Njimbu Iambote Phala O Jingadiama

O MAK’Â NZAMBI, a tu kanena: “Bhu kala kizuua, phulungu a mu suua.” (Jisálamu 9:18) O Bibidia i zuela ué ia lungu ni Mubhangi uetu: “Eie uila u jikula o lukuaku lué, mienhu ioso idia, ikuta, ni ima iambote.” (Jisálamu 145:16) O ikanenu íii, i tu sanga mu Mak’â Nzambi, ki nzoji ngó kana. O Nzambi, o Muteni-a-Ioso, u tena ku bhanga ioso phala o ku bhuisa o uadiama. Ihi ia bhindamena o jingadiama?

Saí muhatu ua di longo ku phopheka jimbongo ku Africa, ua zuela kuila, kima kiambote se o jixi jene ni uadiama a kala ni “unguvulu uambote” phala ku tumina. Kiki kilondekesa kuila phala o ku bhuisa o uadiama, kua bhinga muthu uala ni kutena, u tumina mu ukexilu uambote. Tu tena kuzuela kuila, unguvulu u tena o ku bhuisa o uadiama, ueji tena ku tumina o mundu uoso, mukonda o uadiama uene mu bhangesa o athu ku di muangununa. O nguvulu ueji tena ku zubha o uadiama, ueji tena ué o ku bhuisa o kima ki bheka o uadiama—o ukexilu ua athu ua ku mesena ngó o mbote iâ. Kuebhi ku tu tena ku sanga o unguvulu iú uambote?

Nzambi ua tumikisa Jezú, ni njimbu iambote phala o jingadiama. Kioso Jezú kia tange ia lungu ni kikalakalu kia tambula kua Nzambi, muéne uambe: “Nzumbi ia [Jihova] ia ngi tula, mukonda muène ua ng’undu ni kutudila o jingadiama, Njimbu Iambote.”—Luka 4:16-18.

O Njimbu Iambote Ihi?

Nzambi ua tumikisa Jezú kála Sobha. Íii iexile njimbu iambote. Muéne o Nguvulu ia kidi u tena ku bhuisa o uadiama, mukonda (1) muéne ua-nda tumina o mundu uoso, uala ni ku tena phala ku tumina; (2) muéne ua londekesele o henda ku jingadiama, ua tumina o akaiedi’ê ku a langa; (3) muéne u tena ku zubha o kima ki bheka o uadiama—o ukexilu ua athu ua ku mesena ngó o mbote iâ. Tua-nda di longa maukexilu atatu a njimbu iambote.

1. Jezú ua-nda tumina o ifuxi ioso O Mak’â Nzambi a zuela ia lungu ni Jezú: “Anga a mu bhana o ku tumina, . . . miji ioso, ni ifuxi, ni madimi moso ende ni ku mu bhikila muéne.” (Daniiele 7:14, NW) U tena ku xinganeka, mu ngongo ioso mu kala ngó nguvulu imoxi phala ku tumina o mundu uoso? Sé phata, ki kua-nda kala dingi undanda ni kitateku mu ixi. Athu enioso mu ixi a-nda katula mbote ku unguvulu iú. Jezú ua kanena kuila muéne ua-nda kala Nguvulu ia mundu, ni kutena kua ku tumina. Muéne uambe: “O kutena kuoso a ngi bhana-ku eme, ni mu diulu ni mu ngongo.”—Matesu 28:18.

2. Jezú ua londekesele henda ku jingadiama Mu ukunji uê mu ixi, Jezú ua londekesele henda ku athu exile jingadiama. Mu kifika, saí muhatu ua zangele o kitadi kiê kioso phala ku sumba milongo, ua kuata ku izuatu ia Jezú, phala ku mu saka. Muéne ua katele kibhubhe kia manhinga mu 12 dia mivu. Kála kia londekesele o Kitumu, muéne ueji bhangesa kuila o muthu u mu kuata u xila ué. Maji Jezú ua mu kuatela henda. Muéne uambe: “Mona, o kuxikana kué, kua ku bhulula. Ndeie ni ku tululuka, u di sanze ku uhaxi ué.”—Marku 5:25-34.

O milongi ia Jezú, i tena ku lungulula o ibanzelu ia iibha ia athu. Mu kifika, xinganeka kiebhi kia tambuijila Jezú ku diiala ua mesenene kuijiia se kiebhi kia tena ku bhanga o vondadi ia Nzambi. O diiala uejidile kuila Nzambi ua mesena tu zola akuetu, maji uebhula Jezú: “O mukuetu-phe nanhi?”

