Jezú Ua Tu Xíla Phangu Ia Ku Lenduka
Jezú Ua Tu Xíla Phangu Ia Ku Lenduka
‘Eme nga mi bhana phangu, phala mu bhange kala ki nga bhange eme.’ —NZU. 13:15.
KIEBHI KI UEJI TAMBUIJILA?
Kiebhi o Mon’a Nzambi kia londekesa o ku lenduka, kioso kiexile ku diulu?
Mu ukexilu ua xitu, kiebhi Jezú kia londekesa o ku lenduka?
Mabesá ahi a bheka o ku lenduka kua Jezú?
1, 2. Disá diahi dia longo Jezú ku jipoxolo jê mu usuku uê ua sukina mu ixi?
MU USUKU ua sukina ua Jezú mu ixi, muéne u kala ni jipoxolo jê mu inzo mu Jeluzaleme. Jezú u balumuka ku meza, u zula divunga diê. U katula o dituaia, u di kuta na-diu mu mbunda. Anga u ta menha bhu basia, u mateka ku sukula o inama ia jixibulu jê, ni ku i kondona ni dituaia dia dikutile na-diu. Kioso kia zubha, u zuata o divunga diê. Mukonda diahi Jezú ua bhange o kikalakalu kiki kia ku lenduka?—Nzu. 13:3-5.
2 Jezú u jimbulula: ‘Enu muejiia kioso ki nga bhange? . . . Eme-phe ngi Mesene, ngi Ngana, se nga mi sukula o inama, enu uenu mua tokala ku di sukula jinga o inama mudienu. Kuma eme nga mi bhana phangu, phala mu bhange kioso ki nga bhange eme.’ (Nzu. 13:12-15) Mu ku kala polondo phala ku bhanga o kikalakalu kia lenduka, Jezú ua longo disá ku jipoxolo jê, o disá didi dieji kala mu ilunji iâ, ni ku a suínisa kulondekesa o ku lenduka mu ithangana ia mukuá.
3. (a) Kiebhi Jezú kia londekesa o valolo ia ku lenduka mu ithangana iiadi? (b) Ihi i tua-nda di longa mu milongi íii?
3 Kioso Jezú kia sukula o inama ia jipoxolo jê, muéne ka londekesa ngó o valolo ia ku lenduka mu kithangana kieniókio. Mu kithangana kia mukuá, kioso o jipoxolo jê kia kexile mu zoka se nanhi ua kexile o dikota bhu kaxi kâ, Jezú ua kuata mon’a ndenge, u mu bheka bhu kaxi kê, uixi: ‘Uoso u tambulula kamona kaka mu dijina diami, eme-muéne a ngi tambulula. Uoso-phe u ngi tambulula, ua tambulula uoso ua ngi tumu. Mukonda uoso mudienu u di tolesa, muenhó muéne o dikota.’ (Luk. 9:46-48) Mu kuijiia kuila o Jifalizeu akexile mu sota kididi kia fuma, mu ku bhita kithangana Jezú uambela o maxibulu mê: ‘Mukonda uoso u di zangeleka, a mu tulula; uoso-phe u di tolesa, a mu zangeleka.’ (Luk. 14:11) Mu kidi, Jezú ua mesena kuila o akaiedi’ê, a kala ni kilunji kia lenduka, kulenduka mu nzumbi sé ku kala ni ukexilu ua luímbi ni ku di zangeleka. Phala tu tene ku kaiela o phangu iê, tua-nda di longa o phangu iê ia ku lenduka. Tua-nda di longa ué se kiebhi o kídifua kiki, ki ki kuatekesa ngó o muthu u kilondekesa, maji ni athu a mukuá ué.
