1, 2. Maka ahi a di bhana na-u o athu aia mu kalakala ku jixi jengi kioso kia vutuka ku bhata? (Tala o foto ia dianga.)

EDUARDO u di lembalala: * “Kioso ki nga kexile mu kalakala ku ixi iéngi, nga kexile ni salu iambote, nga kexile mu nganhala kitadi kiavulu. Maji kioso ki nga mateka ku di longa o Bibidia ni Jimbangi ja Jihova, nga mono kuma nga kexile ni kikalakalu kia dikota, kia ku dikila ibhindamu ia muiji uami mu nzumbi, ni mu xitu. Mukonda dia kiki, nga vutuka ku bhata.”—Efe. 6:4.

² Eduardo uejidile kuila o ku vutuka ku bhata, kua sangulukisa Jihova. Maji kála kia bhitile ni Marilyn, tua mu tange kiá mu milongi ia dianga, Eduardo ua tokalele ku iudika o ima phala ku kala dingi ni ukamba ni muiji uê. Muéne ua tokalele ué ku dikila o ibhindamu ia muhatu uê, ni an’ê, maji ka kexile ni kitadi kiavulu. Kiebhi kieji dikila o ibhindamu iâ? O kuila o kilunga kieji ku a kuatekesa?

3. Kiebhi ki divua o an’a kioso o jitata kiaia mu kalakala mu ixi iéngi?

³ Eduardo u zuela: “Nga mono kuma nga xisa o an’ami mu kithangana kia bhindamene kiavulu o kikuatekesu kiami, ni henda iami. Ki ngi kexile nau phala ku a tangela misoso ia  Bibidia, kua lela bhu maku, mba ku tonoka nau.” (Mate. 6:7) O mon’ê ua dikota Anna u lembalala: “Ki ngi kexile mu divua kiambote kioso tat’etu ka kexile n’etu ku bhata. Kioso kia vutuka tuejidile ngó o pholo iê, ni dízui diê. Ki ngi kexile mu divua kiambote kioso kia kexile mu ngi’akata.”

4. Mukonda diahi ki bhonza phala o tata ku bhanga o kikalakalu kiê, kia mutuameni ku muiji, se muéne ka tungu ni muiji?

⁴ Kioso o tata kiaia mu kalakala mu ixi iéngi, ki mu bhonza ku kala mutuameni ua muiji. O muhatu a Eduardo Ruby, u jimbulula: “Nga kexile mu bhanga o kikalakalu kia Mama ni kia Tata, ni ku batula o maka ku muiji. Kioso Eduardo kia vutuka ku bhata, nga di longo ihi i lombolola o ku belesela o diiala, kála kia tokala o muhatu ua Kidistá. Né muene lelu, saí ithangana ku bhinga ku lembalala kuila muadi uami uala ku bhata.” (Efe. 5:22, 23) Eduardo u zuela ué: “O ilumba ejidile kuia kua mam’â ku bhinga kabasa-kima kia mesenene. Mukonda tu jitata, tua mono kuma tua tokalele kulondekesa ku an’etu kuila tu batula o maka kumoxi, eme nga di longo ku kala mutuameni ku muiji, kála kia tokala ku Ukidistá.”

