Nanhi ua Tokala ku Longa o Mak’â Nzambi ku Tuana?

“Xibulu ki i tundu mesene iê ua mu longo. Suke xibulu ioso ki i zubha ku di longa, i soka ni mesene iê.”—LUKA 6:40.

SAÍ jitata a banza kuila ene kala ni uhete ua ku longa o mak’â Nzambi ku tuana tuâ. Nange ene a banza kuma kejiia kiambote o mak’â Nzambi phala ku longa kiambote. Mukonda dia kiki, ene ehela o jindandu jâ, mba o atuameni a jingeleja ku longa o tuana tuâ.

Kienhiki, nanhi ua tokala ku longa o itumu ia Nzambi ku tuana? Xinganeka ihi i zuela o Bibidia mu maka enhá, ni u i sokese ni izuelu ia jingijiie.

Kiebhi o Kikalakalu Kia Jitata?

Ihi i longa o Bibidia: “Jitata, kana ku kuatesa njinda ku tuana tuenu, maji kolokote-nu mu ku a longa mua Ngana.—Efezo 6:4, “Holman Christian Standard Bible.”

Ihi ia zuela o jingijiie: Kiebhi o jitata kia tena ku katula mbote, se ene ejiia kiambote o mak’a Nzambi? O milongi, A Participação dos Pais na Religião, e O Comportamento Infantil, a i soneka ku muvu ua 2009, iambe: “O mak’â Nzambi, a tena ku kuatekesa o mala ku kala  jitata jambote. O mak’â Nzambi a kuatekesa o athu mu ukexilu uoso, o milongi iê ilondekesa o njila iambote kiebhi o muthu kia tokala o kuenda ni muenhu.”

O Bibidia i tendelesa kiavulu o ku bhana valolo ku kikalakalu kia jitata, kia lungu ni ku sasa, ni ku longa o tuana. (Jisabhu 4:1; Kolose 3:21; Jihebeleu 12:9) O kuila o kitendelesu kiki kiala ni valolo lelu? Ku muvu ua 2009 o Xikola ia Katunda ia Flórida ia soneka kadivulu ka zuela kuila, o ukexilu ua jitata u tena ku bhangesa o tuana ku katula phangu iambote, mba aiibha. O jingijiie a mono kuma o tuana ala ni jitata a thandanganha ni ulongelu uâ, a sanguluka dingi. O tuana tua mala nange a kala dingi ni ukexilu uambote, o tuana tua ahatu a kala ni sauidi ni kilunji kiambote. Mu kidi o milongi ia Bibidia, iene hanji ni valolo.

O Kuila o Kikalakalu Kia ji Mama Kiala ni Valolo?

Ihi i longa o Bibidia: “Kana kueha o ijila ia mam’enu.”​—Jisabhu 1:8.

Ihi ia zuela o jingijiie: Ku muvu ua 2006, o Manual de Psicologia Infantil, iambe: “O ji mama a ngastala 65% mba 80% ia kithangana kiâ, phala kuzuela ni tuana, o jitata ndenge, kiki kiene mu bhita mu jixi javulu. O ukamba iú, o izuelu ia ji mama, ni ibhangelu iâ, i tena ku bhangesa o ana ku kala ni ukexilu uambote.

Kioso o jitata kia kala kumoxi phala ku longa o tuana tuâ, o mak’a Nzambi, ene a bhana maujitu a iiadi. Kia dianga, o tuana a kala ni ujitu ua ku kala ni ukamba ni Tata iâ ia diulu, o ukamba iú u tena ku a kuatekesa ku mienhu iâ. Kaiiadi, o tuana a tena ku di longa mu ku mona o phangu ia jitata ia ku kala kumoxi phala ku suua o mbambe ia beta-kota. (Kolose 3:18-20) Sumbala athu engi a tena ku kuatekesa o tata ni mama, maji o ujitu ua ku longa o tuana o mak’a Nzambi, ni ihi ia mesena Nzambi phala o muiji, ua tokala ku jitata.

Kienhiki, kiebhi o jitata kia tokala ku longa o tuana tuâ? Kiebhi kia tokala ku bhanga kiki?