1. Kiebhi Phaulu kia kexile mu mona ió a di bhakuile mu ku boka o njimbu iambote?

O POXOLO PHAULU ua kexile mu bhana valolo iavulu ku jiphange jê ja mala ni ja ahatu, a di bhakuile mu ku boka o njimbu iambote. Muéne ua soneka: ‘Kuma tuene ku mi lembalala, sé ngó kufula, bhu pholo ia Nzambi ietu, Tat’etu, o ku kalakala kuenu kua ufiiele, ni ku di bhakula kuenu kua henda , ni ku kolokota kuenu mu ku dielela Ngana Jezú Kristu.’ (1 Tesalonika 1:3) Jihova u lembalala ué ni ku bhana valolo mu ima ioso ia bhanga o jiselevende jê phala ku mu sidivila, ki kale se a kalakala kiavulu mba bhofele.—Jihebeleu 6:10.

2. Ihi i tua-nda di longa mu milongi íii?

² Tundé mu ukulu, o Jikidistá ene mu dituna ima iavulu phala ku di bhakula mu sidivisu ia Jihova. Mu milongi íii, tua-nda di longa se ihi ia bhangele o Jikidistá ku hama ia dianga, phala ku sidivila Jihova. Tua-nda di longa ué, ihi ia mu bhanga lelu, o jiphange a di bhakula mu sidivisu ia thembu ioso, ni ku mona se kiebhi ki tu tena o ku a kuatekesa.

3, 4. (a) Mu maukexilu ebhi o jiphange ja mala ni ja ahatu a sidivile Jihova ku hama ia dianga? (b) Kiebhi o aboki a Utuminu ku hama ia dianga kia a dikila o ibhindamu iâ?

³ Mu ku bhita kithangana, kioso Jezú kia mu batizala, muéne ua mateka ku boka o njimbu ia Utuminu ni ku longa ué akuâ ku bhanga o kikalakalu kiki. (Luka 3:21-23; 4:14, 15, 43) Kioso Jezú kiafu, o jipoxolo a suluka mu ku bhanga o kikalakalu kia ku boka, ni ku ki sanzumuna dingi. (Ikalakalu 5:42; 6:7) Saí Jikidistá a xisa o mabhata mâ, phala ku kalakala kala akunji mu jixi jengi. Mu kifika, Filipe ua boko mu jimbanza javulu ja Palestina. (Ikalakalu 8:5, 40; 21:8) Phaulu, ua xisa ué o dibhata diê, phala ku boka mu jixi javulu kala mukunji. (Ikalakalu 13:2-4; 14:26; 2 Kolindu 1:19) A mukuá kala, Marku, Luka ni Sidivanu (Sila), a soneka madivulu a Bibidia mba a kalakala kála ji seketa ja asoneki a Bibidia. (1 Phetele 5:12) Jiphange javulu ja ahatu a kalakalele kumoxi ni jiphange jiji. (Ikalakalu 18:26; Loma 16:1, 2) Mu Mikanda ia Ngeleku, tu sanga-mu misoso iavulu iambote, ia lungu ni jiphange jiji ja mala ni ja ahatu. O misoso íii, i tu longa kuila, Jihova u bhana valolo ku kikalakalu kia bhanga o jiselevende jê ni ku dikila o ibhindamu iâ.

⁴ Kiebhi o aboki a Utuminu ku hama ia dianga, kia tenene ku dikila o ibhindamu iâ? Ene ka kexile mu jijidika o jiphange jâ kua kuatekesa, maji akexile mu katula kithangana phala ku kalakala ni ku dikila o ibhindamu iâ mu xitu. (1 Kolindu 9:11-15) Maji kioso kia monekene kikuatekesu, ene akexile mu xikina. Saí ithangana, a a kuatekesele mu ku a bhana kudia, kua bhana inzo, ni ima ia mukuá. Saí ithangana o kilunga kia kexile mu kuatekesa, mu ithangana ia mukuá, o kikuatekesu kia kexile mu kuíza bhu kaxi ka ji phange.—Tanga Ikalakalu 16:14, 15; Filipe 4:15-18.

