Mbalahamu Diiala Dia Suína

Mbalahamu u tala ku muiji uê, ni ku jiselevende jê, a mu di pelepalala phala kuia mu ixi ia Kanana. (Dimatekenu 12:1-5) Mu ku tala o kibuka kiki kia dikota, kia athu kiala bhu maku’ê, Mbalahamu u bhanga o kikalakalu kiê kia ku a tambula konda. Kiebhi muéne kia-nda tena ku a dikila mu ixi iéngi? O kuila ua tokala ku a tumina kuia mu ixi ia Uli, kuene ibhaku iavulu, ididi iambote phala ku kuna, ni menha avulu? Ihi i tuamba se muéne ua katele mba ua fuile, mu ixi muendele? Nanhi ueji tambula konda ia muiji uê? Íii iene iexile o ibhindamu ia Mbalahamu, maji muéne kehele kuila o uôma uê u mu fidisa o kuia. Muéne ua mesenene ngó ku kumbidila, ni ku belesela o itumu ia Nzambi, se-ku kima kieji mu fidisa —kiki kiexile kijimbuete kia ku suína.

O KU SUÍNA IHI? O ku suína kulombolola ku kala ni ngunzu mu ukexilu uoso, o ku kolokota, ni ku kala ufiiele mu ibhidi. O ku suína ki kilombolola kuila nuka tua-nda kala ni uôma. Mu kiki, o muthu a mu bhana o ku suína kua Nzambi, u bhanga kima sumbala ni uôma.

KIEBHI MBALAHAMU KIA LONDEKESA O KU SUÍNA? Mbalahamu ua kexile polondo phala ku belesela Nzambi. Mbalahamu ua kudila bhu kaxi ka athu akexile mu bheza jinzambi javulu, ni iteka. Maji né kiki, muéne ka kexile ni uôma ua ima ieji zuela o athu, ieji mu fidisa ku bhanga o kima kiejidile kuila kidi. Mu veji dia kiki, Mbalahamu ni ku suína kuoso, ua solo njila iéngi, o ku bheza ngó Nzambi imoxi—Jihova, o “Nzambi Suke-ku.”—Dimatekenu 14:21, 22.

Mbalahamu ua tele o ubhezelu ua Nzambi ku pholo, mu veji dia jimbote jê. Muéne ua solo kueha o ukexilu uambote ua muenhu uê mu ixi ia Uli, phala kuia mu kikangalakata, mu ku dielela kuila Jihova ueji mu dikila. Mu ku bhita mivu, nange Mbalahamu ua xinganekene hanji ku jimbote joso ja xile mu ixi ia Uli. Maji Mbalahamu uejidile kuila Jihova ueji mu langa, ni ku langa uê o muiji uê. Mu kuijiia kuila Jihova, muéne o Muthu ua betele kota ku muenhu uê, Mbalahamu ua suínine phala ku belesela o itumu ia Nzambi.

PHANGU IAHI I TU KATULA KUA MUÉNE? Tu tena ku kaiela o phangu ia Mbalahamu mu ku suína ku belesela Jihova, né muene se athu a tu kondoloka kene mu ki bhanga. Mu kifika, o Bibidia i longa kuila ió a zokela o ubhezelu ua Jihova Nzambi, a tena ku a zukutisa, nange ku makamba, mba ku miji. (Nzuá 15:20) Kioso ki tu xikina ku di longa ia lungu ni Jihova, tu tena ku zokela o ubhezelu uetu mu ukexilu uambote.—1 Phetele 3:15.

 Tu tena ku dielela mu ikanenu ia Nzambi, ia kuila muéne ua-nda langa ió ala ni kixikanu kua muéne. O kidielelu kiki, ki tu suínisa ku thandanganha ni ima mu nzumbi, mu veji dia ku thandanganha ni ima ia xitu. (Matesu 6:33) Ejiia kiebhi o muiji iú ua tena ku bhanga kiki.

Sumbala ala ni ana kiiadi, Doug ni Becky, a solo kuia mu ixi kuala ibhindamu iavulu ia aboki a njimbu iambote. Kia zubha ku xinganeka ni ku samba, ene a solo kuia ku pholo. Doug uambe: “Kua bhingile ku suína phala kuambata o tuana, mukonda ki tu’ijidile ihi ieji bhita n’etu.” Maji kioso ki tua banze o ku xisa o dibhata dietu, tua di longo o phangu ia Mbalahamu ni Sala. Mu ku xinganeka kiebhi ene kia dielele kua Jihova—ni kiebhi Jihova kia a kuatekesa—kia tu kuatekesa ué kiavulu.”