“KI NGI XIKINA KUVUTUKA KUDIMA”
4. Kiebhi kia londekesa o Mon’a umoxi-élele ua Nzambi, o ku lenduka kioso kia kexile ku diulu?
4 O Mon’a umoxi-élele ua Nzambi, ua londekesele o ku lenduka né muene ande dia kuíza mu ixi. Kioso kia kexile ku diulu, Jezú ua bhiti mivu iavulu ni Tat’ê ia diulu. O Bibidia, mu divulu dia Izaia, dizuela o ukamba ua Mona ni Tat’ê, mu kuzuela: “Jihova Nzambi ua ngi bhana dimi dia uanji, phala uoso ua bhuila ng’ijiie ku mu tela tumaka tua mbote tu mu nhohesa bhu thembu ia tokala; muene mukua ku ngi phaphumuna imene ioso, uphaphumuna dítui diami ni d’ivue, kala ki kala a-di-longi. Jihova Nzambi ua ngi xitununa mátui, eme ki nga xinuka; ki ngi xikina kuvutuka ku dima.” (Iza. 50:4, 5) O Mon’a Nzambi, ua londekesele o ku lenduka, ua bhanene mátui ku ima ioso ia kexile ku mu longa Jihova. Muéne ua kexile polondo phala ku di longa maka alungu ni Nzambi ia kidi. Jezú ua bandekesa dingi o ukamba uê mu ku mona o phangu ia ku lenduka ia Jihova, mu kulondekesa o henda ku athu ati a ituxi!
5. Kiebhi Mingedi, kota dia ji-anju, kia londekesa o ku lenduka ni unjimu, mu ku zoka ni Diabhu?
5 O ji-anju ja mukuá ku diulu, ka kexile ni ukexilu ua difu ni ua Mon’a umoxi-élele ua Nzambi. Mu veji dia ku di longa ia lungu ni Jihova, o anju ia kituka Satanaji o Diabhu, ka londekesa o ukexilu ua ku lenduka—ua londekesa o unéne, ua ku dizangeleka—iu ua bhukumukina Jihova. Jezú ka luualele ni kikalakalu kiê kia tambuile ku diulu, ka kexile ué mu bhanga ima ia iibha ni ungana uê ua tambuile. O Mingedi, kota dia ji-anju, Jezú, ka bhângela mukonda dia ungana uê kioso ‘kia di kuatele ni Diabhu mukonda dia mukutu ua Mozé.’ Mu veji dia ku bhânga, o Mon’a Nzambi ua londekesa o ku lenduka, ni unjimu. Muéne ua sangulukile mukonda dia Jihova ku kala Suke-ku ia ngongo ioso, u batula o maka mu kithangana Kiê kia tokala.—Tanga Juda 9.
6. Kiebhi Jezú kia londekesa o ku lenduka mu ku xikina kuíza mu ixi kála Mexiia?
6 O ima ia di longo Jezú ku diulu, ia lungu ni ima ieji bhita ku muenhu uê mu ixi, kala Mexiia. Nange muéne uejidile kiá o ima ia iibha ieji bhita na-iu. Maji né kiki, Jezú ua xikina kuíza mu ixi, ni kufuá kála Mexiia a mu kanena. Mukonda diahi? Mu ku tumbula o ku lenduka kua Mon’a umoxi-élele ua Nzambi, o poxolo Phaulu ua soneka: “Muène kia kexile, o kidifanganu kiê kiene kimoxi ni Nzambi, maji ka sotele mu nguzu o kusokela ni Nzambi. Inda-phe Muène ua di tolesa, anga u tambula kididi kia ubhika, hé u di bhanga kidifua kimoxi ni athu.”—Fil. 2:6, 7.
MU UKEXILU UA XITU, ‘MUÉNE UA DI TULULA’
7, 8. Kiebhi Jezú kia londekesa o ku lenduka mu undenge uê, ni mu ukunji uê mu ixi?
