Londekese-nu Kuila Mua Tokala ku Utuminu ua Nzambi!
Londekese-nu Kuila Mua Tokala ku Utuminu ua Nzambi!
“O uendelu uenu u kale uendelu ua fuama mu Njimbu Iambote.” —FIL. 1:27.
KIEBHI KI UEJI TAMBUIJILA?
Nanhi u tena ku tokala ku Utuminu ua Nzambi?
Ihi i tua tokala ku bhanga ia lungu ni dimi dia Utuminu, o misoso, ni itumu?
Kiebhi kia londekesa ió a tokala ku Utuminu, kuila a zolo o itumu ia Nzambi?
1, 2. Mukonda diahi o kitendelesu kia Phaulu kia bhana ku Jikidistá mu kilunga kia Filipe, kia kexile ni dilomboluelu dia dikota?
O POXOLO Phaulu ua suínisa o Jikidistá mu kilunga kia Filipe ku kala ni ‘uendelu ua fuama mu Njimbu Iambote.’ (Tanga Filipe 1:27.) O kizuelu “uendelu” kiambe Phaulu, mu Ngeleku, kilombolola ué “o ukexilu ua muthu o mukua ixi.” O kizuelu kiki kia kexile ni valolo ia dikota ku Jikidistá mu kilunga kia Filipe. Mukonda diahi? Mukonda o akua mbanza ia Filipe, nange a a solele phala ku tokala ku ixi ia Loma. O akua Loma mu Filipe ni mu Utuminu uoso ua Loma, a dizangelekele a sangulukile ué bhenge-bhenge mukonda dia ku tokala mu ixi íii ni ujitu ua dikota ua ku a langa mu itumu ia utuminu ua Loma.
2 O jiphange mu kilunga kia Filipe, a tokalele muene dingi ku dizangeleka. Phaulu ua a lembalala kuila mukonda dia ku kala Jikidistá a a undu, o ixi iâ ia tokalele ‘ku Utuminu ua diulu.’ (Fil. 3:20) O ixi iâ ki i tokalele ku Utuminu ua athu, maji a tokalele ku Utuminu ua Nzambi. Mukonda dia kiki, ene akexile ni ujitu ua dikota ua ku a langa, ni ku tambula mabesá avulu.—Efe. 2:19-22.
3. (a) A nanhi ala ni ujitu ua ku tokala ku Utuminu ua Nzambi? (b) Ihi i tua-nda di longa mu milongi íii?
3 O kitendelesu kia Phaulu kia ‘kulondekesa kuila a tokala ku utuminu ua Nzambi’ kia tokala bhenge-bhenge kua ió, a-nda tumina ni Kristu ku diulu. (Fil. 3:20) Maji kia tokala ué kua iá ala ni ujitu ua ku kala mu ixi ku Utuminu ua Nzambi. Mukonda diahi? Mukonda o Jikidistá joso a sidivila Sobha imoxi, Jihova, oso a tokala ku belesela o itumu iê. (Efe. 4:4-6) Lelu, o athu a di suínisa kiavulu phala ku a xikina ku tokala mu ixi iéngi iambote. Etu ki tu beta-kota mu ku bhana valolo ku ujitu ua ku tokala ku Utuminu ua Nzambi! Phala ku bandekesa dingi o kisakidilu kietu ku ujitu iú, tua-nda di longa ima ia difu ia lungu ni itumu ia jinguvulu ni itumu ia tokala ku belesela ió a tokala ku Utuminu ua Nzambi. Tua-nda di longa itumu itatu i tua tokala ku belesela se tua mesena ku kala ni ujitu ua ku tokala ku Utuminu ua Nzambi.