5. Ihi iambe o dikaza, ia lungu ni ku sidivila mu thembu ioso?

⁵ Lelu, Jiphange javulu a di suínisa phala ku sidivila Jihova mu maukexilu avulu. (Tala o kaxa “ Maukexilu Avulu a ku Kalakala mu Sidivisu ia Thembu Ioso.”) O kuila o jiphange a di bhakula mu sidivisu ia thembu ioso, a sanguluka mu ku sola o ukexilu iú ua muenhu? Se u bhanga o kibhuidisu kiki, ku jiphange a di bhakula mu sidivisu ia thembu ioso, o kitambuijilu kiâ, kia-nda ku suínisa kiavulu. Saí phange ua sidivile kiá kala muboki ua thembu ioso, muboki ua katunda, mukunji mu ixi iéngi, ni ku muiji ua Betele, uambe: “Ngi mona kuila, o ku di bhakula mu sidivisu ia thembu ioso, kiene o kima ki  nga beta o ku sola ni unjimu ku muenhu uami. Kioso ki nga tenesa 18 dia mivu, nga kexile mu banza se ngi bokona mu xikola ia katunda, se ngi mateka o ku kalakala, mba se ngi kala muboki ua thembu ioso. O ima ioso ia bhiti kiá, ia ngi londekesa kuila, Jihova kene mu jimba o nguzu i tu bhanga, ni ima ioso i tu xisa ku dima, phala ku di bhakula mu sidivisu ia thembu ioso. Ngene mu bhakula kua Jihova o uhete uami uoso ni nguzu ia ngi bhana muéne, ki ngeji tena ku bhanga kiki, se nga solele kikalakalu ku mundu.” O kazola kê uambe: “Kikalakalu kioso kia tu bhana, ki ngi kuatekesa ku kula dingi mu nzumbi. Tua mono o kikuatekesu kia Jihova mu ithangana iavulu, kiki, ki kieji bhita se tua solele ku kala mu mbanza ietu ia fuama, mu tua tungile. Ngene mu sakidila Jihova izuua ioso, mukonda dia muenhu uetu mu sidivisu ia thembu ioso.” O kuila eie ua mesena uê ku divua kiki?

6. Kiebhi kia divua Jihova kia lungu ni sidivisu i tu bhanga phala muéne?

⁶ Saí jiphange ka tena ku di bhakula mu sidivisu ia thembu ioso, maji a mu bhanga ioso ia tena mu sidivisu ia Jihova. Tuejiia kuila o sidivisu ia Jiphange jiji, iala ni valolo iavulu phala Jihova. Mu kifika, mu divulu dia Filimone 1-3, Phaulu ua tumikisa umenekenu ku jiphange joso a tokalele mu kilunga kia Kolose, ni ku tumbula o majina mâ. (Tanga.) Kala Jihova kia bhana valolo ku kikalakalu kia jiselevende jê, Phaulu ua kexile ué mu bhana valolo iavulu ku kikalakalu kia kexile mu bhanga o jiphange jê. Jihova u bhana valolo mu ima ioso i uene mu bhanga mu sidivisu iê. Ihi-phe i u tena o ku bhanga phala ku kuatekesa o jiphange a di bhakula mu sidivisu ia thembu ioso?

7, 8. Kikalakalu kiahi kia bhanga o aboki a thembu ioso, ni kiebhi o jiphange mu kilunga kia tena o kua kuatekesa?

⁷ Kala o aboki mu hama ia dianga, lelu o aboki a thembu ioso, a suínisa kiavulu o jiphange mu kilunga. Aboki avulu a thembu ioso a bhanga 70 a ji ola ku mbeji mu ukunji. Kiebhi ki u tena o ku a kuatekesa?

⁸ Saí phange ia muhatu muboki ua thembu ioso, a mu ixana Shari uambe: “O aboki a thembu ioso a kala dingi ni nguzu, kioso ene kia kala mu sidivisu ia ku boka izuua ioso. Maji né kiki, a bhingi ué kua suínisa.” (Loma 1:11, 12) O phange ia mukuá ia muhatu, uexile kiá muboki ua thembu ioso mu mivu iavulu, uambe ia lungu ni aboki a kilunga kiê: “Ene a kalakala kiavulu sé ku nhoha. Kioso o jiphange kia a kuatekesa mu sidivisu ia ku boka mu ku kalakala kumoxi, kua exana phala kudia kumoxi, kua bhana ka kitadi mba ku a kuatekesa mu maukexilu a mukuá, ene a sakidila ni ngalasa ioso. Mu ku bhanga kiki, o jiphange a londekesa kuila a bhana valolo, ku kikalakalu kia bhanga ió a di bhakula mu sidivisu ia thembu ioso.”