Phala ku tambuijila o kibhuidisu kiki, Jezú ua bhange kifika kia lungu ni diiala ua tundile mu Jeluzaleme, u kulumuka ku Jedikó, anga u  tukulukila mu’axaxi ka mii, a mu beta a mu xa “ua kumbama.” Mukunji umoxi u bhita mu kikoka kiná, u bhitila bhu mbandu ia kiasu. O Levita kiene ué kia ki bhange. “Bhu kala-phe mukua Samádia ‘mu bhita njila iê, u tula bhenhobho u sanga iú.’ O kia mu mono, henda ia mu kuata.” Muéne ua kuatekesa o diiala didi, ua mu ambata ku inzo ia ku saka, iu ua futu kitadi ku mukua inzo phala ku saka o diiala didi. Mu kiki, Jezú uebhula: “Uebhi ua mu fika muku’á ua io ua tukulukile bhu’axaxe ka imbokoto? O diiala ua tambuijila: “Uoso ua mu kuatela o henda.” Jezú anga u mu ambela uixi: “Eie ue ndé, kà bhange kienhókio.”—Luka 10:25-37.

Athu a kituka Jimbangi ja Jihova, a di longo o milongi ia Jezú, ia a lungulula o ukexilu uâ, ua lungu ni ku kuatekesa ió a bhindamena. Mu kifika, Saí muhatu musoneki mukua Letônia, ua soneka mu divulu diê Mulheres nas Prisões Soviéticas, kioso kia kexile mu kaleia, mu Potma, ku muvu ua 1962 ndu 1966, kuila: “Mu ithangana ioso i nga kexile mu kata, o Jimbangi ja Jihova ene akexile mu ngi saka. Eme ki nga banzele kuila ene eji ngi kuatekesa kiambote.” Muéne uambe dingi: O jimbangi ja Jihova akexile mu kuatekesa athu oso, ka kexile ni kathombo.”

Kioso kiéza o maka a ku kamba o kitadi ku mundu, o Jimbangi ja Jihova mu ixi ia Ancón, Equador, ka kexile ni ikalakalu, né kitadi, o jiphange jâ mu nzumbi, a a kuatekesa ni kitadi; ene a sotele kudia phala ku sumbisa mu usuku ku athambi a jimbiji (o foto ku mbandu ia kadilu). O kilunga kioso kia a kuatekesa, katé muene ni ana-ndenge. Ene akexile mu bhanga kiki izuua ioso mu kimenemene, phala kioso o ji baluku ki jeji vutuka, a sanga kiá kudia phala o athambi ku sumba. O kitadi kia bhongolola o Jimbangi a ki uanena ku athu oso a bhindamene.

O misoso íii, ilondekesa kuila o phangu ia Jezú ni milongi iê, iala muene ni kutena kua ku lungulula o ukexilu ua athu, ua lungu ni ku kuatekesa a mukuá a bhindama.

3. Jezú u Tena ku Lungulula o Ibanzelu ia Iibha ia Athu O ukexilu ua athu ua ku mesena ngó o mbote iâ, a uijiia ku mundu uoso. O Bibidia iamba kuila, “kituxi.” O poxolo Phaulu ua soneka: “Kiki-phe nga sange kuila moxi diami muedi kiki: “Kioso eme ki ngi sola ku bhanga iauabha, iaiibha iene ia ngi zukama.” Muéne uambe dingi: “Nanhi u ngi kudila ku mukutu iú ua mu ngi bheka mu kalunga.” “Nga sakidila-phe Nzambi, kuma sai-ku kubhanduluka mua Jezú Kristu.” (Loma 7:21-25) Phaulu ua kexile mu zuela se kiebhi Nzambi mu kaxi ka Jezú, ueji tena ku bhulula o abhezi a kidi ku ituxi ia lundula, kuma o luímbi luene lu bheka o uadiama. Kiebhi kiki kieji bhita?

Nzuá kioso kia batizala Jezú, ua mu londekesa ku athu: “Talenu kuma! Muenhó Kambudi ka Nzambi, ka katula o ituxi ia mundu!” (Nzuá 1:29) Kua kambe ngó, o ixi ia-nda ku izala ni athu, a-nda ku a bhulula ku ituxi ia lundula, ni ukexilu ua athu ua ku mesena ngó o mbote iâ. (Izaia 11:9) Jezú ua-nda bhuisa o kima ki bheka o uadiama.

Kisangusangu kia dikota ku kingila o thembu ia athu oso ku kala ni ima ia bhindamena! O Mak’â Nzambi, amba: “A k’ela kiá, muthu uxikama bhoxi dia muvidi uê, muthu uxikama bhoxi dia mufiku uê, o u a kuatesa uôma ka moneka.” (Mikeia 4:4) O izuelu íii, ilondekesa o thembu ia athu oso ku kala ni ikalakalu, ku kala ni ku kondama, ni ku katula mbote ku ima ioso iene ku mundu sé ku kala mu uadiama, ni athu ku ximana Jihova.