ITUMU IA TOKALA AKUA IXI
4. O dimi dia zele dilombolola ihi, ni kiebhi ki tua tokala o ku di ‘zuela?’
4 Ku di longa o dimi. Saí jinguvulu a bhinga kuila oso a mesena ku tunga mu ixi iâ, ejiia kuzuela o dimi dia ixi íii. Né muene kioso kia a xikina ku kala mu ixi, nange o athu a di suínisa mu mivu iavulu phala ku tena kuzuela kiambote o dízui dia ixi. Nange ene a di longa ni lusolo o ukexilu ua kuzuela o dízui didi, maji ku bhita hanji thembu phala ku tena ku dizuela kiambote. Kiene kimoxi ué ni Utuminu ua Nzambi, ku bhinga ué kuila ió a tokala ku Utuminu ejiia o ‘dimi dia zele.’ (Tanga Sofoniia 3:9.) Ihi ilombolola o dimi dia zele? O kidi kia lungu ni Nzambi ni ikanenu iê, kala ki longa o Bibidia. Etu ‘tu zuela’ o dimi dia zele kioso ki tu belesela o itumu ni ijila ia Nzambi. O a tokala ku Utuminu ua Nzambi, nange a di longa o itumu ia Bibidia ni lusolo ni ku a batizala. Né muene kioso kia a batizala, ene a tokala ku suína phala ‘kuzuela’ o dimi dia zele. Kiebhi kia tena ku bhanga kiki? Kala muthu ua tokala uijiia o milongi ia Bibidia i tua di longo kiá ni ima i tu bhanga.
5. Mukonda diahi tua tokala ku di longa o misoso ioso ia lungu ni kilunga kia Jihova mu ixi?
5 Kuijiia o misoso ia ixi. O muthu ua mesena ku tokala ku ixi mu utuminu ua athu, ua tokala uijiia o misoso ia unguvulu ienioió. Kiene kimoxi ué, oso a mesena ku tokala ku Utuminu ua Nzambi, a tokala kuijiia kiambote ioso ia tokala ku Utuminu ua Nzambi. Xinganeka o phangu ia an’a Kola, a sidivile mu Izalaiele. Ene a zolele o mbanza ia Jeluzaleme ni kididi kia ubhezelu, akexile mu tanga o misoso ia mbanza. Ene ka zolele ngó o mbanza, maji a zolele o dijimbuluilu dia kididi kia ubhezelu. Jeluzaleme iexile o mbanza ia “Sobha ia dikota” Jihova, iexile kididi kia ubhezelu ua kidi. Mu mbanza ienioió, muene mua kexile mu longa o Itumu ia Jihova. O mundu akexile mu u tumina ku Sobha ia Jeluzaleme, kuene kua londekesele Jihova o henda iê. (Tanga Jisálamu 48:1, 2, 9, 12, 13.) O kuila eie ué uala ni vondadi ia ku di longa ni ku tanga o misoso ia kilunga kia Jihova mu ixi, kála kia kexile mu bhanga ene? Kioso ki uia ni ku di longa dingi ia lungu ni kilunga kia Nzambi mu ixi, ni kiebhi Jihova kia kuatekesa o mundu uê, ua-nda kala dingi ni kidielelu ku Utuminu ua Nzambi ni ku u xikina kuila ua kidi. Ua-nda kala dingi ni vondadi ia ku boka o Utuminu ua Nzambi.—Jel. 9:24; Luk. 4:43.
6. Mukonda diahi Jihova u kingila kuma oso a-nda bhanga mbandu ku Utuminu uê, a di longa ni ku belesela o itumu ni ijila ia Utuminu?
6 Kuijiia o itumu. O jinguvulu ji jijila, kuila oso a tokala mu ixi iâ a di longa o itumu ia ixi, ni ku i belesela. Kienhiki, tu kingila kuila Jihova u mesena tu di longa ni ku belesela o itumu ni ijila, phala ió a tokala ku Utuminu. (Iza. 2:3; Nzu. 15:10; 1 Nzu. 5:3) O itumu ia athu iene mu lueza, ki i iuka. Maji o ‘ngonge ia Jihova ia iuka.’ (Jisá. 19:7) O kuila tua uabhela o itumu ia Nzambi, ni ku tanga o Maka mê izuua ioso? (Jisá. 1:1, 2) O ukexilu ua mukuá u tu kuatekesa kuijiia o itumu ia Nzambi, o ku di longa mudietu. Se-ku muthu u tena ku di longa bhu kididi kietu.
