1. Kiebhi o divulu dia Ijila di tena ku tu kuatekesa?

JIHOVA ua mesena kuila, o jiselevende jê joso, a kala athu a zele. Né muene mu Bibidia tu sanga-mu milongi iavulu ia lungu ni ku di zelesa, maji mu divulu dia Ijila, muene mua beta-o-kota o ku zuela o maka enhá. O ku di longa ni ku tendela kiambote o divulu didi, kua-nda tu kuatekesa kuijiia kiebhi ki tu tena o ku zela.

2. Ihi i tu sanga mu divulu dia Ijila?

² O divulu dia Ijila a di soneka kua Mozé, di bhanga mbandu mu “Mikanda ioso” ia “kubhandulula, ni mu kulonga.” (2 Timote 3:16) O dijina Jihova, a di tumbula dikuinhi dia ji veji mu divulu didi. O ku tendela kiambote o divulu dia Ijila, kua-nda tu kuatekesa phala ki tu bhange kima ki tena o ku xidisa o dijina dia Jihova. (Ijila 22:32) O izuelu “Eme Jihova,” a i tumbula mu veji javulu mu divulu didi, i tu kuatekesa ku lembalala kuila, tua tokala tu belesela Nzambi. Mu milongi íii ni ia kaiela, tua-nda di longa ima ia katunda i tu sanga mu divulu dia Ijila, ia-nda tu kuatekesa o ku di zelesa mu ubhezelu uetu kua Nzambi.

3, 4. Ihi ilondekesa o ku di zelesa kua Alá ni an’ê? (Tala o foto ia dianga.)

³ Tanga Ijila 8: 5, 6. Jihova ua tumu Alá ni an’ê phala ku  kala ku pholo ia Izalaiele, kala akunji a kifuxi kia Izalaiele. Alá ua lombolola Jezú, o an’ê a kexile mu lombolola o Jikidistá a a undu. Ihi i lombolola o ku di zelesa kua Alá? O kuila ku lombolola kuma Jezú ua tokalele ku di zelesa? Kana. Jezú “ka moneka phulu.” (Jihebeleu 7:26; 9:14) Mu ku bhita thembu kioso Alá kia mu zelesa, muéne ua kexile mu lombolola Jezú, ió ua beta-kota ku di zelesa ua iuka. Mu kiki, ihi ilombolola o ku di zelesa kua an’a Alá?

⁴ O ku di zelesa kua an’a Alá, kulombolola o ku di zelesa kua ió a a solo phala ku kala akunji ku diulu. O kuila o ku di zelesa kua lungu ni batizu iâ? Kana, mukonda o batizu ki i zelesa o ituxi. O batizu ilondekesa ngó kuila, o muthu ua di bhakua kua Nzambi. O Jikidistá a a undu ene a di zelesa bhu kaxi ka “maka mê,” mu kiki ene a tokala o ku belesela o milongi ia Kristu ku mienhu iâ. (Efezo 5:25-27) Mu ku bhanga kiki, ene a kala athu a iuka ni a zele. Maji ihi i tu zuela ia lungu ni “jimbudi ja mukuá?”—Nzuá 10:16.

5. Mukonda diahi tu tena ku zuela kuila o jimbudi ja mukuá a di zelesa bhu kaxi ka Mak’â Nzambi?

⁵ O an’a Alá, ka lombolola o “mundu uavulu” ua jimbudi ja mukuá ja Jezú. (Dijingunuinu 7:10) Kienhiki, o jimbudi ja mukuá a di zelesa mukonda dia Mak’â Nzambi. O athu ala ni kidielelu kia ku kala ni muenhu mu ixi, kioso kia londekesa o kixikanu mu milongi ia Bibidia ia lungu ni sata ia Jezú, ene a kala ni nguzu ia ku bheza Jihova mu “usuku ni muanha.” (Dijingunuinu 7:13-15) O ku di zelesa kua Jikidistá a a undu ni jimbudi ja mukuá, ki ku suku. Mu kiki, ene a tokala a kala ni uendelu uambote mu ithangana ioso. (1 Phetele 2:12) Jihova u sanguluka kioso kia mona o mundu  ué ua zele, ku di bunda kumoxi mu ku belesela o mubhidi uâ, Jezú!