7 “Phaulu ua soneka, ‘kioso kia tukuluka mu ukexilu ua xitu, [Jezú] mu kídifua kia muthu, muéne ua di tulula, iu ua belesela katé mu kufuá—kufuá kua ku mu sebhulula [ku taka].’ (Fil. 2:8) Tundé mu undenge, Jezú ua tu bhana phangu ia ku lenduka. Sumbala a mu sase ku ji tata akua ituxi—Zuzé ni Madiia—Jezú ni ku lenduka kuoso, ‘ua kolokotele mu ku a tumaka.’ (Luk. 2:51) Íii phangu iambote phala o minzangala, se a tumaka o jitata jâ, Nzambi ua-nda ku a besoala uá!
8 Kioso kia kulu, Jezú ua kolokotele mu kulondekesa o ku lenduka kuê, mu ku ta o vondadi ia Jihova ku pholo, kana o vondadi iê. (Nzu. 4:34) Mu ukunji uê, Jezú Kristu ua longo o dijina dia Nzambi, ua kuatekesa athu a lenduka phala kuijiia Jihova, ni vondadi Iê phala o ixi. Jezú ua kumbidile ué o milongi ia kexile mu longa ia lungu ni Jihova. Mu kifika, mu musambu uê, Jezú ua dianga o ku tumbula: “Tata ietu uene mu diulu, dijina dié a dixile.” (Mat. 6:9) Jezú ua longo o akaied’ê ku xila o dijina dia Jihova, ni ku di ta ku pholo. Muéne ua bhana phangu mu ukexilu iú. Ku disukilu dia ukunji uê mu ixi, Jezú uambe mu musambu kua Jihova: “Eme nga ejidisa o dijina dié, [ku jipoxolo] . . . hanji ngi d’ijidisa dingi.” (Nzu. 17:26) Mu ukunji uê uoso, Jezú ua bhana kijingu kua Jihova mu ima ioso ia bhange mu ixi.—Nzu. 5:19.
9. Ihi ia kanena Zakadiia ia lungu ni Mexiia, ni kiebhi kia di kumbidila kua Jezú?
9 Mu kuzuela ia lungu ni Mexiia, Zakadiia ua soneka: “Sanguluka kiavulu, eie mon’a kilumba mu Ziione; Tumbujuka ni ngalasa eie u mon’a kilumba mu Jeluzaleme; tala, sobha ié iú uiza kokué, u fundisa mu kidi, Mubuludi, ngadiama, ua sambela ku thandu dia bulu, ku thandu dia kaseseme ka bulu, kamona ka bulu ia mukaji.” (Zak. 9:9) O kikanenu kiki kia di kumbidila kioso Jezú kia bokona mu Jeluzaleme, ande ia Fesa ia Phasu, ku muvu ua 33 K.K. O mundu a zale milele bhoxi, a zale ué isalale ia maie mu njila. Kioso kia bokona mu mbanza, athu oso a sangulukile kiavulu. Né muene kioso athu kia kexile mu zuela kuila muéne Sobha, Jezú ua londekesa o ku lenduka.—Mat. 21:4-11.
10. O ku belesela kua Jezú katé mu ufuilu uê, kua londekesa ihi?
10 O ku lenduka kua Jezú Kristu, ni ku belesela kuê mu ixi, kua bhu kioso kiafú ku taka. Muéne ua londekesa kuila o athu a tena ku kala jifiiele kua Jihova, né muene se a bhita mu ibhidi iavulu. Jezú ua londekesa ué kuila Satanaji ua tange makutu, kioso kiambe kuila o athu a sidivila ngó Jihova, sé a mona mbote. (Jobe 1:9-11; 2:4) O ufiiele ua Kristu, ua kuatekesa ué ku zokela o ku iuka ni ungana ua Jihova. Jihova ua sangulukile kiavulu mu ku mona o ufiiele ua Mon’ê ua lenduka.—Tanga Jisabhu 27:11.