5. Ihi ia Bhange Eduardo phala ku kala dingi ni ukamba uambote ni muiji uê, kioso kia vutuka ku bhata?

⁵ Eduardo ua bhange ioso phala ku kala dingi ni ukamba uambote ni muiji uê, ni ku a kuatekesa ku kala ni ukamba ni Jihova. “Nga mesenene ku longa o Mak’â Nzambi ku an’ami, bhu kaxi ka izuelu iami ni ima i ngi bhanga​—ki ngi zuela ngó kuila nga zolo Jihova, maji ngi londekesa o henda íii bhu kaxi ka ima i ngi bhanga.” (1 Nzu. 3:18) O kuila Jihova ua besoala o ngunzu ia bhange Eduardo? Anna u tambuijila: “O ku mona o ngunzu ioso ia bhange phala ku kala tata iambote, ni ku kala dingi ni ukamba uambote ni etu, kua kuatekesa kiavulu. Kioso ki tua mono kuila muéne ua kexile mu di suínisa mu kilunga, tua sanguluka kiavulu. O mundu ua fikisa ku tu sondolokesa kua Jihova. Maji tua mono o nguzu ia kexile mu bhanga o jitata jetu, phala ku kolokota mu kilunga, etu ué tua solo ué ku a kaiela. Tat’etu ua tu kanena kuila keji tu xisa dingi, muéne ka tu xisa muene. Se ka kumbidile o izuelu iê, nange ki ngeji kala dingi mu kilunga kia Jihova.”

6. Ihi ia di longo o jitata mu kithangana kia ita?

⁶ Saí misoso ilondekesa kuila, mu kithangana kia ita kia akua Bálcãs, o an’a a Jimbangi ja Jihova, a tungile kuenhoko, a sangulukile sumbala a kexile ni ibhidi iavulu. Mukonda diahi? O jitata ka tenene kuia ku salu, akexile mu kala ku bhata ni tuana tuâ, mu kiki akexile mu di longa ni ku tonoka ni kuzuela ni tuana tuâ. Ihi i tu di longa? O kima kia beta-o-kota kia bhindamena o an’a, ki kitadi, mba ku a bhana ima ia valolo, maji o an’a a mesena ku kala ni jitata jâ. Kála ki zuela o Mak’â Nzambi, o an’a a kala kiambote se o jitata ji bhita nau kithangana ni ku a longa.—Jisa. 22:6.

7, 8. (a) Nange ihi i sanga o jitata kioso kia vutuka ku bhata? (b) Ihi ia tokala ku bhanga o jitata phala ku kala dingi ni ukamba uambote ni an’a?

⁷ Saí jitata a divua kia iibha kioso kia vutuka ku bhata. Nange o an’a, a bhanga ima i londekesa kuila ka sanguluka mu ku mona o jitata ja vutuka ku bhata, mba kuila ka a dielela. Nange o jitata ji zuela: “Kiebhi ki mu tena ku kamba kisakidilu mu ima ioso i nga mi bhangela?” Mu kidi o an’a a kala ni ukexilu iú, mukonda o jitata a a xisa. Ihi i tena ku bhanga o tata phala ku batula o maka enhá?

⁸ Bhinga kikuatetekesu kua Jihova phala kuijiia kiambote kiebhi kia mu divua o muiji uê, ni ku a londekesa kuila ua a zolo. Mu ku suluka, kioso ki u zuela ni muiji uê ua tokala ué kuijjia kuila, o maka a moneka, mukonda dia ima i ua bhange. Mu kiki, o ku bhinga muloloki, nange kua-nda kuatesa ku batula o maka. Se o muhatu uê ni an’ê, a  mona kuila ua mu di suinisa phala ku iudika o ima, ene a-nda mona kuila ua mesena muéne ku iudika o ima ku muiji. Se u kala ni muanhu, sé ku bhuila, o muiji ué ua-nda mateka kulondekesa henda, ua-nda ku xila.

