрийеда» һе зедә пәй хьзмәткʹаред Хԝәде дькʹәвә (2 Тимтʹ. 3:1). Ле ван рʹожед чәтьнда, әм ча дькарьн беԛьсуртийа хԝә хԝәй кьн? Диса жи мәсәла Ибо дькарә али мә бькә. Пешийа кӧ әԝ бьһата щерʹьбандьне, әԝи ида гәләк щар беԛьсуртийа хԝә избат кьрьбу. Дина хԝә бьдьнә се дәрса кӧ әм дькарьн жь ԝи һин бьн, ԝәки чаԝа беԛьсуртийа хԝә ԛәԝи кьн.

12. а) Чаԝа жь Ибо 26:7, 8, 14 те кʹьфше, чь али Ибо кьр ԝәки дьле хԝәда хофа Хԝәде пешда бинә у һьндава Хԝәде бь ԛәдьр бә? б) Ча әм дькарьн хофа Хԝәде дьле хԝәда пешда биньн?

¹² Ибо һʹьзкьрьна хԝә һьндава Йаһоԝа бь ве йәке ԛәԝи кьр, кӧ хофа Хԝәде дькьрә дьле хԝә. Ибо ԝәʹдә хԝәрʹа башԛә дькьр, сәва сәр әʹфьринед Йаһоԝайи пʹьрʹ баш у һʹәԝас бьфькьрә. (Бьхунә Ибо 26:7, 8, 14.) Әԝ мәтʹал дьма чахе дьфькьри дәрһәԛа әʹрде, әʹзман, әʹԝьр у бьруске, у әԝи фәʹм дькьр кӧ әԝ чьԛас бьчʹук ә бәр  ԝан чекьрьнед дәсте Хԝәде. Ибо ӧса жи хәбәред Йаһоԝа ԛимәт дькьр. Әԝи гот: «Готьнед дәве ԝи вәшартьм» (Иб. 23:12). Ибо әʹщебмайи дьма сәр Йаһоԝа у бь дьл у щан ԛәдьре ԝи дьгьрт. Әԝи Баве хԝә һʹьз дькьр у дьхԝәст дьле ԝи ша кә, ләма жи һе мьԛәрм хԝә ль беԛьсуртийе дьгьрт. Иро әм дәрһәԛа әʹфьринед Хԝәде һе зедә заньн, нә кӧ мәрьвед ԝәʹде Ибо. У һьн жи Кʹьтеба Пироз бал мә һәйә, бь сайа кʹижане әм дькарьн Йаһоԝа һе незик нас кьн. Һʹәму тьштед кӧ әм жь ве кʹьтебе педьһʹәсьн, али мә дькьн кӧ хофа Хԝәде дьле мәда пешда бе. Хԝәдехофи у ԛәдьр һьндава ԝи, нав мәда һʹьзкьрьне пешда тинә, у әм һе зедә гӧрʹа ԝи дькьн у хԝә мьԛәрм ль беԛьсуртийа хԝә дьгьрьн (Иб. 28:28).

13, 14. а) Ль гора Ибо 31:1, Ибо гӧһдарийа хԝә чьда нишан кьр? б) Әм ча дькарьн чʹәʹв бьдьнә Ибо?

¹³ Ибо һәр тьштида гӧрʹа Хԝәде дькьр, у әԝе йәке али ԝи дькьр беԛьсуртийа хԝә хԝәй кә. Ибо заньбу кӧ сәва беԛьсур бә, әԝ гәрәке гӧрʹа Йаһоԝа бькә. Бь рʹасти һәр щар гава әм гӧрʹа Хԝәде дькьн, әм һелан дьбьн һе зедә хԝә ль беԛьсуртийе бьгьрьн. Ибо сәр хԝә дьхәбьти, ԝәки һәр тьштида гӧрʹа Хԝәде бькә. Мәсәлә, әԝ гәләк фәсал бу һьндава жьнада. (Бьхунә Ибо 31:1.) Кʹӧлфәта ԝи һәбу, у әԝи заньбу кӧ нәрʹаст ә һәрге әԝ хенщи кʹӧлфәта хԝә, сәр жьнәкә дьн бьньһерʹә. Иро әм дьжин дьнйакә ӧсада, кʹижанеда һәр гав намусийа мә те щерʹьбандьне. Гәло әме жи мина Ибо чʹәʹве хԝә хԝәй кьн, кӧ тʹӧ щар сәр кәсәки дьн нәньһерʹьн, хенщи жьн йан мере хԝә? Гәло әме инкʹар кьн кӧ бьньһерʹьн һәр щурʹә шьклед нәщайиз йан жи шьклед порнографи? (Мәт. 5:28) Һәрге әм һәр рʹож хԝә бьгьрьн, әме мьԛәрм беԛьсуртийа хԝә хԝәй кьн.