9, 10. Ihi iene mu bhanga o jiphange, phala ku kuatekesa o aboki a thembu ioso mu kilunga?

⁹ O ukexilu ua mukuá ua ku kuatekesa o aboki, o ku kalakala nau mu sidivisu ia ku boka. Jiphange jiiadi ja ahatu, aboki a thembu ioso, ambe kuila a bhingile dingi kikuatekesu kia jiphange ja mukuá, ja mala ni ja ahatu, phala ku kalakala nau mu sidivisu ia ku boka mu kaxi ka semana, ni mu ngoloxi.  Saí phange ia muhatu ua mu sidivila ku Betele ia Brooklyn, ua di lembalala o kikuatekesu kia tambuile kioso muéne kiexile muboki ua thembu ioso. Muéne uambe: “Saí phange ua kexile ni dikalu, ua ngi tangela kuila, ‘kabasa kithangana ki u kala ubheka ué mu sidivisu ia ku boka, u ngi ixana phala ku boka kumoxi.’ O phange íii, ia ngi kuatekesa ku kolokota mu sidivisu ia thembu ioso.” Shari uambe: “Kioso kia zubha o sidivisu ia ku boka, o aboki a thembu ioso akudi, a kala ubheka uâ. Saí ithangana eie u tena kuixana o jiphange jiji ja ahatu mba ja mala, phala ku bhanga mbandu ku ubhezelu uê ku muiji. Kima kiambote kua exana phala ku bhanga ué ima ia mukuá i tena o kua suínisa.”

¹⁰ Saí phange ia muhatu ua kexile mu sidivisu ia thembu ioso mu 50 a mivu, ua zuela ia lungu ni kikuatekesu kia tambuile muéne, ni jiphange ja mukuá ja ahatu exile makudi, muéne uambe: “O tufunga tuetu tua kexile mu kunda o aboki a thembu ioso mu ku bhita jimbeji. Ene akexile ku tu ibhula ia lungu ni sauidi ietu, ni sidivisu ia ku dikila o ibhindamu ietu ni ku sota kuijiia, se kua kexile kima kia kexile mu tu thandanganhesa. Ene exile athu ambote. Ene a tu kundu mu inzo ietu phala ku mona se tua bhindamena kikuatekesu.” O tufunga tutu, ni tua mukuá, a kaiela o phangu ia Onezifolo. Muéne ua tokalele ku dikila o muiji uê, maji né kiki, ua kuatekesa ué Phaulu, mukonda ua bhindamene kikuatekesu.—2 Timote 1:18.

11. Kikalakalu kiahi kiene mu bhanga o aboki a katunda?

¹¹ O ukexilu ua mukuá ua ku kalakala mu sidivisu ia thembu ioso, o ku kalakala kála muboki ua katunda. O aboki a katunda a bhanga 130 a ji ola, ku mbeji mu sidivisu ia ku boka. Ene a bhanga ikalakalu ia mukuá mu kilunga. O filiiale i bhana kikuatekesu ku jiphange jiji, mukonda ene kala dingi ni kithangana phala ku kalakala. O kikuatekesu kiki, phala ku dikila o ibhindamu iâ ni ku kalakala dingi mu sidivisu ia ku boka.

12. Kiebhi o tufunga ni aboki kia tena o ku kuatekesa o aboki a katunda?

¹² Ihi i tu tena o ku bhanga phala ku kuatekesa o aboki a katunda? Saí kafunga ua mu sidivila ku filiiale, uene mu zuela ni aboki avulu a katunda, uambe: “O tufunga a tokala ku zuela ni aboki a katunda phala kuijiia se ima iahi ia bhindamena ni ku mona kiebhi kia tena o kua kuatekesa. Saí jiphange a banza kuila, o aboki a katunda ka bhingi kikuatekesu mukonda, ene mua kuatekesa kiá ku filiiale, maji mu kidi, o jiphange ja kilunga a tena ku kuatekesa mu maukexilu avulu.” Kala ki bhita ni aboki a thembu ioso, o aboki a katunda a sakidila ué ni muxima uoso, kioso o jiphange kia kalakala nau mu sidivisu ia ku boka. O kuila eie u tena ku kalakala nau?