6. Mukonda diahi etu tua tokala ku di tonginina izuua ioso?

⁶ Ihi ilombolola o ku di zelesa kua akunji mu Izalaiele phala etu lelu? Saí athu a di longa o Bibidia n’etu, a mona kuila, tu zela mu izuatu ietu, ni mu ididi ietu ia ubhezelu. Oso a mesena ku bheza Jihova, a tokala ku kala ni ‘muxima ua zele.’ (Tanga Jisálamu 24:3, 4; Izaia 2:2, 3.) Mu kiki, tua tokala ku sidivila Jihova ni muxima ua zele, ni mukutu ua zele. Tua tokala ku di tonginina izuua ioso. Saí ithangana, tua tokala ku lungulula o ukexilu ua muenhu uetu, phala ku kala tu athu a zele. (2 Kolindo 13:5) Mu kifika, se o muthu a mu batizala kiá, u mona ufusa ua tokala ku dibhula: ‘O kuila eme nga zele muene?’ Muéne ua tokala ku sota kikuatekesu phala kueha o kifua kiki kia iibha.—Tiiaku 5:14.

7. Phangu iahi ia bhana Jezú ia difu ni ukunji ua Izalaiele uo tange mu divulu dia Ijila 8:22-24?

⁷ Kioso kia mateka o kikalakalu kia akunji mu Izalaiele, o manhinga a jimbudi, a tokalele ku tá mu ditui dia kadilu, ni ku mulembu ua lukuaku lua kadilu ni mulembu dia kinama ia kadilu, ka Alá ni ku an’ê. (Tanga Ijila 8:22-24.) O ukexilu ua ku kalakala ni manhinga ua londekesele kuila, o akunji eji langa kiambote o kikalakalu kiâ. Mu kiki, Jezú kala mukunji, ua bhana phangu iambote phala o Jikidistá a a undu ni jimbudi ja mukuá. Muéne uevu o dízui dia Nzambi, ua bhange o vondadi ia Jihova mu ku kala ni ukexilu uambote ku muenhu.—Nzuá 4:31-34.

8. Ihi i tua tokala ku bhanga etu oso?

⁸ Etu oso tu jiselevende ja Jihova, tua tokala ku kaiela o phangu ia Jezú, ia ku londekesa o ufiiele uetu ua ku bheza Nzambi. Tua tokala ku belesela o milongi ia Nzambi i tu sanga mu Bibidia phala ki tu ‘bhekele malamba ku nzumbi Ikôla ia Nzambi.’ (Efezo 4:30) Kala ni ukexilu uambote phala kuenda “mu jinjila ja kuika.”—Jihebeleu 12:13.

9. Ihi ia zuela o jiphange jitatu a kalakala mu Kibuka Kia Utuminu, ni kiebhi o izuelu iâ i ku kuatekesa ku kala muthu ua zele?

⁹ Tua-nda di longa o izuelu ia jiphange jitatu a kalakala kumoxi ni jiphange a tokalele mu Kibuka Kia Utuminu ku mivu iavulu. O phange ia dianga uambe: “O ku di bunda kumoxi ni jiphange a a undu kima kiambote, maji o ku kala kumoxi, ku londekesa kuila ene uâ akua ituxi. Maji né kiki, eme nga tokala ku belesela io ala ku pholo.” O phange ia mukuá uambe: “O divulu dia 2 Kolindo 10:5, di zuela ia lungu ni ku ‘tumaka Kristu,’ diene mu ngi kuatekesa ku belesela ió ala ku pholo ia kilunga. O ku belesela, ku tu-nda ku muxima.” O phange ia katatu uambe: “O ku zola o ima ia uabhela Jihova ni ku zemba o ima ia zembe muéne, ni ku belesela o kitumu kiê, ki  londekesa kuila tua mu belesela o kilunga kia Jihova, ni ió ala ku pholo mu ku bhanga o vondadi iê mu ixi.” Muéne u di lembalala o phangu ia phange Nathan Knorr. O phange Knorr, ua kexile mu kibuka kia Utuminu, ua xikina o milongi ia soneka mu Mulangidi ua muvu 1925 uexile ni diambu: “O ku vuala kua ifuxi,” saí jiphange a kexile ni phata. O phange ua diuana ni ukexilu ua ku belesela. O ku xinganeka mu phangu ia izuelu ia jiphange jiji, ia-nda ku kuatekesa ku belesela Nzambi ni ku kala muthu ua zele.

