“Tunde mu undenge wami, o kima kya ngibhonzo o kuzola kadiyala. Ngexile mubanza kwila kupholodyakwenda o jihanji jiji jeji bhita maji ki kyene kyabhiti kate kiki ngamudibhana naju hanji.”—Davidi, wala ni 23 a mivu.

 Davidi kidista wamesena kusangulukisa Nzambi. O kwila mwene utena kusangulukisa Nzambi nemwene ni jihanji jiji? Kyebhi Nzambi kya tala diyala mba muhatu kuzeka ni mukwa?

•  Ihi Izwela o Bibidya?

•  O kwila kiki kilombolola . . . ?

•  Maji ihi twamba se . . . ?

 Ididi ni ididi mba ithangana ni ithangana, o ukexilu wakudibhana ni jihangi jiji ki ja difu. Maji o Jikidistã kene mukayela o ibanzelu ya athu oso mba “kukayela o ilongesu ya makutu ya athu akwa mangonya, phala katutakujule kuku ni koko”. (Efezu 4:14) Muveji dya kiki, o ixinganeku ya Jikidistã yene imoxi ni milongi ya Bibidya yalungu ni diyala mba muhatu kuzeka ni mukwa.

 O Bibidya ki ibhana jihonda mu kuzwela yalungu ni diyala mba muhatu kuzeka. O Mak’â Nzamba amba:

•  “Kana kuzeka diyala ni mukwenu, kala muhatu.”—Ijila 18:22

•  “Nzambi wa ehela kukayela o jihânji jayibha jala ku mixima yâ, . . . wa ehela mu jihânji ja ufusa. O ahatu axisa o ukexilu wakuzeka ni mala, ya a ulungulula mu ukexilu wengi ki watokala.”—Loma 1:24, 26.

•  “Kanenu kudinganala. O akwa kubhanga o undumbu, abhezi a iteka, akwa jiphánda, mala ala ni jihânji ja kubhanga undumbu ni mala ni akwâ, ni mala ene muzeka ni mala ni akwâ, o miyi, akwa lwimbi, o jihôlwa, akwa kuxinga akwâ, ni akwa kunyana, enyoso yá kanda lundula o Utuminu wa Nzambi.”—1 Kolindu 6:9, 10.

 Mu kidi, o ixinganeku ya Nzambi yalungu ni maka enya yatokala phala o athu oso kate mwene yo ala ni jihanji ja ukexilu wakuzeka ni mala mba muhatu ni muhatu mba mawkexilu oso a undumbu. Mukiki, athu oso atokala kudilanga kyoso kyakala ni hanji yakubhanga kima kilwalesa Nzambi.—Kolose 3:5.

 O kwila kiki kilombolola kwila twatokala kuzemba yo azeka diyala ni diyala mba muhatu ni muhatu?

 Kana. Mukidi, o Bibidya itutendelesa kwila ki twatokala kuzemba muthu wosowoso—kikale se o muthu uzeka diyala ni diyala mba muhatu ni mukwa. Mu veji dya kiki, yene yamba kwila “sotenu kukala ku paze ni athu oso,” ne mwene se wala ni ukexilu wa ibha ku mwenyu. (Jihebelewu 12:14) Kyenyiki kima kyayibha kulokalala, kwatatela, mba kwatalatala kyayibha kikale dyiyala mba muhatu uzeka ni mukwa.

 O kwila kiki kilombolola kwila o Jikidista katokala kuxikina itumu ya jinguvulu ibhana ufolo kwa diyala ni mukwa mba muhatu ni mukwa kuzala?

 O Bibidya yamba kwila Nzambi wabhange o ukaza phala ukale diyala ni muhatu. (Matesu 19:4-6) Maji, o itumu ibhana o jinguvulu yalungu ni maka ya, yalungu ni unguvulu. O Bibidya itutangela kwila ki twatokala kudita mu maka a jinguvulu. (Nzwá 18:36) Mukiki, o Jikidistã kene mukwatekesa mba kuzemba o itumu yalungu ni diyala kuzeka ni diyala mba muhatu ni mukwa.

 Maji ihi twamba se o muthu wexile kya muzeka diyala ni diyala mba muhetu ni mukwa? O kwila o muthu yu utena kulungulula o ukexilu we?

 Xe. Mu kidi, kuhama yadyanga sayi athu exile ni ukexilu yu, atena kulungulula o ukexilu wâ! Kyoso kya zuwela kwila o yo azeka diyala ni diyala mba muhatu kanda tambula mabesá a Utuminu wa Nzambi, o Bibidya yamba: “Amoxi mudyenu, kyene kyakexile.”—1 Kolindu 6:11.

 O kwila kiki kilombolola kwila o yo eha u ukexilu yu kanda kwyivwa dingi o hanji ya kuzeka diyala ni diyala mba muhatu ni muhatu? Kana. O Bibidya izuwela: “Zwatenu o ukexilu wa ubhe watubhana Nzambi. O ukexilu yú wa ubhe a ubhange mu kidifwanganu kya Nzambi.” (Kolose 3:10) O kulungulula o ukexilu wetu kima ki twa tokala kubhanga ithangana yoso.

 Maji se o muthu wandala kubhanga o vondai ya Nzambi maji wala hanji ni jihanji ja kuzeka diyala ni diyala mba muhatu ni mukwa?

 Kala kibhita ni jihanji josojoso, o muthuutena kusola kweha o jihanji ja kuzeka diyala ni diyala mba muhatu ni mukwa. Kyebhi kyatena kubhanga kiki? O Bibidya yamba: “Ehelenu o nzumbi ya Nzambi ku mi endesa, phala ki mubhange o ima ya xitu.”—Ngalásya 5:16.

 Mona kwila o velesu ki yamuzuwela kwila o muthu kanda kala dingi ni jihanji ja xitu, kala o kumesena kuzeka diyala ni diyala mba muhatu ni muhatu. Mu veji diya kiki, o divulu dizuwela kwila, se o muthu udilonga ithangana yoso ni kusamba kwa Nzambi wanda kala ni nguzu yasoko phala kweha o jihanji jayibha.

 Davidi, twamutumbula kudimatekenu watena kubhanga kiki—bhengebhenge kyoso kya zuwela jitate je jikidista yalungu ni maka yakexile mubhita ni mwene. “Kyedile kala angikatula kima kya neme kinene kudikunda dyami. Ngibanza kwila ngeji sanguluka dingi mu undenge wami se nga zuwelele ni ku dimatekenu.”

 Mu kidi, twanda sanguluka dingi se tu kala ni ukexilu wa mwenyu kala kyandala Jihova. Twa dyelela ni kidi kyoso kwila o “Ijila ya Jihova ya tetuluka,” ni kwila “o kya kwata ku a aluka kubhanduluka kwê ku vula.”—Jisálamu 19:8, 11.