•   Kyebhi ki udivwa kyoso muthu kyazwela ima yabolo?

  •  Ki ngene mudivwa kyayibha.

  •  Ngitandanganya ngó bhofele, maji ku pholo dya kwenda ngi ixikina.

  •  Ngidivwa kyayibha, kingitena kukala ni kifwa kiki.

•   Jiveji jikuxi ji wene muzwela ima yabolo?

  •  Ki ngene muzwela

  •  Ngizwela ngó sayi ithangana

  •  Ngizwela mu ithangana yoso

•   Kyebhi ki umona o kifwa kya kuzwela ima yabolo?

  •  Ki kwale maka

  •  Kima kyayibha

 O kwila kwala maka se tuzwela kima kyabolo? Nange eye uzwela: ‘Kana. Ki kwale maka. Kwala maka a makota ku mundu phala kutandanganya nawu. O kya mukwá, athu oso ene muzwela ima yabolo!’ O kwila kidi?

 Né mwene se uxikina mba kana, athu avulu ene mubhanga nguzu phala kazwele ima yabolo. Sayi ima yene mwabhangesa kukamba kuzwela ima yabolo. Mu kifika:

•  Kuzwela ima yabolo ilondekesa o ukexilu wé. O ukexilu wé wakuzwela ulondekesa se mu kidi eye nanyi. Mu kiki, kuzwela ima yabolo kutena kulondekesa kwila, ki wene musuwa akwenu. O kwila eye wala ni ukexilu yú?

   O Bibidya yamba: “Yoso izwela o dikanu, itunda ku muxima.”—Matesu 15:18.

•  Se uzwela ima yabolo, akwenu atena kukala ni ibanzelu yayibha yalungu neye. Sayi divulu dizwela yalungu ni jindaka (Cuss Control) dyamba: “O ukexilu wetu wa kuzwela utena kulondekesa se ananyi andakala o makamba metu, se o mwiji ni jikoleka jetu ja salu jandatuxila, se twandadibhana kyambote ni makamba metu ni kwaswinisa, se twandasanga salu mba ku tuhabesa ku salu, ni kyebhi akwetu kyandatutala. . . . Dibhwidise: ‘Se ngikamba kuzwela ima yabolo, o kwila andangixila dingi?’”

   O Bibidya yamba: “Ehenu o . . . jindaka.”—Efezu 4:31.

•  Nange ubanza kwila kima kyambote kuzwela ima yabolo, maji ki kyene. Mu divulu dyê dizwela yalungu ni jindaka (How Rude!) o mesene Alex Packer wambe: “Ku bhwila kyavulu, kwivwa o muthu uzwela ima yabolo mu ithangana yoso. . . . Se muthu wala ni ukexilu wa kuzwela ima yabolo, kandatena kuzwela ni unjimu, kusangulukisa akwa ni kwivwa o ndolo ya akwâ. Se eye wene muzwela ima yabolo, wandabanza we mu ukexilu yú.”

   O Bibidya yamba: “Mu kanu dyenu ki mu tunde ndaka.”—Efezu 4:29.

•  Xinda mbambe. Ihi i ubanza kweha kuzwela ima yabolo mu mbeji imoxi? Soneka kyebhi ki wamuditunda. Maji phala kukumbidila o mbambe iwaxindi, watokala kubhanga ima yamukwá. Mu kifika:

•  Eha itonokenu itena kwizalesa o kilunji kyé ni ima yabolo. O Bibidya yamba: “O kudilunga ni athu ayibha, kubolesa o ifwa yambote.” (1 Kolindu 15:33, tala ku lwiji) Ko athu ngó atena kubolesa o ifwa yetu yambote, maji we ni jifilime, jividyu geime ni mimbu itwivwa. Manu Kenneth, wala ni 17 dya mivu, wambe: “Sayi ithangana eye wimba mwimbu u wawabhela, maji mukonda dya mukumbi wa mwimbu, ki umona kwila o mwimbu wezala ni izwelu yabolo.”

•  Londekesa kwila u muthu wala ni kilunji. Sayi athu abanza kwila kuzwela ima yabolo kibhangesa o athu kwamona kala akulu kyá. Maji mu kidi, o athu akulu kyá, yó “asungu kyá kilunji kya kutungula kyoso kyawabha mu kiki kyayibha.” (Jihebelewu 5:14) Kazwela ima yabolo phala “kusangulukisa” ngó akwâ.

 Kuzwela ima yabolo kuxidisa ngó o kilunji kyetu ni ibanzelu yayibha. Mu ngongo mumu mwala athu avulu ala ni ibanzelu yiyi! O divulu dizwela yalungu ni jindaka (Cuss Control) dyambe: “Kana kubandekesa dingi o ixete. Bhanga o mbandu yé mu kukwatekesa o athu kukala ni uzwelelu wambote. Wandakala ni ibanzelu yambote yalungu neye, akwenu we anda kuxila dingi.”