Zola O Kuiuka Ni Muxima Uê Uoso
Zola O Kuiuka Ni Muxima Uê Uoso
“Eie ua zolo ioso ia iuka mu kidi.”—JISÁ. 45:7, NW.
1. Ihi ia-nda tu kuatekesa kuenda “mu njila ia kuiuka?”
MU KAXI ka Maka mê, ni nzumbi iê ikôla, Jihova uendesa o mundu uê “mu njila ja kuiuka.” (Jisá. 23:3) Maji, mukonda dia ku kala tu ati a ituxi, nange tu bhanga kima ki tu bhangesa ku tunda mu njila íii. Phala ku vutuka, tua bhingi tu kala ni nguzu. Ihi ia-nda tu kuatekesa ku kala ni nguzu? Kála kia bhange Jezú, tua tokala ku zola, mu ku bhanga o mbote.—Tanga Jisálamu 45:7.
2. O “njila ja kuiuka” ihi?
2 O “njila ja kuiuka” ihi? O njila, kikoka kófele mu bhita athu. O “njila” íii, o ku belesela o itumu ia Jihova. Mu dízui dia Hebalaiku ni dia Ngeleku, o kizuelu “kuiuka” kulombolola ku bhanga ‘mbote’ mu ku kumbidila o itumu ioso ia tokala. Mukonda dia Jihova ku kala ‘njila ia kuiuka,’ o abhezi’ê, a zediua mu ku mu sota, ni ku kumbidila o itumu iê ku muenhu uâ.—Jel. 50:7.
3. Kiebhi ki tu tena kuijiia o itumu ia Nzambi?
3 Se tu bhanga ioso, ni muxima uoso phala ku kumbidila o itumu ia Nzambi, tua-nda tena ku sangulukisa o muxima uê. (Mate. 32:4) Tu tena ngó ku bhanga kiki, se tuijiia ioso ia lungu ni Jihova Nzambi, mu ku di longa o Maka mê, o Bibidia. Kioso ki tuia ni ku di longa ia lungu ni Nzambi, tua-nda tena ku mu zukama dingi, ni ku zola dingi o kuiuka kuê. (Tiia. 4:8) Tua tokala ku belesela o Maka a Nzambi, bhenge-bhenge kioso ki tu mesena ku sola ima ku muenhu uetu.
Sota o Kuiuka Kua Nzambi
4. Ihi ia bhingi phala ku sota o kuiuka kua Nzambi?
4 Tanga Matesu 6:33. O ku sota o kuiuka kua Nzambi, ki kua bhingi ngó kuboka o njimbu iambote ia Utuminu ua Nzambi. Phala Jihova ku xikina o sidivisu ietu ikola, tua tokala ku kumbidila o itumu iê izuua ioso. Ihi ia tokala ku bhanga o athu a sota o kuiuka kua Jihova? Ene a tokala ku “zuata o muthu uobhe a mu bhangulula mu kidifua kia Nzambi, ki di monekena mu kukala ni muenhu ua kuiuka, ni mu kuzela kua kidi.”—Efe. 4:24.
5. Ihi ia-nda tu kuatekesa ku dibhana kiambote ni ku kondama?
5 Kioso ki tuia ni ku bhanga ioso phala ku kumbidila o itumu ia Nzambi, saí ithangana, nange tu kondama mukonda dia iluezu ietu. Ihi ia-nda tu kuatekesa ku dibhana kiambote ni ku kondama, ni ku di longa, ni ku bhanga o kuiuka? (Jisa. 24:10) Tua tokala ku zukama kua Jihova, mu ku mu sambela izuua ioso “ni muxima ua kidi, ni kuxikana kua soko.” (Jihe. 10:19-22) Ki kale o Jikidistá a a undu phala kuia ku diulu, ni ió a kingila ku kala mu ixi, a tokala ku kala ni kixikanu mu sata ia Jezú Kristu, ni mu sidivisu iê kála Mukunji uetu ua Dikota. (Lom. 5:8; Jihe. 4:14-16) O mbote i tu katula mu kukula kua Jezú, a u jimbuluile kiambote mu milongi ia dianga mu mulangidi. (1 Nzuá 1:6, 7) O milongi íii iambele: “Se tu mona kima kia sueka mu kopho mu usuku, mu mukengeji, ki tena ku moneka kála kima kia zele; Kiene kimoxi ué, mu kaxi ka manhinga a Jezú Kristu, Nzambi u tena ku zelesa o ituxi ietu kála neve, né muene se i kusuka kála husu.” (mulangidi ia mbeji ia kavua ua 1879, mu mban. 6) Kiki, ki kilondekesa o henda ia Jihova ko kuetu, mu ku bhana o muenhu ua Mon’ê ua kazola phala ku tu kula?—Iza. 1:18.