13, 14. (a) Ihi i tua tokala o ku lembalala ia lungu ni tufunga tua ilunga ni ahatu’â? (b) Ihi i u tena o ku bhanga phala ku kuatekesa o tufunga tua ilunga?

¹³ O tufunga tua ilunga ni ahatu’â, jiphange ala ni kixikanu kia kolo, a tu suínisa kiavulu. Maji tua tokala ku lembalala kuila, ene a bhingi uâ o kua suínisa. Ene a bhingi uâ, o kikuatekesu kia jiphange, phala ku kalakala nau mu sidivisu ia ku boka. O tufunga tua ilunga a sakidila kiavulu, kioso o jiphange kia exana phala ku tonoka nau. Kioso o tufunga tua ilunga mba o ahatu’â kia kata, u tena kua kuatekesa mu kua kunda ni ku suua o ibhindamu iâ. Luka, ‘kamba dia muxima, musaki a jihaxi’ ua kuatekesele ku suua o ibhindamu ia Phaulu ni ia jiphange ja mukuá, endele mu kunda o ilunga.—Kolose 4:14; Ikalakalu 20:5–21:18.

¹⁴ O tufunga tua ilunga ni ahatu’â, a bhindamena  o henda ni kikuatekesu kia makamba. Saí kafunga ka ilunga ua soneka: “O makamba mami, ala kala ejiia kiambote o kithangana kia tokala ki nga bhingi ki suinisu. Ene a bhanga ibhuidisu i ngi bhangesa ku zuela, o ima ia mu ngi thandanganhesa. Mukonda dia ku ngi ivua kiambote ene a ngi kuatekesa kiavulu.” O tufunga tua ilunga, a sakidila kiavulu kioso o jiphange ja mala ni ja ahatu kia londekesa o henda iâ ni ku kala makamba a kidi.

15, 16. Mukonda diahi o kikalakalu kia bhanga o jiphange ku Betele ni mu Ididi ia Iônge ia makota iala ni valolo, ni kiebhi ki tu tena o kua kuatekesa?

¹⁵ O jiphange a sidivila mu betele ni ió a sidivila mu Ididi mu bhita o Iônge ia makota, a bhanga kikalakalu, ki kuatekesa o sidivisu ia ku boka o njimbu iambote. Se saí athu a kalakala mu betele mu kilunga kiê, Kiebhi ki u tena o kua kuatekesa?

¹⁶ Mu izuua ia dianga ku Betele o jiphange jiji, nange a divua ubheka, anga a kala ni ngunzu ia makamba ni ia muiji uâ. O jiphange jiji, a sanguluka kiavulu kioso kia bhanga ukamba ni jiphange ja mukuá, ku Betele ni mu kilunga. (Marku 10:29, 30) O akua Betele a tena kuia mu iônge ni mu sidivisu ia ku boka, semana joso. Maji, saí ithangana o akua betele a kala ni ikalakalu ia mukuá. Kima kiambote o jiphange mu ilunga ku tendela o ima íii, ni ku londekesa kuila a bhana valolo mu sidivisu ia bhanga o jiphange jiji.—Tanga 1 Tesalonika 2:9.

17, 18. Kikalakalu kiahi kia bhanga o akunji mu jixi jengi?

¹⁷ Saí jiphange ala mu sidivisu ia thembu ioso, a xikina kuia mu jixi jengi. Ene nange adia kudia kuengi, a di longa dimi diéngi ni ku di longa ué ijila ia ubhe ni ukexilu uéngi ua muenhu. Kikalakalu kiahi kia bhanga o akunji mu jixi jengi?

¹⁸ O akunji, a bhita ithangana iavulu mu ku boka o njimbu iambote. O jiphange jiji, ala ni uhete uavulu ua ku boka ni ku longa, ene a kuatekesa ué o jiphange ja kilunga bhu kaxi ka milongi ia tambula. O jiphange ku filiiale a bhana kididi phala o mukunji ku kala-mu ni ku mu bhana kikuatekesu phala  ku dikila o ibhindamu iê. A mukuá, a a tumikisa mu jixi ja mukuá, phala ku sidivila mu filiiale mba ku tunga ji filiiale, ididi ia ku lungulula madivulu mba ku tunga Ididi ia Ubhezelu, ni Ididi ia Iônge ia Makota. O filiiale mba o jiphange ja ilunga, a suua o ibhindamu ia jiphange jiji, mu kua bhana kididi, ni kudia. Kála ki bhita ni jiphange a kalakala ku Betele, o jiphange jiji, a katula ué kithangana phala ku boka o njimbu iambote ni kuia mu iônge. O jiphange mu kilunga a katula mbote mu jindunge ja jiphange jiji ja mala, ni ja ahatu.

