DIAMBU DIA KAPA: MUKONDA DIAHI KUENE HADI? THEMBU KUXI IA-NDA BHUA?
A Jibha Athu Avulu sé Kikuma!
Noelle, uexile kamona ka henda, ua uabhele ku bhanga ifikula. Saí kizuua mu usuku, ua kexile mu tonoka mu kithádi kiâ, mu ku bhita kithangana ua dibhale mu ditange dia menha dia kexile kubhata diâ. Anga u fuá mu menha. Kiki kia bhiti semana jiiadi ande dia ku tenesa mivu iuana.
Charlotte, Daniel, Olivia, Josephine . . . Majina a minzangala akexile mu kitala kia 26 a mukuá mu kitala kia 27 a mivu, akexile ku 26 a minzangala a a jibha mu xikola mu mbanza ia Connecticut, E.U.A., mu kizuua 14, ku mbeji ia Kaiadi, ku muvu ua 2012. Mu kithangana kia ku a funda, o Muenexi Obama, ua tumbula o majina a minzangala enhá, iu ua zuela ku mundu ua kexile-mu, uixi: “O ujibhangânga iú ua tokala ku bhua.”
Bano, kilumba uala mu kitala 18 dia mivu, ua tundu ku ixi ia Iraque ku muvu ua 1996 iu uai ni muiji uê ku ixi ia Noruega. O makamba mê, akexile ku mu ixana, Mukengeji. Maji mu kizuua 22, ku mbeji ia Kavua ku muvu ua 2011, Bano ua kexile ku 77 a athu a a jibha, ku kijibhangânga, ua dinanze: “Ngi diela kiavulu mu ku jibha ngó o athu enhá . . . nga mesenene ku jibha dingi athu.”
Ima ia iibha kala íii iene mu bhita ku mundu uoso veji javulu. Xinganeka o ndolo ni mukôndo ijila mu iluezu ia makalu, mu ujibhangânga, mu ita, mu usuéia, ni mu mavuua. Athu avulu a fuá, mba a tala hadi sé ku ta kituxi!
Saí athu a tatela Nzambi, mu kuzuela kuila o Mubhangi uetu kene mu tala o hadi iene mu tala o athu mu ixi. A mukuá amba kuila sumbala Nzambi u tala o hadi ietu, ka mesena ku bhanga kima. A mukuá, amba kuila o jiphaxi jiji, jo xinde kiá kua Nzambi. Kuene hanji ibanzelu iavulu ia lungu ni maka enhá. Maji kuebhi ku tu tena ku sanga o itambuijilu ia tokala? Mu milongi ia kaiela, tua-nda di longa ku Mak’â Nzambi, o Bibidia, phala kuijiia o itambuijilu ia lungu ni mukonda diahi kuene hadi iavulu, ni kiebhi kia-nda bhua.