Tonginina Kiambote o Kibhakatu Kiê mu Nzumbi
6. Mukonda diahi tua tokala ku tonginina kiambote o kibhakatu kietu mu nzumbi?
6 Mu ithangana ioso, tua tokala ku zakela “o kivunga-thulu kia kuiuka,” mukonda kiene ki bhanga mbandu ku kibhakatu kia tu bhana Nzambi. (Efe. 6:11, 14) Ki kale se tua di bhakula kindala kua Jihova, mba tuala kiá tundé ukulu mu ku bhanga o sidivisu ikola izuua ioso, tua tokala ku tonginina kiambote o kibhakatu kietu mu nzumbi. Mukonda diahi-phe? Mukonda Satanaji ni madimonho mê, a a takula mu ngongo. (Dij. 12:7-12) Satanaji uala ni njinda iavulu, mukonda muéne uejiia kuila o thembu iê ia butu kiá. Mukonda dia kiki, muéne uene mu zukutisa dingi o mundu ua Nzambi. Mu kidi, ki tua tokala kuijiia o valolo ia ku kala ni “kivunga-thulu kia kuiuka?”
7. Ukexilu uebhi u tua-nda kala nau, se tuijiia o valolo ia “kivunga-thulu?”
7 O kivunga-thulu ki langa o muxima. Mukonda dia ku kala tu ate a ituxi, o muxima uetu uene mu bhobha kinene, ua bhukumuka kiavulu. (Jel. 17:9) Mukonda dia muxima uetu ku mesena ku bhanga o ima ia iibha, tua tokala ku u longa kiambote. (Dim. 8:21) Se tuijiia o valolo ia ku kala ni “kivunga-thulu,” ki tua-nda ki katula hanji, phala ku sola itonokenu ia zembe Nzambi; né ku bhanga ima ia iibha. Ki tua-nda zanga kithangana kiavulu mu ku mona ngó o ima mu mutelembe ua izunzumbia. Mu veji dia kiki, tua-nda bhanga ioso, phala ku sangulukisa o muxima ua Jihova. Né muene se tu dibhala mu nzumbi, mu ku kala ni ibanzelu ia xitu, tua-nda tena ku balumuka dingi ni kikuatekesu kia Jihova.—Tanga Jisabhu 24:16.
8. Mukonda diahi tua bhingi “o ngubu ia kuxikana?”
8 O kima kia mukuá ki bhanga mbandu ku kibhakatu kietu mu nzumbi, “o ngubu ia kuxikana.” Iene i tena ku tu kuatekesa “kujima na-iu o mifula ia Diabhu ia uama tubhia.” (Efe. 6:16) Kienhiki o kixikanu, ni henda ietu kua Jihova, ia-nda tu kuatekesa ku bhanga o ima iambote, ni ku kala mu njila i tu bhana o muenhu ua kalelaku. Kioso ki tuia ni ku di longa o henda ia Jihova, tua-nda bhana dingi valolo mu kuiuka kuê. Maji ihi i tuamba ia lungu ni kitongoluelu kietu? Kiebhi ki i tena ku tu kuatekesa mu nguzu i tu bhanga phala ku zola o kuiuka?