Doug uambe ia lungu ni muenhu uê mu ixi ia dikanga, kuila: “A tu besoala mu ukexilu uavulu.” Muéne ujimbulula: “Mukonda dia ku sosola o ukexilu uetu ua muenhu, tu kala dingi ni kithangana kia ku kala kumoxi”—mu ukunji, mu ku di zuelesa mudietu, ni ku tonoka ni tuana. O ukexilu iú, ki tu bhonza ku ijimbulula mu izuelu.”

Mu kidi, ki athu oso a tena ku sosola o ukexilu ua mienhu iâ. Maji né kiki, etu oso tu tena ku kaiela o phangu ia Mbalahamu, mu ku ta o ubhezelu uetu kua Nzambi ku pholo mu ku dielela kuila muéne ua-nda tu kuatekesa. Kioso ki tu bhanga kiki, tua mu belesela o kitendelesu kia Bibidia kia kuila, “tu kolokotienu ni kuila: ‘Jihova muéne múkuatekexi uami, ki ngi kala ni uôma.’”—Jihebeleu 13:5, 6.

[Kilombuelelu ku mbandu 7]

O Muhatu u Bhezela Nzambi, Muhatu Uambote

Sala uexile muhatu ua diiala dia kixikanu. Maji o muhatu iú mubhezi a Nzambi ua bhana phangu iambote. O Bibidia i tumbula veji jitatu o dijina diê, o ahatu abhezi a Nzambi a tokala ku kaiela o phangu iê. (Izaia 51:1, 2; Jihebeleu 11:11; 1 Phetele 3:3-6) Sumbala o Bibidia ki izuela ima iavulu ia lungu ni muhatu iú, maji tu tena ku mona kuila muéne uexile muhatu ua uabha.

Mu kifika, xinganeka kiebhi Sala kia divu kioso Mbalahamu kia mu tangela kuila ua tambula kitendelesu kia Nzambi kia ku xisa Uli. O kuila muéne uebhula se kuebhi kueji kuia, ni mukonda diahi? O kuila ua thandanganhele ni ibhindamu ia muenhu? O kuila ua luualele mukonda ueji xisa o jindandu jê, ni makamba mê, mukonda kejidile se kizuua kuxi kieji ku a mona dingi? Se phata muéne ua kexile ni ibanzelu íii. Maji né kiki muéne ua mesenene ku a xisa, ua dielele kuila Jihova ueji mu besoala mukonda dia ku belesela.—Ikalakalu 7:2, 3.

Sala kexile ngó selevende ia belesela Nzambi, uexile ué muhatu uambote. Mu veji dia ku kala ku pholo dia muadi’ê, mu ku batula o maka ku muiji, Sala ua kexile mu xila muadi’ê, mu ku mu kuatekesa kioso Mbalahamu kia kexile mu batula o maka ku muiji. Kienhiki muéne ua di zuika kitundu—ua fuama—ni ídifua iê iambote.—1 Phetele 3:1-6.

O kuila o ahatu lelu a tena ku kaiela o phangu iê? Saí muhatu a mu ixana Jill ua zediuile mu ukaza ué, mu 30 a mivu uambe: “O phangu ia Sala ia ngi longo kuila ki nga tokala ku kala ni uôma ua kuzuela ni muadi uami o ibanzelu iami,” uambe dingi, “muadi uami muéne ua tokala ku batula o maka, mukonda muéne o mutuameni ua muiji. Kioso kia bhanga kiki, eme ngi bhanga ioso phala o ima i tunde kiambote.”

O phangu ia beta-kota i tu tena ku di longa kua Sala íii: Sumbala muéne uexile muhatu ua fuama, Sala kehela kuila o ku fuama kuê, ku mu bhangesa ku di zangeleka. (Dimatekenu 12:10-13) Mu veji dia kiki, muéne ni ku lenduka kuoso ua kexile kumoxi ni Mbalahamu mu ithangana iambote, ni mu ithangana ia bhonzo. Se-ku phata kuila Mbalahamu ni Sala, akexile ni kixikanu, a di zolele kiavulu—kala muthu uexile dibesá phala mukuá.