O kuila eie u xikina mu kikanenu kia Bibidia kia lungu ni difukunukinu? * O kidielelu kia ku di sanga dingi ni ndandu jetu jafú kiá, kidielelu kiambote. Maji o kuila kima kiambote ku kala ni kidielelu kiki ku muxima? Phala ku tambuijila o kibhuidisu kiki, kima kiambote ku di longa hanji o phangu ia jipoxolo ja Jezú Kristu.

O jipoxolo a xikinine ni kidi kioso kuila, o difukunukinu, kidi muene. Mukonda diahi? Mu ima iiadi. Kia dianga, o kidielelu kiâ kia tundile mu kidi kiki: Jezú a mu fukunuine mu’alunga. O jipoxolo—ni ‘500 ja jiphange kumoxi—a mono Jezú a mu fukunuine. (1 Kolindo 15:6) O difukunukinu dia Jezú a di mono, ia a di xikina ku athu oso, kala kilondekesa o divulu dia Matesu, Marku, Luka, ni divulu dia Nzuá.—Matesu 27:62–28:20; Marku 16:1-8; Luka 24:1-53; Nzuá 20:1–21:25.

Kia kaiiadi, o jipoxolo a monene mu veji jitatu Jezú ku fukununa kitatu kia athu—kia dianga ku Naini, kaiiadi ku Kafanau, ni ku Betanha. (Luka 7:11-17; 8:49-56; Nzuá 11:1-44) O difukunukinu dia suku-ku, di tua di longo kiá mu kadivulu kaka, dia muthu uexile kamba dia Jezú. Tu di longe dingi ia bhiti.

‘Phang’ê ua-nda fukunuka.’ Jezú ua tumbula o izuelu íii kua Marta, ua fundile phang’ê, Lázalu, ua bhitile kiá izuua iuana mu mbila. Marta ka kexile mu tendela ihi ia mesenene kuzuela Jezú ni izuelu íii. Muéne ua tambuijila: ‘Ng’ejiia kuma ua-nda fukunuka,’ muéne ua kexile mu banza kuila kiki kieji bhita ngó ku pholo. Xinganeka kiebhi kia divu kioso kievu Jezú kuzuela: “Eme ngi difukunukinu ni muenhu,” muéne ua mono Jezú ku fukununa phang’ê mu’alunga!—Nzuá 11:23-25.

Kuebhi kua kexile Lázalu mu izuua iuana kioso kiafú? Lázalu ka zuele kima kilondekesa kuila muéne ua kexile mu kididi kiéngi mu izuua iuana. Lázalu ka kexile ni kima kia tundile ku mukutu uê iu ua ile ku diúlu. Mu ku fukununa Lázalu, Jezú ka mu bhekele mu ixi kala o ku mu katula ku diulu, ku mbandu ia Nzambi. Kienhiki-phe, kuebhi kua kexile Lázalu mu izuua iuana? Muéne ua kexile mu zeka mu mbila.—Ndongixi 9:5, 10.

Lembalala kuila Jezú ua sokesa o kalunga ni ku zeka, ni kuila o muthu a mu balumuna bhu kaxi ka difukunukinu. O musoso u suluka: “‘Kamba dietu Lázalu ua mu zeka. Maji eme ngiia-phe ku mu phaphumuna.’ O maxibulu a mu ebhula: ‘Ngana, se ua mu zeka, ua-nda balumuka.’ Jezú-phe ua tange o kufuá kuê. Jezú anga u a lomboluela kiambote, uixi: Lázalu, uafú.’” (Nzuá 11:11-14) Mu ku fukununa Lázalu, Jezú ua mu vutuila o muenhu, ni ku bheka dingi ku muiji uê. Ujitu ua di kota ua bhana Jezú ku muiji iú.

O madifukunukinu a bhange Jezú kioso kia kexile mu ixi, ilondekesu ngó ia ima ia-nda bhanga kioso kia-nda tumina kala Sobha ia Utuminu ua Nzambi. * Kioso kia-nda tumina o ixi, Jezú ua-nda fukununa oso a mu zeka mu’alunga. Kiene kia mu bhangesa o kuzuela: “Eme ngi difukunukinu.” Xinganeka o kisangusangu ki ua-nda kala na-kiu mu ku mona dingi o jindandu jê afú! Xinganeka ué o kisangusangu kia-nda kala na-kiu o madifundu kioso kia-nda a fukununa!—Luka 8:56.

Jezú uambela Marta: “Uoso u ngi xikana eme, né uafu, u kala dingi ni muenhu. O uoso uala ku muenhu, hé u kala mu ku ngi xikana, ka kà fua dingi.” (Nzuá 11:25, 26) Oso a-nda ku a fukununa ku utuminu ua Jezú ua midi ia mivu, ka-nda fuá dingi​—se a kala ni kixikanu kua muéne.

Kioso kia zubhu o kuzuela o izuelu íii iambote, Jezú ua bhange o kibhuidisu kiki kua Marta: “‘Eie kienhiki, ua ki xikana?’ Kuala Marta: Kiene, Ngana! Eme nga ku xikana kuma eie u Kristu, Mon’a Nzambi.’” (Nzuá 11:26, 27) Abha eie—ua mesena ku kala ué ni kixikanu mu difukunukinu kála kia kexile na-kiu Marta? Kia dianga, ua tokala ku di longa ia lungu ni vondadi ia Nzambi phala o athu. (Nzuá 17:3; 1 Timote 2:4) O ku bhanga kiki, kua-nda ku kuatekesa ku kala ni kixikanu. Mukonda diahi ki u bhingi ku Jimangi ja Jihova n’a ku longe ihi i zuela o Bibidia mu maka enhá? Ene a-nda sanguluka kiavulu mu ku di longa n’eie o maka alungu ni difukunukinu.