10. Valolo iahi iala mu ku belesela o kitumu kia Nzambi kia lungu ni ku tambula manhinga?

¹⁰ Tanga Ijila 17:10. Jihova uambe kuila o akua Izalaiele ka tokalele kúdia o “manhinga.” O Jikidistá a a bhana o kitumu kia ku kamba kúdia manhinga a athu, ni a iama. (Ikalakalu 15:28, 29) Kima kia iibha ku xinganeka ku bhanga kima kieji tu bhangesa ku zanga ukamba uetu ni Nzambi, ni ku tu kaia mu kilunga kiê. Etu tu belesela Jihova mukonda tua mu zolo. Né muene se o muenhu uetu u kala mu iluezu, etu ki tua-nda xikina ku bhanga kima kia iibha, né muene kioso o athu ka belesela Jihova kia tu jijidika ku bhanga kiki. Tuejiia kuila, saí athu a-nda tu tobhesa se ki tu bhana manhinga, maji etu tu suína mu ku belesela o vondadi ia Nzambi. (Juda 17, 18) Ihi i tu kuatekesa phala ki tu xikina o kúdia manhinga né ngó ku tambula manhinga?—Matendelelu 12:23.

11. Mukonda diahi tu tena ku zuela kuila o Kizuua Kia ku Bhana Sata kexile kizuua kiala ni valolo ia dikota?

¹¹ O ima ia kexile mu bhanga o akunji a Izalaiele ku mivu ioso mu Kizuua kia sata, i tu kuatekesa ku tendela kiebhi Nzambi kia mona o manhinga. O manhinga a kexile ngó ni disukilu dimoxi dia katunda. A tokalele phala ku loloka o ituxi, phala o kua Izalaiele a kale ni ukamba uambote ni Nzambi. O manhinga a mukuá a sata ia hombo a tokalele ku a ta ku thandu dia álaka ia kikutu. (Ijila 16:14, 15, 19) Mukonda dia manhinga enhá, Nzambi ua kexile mu loloka o ituxi ia akua Izalaiele. Jihova ua zuelele kuila se diala u jibha o iama phala kúdia o manhinga mê, ua tokalele ku a zunzumuna mu dikungu ni ku a futa ni mavu, mukonda, ‘o muenhu ua xitu uala mu manhinga.’ (Ijila 17:11-14) O kitumu kiki, kexile ni valolo ia dikota. Mu thembu ia Noué, Nzambi ua zuela kuila ka tokalele kúdia manhinga. (Dimatekenu 9:3-6) Ihi ilombolola phala o Jikidistá?

12. Kiebhi Phaulu kia sokesa o manhinga ni ku loloka o ituxi?

¹² O poxolo Phaulu uambe kuila o manhinga ala ni valolo ia ku zelesa kioso kia soneka: “Mu kidi, kala kia tumu o Kitumu, kifua ima ioso muène ia bhingi ku i bonza ni manhinga. Mukonda sé kulundulula manhinga, ki ku kala muloloko ua ituxi.” (Jihebeleu 9:22) Maji, o valolo ia sata ia iama iexile ngó phala kithangana kiofele. Phaulu ua zuela kuila  o ji sata jiji, ja tokalele phala ku lembalala o akua Izalaiele kuila ene exile akua ituxi, maji phala ku zubha o ituxi iâ ioso, a bhingile ku kala ni sata ia mukuá ia beta-kota. O kitumu kiexile “kizuzumbia ngó kia ima iambote ia-nda kuiza-ku.” (Jihebeleu 10:1-4) Kiebhi kieji tena o ku loloka o ituxi?

