XINGANEKA kuila uala ni dikamba ua mu zolo kiavulu ni ku mu ximana, maji muéne u bhanga kima, eie ku tena ku ki tendela. Athu a mu tatela ni ku mu fundisa kuila muéne muthu ua iibha. O kuila ueji xikina ni lusolo kuila kidi, inga ueji kingila hanji kuívua kamba diê? Se muéne kale mu kithangana kieniókio phala ku ku jimbulula se ihi ia bhiti, o kuila ueji mu kingila sé ku mu fundisa?

Ande dia ku tambuijila o ibhuidisu íii, nange ua bhingi kuijiia dingi ima ia mukuá. U tena ku dibhudisa: ‘O kuila ngejiia kiambote kamba diami ni ihi i ngi bhangesa o ku mu ximana?’ Nange ua muijiia. Maji talesa: O kuila tu tena ku kaiela o ijila íii phala kuijiia se Nzambi muthu ua iibha mba kana?

Nange ku ku bhonza ku tendela kiambote o ima i bhanga Nzambi mba o ima iene mu kuehela muéne o ku bhita. Sai athu a-nda ku tangela kuila, Nzambi muthu ua iibha ni ku ku bhangesa ku mu fundisa kala kia bhanga ene. O kuila ua-nda kala bhu mbandu ia Nzambi ni ku sota kuijiia kiambote o maka? Phala ku tambuijila o kibhuidisu kiki, eie ua tokala kuijiia kiambote Nzambi. Dibhudise: ‘Ima iahi iambote iene mu ngi bhanga Nzambi?’

Se uene mu dibhana ni ibhidi iavulu ku muenhu, nange u tena o kuzuela kuila Nzambi ki dikamba diambote kana. Maji xinganeka hanji. O kuila Nzambi uene mu ku bhekela ibhidi ku muenhu—inga mabesá? Kala ki tua mono, Satanaji muéne “o sobha ia mundu iú,” ki Jihova kana. (Nzuá 12:31) Kienhiki, Satanaji muéne uene mu bheka o uadiama ni kuiibha ku mundu iú. Ku xikina kuila, saí ithangana tu bhita ni hadi iavulu, mukonda tu akua ituxi?

Maji, ihi ia bhange Nzambi? O Bibidia i zuela kuila Nzambi, ‘muéne ua bhange o diulu ni ixi,’ muéne ua ‘iudika ué kiambote’ o mukutu uetu. O Bibidia i zuela ué kuila, Jihova ‘o Nzambi ua kuata o muenhu.’ (Jisálamu 124:8; 139:14; Daniiele 5:23) Kiki kilombolola ihi?

Kilombolola kuila, tua tokala ku sakidila o mubhangi uetu mu ku tu bhana o muenhu. (Ikalakalu 17:28) Kilombolola kuila o ujitu ua muenhu, o ima ia uabha iene mu ixi, o henda, makamba ambote, o kúdia ni kuívua—ioso íii ujitu ua tu bhana Nzambi. (Tiiaku 1:17) Ku xikina kuila o mabesá enhá, i tu bhangesa ku mona Nzambi kala kamba dietu dia kazola, u tua tokala ku mu ximana ni ku mu dielela?

Nange ku ku bhonza kiavulu ku dielela kua Nzambi. Nange u mona kuila kua mu ijiia hanji kiambote phala ku mu dielela. Kiki ki tena ku bhita. Mu mbandu jiji, ki tua-nda tena ku tanga o milongi ioso i bhangesa o athu kuzuela kuila, Nzambi muthu ua iibha. Maji, ki kima kiambote ku bhanga nguzu phala kuijiia kiambote Nzambi? * Tua dielela kuila mu ku bhanga kiki, ua-nda tena kuijiia o kidi kia lungu ni Nzambi. O kuila muéne muthu ua iibha? O Bibidia i zuela kuila: “Nzambi henda.”—1 Nzuá 4:8.