9. Mukonda diahi phala ku ‘dikila o muiji uetu,’ ki ku bhingi ku di sunga-sunga phala ku kala ni jimbongo javulu?

⁹ O poxolo Phaulu u soneka kuila, se adiakime Jikidistá ka tena dingi ku langa o ibhindamu iâ, o an’â ni alaul’â a tokala “kufuta o mbote ia tambula jinga ku jitata jâ ni ku jikuku.” Phaulu ua suluka mu kuzuela kuila, o Jikidistá a tokala ku sanguluka ni ibhindamu iâ ia kizuua ni kizuua, kála o kudia, o izuatu ni inzo. Ki tu tokala ku bhanga nguzu iavulu phala ku kala ni ukexilu uambote mba kitadi kiavulu. (Tanga 1 Timote 5:4, 8; 6:6-10.) Phala ku ‘dikila o muiji uê,’ o Kidistá ka tokala ku sota jimbongo ku mundu iú, mukonda, kua kambe ngó ua-nda jimuka. (1 Nzu. 2:15-17) Ki tu tokala kuehela o “músendu ua jimbôngo” mba “makubhindama ma muenhu iú,” ku bhangesa o muiji uetu ku kamba ‘ku nganhala o muenhu ua kidi,’ ku mundu ua iuka ua Nzambi.—Mar. 4:19; Luka 21:34-36; 1 Tim. 6:19.

10. Mukonda diahi ki kima kiambote ku ta makongo?

¹⁰ Jihova uejiia kuma tua bhindamena kitadi. Maji o kitadi, ki ki tena ku tu langa mba ku dikila o ibhindamu ietu, kála ki bhanga o unjimu u tunda kua Jihova. (Ndo. 7:12; Luka 12:15) Saí ithangana o athu kejiia o kitadi kia bhingi phala kuia mu tunga ku ixi iéngi. Ene kejiia uâ se a-nda nganhala muéne kitadi kiavulu kioso kia-nda bhixila ku ixi ienioió mba kana. Mu kidi, kiluezu kia dikota kuia mu sota salu ku jixi jengi. Sai iá, a vutuka ni makongo avulu. Mu veji dia ku kala ni ufôlo ua ku sidivila Nzambi, ene a sidivila o athu a a a sobhesa o kitadi. (Tanga Jisabhu 22:7.) Ki kima kiambote ku ta makongo.

11. Kiebhi o ku soneka o ima ia bhindamena ni ku ngastala ngó o kitadi kia soko phala ku sumba o ima íii ku kuatekesa o miji?

¹¹ Eduardo uejidile kuila phala ku langa kiambote o muiji uê, kioso kia vutuka ku bhata, muéne ka tokalele ku zanga o kitadi. Muéne ni muhatu uê, a soneka o ima ioso ia bhindamene, anga a sola ku ngastala ngó kitadi kia soko phala ku sumba o ima íii. Phala ku tena ku bhanga kiki, ene ka tokalele ku sumba o ima ia kexile mu sumba kioso kia kexile ni kitadi kiavulu. O muiji uoso ua kumbidila, akexile mu sumba ngó o ima ia bhindamene. * Eduardo u zuela: “Mu kifika, nga katula o an’ami mu ji koleju, nga a te mu ji xikola ja muene-phutu.” Muéne ni muiji uê a sambe phala muéne ku sanga salu ki ieji ku a fidisa ku bhanga o kikalakalu kiâ mu nzumbi. Kiebhi Jihova kia tambuijila o musambu uâ?

12, 13. Ihi ia bhange Eduardo phala ku langa o ibhindamu ia muiji uê, ni kiebhi Jihova kia besoala o nguzu ia bhange mu ku sosolola o ukexilu ua muenhu uê?

¹² Eduardo u zuela: “O kitadi kiami kia kexile mu bhua, o kitadi ki nga kexile mu nganhala ku salu ki ki sokele phala ku sumba o ima i tua bhindamene, nga kexile mu bhuila kiavulu. Maji né kiki, tua kexile múia mu iônge ni mu sidivisu ia kuboka.” Eduardo ka mesenene ku banza mu ji salu jeji ku mu sondolokesa ku muiji uê mu jimbeji mba mivu iavulu. Muéne u zuela: “Mu veji dia kiki, nga di longo maufunu avulu phala se o salu i nga mu bhanga i bhua, ngi tena ku kalakala kididi kiengii.”