O ATHU A TOKALA KU UTUMINU A ZOLO O ITUMU IA NZAMBI
7. Itumu iebhi ia belesela ió a tokala ku Utuminu?
7 Phala ku kolokota mu ku bhanga mbandu ia Utuminu, ki ku bhingi ngó kuijiia o itumu, ia Nzambi kua bhingi ué ku zola o itumu íii. Saí athu amba kuila a xikina o itumu ni ijila ia bhana o jinguvulu mu ixi mua tungu. Maji se a mona kuila kitumu kia a ibhila mba se-ku muthu ua mu mona, ene a xibhaka o kitumu. O athu enhá, sumbala a bhanga kiki phala ‘kua uabhela ku athu.’ (Kol. 3:22) O athu a tokala ku Utuminu, ene mu belesela o itumu ia lebha. Etu tu belesela o itumu ia Nzambi né muene se se-ku muthu ua mu tu mona. Mukonda diahi? Mukonda tua zolo o Mubhangi-a-itumu.—Iza. 33:22; tanga Luka 10:27.
8, 9. Kiebhi ki u tena ku kijiia se ua zolo muene o itumu ia Nzambi?
8 Kiebhi ki u tena o kuijiia se ua zolo o itumu ia Nzambi? Xinganeka kiebhi ki u divua kioso kia ku bhana itendelesu ia lungu ni kima kia ku uabhela—kala o ukexilu ua ku zuata ni ku di iudika. Ande dia ku tokala ku Utuminu ua Nzambi, nange ku kexile ni ukexilu uambote ua ku zuata. Kioso ki ua bandekesa o henda iê kua Nzambi, ua di longo ku zuata kiambote phala ku mu bhana kijingu. (1 Tim. 2:9, 10; 1 Phe. 3:3, 4) Nange u fika kuila uala ni ukexilu uambote ua ku zuata. Maji se kafunga u ku ambela kuila saí jiphange mu kilunga ka uabhela o ukexilu uê ua ku zuata? Ihi i ueji bhanga? O kuila ueji dizangala mba ueji jijila o uzuatelu uê? O athu oso a tokala ku Utuminu ua Nzambi, a kaiela o phangu ia Kristu. (1 Phe. 2:21) O poxolo Phaulu ua soneka ia lungu ni phangu ia Jezú: ‘Tuendienu kala muthu ni ku uabhela mukuá, mu ima iambote i bhekela o ku londekesa o kixikanu. Mukonda ni Kristu muene ka di uabhelele ngó muene.’ (Lom. 15:2, 3) Phala ku kala ni ku tululuka mu kilunga, o Kidistá ua kulu mu nzumbi, u xikina o kitendelesu phala akuâ ka divu kia iibha.—Lom. 14:19-21.
9 Xinganeka o maukexilu a iiadi alungu ni maka enhá: O ukexilu uetu ua lungu ni ku di zeka ni ukexilu ua ukaza. O athu ka tokala luua ku Utuminu ua Nzambi, nange a di zeka ni mala ni akuâ, a banza kuila o ufusa kima kiambote, a banza ué kuila o ku ta phánda ni ku di xisa, ki kituxi. O a tokala ku Utuminu ua Nzambi, a xi kiá o ukexilu iú. Sumbala saí Jikidistá akexile kiá ni ukexilu iú, lelu ene ejiia kuila o ku zeka kumoxi ni ukaza, ujitu ua Nzambi. Ene a bhana valolo ku itumu ia lebha ia Jihova, a xikina ni muxima uoso kuila oso enda ni ku bhanga ufusa ka tokala ku bhanga mbandu ku Utuminu ua Nzambi. (1 Kol. 6:9-11) Ene ejiia ué kuila o muxima u bhomba kinene. (Jel. 17:9) Ene a uabhela ku tambula itendelesu phala ku a kuatekesa ku kala ni ukexilu uambote.
O ATHU A TOKALA KU UTUMINU A BELESELA O ITENDELESU
10, 11. Itendelesu iahi iene mu tu bhana o Utuminu ua Nzambi, ni ihi i u bhanga?
