Mukonda Diahi O Edene Maka U Ua Tokala Kuijiia?

PHATA javulu jene naju athu a di longa mu ji xikola ja katunda amba kuila, o musoso ua Edene ki i moneka mu Bibidia. Mu kifika, o Mesene uene mu Longa maka alungu ni Bibidia a mu ixana Paulo Morris, ua soneka: “Ki tu sange mu Bibidia kima kia lungu ni musoso ua Edene.” O izuelu iê a i xikana ku “jimesene” ja mukuá, kuila milongi ia kidi.

Mu kidi mu Bibidia, tu sanga-mu ibatulu iavulu, izuela ia lungu ni jaludim ia Edene, Adá, ni Eva, ni nhoka. * Maji o ibanzelu ia athu ene mu di longa mu ji xikola ja katunda iene ia beta-kota. Mukonda dia ku dituna o musoso uala mu divulu dia Dimatekenu, ia lungu ni jaludim ia Edene, o atuameni a jingeleja ni athu ka xikina mu Bibidia, ene mu dituna o kidi kia Bibidia. Kiebhi-phe kia bhanga kiki?

Phala kuijiia se ihi ia bhiti mu Edene, kima kiambote kuijiia o Bibidia ioso. Mu kifika, o Maka a Nzambi a a bhange phala ku tu kuatekesa ku sanga o itambuijilu ia beta-kota, iene mu dibhudisa o athu. O Bibidia i tambuijila o ibhuidisu ia lungu ni ima ioso ia bhiti mu jaludim ia Edene. Tu di longe o jipondo jiuana.

● Mukonda diahi tuene mu kuka ni kufuá? Adá ni Eva eji kala ku muenhu ua kalelaku se ene a belesele Jihova. Ene eji fuá ngó se a bhukumukine. O kizuua kia te o kituxi kiene kiafú. (Dimatekenu 2:16, 17; 3:19) Ene a texi o kuiuka kuâ, ia a bhitisa o kituxi kiâ ni ku kamba o kuiuka ku tuana tuâ. O Bibidia ilombolola kiki: “Mukonda dia muthu umoxi, o kituxi kia bokona mu ngongo, o kufuá kuejila mu ituxi; kiene  ué kia bhiti o kufuá ku thandu dia athu oso, kuma ene oso ituxi a i te.”—Loma 5:12, NW.

● Mukonda diahi Nzambi uehela o kuiibha? Mu jaludim ia Edene, Satanaji uambe kuma Nzambi mukua makutu, u sueka ima iambote ku an’ê. (Dimatekenu 3:3-5) Kienhiki, muéne ua tatela makutu ku ukexilu uambote ua Jihova ua ku tumina. Adá ni Eva a solo ku kaiela Satanaji; kienhiki ene a ditunu o ungana ua Jihova, alondekesa kuila o muthu u tena ku sola o kima kia uabha ni kia iibha. Mukonda dia ukexilu uê uambote ua ku fundisa, ni unjimu uê, Jihova uejidile o ukexilu uambote ua ku tambuijila o maka enhá—ua bhana kithangana phala o athu ku di tumina hanji mudiâ, kála kia mesenene. O kuiibha kulondekesa o ukexilu ua iibha ua Satanaji, o ukexilu iú uene mu londekesa o kidi kiki: O muthu ka tena ku di tumina mudiê, sé o kikuatekesu kia Nzambi.—Jelemiia 10:23.

● Iebhi o vondadi ia Nzambi ia lungu ni ixi? Mu jaludim ia Edene, Jihova ua londekesa kiebhi kia tokalele ku kala o ixi. Muéne ua tumina Adá ni Eva ku’zalesa o ixi ni tuana, ni ku ‘i tolola’ ni ku bhanga o ixi palaízu. (Dimatekenu 1:28) Kienhiki Nzambi uala ni vondadi ia ku bhanga o ixi palaízu, phala ku kala-mu athu a iuka, o mbutu ia Adá ni Eva. O Bibidia i zuela dingi ia lungu ni Nzambi ku kumbidila o vondadi iê iokulu.

