KU mbeji ia Kasamanu ua 2006, o ji jurnale ku mundu uoso ja bhana ngolokela ia kuila, kibuka kia akua ku tokuesa kia kexile mu londekesa ku athu oso, milongi iokulu ia sangele, a ixana: “O milongi ia Juda.” O akua ku tokuesa, amba kuila o milongi íii ia-nda tu kuatekesa kuijiia kiambote o ukexilu ua Juda, o dixibulu dia sumbisa Jezú. Kala kilondekesa o milongi íii, o Juda uexile muthu ua suína, o poxolo ua kexile mu tendela kiambote Jezú, ni kuila ua sumbisile Jezú mukonda muéne ua mu bhingile o ku bhanga kiki.

O kuila o milongi íii ia kidi muene? Se kiene, o kuila iene i tanga o ima io sueke ia lungu ni Juda dia Kadiota, Jezú Kristu mba o ima ia lungu ni Jikidistá ja dianga? O kuila o milongi íii i fuinhisa o ukexilu uetu ua ku mona Kristu ni ilongesu iê?

Ki tuejiia kiambote kiebhi kia sange o milongi ia Judá. O madukumendu a moneka mu ithanda ku muvu ua 1970 mba ku muvu ua 1980, Mu veji dia ku a sanga ni ku a bhaka ku akua ku sota o ima koxi a mavu. Nange a a sangele ku Ijitu ku muvu ua 1978 ku mbalale, ka kexile-ko dingi mu funda-ku athu, nange mu mbila. Iexile mbandu jiuana ja moneka mu divulu, a di xana códice (divulu diokulu) a di sonekene mu dimi dia Cóptico (dimi diokulu dia tundu mu dimi dia akua Ijitu).

O códice íii a i bhakele mivu iavulu bhu kididi kia kukuta ku Ijitu, maji kioso kia i katula-mu, iene ia mateka o ku di budika. Saí akua ku tokuesa, a alondekesa o códice ku muvu ua 1983; maji akexile mu i sumbisa kalu iavulu, mukonda dia kiki, ene ka tena ku sumba o mikanda íii. Mu ku bhita mivu iavulu se ku i bhana valolo, ni ku kala bhu kididi kia iibha, kia bhangesa o códice ku di budika dingi kiéngi. Ku muvu ua 2000, o códice a i sumbu ku ngenji ia muhatu, mukua Suíça. Iu ua i bhana ku kibuka kia ku tokuesa ala ni uhete, mu ku langa o ima ia sanga koxi a mavu, ni ku kibuka kia, “A Sociedade Geográfica Nacional” a a bhana o kikalakalu kia ku lungulula kiambote o códice íii, mukonda kua  kexile jimbandu ja kexile mu tandujuka. O kibuka kiki, kieji tokuesa ué o mivu ia códice íii, ku i lungulula ni ku i jimbulula.

O ukexilu ua ku kondala o ji thembu bhu kaxi ka Carbono 14, ua te kidimbu ku códice íii, kia kuila a i bhange ku muvu ua 200 mba ku muvu ua 300, mu K.K. Maji akua ku tokuesa amba kuila o milongi mu dimi dia Cóptico mu ‘milongi ia Juda’ ia tundu mu dimi diokulu dia Ngeleku. Kithangana kuxi kia soneka o ‘milongi ia Juda?’

O kizuelu kia dianga ki tumbula o ‘milongi ia Juda,’ a ki sange mu izuelu ia diiala a mu ixanene Irineu, musoneki uexile Kidistá mu hama ia kaiiadi K.K. Mu divulu diê, Contra as Heresias, Irineu ua sonekene ia lungu ni ibuka iavulu ia athu, a zembele o ilongesu iâ, uixi: “Ene amba kuila Juda, ua sumbisa Jezú, . . . muéne ngó uejidile kiambote o kidi, kia lungu ni kikutu kia tele ni Jezú kia ku mu sumbisa. Bhu kaxi kê, ima ioso mu ixi ni ku diulu iexile kavuanza. Ene a bhangele musoso ua makutu mu ukexilu iú, ia a u ixana, ‘Milongi ia Juda.’

Irineu ua mesenene ku dituna o ilongesu ia makutu ia Jikidistá exile Gnósticos, akexile mu zuela kuila ala ni kuijiia kua soko. O Gnosticismo, ibuka ia athu, kala kibuka u tendela o “kidi” mu ukexilu uê. O Gnósticos, akexile mu katula o milongi iâ mu ilunji iâ, ia a muanganesa o ilongesu iâ mu hama ia kaiidi K.K.

O milongi íii ia akua Gnósticos, saí ithangana ia kexile mu zuela kuila o jipoxolo ja Jezú ka kexile mu tendela kiambote o njimbu ia Jezú, ni kuila saí kikutu, Jezú ua ki jingunuina ngó ku athu ofele. * Saí akua Gnósticos, a xikinine kuila o ixi iexile kaleia. Mukonda dia kiki, akexile mu zuela kuila o “mubhangi ua ima ioso,” o nzambi ia Mikanda ia Jihebeleu, uexile nzambi ia tolo nguzu, ua kexile mu zemba o jinzambi ja iuka. Ene a xikine kuila o muthu uala ni “kuijiia” kua soko, u tena ku mona kuila o muthu ua bhingi ku xisa o mukutu uê ua xitu ni ku kala ni mukutu ua nzumbi.