¹³ Mukonda Eduardo ua kexile mu futa o makongo bofele-bofele, muéne ua tokalele ku futa kitadi kiavulu, o kia sobhele ndenge, mukonda ua kexile mu futa ni avasu. Maji muéne ua mesenene ku futa o kitadi kiki phala n’a sidivile Jihova ni muiji uê. Eduardo u zuela: “Lelu ki ngene mu  nganhala o kitadi ki nga kexile mu nganhala kioso ki nga kexile mu kalakala ku ixi iéngi, maji ki tuala ni nzala. ‘Lukuaku lua Jihova ki lua konana.’ Mu kidi, tua solo ku kalakala kala aboki a thembu ioso. Mu ku bhita kithangana o ima ia lunguluka, mu kiki, ki ki bhonzele dingi ku dikila o ibhindamu ia muiji.”—Iza. 59:1.

14, 15. Ihi i tena ku bhanga o miji se o jindandu jâ a a jijidika ku sola o kitadi mu veji dia ku bheza Jihova? Ihi i tena ku bhita se tu bhana phangu iambote?

¹⁴ Saí athu a banza kuila a tokala ku bhana kitadi ni maujitu ku jindandu ni ku makamba. Eduardo u jimbulula: “Iú ukexilu ua ixi ietu, mu kiki tu sanguluka mu ku bhana maujitu. Maji ki tu tena ku bhana ithangana ioso. Ni ku xila kuoso, ngi zuelela o jindandu jami kuila nga-nda ku a bhana kioso ki nga tena, mukonda nga tokala ku dikila o ibhindamu ia muiji uami mu xitu ni mu nzumbi.”

¹⁵ Saí athu a kala ni njinda ia muthu ua solo ku kala ni muiji uê, mba u vutuka ku bhata mukonda a mu dielela. Saí athu amba kuma o muthu iú kala ni henda. (Jisa. 19:6, 7) Anna mon’a a Eduardo, u zuela: “Kioso ki tu dituna o jimbongo mukonda dia ubhezelu uetu, saí jindandu a mona kuila o ubhezelu uetu kima kia valolo. Maji kiebhi ene kia-nda kijiia se tu bhanga ia mesena ene”?—Sokesa ni 1 Phetele 3:1, 2.

16. (a) Kiebhi o muthu kia tena ku ‘di nganala mu ima ia banza.’ (Tiia. 1:22) (b) Ihi i besoala Jihova?

¹⁶ Saí phange ua xisa o muiji uê phala ku ia mu kalakala ku ixi iéngi, uambela o tufunga: “Tua bhange ima iavulu phala eme kuiza kuku. O muadi uami ua xisa o kikalaklu kie kia kafunga. Mu kiki, nga kingila kuila Jihova u ngi besoala.” Ithangana ioso Jihova u besoala ió a sola bhu kaxi ka kixikanu, maji kiebhi Jihova kia tena ku besoala o muthu ua solo kima kia zembe, benge-benge se o muthu iú u xisa o ujitu uê mu kilunga?—Tanga Jihebeleu 11:6; 1 Nzuá 5:13-15.

17. Mukonda diahi tua tokala ku sota kikuatekesu kia Jihova ande dia ku sola, ni kiebhi ki tu tena ku bhanga kiki?

¹⁷ Sota o kikuatekesu kia Jihova ande dia ku sola o ima, phala ku diele mu ima i u bhanga. Samba mu ku bhinga o nzumbi iê  ikôla, ni unjimu uê ni itendelesu iê. (2 Tim. 1:7) Dibhudise: ‘Kiebhi o kithangana ki nga tokala o ku belesela Jihova? O kuila ngi belesela né muene kia ngi zukutisa?’ Se kiene, o kuila ua-nda mu belesela né muene se ku bhinga ku sosolola o ukexilu ua muenhu uê? (Luka 14:33) Sota o tufunga phala n’a ku kuatekese bhu kaxi ka Mak’â Nzambi. Londekesa o kixikanu mba kidielelu ku ikanenu ia Jihova phala ku belesela o itendelesu iê. O tufunga ka tena ku sola bhu kididi kiê, maji a tena ku ku kuatekesa ku sola ima ia-nda ku bhekela kisangusangu ku muenhu.—2 Kol. 1:24.

