DIAMBU DIA KAPA | O KUILA O KUSAMBA KU TU KUATEKESA?
Mukonda Diahi o Athu Ene mu Samba?
“Eme ng’exile mu jokala izuua ioso. Nuka nga sambele. Maji saí kizuua nga sambe phala ku nganhala itadi iavulu.”
—Samuel, * Kenya.
“Etu oso mu xikola tua tokalele kubhitulula o misambu ia tu longele mu ngeleja.”
—Teresa, Philippinas.
“Eme ngi samba kioso ki nga mu bhita ni maka. Ngi samba ué phala kubhinga o muloloki ua ituxi ni phala kukala Kidistá iambote.”
—Magdalene, Ghana.
O ima ia zuela Samuel, Teresa, ni Magdalene, ilondekesa kuila o athu ene mu samba mukonda dia ima iavulu, amoxi a samba mu kubhinga ima iambote, a mukuá kana. Saí athu a samba ni muxima uâ uoso, maji a mukuá a samba ngó mu kusamba. Kienhiki, ki kale se o athu a samba phala kuditunda kiambote mu xikola mba phala o kibuka kiâ kia joko kunganhala, mba a bhinga kua Nzambi phala kua kuatekesa kulanga kiambote o miji iâ, mba kubhinga ima iéngi, tu xala mu kuijiia kuila jimidi ni jimidi ja athu, a samba. O jingijiie amba kuila katé muene ió kene múia mu ngeleja, ene uá mu samba izuua ioso.
Eie uene mu samba? Se kiene, uene mu samba mukonda diahi? Ki kale se uene mu samba mba kana, nange u dibhuidisa: ‘O kuila o kusamba ku tu kuatekesa? O kuila kuene muthu uene mu kuívua o misambu?’ Saí musoneki uambe kuila o kusamba, “ku kuatekesa o muthu kudivua kiambote . . . Kua soko ni kuívua kamuimbu kambote.” Saí ji dotolo, ja sokesa uá o kusamba ni “milongo.” O kuila o athu a samba ngó mu kusamba inga a samba phala kua kuatekesa kudivua kiambote?
Mu veji dia kiki, o Bibidia i tu londekesa kuila o misambu ki i tu kuatekesa ngó kudivua kiambote kála ki bhanga o milongo, kana. O Bibidia i tu tangela kuila kuene muthu uivua o misambu iambote i bhanga o athu. O kuila kiki kidi? Tu mone o ima ilondekesa o kidi kiki
^ kax. 3 O majina a a lungulula.