19. Kiebhi ki u tena o kuatekesa o akunji a jixi jengi eza mu sidivila mu ixi iê?

¹⁹ Kiebhi ki u tena o ku kuatekesa o akunji a jixi jengi a di bhakula phala ku sidivila mu ixi iê? Ejiia kuila, kioso ene kia bhixila, ka-nda tena luua kudia o kudia kua ixi. Mu kiki, se ua exana phala kudia nau kumoxi, u tena ku a ibhuidisa se a mesena kudia kua ubhe mba se saí kudia ka tokala ku kudia. Ejiia kuila, ene ka-nda tena ku zuela ni lusolo o dimi dia ixi ni kuijiia kiambote o ijila ia ixi iê. Kima kiambote kua talatala ni muanhu ni kua kuatekesa ni henda ioso. Ene a mesena o kuijiia!

20. Kiebhi ki tu tena o ku kuatekesa o jiphange a di bhakula mu sidivisu ia thembu ioso ni jitata jâ?

²⁰ Mu ku bhita kithangana o akunji a sidivila mu jixi jengi, a xinganeka kiebhi kia tena o ku kuatekesa o jitata jâ, ja kuka. Se o jitata jimbangi ja Jihova, ene a mesena kiavulu kuila, o an’ê a kolokota mu sidivisu ia thembu ioso. (3 Nzuá 4) O jiphange ala mu sidivisu ia thembu ioso, a bhanga ioso phala ku langa o jitata jâ, ni kua kunda. Maji o jiphange ala kumoxi ni jitata ja akunji, a tena ué ku kuatekesa. Ene a tena ku di bhakula phala ku kuatekesa o athu enhá, se ene a bhingi kikuatekesu. Tua tokala kuijiia kuila, o jiphange a di bhakula mu sidivisu ia thembu ioso ala ni sidivisu iavulu, ene a kuatekesa o kikalakalu kia ku boka, o kikalakalu kiki, kiene kia beta dingi kota ku kala ni valolo mu ixi, lelu. (Matesu 28:19, 20) O kuila u tena ku lembalala o jiphange a di bhakula mu sidivisu ia thembu ioso, mu ku kuatekesa o jitata jâ?

21. Kiebhi kia divua o jiphange ala mu sidivisu ia thembu ioso, kia lungu ni kikuatekesu kia tambula ku jiphange?

²¹ Athu avulu a kalakala ni ku suína kuoso mukonda a mesena ku kituka ji mvuama. Maji o jiphange a di bhakula mu sidivisu ia thembu ioso a kalakala ni ku suína kuoso mukonda ene a mesena ku bhanga ioso phala Jihova ni ku kuatekesa o athu. Mu kiki, ene a sakidila ni muxima uoso, o kikuatekesu kia bhana o jiphange. Saí phange ia muhatu uala mu sidivisu ia thembu ioso mu ixi iéngi, uambe: “O kizuelu kimoxi kia kisakidilu kilondekesa kuila, a ku bhana valolo ni kuila o jiphange a sanguluka ni ima ioso i ua mu bhanga.”

22. Ihi i u banza ia lungu ni sidivisu ia thembu ioso?

²² O jiselevende ja thembu ioso, a solo o ukexilu ua muenhu, u bhekela kisangusangu kia dikota. Uene o ukexilu ua muenhu ua beta-kota lelu. O jiselevende ja thembu ioso, a tena ku di longa ídifua ni jindunge jambote ji tena kua kuatekesa lelu ni ku mundu ua ubhe. Kua kambe ngó bhofele, o jiselevende joso ja Jihova, a-nda bhanga ikalakalu i suínisa izuua ioso. Mu kiki, tua tokala kuia ni ku lembalala ‘o ku kalakala kua ufiiele,’ ni ku ‘di bhakula’ kua henda,’ kua ió, a di bhakula mu sidivisu ia thembu ioso.—1 Tesalonika 1:3.