10 O jinguvulu nange a dimuna o mundu uâ mu iluezu ia kudia ni sauidi. Tuejiia kuila, ko kudia kuoso mba ukexilu ua ku di saka, ua iibha. Maji se saí kudia ku tena ku bheka uhaxi, o nguvulu ua tokala ku dimuna o athu phala ku a langa. Maji se o nguvulu ka ki bhange, nange a tena ku mu tatela. Kiene kimoxi ué, o Utuminu ua Nzambi uene mu bhana itendelesu ia lungu ni ukexilu ua athu, ki kala mu nzumbi mba mu xitu. Mu kifika, o Internete iene mu kuatekesa kiavulu, phala ku tumikisa njimbu, ku di longa ni ku tonoka. O kilunga kia Jihova kiene ué mu katula mbote mu mitelembe ia Internete. Maji saí ijimbuete mu mitelembe ia internete, ka tokala ku i jikula, mukonda i tena ku zanga o ukexilu uetu uambote mu nzumbi. O ijimbuete ilondekesa o ufusa, i tena ku zanga o ukexilu uambote ua muthu ua tokala ku Utuminu ua Nzambi. Mivu ku dima, o kibuka kia kimbadi kia fiiele uene mu tu tendelesa kiavulu ia lungu ni ijimbuete íii. Tu sakidila kiavulu o itendelesu íii!
11 Ku mivu íii ia sukina, kua moneka dingi ijimbuete ia mukuá—tu tena ku katula mbote se tu di langa kioso ki tu i jikula. Maji o ijimbuete íii ia ibuka ia isangela mu mitelembe ia internete iala ué ni iluezu iê. Iene i tena ku bhangesa o muthu ku dilunga ni athu a iibha. (1 Kol. 15:33) Mukonda dia kiki, o kilunga kia Nzambi kiene mu tendelesa kiavulu ku di langa, kioso ki tu jikula o mitelembe ia ijimbuete íii. O kuila ua tange kiá o itendelesu ioso iene mu tu bhana o kimbadi kia fiiele, ia lungu ni ijimbuete ia ibuka ia isangela mu mitelembe ia internete? Kiluezu kia dikota ku jikula o ijimbuete íii ande dia ku tanga o itendelesu iene mu tu bhana o kimbadi! * Kiki kia difu ni ku tambula milongo sé ku tanga o itendelesu iê.
12. Mukonda diahi kiluezu kia dikota ku bhukumukina o itendelesu?
12 Oso ka belesela o itendelesu ia kimbadi kia fiiele, a di bhekela ibhidi ni ku bhekela ué ibhidi ku jindandu jâ. Saí athu a kala ni kifua kia ku tala o ufusa, ene mu bhanga undumbu, athu enhá a di nganala mu ku banza kuila Jihova kene mu mona ioso iene mu bhanga. Kiluezu kia dikota ku banza kuila tu tena ku sueka o kituxi kietu kua Jihova! (Jisa. 15:3; tanga Jihebeleu 4:13.) Nzambi ua mesena ku kuatekesa o athu bhu kaxi ka tufunga. (Nga. 6:1) Kala kiene mu bhanga o jinguvulu ku muthu u bhukumukina o kitumu, Jihova ua-nda tambula ku athu a bhukumukina o itumu iê, o ujitu ua ku bhanga mbandu ku Utuminu ua Nzambi. * (1 Kol. 5:11-13) Maji muéne muthu ua henda. Oso a diela o ituxi, Jihova u a xikina, phala ku bhanga mbandu ku Utuminu ua Nzambi. (2 Kol. 2:5-8) Ujitu ua dikota ku sidivila o Sobha ia henda!
O ATHU A TOKALA KU UTUMINU A UABHELA KU DI LONGA
13. Kiebhi kiene mu londekesa ió a tokala ku Utuminu kuila a bhana valolo ku milongi ia tambula bhu xikola?
13 Saí jinguvulu a kalakala kiavulu phala ku longa o mundu uâ. Ene a tunga ji xikola, phala ku a longa ufunu. O athu a tokala ku Utuminu a bhana valolo ku ji xikola jiji, ene a a longa ku tanga ni ku soneka, ni ku di dikila ni kitadi kiâ. Maji né kiki o athu a tokala ku Utuminu ua Nzambi, a beta-kota ku bhana valolo ku milongi ia tambula kua Jihova, bhu kaxi ka kilunga kiê. O jitata a a suínisa ku tanga phala o tuana tuâ. Mbeji joso o kimbadi kia fiiele uene mu bhanga O Mulangidi ni Despertai! Se u sota kithangana phala ku tanga o madivulu enhá, ua-nda kaiela o itendelesu i bhana o kibuka kia ku longa o Utuminu ua Nzambi.