11. O kufuá kua Jezú Kristu kua jikula njila iahi phala o athu?
11 Mu kufuá ku taka, Jezú ua bhulula o mundu. (Mat. 20:28) O kufuá kuê, kua bhana kithangana ku ati a ituxi kia ku kala ni muenhu ua kalelaku. Phaulu ua soneka: “O ujitu iú ua ngoho ueza ku thandu dia athu oso mu ku a lungisa n’a tambule muenhu.” (Lom. 5:18) O kufuá kua Jezú kua jikula o njila phala o Jikidistá a a undu ku tambula o muenhu ua kalelaku ku diulu, ni muenhu ua kalelaku mu ixi phala ‘o jimbudi ja mukuá.’—Nzu. 10:16; Lom. 8:16, 17.
EME ‘NGA LENDUKA MUXIMA’
12. Mu ku dibhana ni ati a ituxi, kiebhi Jezú kia londekesa o henda ni ku lenduka?
12 Jezú uexanene athu oso ‘a tatele ni imbamba ia nemene’ kuiza ko kuê. Muéne uambe: “Di tuikienu jungu iami, mu di longe ko kuami; mbata eme nga belesela, nga batama muxima, nda mu mone kutululuka [ku mienhu ienu].” (Mat. 11:28, 29) O ku lenduka kua Jezú kua mu bhangesa kulondekesa o henda, ka kexile ni katombo, mu ku dibhana ni ati a ituxi. Muéne ua di bhanene kiambote ni maxibulu mê. Jezú ua a ximanene, ua a suínisine. Muéne ka kexile mu kua tolesa. Jezú kexile mu jijidika o athu. Muéne ua kanena ku akaied’ê kuila se ene a mu zukamene, ni ku kumbidila o milongi iê, eji kala ni ku tululuka kua muxima, mukonda o milongi iê ki ia nemene. Athu a itala ioso, mala ni ahatu, akexile mu divua kiambote ni muéne.—Mat. 11:30.
13. Kiebhi Jezú kia londekesa o henda ku jingadiama?
13 Mu ku dibhana ni athu exile jingadiama mu Izalaiele, Jezú ua kexile ni henda iâ, mukonda ene kexile jimvuama, muéne ua thandanganhele ni ibhindamu iâ. Mu ku zukama mu Jedikó ua di sange ni kifofo ua mu bhingi jimola a mu ixanene Bartimeu ni kifofo kiéngi. Ene akexile mu bhinga kikuatekesu kua Jezú, maji o mundu ua kexile ku a bazela phala a di xibhe. Ki kieji bhonza ku dituna ku kuatekesa o mala exile ifofo! Jezú ua bhingi ku bheka o mala, ni henda ioso, u a saka. Mu ku bhanga kiki, Jezú ua kaiela o phangu ia Tat’ê Jihova mu kulondekesa o ku lenduka ni henda ku ati a ituxi.—Mat. 20:29-34; Mar. 10:46-52.
“UOSO U DI TOLESA, A KÀ MU ZANGELEKA”
14. Mabesá ahi a bheka o ku lenduka kua Jezú?
14 O ku lenduka kua Jezú Kristu, kua bheka kisangusangu, ni mabesá avulu. Jihova ua sangulukile kiavulu mu ku mona Mon’ê ua lenduka ku belesela o vondadi iê. O jipoxolo ni maxibulu a monene o ku tululuka kua Jezú, ni ku lenduka kuê kua muxima. O phangu iê, o milongi iê, ni izuelu iê ia ku ximana, ia a kuatekesa ku kula mu nzumbi. Athu exile jingadiama, a katula mbote mu ku lenduka kua Jezú, mukonda ene a tambuile o kikuatekesu kiê, o milongi iê, iú ua a suínisa. Mukonda dia sata ia Jezú, athu oso ku mundu ala ni kixikanu, a-nda tambula mabesá a kalelaku.