¹⁴ Ибо ӧса жи ве йәкеда гӧрʹа Йаһоԝа дькьр, кӧ сәр һәбуке рʹаст дьньһерʹи. Әԝи фәʹм дькьр, кӧ һәрге әԝ итʹбарийа хԝә һәбука хԝә бинә, әԝе гӧнәки  гьран бькә у һежайи щәзакьрьне бә (Иб. 31:24, 25, 28). Иро әм дьжин дьнйа пʹәрәһʹьзда. Һәрге әм сәр пʹәра у һәбуке ӧса дьньһерʹьн ча Кʹьтеба Пироз ширәте дьдә, әме һе ԛайим беԛьсуртийа хԝә хԝәй кьн (Мәтʹлк. 30:8, 9; Мәт. 6:19-21).

15. а) Баԝәри һьндава чь али Ибо кьр, кӧ әԝи беԛьсуртийа хԝә хԝәй кьр? б) Әԝ баԝәри чаԝа али мә жи дькә?

¹⁵ Ибо ӧса жи беԛьсуртийа хԝә бь ԝи щурʹәйи хԝәй кьр, кӧ бир нәдькьр, ԝәки Хԝәде ԝе ахьрийеда ԝи кʹәрәм кә. Әԝи баԝәр дькьр, кӧ Хԝәде беԛьсуртийа ԝи ԛимәт дькә (Иб. 31:6). Нава тәʹли-тәнгийада жи, Ибо баԝәр дькьр, кӧ ахьрийеда Йаһоԝа ԝе ԝи хәлат кә. Әԝе баԝәрийе бешьк али ԝи кьр, кӧ әԝи беԛьсуртийа хԝә ӧнда нәкьр. Рʹаст ә Ибо гӧнәкʹар бу, ле Йаһоԝа беԛьсуртийа ԝирʹа ша дьбу у һе зедә кʹәрәм сәрда баранд (Иб. 42:12-17; Аԛуб 5:11). У кʹәрәмед һе мәзьн ахьрийеда һивийа Ибо нә. Ле һун ԛайим баԝәр дькьн, ԝәки Йаһоԝа ԝе бона беԛьсуртийа ԝә, ԝә кʹәрәм кә? Хԝәдайе мә найе гӧһастьне (Малх. 3:6). Һәрге әм бир нәкьн, ԝәки беԛьсуртийа мә бәр чʹәʹве Йаһоԝа ԛимәт ә, әме бькарьбьн баԝәрийа хԝә һьндава ахьрийе дьле хԝәда сах хԝәй кьн (1 Тʹеслн. 5:8, 9).

16. Әм чь гәрәке хԝәрʹа ԛьрар кьн?

¹⁶ Хԝәрʹа мьԛәрм ԛьрар кьн, ԝәки тʹӧ щар беԛьсуртийа хԝә ӧнда нәкьн! Щара дьбәкә һун хԝә тʹәне тʹәхмин кьн, жь бо ве йәке кӧ бьфькьрьн, ԝәки дор бәре ԝә тʹӧ кәс хԝә беԛьсуртийе нагьрә. Ле бь рʹасти һуне тʹӧ щар тʹәне нибьн. Һуне нава бь милйона мәрьвед нав тʹәмамийа дьнйайеда бьн, йед кӧ бь амьни беԛьсуртийа хԝә хԝәй дькьн. Ӧса жи һуне нава ԝан мәрьвада бьн, йед кӧ һена бәре беԛьсуртийа хԝә хԝәй кьрьнә, һәла һе жи чахе мьрьн пешийа ԝан буйә (Ибрн. 11:36-38; 12:1). Ԝәрә әм жи бьжин анәгори гьлийед Ибо: «Беԛьсуртийа хԝә наһельм!, ДТʹ». У бьра беԛьсуртийа мә һʹәта-һʹәтайе Йаһоԝа һӧрмәт-рʹумәт кә!