Kala ni Kitongoluelu Kia Zele
9. Mbote iahi i tu katula mu ku kala ni kitongoluelu kia zele?
9 Kioso kia tu batizala, tua bhingi kua Jihova phala ku kala ni “kitongoluelu kia zele kiambote.” (1 Phe. 3:21) Mukonda dia ku kala ni kixikanu mu kukula, mu manhinga a Jezú phala ku tu bhulula mu ituxi, tu tena ku kala ni ukamba ni Nzambi. Phala ku kolokota ku kala ni ukamba iú, tua tokala ku kala ni kitongoluelu kia zele. Se saí ithangana o kitongoluelu kietu kiene mu tu bazela, tua tokala ku sanguluka, mukonda kiene kia mu kalakala kiambote. O ukexilu iú, ulondekesa kuila o kitongoluelu kietu, ki kia xixidila kála kiauka ku felu ia tema ia lungu ni ku belesela o itumu ia Jihova. (1 Tim. 4:2) Kienhiki, o kitongoluelu kiala ni valolo ia dikota ku muenhu ua athu a mesena ku zola o kuiuka.
10, 11. (a) Tanga musoso ulondekesa se mukonda diahi tua tokala ku xikina o ku tu bazela ku kitongoluelu kia zele. (b) Mukonda diahi o ku zola o kuiuka ku bheka kisangusangu ku muenhu?
10 Kioso ki tu bhanga kima kia iibha, o kitongoluelu kietu ki tena ku tu bazela. Saí munzangala ua xisa “o njila ia kuiuka.” Muéne ua mateka ku tala ima ia ufusa, ni ku xibha diamba. O kitongoluelu kiê kia kexile ku mu bazela, kioso kia kexile múia mu iônge, ni kioso kia kexile múia mu boka, ka kexile mu divua kiambote, kienhiki muéne ua banze kueha o sidivisu iê mu Iônge. “Maji” muéne uambe “eme nge jidile kuila o kitongoluelu kiami, kieji ngi fundisa, mukonda dia ima i nga kexile mu bhanga.” Iu uambe dingi: “O ku tobha kuami, o kuehela kuila o ukexilu iú ua iibha u nangenena mu mivu i uana.” Kienhiki muéne ua banze ku vutuka mu kilunga. Sumbala muéne ua kexile mu banza kuila Jihova ka-nda kuívua o misambu iê, muéne ua sambe iu ua bhingi o muloloki. Mu ku bhita dikuinhi dia ithangana, o manh’â ua mu soto ku dibhata diê, iu ua mu suínisa kuia mu iônge. Muéne uai mu Kididi kia Ubhezelu, iu ua bhingi ku kafunga phala kuenda ku di longa nê. Mu ku bhita thembu a mu batizala, iu ua sakidila Jihova, mu ku bhulula o muenhu uê.
11 Ki tu kala ni kisangusangu mu ku bhanga o kima kia tokala? Kioso ki tuia ni ku zola o kuiuka, ni ku i kumbidila ku muenhu uetu, tua-nda kala ni kisangusangu mu kuijiia kuila, tua mu bhanga ima i sangulukisa o muxima ua Tata ietu ia diulu. Xinganeka ngó! Ku hádia athu oso a-nda zediua mu ku kala ni kitongoluelu kia zele; ene a-nda tena kulondekesa kiambote o kidifuanganu kia iuka kia Nzambi. Kienhiki, tua tokala ku zola o kuiuka ni muxima uoso, ni ku bhanga ioso phala ku sangulukisa o muxima ua Jihova.—Jisa. 23:15, 16.
12, 13. Kiebhi ki tu tena ku longa kiambote, o kitongoluelu kietu?
12 Ihi i tua tokala o ku bhanga phala ku longa o kitongoluelu kietu? Kioso ki tu di longa o Bibidia, ni madivulu metu, tua tokala kuijiia kuila o “muxima ua muthu uaiuka, u xinganeka kioso kia tokala kukumbulula.” (Jisa. 15:28) Tua di longo se kiebhi o ukexilu iú, u tena ku tu kuatekesa kioso ki tu dibhana ni maka alungu ni sidivisu. Se o sidivisu i jijila ku bhanga kima kia fidisa mu Bibidia, etu enioso, tueji kumbidila o milongi i tu bhana o kimbadi kia fiiele. Sumbala o Bibidia ki i tu zuela o sidivisu i tua tokala ku xikina, ni i tua tokala ku dituna, maji né kiki, tua tokala ku xinganeka kiambote mu maka enhá, ni ku a tumbula mu musambu phala ku sola kiambote. * Kiene kimoxi ué, tua tokala ku bhanga kiki, phala ki tu bhangese akuetu ku dibhala. (1 Kol. 10:31-33) Tua tokala ku thandanganha bhenge-bhenge, ni itumu ia lungu ni ukamba uetu ni Nzambi. Se tuejiia kuila Jihova muthu ua kidi, tua tokala ku dibhudisa: ‘O kuila o sidivisu iami i sangulukisa Jihova, anga kana?’—Jisá. 78:40, 41.