15. Mabesá ahi a tambula Jezú mukonda dia ku lenduka kuê?
15 Ihi i tuamba ia lungu ni Jezú? O kuila muéne ua tambula mabesá mu ku lenduka kuê? Kiene, mukonda Jezú uambela o maxibulu mê: “Uoso u di tolesa, a kà mu zangeleka.” (Mat. 23:12) O izuelu íii ia di kumbidila kua muéne. Phaulu ua jimbulula: “Nzambi ua mu zangeleka kiavulu, [Jezú] iú ua mu bhana dijina dia tundu o majina moso. Uila kiki, mu kujingisa o dijina dia Jezú, ene oso a di fukamena, kixi ió ala mu diulu, kixi ala mu ngongo, kixi ala koxi a mavu mu’alunga. Ki bhu xala dimi di kamba kufisala kuma Jezú Kristu muene Ngana, mu kubhana o fuma kua Nzambi, Tata.” Mukonda dia ku lenduka kua Jezú, ni ufiiele uê mu ixi, Jihova Nzambi ua zangeleka o Mon’ê, ua mu bhana o kutena ku diulu ni mu ixi.—Fil. 2:9-11.
JEZÚ UA-NDA ‘KUÍZA NI DIKABAKABA MU KU BHÂNGELA O KIDI’
16. Ihi ilondekesa kuila o Mon’a Nzambi ua-nda londekesa o ku lenduka mu ima ioso ia-nda bhanga?
16 O kulenduka kua-nda moneka mu ima ioso ia-nda bhanga o Mon’a Nzambi. Mu kuzuela ihi ia-nda bhanga Jezú ku jinguma Jê, mu ku kala bhu kididi kia fuma ku diulu, o mukua jisalamu uimbi: ‘Zá ni dikabakaba; iene ioso u soke na-iu mu ku bhângela o kidi.’ (Jisá. 45:4) Mukonda dia kidi, ni ku iuka, ni ku lenduka kuoso, Jezú Kristu, ua-nda kuíza ni dikabakaba mu Alumajedone. Ihi ia-nda bhita ku disukilu dia Midi ia Mivu, kioso o Sobha ia Utuminu kia-nda ‘buika o mautuminu oso a nzumbi, ni maungana moso, ni kutena kuoso?’ O kuila muéne ua-nda londekesa o ku lenduka? Kiene, mukonda muéne ua-nda bhana o ungana kua Nzambi, o Tata.’—Tanga 1 Kolindo 15:24-28.
17, 18. (a) Mukonda diahi o jiselevende ja Jihova a kaiela o phangu ia ku lenduka ia Jezú? (b) Ihi i tua-nda di longa mu milongi ia kaiela?
17 Abha etu? O kuila tua-nda kaiela o Phangu ia tu bhana ni kulondekesa o ku lenduka? Ihi ia-nda bhita n’etu, kioso o Sobha Jezú Kristu, kia-nda kuíza mu kizuua kia Alumajedone? O ukexilu uê ua ku bhanga o ima, ulondekesa kuila muéne ua-nda bhulula ngó o athu a lenduka. O ku lenduka kuetu, kuene kua-nda tu bhangesa o ku bhuluka. O ku lenduka kua Jezú Kristu, kua mu bhekela mabesá, ni ku athu a mukuá, lelu ué o ku lenduka kuetu kua-nda tu bhekela ué mabesá avulu.
18 Ihi ia-nda tu kuatekesa ku kaiela o phangu ia Jezú ia ku lenduka? Kiebhi ki tu tena ku kolokota mu ku kala tu athu a lenduka sumbala ni ibhidi i tu bhita na-iu? O ibhuidisu íii tua-nda itambuijila mu milongi ia kaiela.
[Ibhuidisu ia ku dilonga]
[Foto ku mbandu 15]
Mabesá ahi a tu bhekela o ku kaiela o phangu ia Jezú ia ku lenduka?
[Foto ku mbandu 16]
Jezú ua bhana phangu ia kulondekesa henda