● Mukonda diahi Jezú Kristu uéza mu ixi? O ku bhukumuka mu jaludim ia Edene kua bheka kalunga, kua Adá, ni Eva, ni ku tuana tuâ, maji Nzambi ua bhana kidielelu. Muéne ua tumikisa o Mon’ê mu ixi phala ku bhana o muenhu uê mu kukula, kála ki zuela o Bibidia. (Matesu 20:28) Kiki kilombolola ihi? Jezú, muéne uexile o “Adá ia sukidila-ku,” muéne ua futu o kiluezu kia Adá. Jezú ua kolokota mu ufiiele uê mu ku belesela Jihova. Kienhiki mu vondadi iê muéne ua bhana o muenhu ué mu kukula, phala athu oso ku tambula o muloloki ua ituxi, ni ku tambula o muenhu ua kexile nau Adá ni Eva mu Edene, ande dia ku ta kituxi. (1 Kolindo 15:22, 45; Nzuá 3:16) Mukonda dia kiki, Jezú ua kanene kuila o vondadi ia Jihova ia ku bhanga o ixi kála o jaludim ia Edene, ia-nda dikumbidila muene. *

O vondadi ia Nzambi ki kima kia ngó. Maji kikanenu kia kidi. Kienhiki o jaludim ia Edene iexile kididi kia kidi mu ixi íii, ni iama ni athu a kidi, kienhiki o vondadi ia Nzambi ia lungu ni hádia, kikanenu kia kidi, kua kambe ngó bhofele, kia-nda dikumbidila muene. O kuila eie ua-nda kala ni muenhu mu palaízu? Phala ku kala mu palaízu, ua tokala u bhanga kima. Nzambi ua mesena kuila athu oso a kala ni muenhu ua kalelaku, katé muene ni athu ene mu ta ituxi.—1 Timote 2:3, 4.

Jezú ande dia kufuá, ua zuela ni diiala ua kexile-né kumoxi ku taka. O diiala didi, diexile kijibhangânga uejidile kuila ua tokalele kufuá. Maji ua bhingi kidielelu kua Jezú. Jezú ua mu kanena. “Ua ka kala ni eme ku kididi kiambote mu Palaízu.” (Luka 23:43) Se Jezú ua mesenene ku mona o kijibhangânga kiokió—ku muenhu ni ku mu bhana o dibesá dia ku kala ni muenhu ua kalelaku mu palaízu ia Edene—muéne ka-nda mesena ué kuila eie u tambula ué o dibesá didi? Muéne ua mesena! O Tat’ê ua mesena ué! Se ua mesena ku kala mu palaízu, bhanga ioso phala ku di longa ia lungu ni Nzambi, ua bhange o jaludim ia Edene.

[Tanga mu luji]

 [Kidikisu​Jifoto ku bandu 10]

O KIKANENU KIA LUNGU NI BIBIDIA IOSO

“Nga-nda ku ta unguma bhu kaxi kê, [o nhoka] ni muhatu, ni bhu kaxi ka mbutu iê, ni mbutu iê-muene; muéne ua ka ku bula o mutué, eie ua ka mu numata o kasende.”—Dimatekenu 3:15, NW.

Kiki kiene o kikanenu kia Bibidia kia dianga kia zuela Nzambi mu Edene. A nanhi a a tange mu kikanenu kiki: o muhatu, ni mbutu iê, o nhoka, ni mbutu iê? Mu ukexilu uahi o a a tange mu kikanenu kiki, a di kuatela “unguma?”

O NHOKA

Satanaji o Diabhu.—Dijingunuinu 12:9.

O MUHATU

O kilunga kia Jihova ku diulu. (Ngalásia 4:26, 27) Izaia ua zuela ia lungu ni “muhatu,” kuma muéne ueji vuala ana avulu ku hádia.—Izaia 54:1; 66:8.

O MBUTU IA NHOKA

Ió a sola ku bhanga o vondadi ia Satanaji.—Nzuá 8:44.

O MBUTU IA MUHATU

O ua dianga Jezú Kristu, ua tundu ku diulu mu kilunga kia Jihova. A mukuá a bhanga mbandu ku “mbutu,” o jiphange ja Kristu mu nzumbi, a-nda tumina ni muéne ku diulu. O Jikidistá jiji, a a undu, phala kuia ku diulu, o ‘izalaiele ia Nzambi.’—Ngalásia 3:16, 29; 6:16; Dimatekenu 22:18.

O KU MU NUMATA O KASENDE

O ndolo ievu mexiia, maji o ndolo íii ki ia nangenena. Satanaji ua ditundu kiambote mu ku bhangesa kuila Jezú ufuá mu ixi. Maji Jezú a mu fukununa.

O KU MU BULA O MUTUÉ

O ufuilu ua Satanaji. Jezú ua-nda buika Satanaji, nuka dingi ua-nda moneka. Ande dia ku bhanga kiki, Jezú ua-nda zubha o kuiibha kuoso kua Satanaji kua mateka mu Edene.—1 Nzuá 3:8; Dijingunuinu 20:10.

Phala kuijiia dingi ia lungu ni diambu dia dianga dia Bibidia, tanga o kadivulu, A Bíblia​—Qual é a Sua Mensagem? a ka bhange ku Jimbangi ja Jihova.

[Foto ku mbandu 11]

Adá ni Eva a tale hadi mukonda dia kituxi kia te