13 Kioso ki tua mu pelepalala O Mulangidi u tua-nda di Longa, ni Divulu dia ku di Longa mu Kilunga, tua tokala ku xinganeka mu milongi i tua mu pelepalala. O kuila tuene mu sota ngó o itambuijilu ni lusolo, ni kuia mu kibatulu kiéngi? O ku di longa mu ukexilu iú, ki ua-nda tu kuatekesa ku zola o kuiuka, mba ku tu kuatekesa ku kala ni kitongoluelu kia zele. Se tua mesena ku zola o kuiuka, tua tokala ku di longa kiambote, ni ku xinganeka mu Maka a Nzambi. Phala ku zola o kuiuka ni muxima uetu uoso, tua tokala ku bhanga nguzu!
Kala ni Vondadi ia Kulondekesa o Kuiuka
14. Ihi ia mesena Jihova Nzambi, ni Jezú Kristu, ia lungu ni sidivisu ietu ikola?
14 Jihova Nzambi, ni Jezú Kristu, a mesena kuila tu sanguluka mu ku bhanga o sidivisu ietu ikola. Ihi ia-nda tu kuatekesa ku kala ni kisangusangu? O ku zola o kuiuka! Mu diskursu dia bhange Jezú ku Mulundu, muéne uambe kuila: “A zediua ió, a kala ni nzala ni dinhota dia ku bhanga o ima ia iuka, mbata hádia ekuta.” (Mat. 5:6, NW) O izuelu íii, ilombolola ihi kua ió a zolo o kuiuka?
15, 16. Mu ukexilu uebhi o athu a kala ni nzala ni dinhota, mu nzumbi a tena ku ekuta?
15 O mundu iú a u tumina kuala o kadiaphemba. (1 Nzuá 5:19) Se tu tanga jurnale ia ixi ioso-ioso, tua-nda sanga-mu njimbu ia lungu ni kuiibha, ni ujibhangânga. O kuiibha kuene mu londekesa athu ku mundu, kuene mu bheka ndolo iavulu ku athu a iuka o mixima. (Ndo. 8:9) Mukonda dia ku zola Jihova, etu tuejiia kuila muéne ngó u tena ku zubha o nzala, ni dinhota dia athu mu ukexilu ua nzumbi, a mesena kuijiia o kuiuka. Kua kambe ngó bhofele, o athu a iibha a-nda ku a buika, o azodi a kuiuka nuka dingi a-nda kuívua o ndolo, mukonda dia ima ia iibha i bhanga athu a kambe ku belesela o itumu. (2 Phe. 2:7, 8) Kiki kia-nda ku a sangulukisa kiavulu!
16 Etu tu jiselevende ja Jihova, ni akaiedi a Jezú Kristu, tuejiia kuila oso a kala ni nzala ni dinhota dia kuiuka “hádia ekuta” mu ukexilu ua nzumbi. Ene a-nda sanguluka mu ku kala ku utuminu uobhe ua diulu, ni mu ixi iobhe ia-nda bheka Nzambi, “muà tunga ubatuilu ua kuiuka.” (2 Phe. 3:13) Kienhiki, ki tua tokala ku kondama, mba ku diuana, mukonda dia ku mona izukutisu, ni ujibhangânga, mu veji dia kuiuka ku mundu iú ua Satanaji. (Ndo. 5:8) Jihova o Suke-ku, uejiia o ima ioso iene mu bhita, kua kambe ngó bhofele, muéne ua-nda bhulula o azodi a kuiuka.