14. (a) Milongi iebhi i tuene mu tambula? (b) Itendelesu iebhi ia tokala phala o Usuku ua Ubhezelu ku Muiji i uene mu kumbidila?
14 Semana joso, oso a tokala ku Utuminu ua Nzambi, a tambula milongi mu iônge. Mu kifika, o Xikola ia Ukunji ua Nzambi, iene mu longa o maxibulu phala ku longa kiambote o Mak’â Nzambi, makuinhi a samanu a mivu, ndenge. O kuila ua di soneka kiá mu xikola íii? Ku mivu ia bhiti o kimbadi kia fiiele uene mu suínisa o miji ku di longa mu Usuku ua Ubhezelu ku Muiji ku semana. O kithangana kiki, kiene mu suínisa o ukamba ku muiji. O kuila uene mu kaiela o itendelesu iene mu tu bhana mu madivulu metu? *
15. Ujitu uahi ua beta-kota u tuala nau?
15 O athu a tokala ku unguvulu ua athu ene mu suínisa akuâ ku kuatekesa o unguvulu uâ, sumbala o kibuka kia tokala ku unguvulu ua mu tumina o ixi, phala ku sota athu avulu a kuatekesa o unguvulu, aia nzo ni inzo phala ku sanga o athu. O athu a tokala ku Utuminu ua Nzambi, a bhanga kiki ku mundu uoso, ki kale mu ikoka mba mu inzo ni inzo. Kala ki tua di longo mu milongi ia dianga, O Mulangidi u bhana ngolokela ia Utuminu ua Jihova, o kadivulu ka beta-kota mu ku ka uana ku mundu uoso! O ujitu ua beta-kota u tuala nau, o ku tangela akuetu ia lungu ni Utuminu ua Nzambi. O kuila ua mu suína mu sidivisu ia kuboka?—Mat. 28:19, 20.
16. Kiebhi ki u tena kulondekesa kuila u muthu uambote ua tokala ku Utuminu ua Nzambi?
16 Kua kambe ngó o Utuminu ua Nzambi uene ngó uanda tumina mu ixi ioso. Uene ua-nda langa o ukexilu uoso ua muenhu ua athu ki kale mu nzumbi kala mu ima ioso. O kuila eie ua-nda kala muthu uambote mu Utuminu ua Nzambi mu kithangana kieniókio? Kiki kiene o kithangana kia ku dilondekesa. Mu ima ioso i u sola o ku bhanga izuua ioso, bhanga-io phala ku ximanesa Jihova, ni u londekese kuila u muthu uambote ua tokala ku Utuminu ua Nzambi.—1 Kol. 10:31.
[Tanga mu luji]
^ kax. 11 Mu kifika, tanga o Despertai! dia mbeji ia Kavua ua 2011, mu jimbandu ja 24-27; ua Kakuinhi ua 2011, jimbandu 10-13; ni ua Kauana ua 2012, mbandu 3-9.
^ kax. 12 Tanga O Mulangidi ua Katanu ua 2012, mu jimbandu ja 30-31, mu phutu.
^ kax. 14 Tanga O Mulangidi ua 15 ua Kakuinhi ua 2011, mu jimbandu 6-7, mu phutu ni Kikalakalu Kietu kia Utuminu kia Katatu ka 2011, mu jimbandu 3-6.
[Ibhuidisu ia ku dilonga]
[Kilombuelelu ku mbandu 21]
O kuila ua mu belesela o itendelesu ia Bibidia mu madivulu metu ia lungu ni mitelembe ia Internete?
[Foto ku mbandu 19]
O kuila u sanguluka ni ubhezelu ua kidi ni misoso iê kála kia kexile mu bhanga an’a Kola?
[Foto ku mbandu 22]
Eie ni muiji uê, mu tena ku katula mbote mu Usuku ua Ubhezelu ku Muiji, u tena ku mi kuatekesa phala ku bhanga mbandu ku Utuminu ua Nzambi