13. Jezú mu ku bhana o valolo ia manhinga mê kua Nzambi, i lombolola ihi phala eie?

¹³ Tanga Efezo 1:7. Jezú ua bhana o muenhu ué kala sata phala athu oso, o sata íii iala ni valolo iavulu phala io a zolo Jezú ni Tat’ê. (Ngalásia 2:20) Kiene kia bhangele Jezú kioso kia mu fukununa phala ku loloka o ituxi ietu, kala kia kexile mu bhanga mu Kizuua kia Sata. Kioso o mukunji kia kexile mu bokona mu Kididi Kikôla, kia difuile kala uexile bhu pholo ia Nzambi. Mu Kididi ki Kola, muene o mukunji mua bhana o sata ia iama kua Nzambi. (Ijila 16:11-15) Kioso kia mu fukununa, Jezú uai ku diulu iú ua bhana kua Nzambi o valolo ia manhinga mê. (Jihebeleu 9:6, 7, 11-14, 24-28) Etu tu sakidila kiavulu, mukonda tu tena ku kala ni muloloki ua ituxi ietu, ni ku kala ni kitongoluelu kia zele, mukonda tu xikina mu sata a manhinga a Jezú!

14, 15. Mukonda diahi kima kiambote ku bhana valolo ku sata ia Jezú ia lungu ni manhinga?

¹⁴ Mu kindala kiki tua mu tendela kiambote  se mukonda diahi Jihova ua tu fidisa o kúdia ‘manhinga oso oso.’ (Ijila 17:10) O kuila eie u tendela kiambote se mukonda diahi o manhinga ala ni valolo phala Nzambi? O manhinga a lombolola o muenhu. (Dimatekenu 9:4) Sé phata, eie u xikina kuila tu tena ku bhana valolo ku manhinga kala ki bhanga Nzambi ni ku belesela o kitumu kia ku dituna ku tambula manhinga. Phala ku kala ni ukamba ni Nzambi, tua tokala ku kala ni kixikanu mu sata ia kukula kua Jezú, ni ku tendela kuila o manhinga a Jezú ala ni valolo ku pholo ia Mubhangi uetu.—Kolose 1:19, 20.

¹⁵ Kala muthu mudietu u tena ku di bhana ni maka a lungu ni kuxikina ku tambula manhinga mba kana, ni mbandu ia manhinga, mba ku tambula milongo iambata manhinga. Mu kiki, eie u tena ku samba kua Jihova, ni ku di longa kiambote, ni ku batula kiambote o maka, ande dia ku moneka maka a bhonzo. Mu kiki, eie ua-nda kala ni kixikanu kia kolo phala ku dituna ku tambula o manhinga. Etu ki tua mesena ku luualesa Jihova mu ku xikina kubhanga kima kia fidisa muéne. Lelu, saí ji dotolo javulu ni athu a mukuá, a mesena kuila tu bhana manhinga phala ku bhulula o mienhu. Mukonda tu jiselevende ia Nzambi ia zele, tuejiia kuila Jihova muene ua tokala ku zuela kiebhi ki tena ku bhanga ni manhinga. Phala muéne, ‘manhinga oso’ a kôla. Kienhiki etu tua tokala ku belesela o kitumu kiê kia lungu ni manhinga. Mukonda dia uendelu uetu ua zele, tu tena kulondekesa o valolo ia manhinga a sata ia Jezú. O manhinga mê a tu bhangesa ku loloka o ituxi, ni ku kala ni muenhu ua kalelaku.—Nzuá 3:16.

16. Mukonda diahi o mundu ua Jihova ua tokala ku zela?

¹⁶ Kioso Jihova kia katula o mundu ua Izalaiele mu ubhika ku Ijitu, muéne ua ambela kuila: “Mukonda Eme-eme Jihova, ngala ku mi batesa mu kutunda k’oxi ia Ijitu, phala ngi kale ngi Nzambi ienu; kala kiki enu mu di zelesa, mbata Eme nga zela.” (Ijila 11:45) Jihova ua mesenene kuila, o akua Izalaiele a tokalele ku kala athu a zele, mukonda muéne muthu ua zele. Lelu, Jihova ua mesena ué kuila tu kala tu athu a zele. O divulu dia Ijila di tu zuela kiambote o maka enhá.

17. Mbote iahi i ua katula mu ku di longa o divulu dia Ijila?

¹⁷ Sé phata eie ua katula mbote mu ku di longa o divulu dia Ijila. Mu kidi, ua uabhela mu ku di longa o divulu didi, ni ku tendela kiambote mukonda diahi tua tokala ku zela. Mu kiki, kima kiahi dingi ki tua tokala o ku di longa mu divulu dia Ijila? Kiebhi o divulu dia Ijila di tu kuatekesa ku bheza o Nzambi ua zele? Tua-nda di longa o maka enhá mu milongi ia-nda kaiela.