O Mbote Ijila mu ku Zola o Kuiuka
17. Mbote iahi ijila mu ku zola o kuiuka?
17 O divulu dia Jisálamu 146:8, dilondekesa o mbote ijila mu kuenda mu njila ia kuiuka. O mukua jisalamu uambe: “Jihova u zola ió aiuka.” Xinganeka ngó! O Ngana ia ngongo ioso ua tu zolo, mukonda tua zolo o kuiuka! Mukonda dia henda ietu kua Jihova, tuejiia kuila muéne ua-nda langa o ibhindamu ietu, se tu dianga ku ta ku pholo o sidivisu ia Utuminu ku muenhu uetu. (Tanga Jisálamu 37:25; Jisabhu 10:3.) Mu kidi o athu a zolo o kuiuka, ene ngó a-nda kala mu ngongo mumu. (Jisa. 13:22) O mundu ua Nzambi, a zolo o kuiuka a-nda tambula dibesá dia ku kala ni muenhu se dizubhilu mu palaízu mu ixi. Né muene kindala, o azodi a kuiuka kua Nzambi, ene mu tambula kiá dibesá dia ku kala ni kutululuka kua muxima, ni ku a kuatekesa ku dibhana kiambote mu miji iâ, ni jiphange mu ilunga iâ.—Fil. 4:6, 7.
18. Ihi i tua tokala ku bhanga, mu ku kingila o kizuua kia Jihova?
18 Mu ku kingila o kizuua kia dikota kia Jihova, tua tokala ku sota ku bhanga o mbote. (Sof. 2:2, 3) Kienhiki, tua tokala kulondekesa o henda ia kidi kua Jihova Nzambi, mu kuenda mu jinjila jê. Kiki kilombolola ku di fikidila ni “kivunga-thulu,” phala ku langa o muxima uetu. Tua tokala ué ku kala ni kitongoluelu kia zele—kia-nda tu bhekela o kutululuka kua muxima, kia-nda sangulukisa o muxima ua Nzambi.—Jisa. 27:11.
19. Ihi i tua tokala ku bhanga, ni ihi i tua-nda di longa mu milongi ia-nda kaiela?
19 Jihova “o mesu mê ma bhita mu ngongo ioso, phala ku di londekeza o kusuína kuê mu kudila ió oso ala ni muxima ua tenena kua muene.” (2 Mal. 16:9) O izuelu íii, i tu suínisa mukonda tuene mu bhanga o ima iambote, sumbala tuala ku mundu ua iibha kuene ujibhangânga, ni kuiibha kuavulu! Mu kidi, o athu a kambe ku bhanga o vondadi ia Nzambi, ene mu diuana kioso kia mona o ukexilu uetu uambote. Etu tu katula mbote iavulu, mu ku belesela o itumu ia Jihova. (Iza. 48:17; 1 Phe. 4:4) Kienhiki tua tokala ku zola o kuiuka ni muxima uetu uoso, phala ku kala ni kisangusangu mu kala mu njila íii. O ku zola o kuiuka ni muxima uoso, kulombolola ué ku zemba o usuéia. O milongi ia-nda kaiela, ia-nda tu jimbulula kiambote se kiki ki lombolola ihi.
[Tanga mu luji]
^ kax. 12 Phala kuijiia dingi o itumu ia Bibidia, ia lungu ni ibhuidisu ia sidivisu, tanga O Mulangidi ua 15 ia mbeji ia Kasamanu ua 1999, mu jimbandu ja 28-30.
Kiebhi ki Ueji Tambuijila?
• Mukonda diahi tua tokala ku bhana valolo mu kukula phala ku zola o kuiuka?
• Mukonda diahi tua tokala ku di fikidila ni “kivunga-thulu kia kuiuka?”
• Kiebhi ki tu tena ku longa o kitongoluelu kietu?
[Ibhuidisu ia ku dilonga]
[Foto ku mbandu 26]
O kitongoluelu kia zele ki tu kuatekesa kioso ki tu dibhana ni maka alungu ni sidivisu