Kiki kiene kia bhitile ni ‘milongi ia Juda.’ I mateka kiki: “Kiki kiene o kikutu kia Jezú kia jingunuine kua Juda dia Kadiota, ku nake dia izuua, izuua itatu ande dia ku bhanga o fesa ia Phasu.”

O kuila o códice íii, o milongi ia sonekene Irineu ia fikile kuila ia jimbidile? Marvin Meyer, diiala dia tokalele mu kibuka kia diangele o ku tokuesa ni ku lungulula o códice íii, u zuela kuila, ‘o maka a zuela Irineu, a tokala muene mu milongi ia Cóptico a ixana o milongi ia Juda.’

Mu ‘Milongi ia Juda,’ Jezú uelela ni ku sebhulula kioso o maxibulu mê kia londekesa kuila ene ka kexile ni kuijiia kua soko. Maji Juda, muéne ngó bhu kaxi ka dikuinhi ni kiiadi kia jipoxolo ua londekesa kuila uejidile kiambote o ukexilu ua Jezú. Kienhiki, Jezú ua zuela ngó ni muéne o “ikutu ia utuminu.”

O kibuka kia dianga kia lungulula o milongi ia Juda, a xikina mu izuelu ia Irineu. Mu milongi iâ, ene a zuela kuila, Juda uexile muthu a mu zolele kiavulu kua Jezú, kuila muéne ngó ueji tena ku tendela kiambote o ikutu ia “utuminu” ni “ku bokona” mu utuminu. Mukonda dia ku a nganala, o jipoxolo eji sota muthu uéngi phala ku bhingana bhu kididi kia Juda, maji o Juda iú, ueji kituka o “dikuinhi ni katatu ka nzumbi” “ueji kala [ku pholo dia maxibulu oso]” mukonda Jezú uambe,  “Eie ua-nda ngi kuatekesa ku xisa o mukutu uami ua xitu.”

O asoneki a katunda, kala Bart Ehrman ni Elaine Pagels, akexile ué ku pholo mu Ukidistá, ni mu Gnosticismo, ni lusolo luoso, a soneka madivulu a lungile ni ‘milongi ia Juda.’ O milongi ia kexile mu madivulu enhó, ia sokele ni milongi ia lunguluile kiá ku kibuka kiokulu. Maji mu ku bhita kithangana, o asoneki a mukuá kala, April DeConick ni Birger Pearson, alondekesa kuila a thandanganhele uá ni maka enhá. Ene ambe kuila “A Sociedade Geográfica Nacional,” ia londekesele ni lusolo o milongi íii ku athu. Ene a mono ué kuila, o asoneki ka kaiela o maukexilu oso a ku tokuesa o milongi.

DeConick ni Pearson a mono kuila, saí milongi ia betele kota mu códice, ka i lunguluile kiambote ku asoneki okulu. Mu milongi ia lunguluila DeConick, Jezú uixana Juda o “dikuinhi ni katatu ka Dimonho,” ka mu ixana kala, “dikuinhi ni katatu ka nzumbi.” * Jezú uambe ué kuila Juda ka-nda bokona mu “utuminu.” Mu veji dia ‘ku kala ku pholo’ ia maxibulu oso, Jezú u zuela kua Juda: “Eie ua-nda beta ku bhanga kia iibha, ene ndenge. Mukonda eie ua-nda ngi katula o mukutu iú ua xitu.” Mu kibanzelu kia DeConick, o asoneki a ‘milongi ia Juda’ akexile mu sebhulula o jipoxolo joso. DeConick ni Pearson a suku mu kuzuela kuila mu ‘milongi ia Juda,’ o Juda kexile muthu ua suína kana.

Ki kale se o asoneki, a mono kuila mu milongi íii, Juda uexile muthu ua suína mba dimonho, se-ku muthu ua tena kulondekesa kuila o milongi ia Juda, ia kidi muene. Bart Ehrman ua jimbulula: “Ki Juda ua soneka o Milongi íii, mba muthu uamba kuila muéne ua i soneka. . . . O milongi ka i soneka mu thembu ia Juda, ku muthu ua mu ijidile kiambote . . . Kienhiki, ki divulu dia-nda tu bhana milongi ia kidi ia lungu ni ioso ia bhitile ku muenhu ua Jezú.”

O ‘Milongi ia Juda’ milongi ia makutu ia kexile ku hama ia kaiiadi K.K., a diangele ku i soneka mu dimi dia Ngeleku. O asoneki kejiia luua se o ‘Milongi ia Juda’ iene ia kexile mu zuela Irineu. Maji o ‘Milongi ia Juda’ ia londekesa kuila kua kexile kithangana, o Jikidistá ja makutu akexile mu bheka o ilongesu ia makutu mu “Kilunga” ia bhangesa o Jikidistá ku di uanuna mu ibuka. Mu veji dia kulondekesa kuila o Mikanda Ikola ia mu zuela makutu, o ‘Milongi ia Juda’ ilondekesa kuila o jingolokela ja kexile mu bhana o jipoxolo, kala o ngolokela ia bhana Phaulu mu divulu dia Ikalakalu 20:29, 30, iambe: ‘Ngejiia kuma, ki nga-nda ku tunda-bhu’iki, . . . mudienu muene, hinu mu moneka athu a tanga ima ia makutu, ia ku nganala, ni ku sunga o maxibulu ku mbandu iâ.’