18. Nanhi uala ni kikalakalu kia ku dikila o muiji? Ihi i tu tena ku bhanga phala ku kuatekesa?

¹⁸ Jihova ua bhana ku atuameni a miji, o ‘kikalakalu’ kia ku dikila o miji kizuua ni kizuua. Tua tokala ku ximana, ni ku samba, phala ió a kumbidila o kikalakalu kiá sé ku xisa o ahatu’â mba o an’â, sumbala ni jitendasá mba kijijidiku kia athu. Kioso ki ku bhita mavuua mba mauhaxi, kithangana kiambote phala kulondekesa o henda ietu ku jiphange jetu. (Nga. 6:2, 5; 1 Phe. 3:8) O kuila u tena ku kuatekesa phange mu ku mu bhana kitadi mba kudia, mba ku a kuatekesa ku sota salu? Se u bhanga kiki, nange muéne ka-nda bhinga ku xisa o muiji uê phala kuia mu kalakala mu ixi iéngi.—Jisa. 3:27, 28; 1 Nzu. 3:17.

19, 20. Mukonda diahi o Jikidistá a tena ku dielela kuila Jihova ua-nda ku a kuatekesa?

¹⁹ O Mak’â Nzambi a tu tendelesa: “Ki mu kale mu akua luimbi lua kitadi, ioso i mua mono i mi soke. Kuma Nzambi u ambe uixi: Eme nuka nga kà mi xisa, ki nga kà mi ehelela ue, kana. Uila kiki, tu kolokotienu ni kuila: Ngana muène mukuatekexi uami, eme ki ngi kala ni uoma. Hé muthu u ngi bhanga-hi?” (Jihe. 13:5, 6) Kiebhi ki tu tena ku bhanga o kima kiki ku muenhu?

²⁰ Saí kafunga ua tungu mu ixi ia ungadiama uambe: “Ithangana ioso o athu a ximana o Jimbangi ja Jihova mukonda dia ku sanguluka kuâ. Ene a mona ué kuila ithangana ioso, o Jimbangi ja Jihova né muene o jingadiama, ji zuata kiambote, o athu a mukuá ndenge.” O kidi kiki, kia lungu ni kikanenu kia bhange Jezú kua ió a ta o Utuminu ua Nzambi ku pholo. (Mat. 6:28-30, 33) Mu kidi, Tata ienu ia diulu, Jihova, ua mi zolo, muéne ua mesena ngó o mbote ienu. ‘Mukonda-phe Jihova mesu mê ma bhita mu ngongo ioso, phala ku di londekesa o ku suína kuê mu ku kudila ió oso ala ni muxima ua tenena kua muéne.’ (2 Mal. 16:9) Muéne ua tu bhana o itendelesu iê, kála ióió ia lungu ni muiji ni ibhindamu ietu, phala o mbote ietu. Kioso ki tu i belesela tu londekesa kuila tua mu zolo, tua mu dielela. “Kuma o henda ia kuzola Nzambi inhi’íi, o kualuka o ijila iê. O ijila iê-phe ki ia bhonzo ku i aluka.”—1 Nzu. 5:3.

21, 22. Mukonda diahi ua solo ku sidivila Jihova?

²¹ Eduardo u zuela: “Ngejiia kuma ki ngi tena ku bhana ku muhatu uami ni an’ami, o kithangana ki nga zange kioso ki nga kexile dikanga, maji ki ngene mu banza dingi o ithangana ioso i nga zange. Avulu exile jikoleka jami, a kituka jimvuama, maji ka sanguluka ku muenhu. O miji iâ iala ni ibhidi iavulu. Maji o muiji uetu ua sanguluka kiavulu! Ngi diuana mu ku mona o jiphange mu ixi íii , a ta o Utuminu ua Nzambi ku pholo ia mienhu iâ, sumbala ni uadiama uâ. Etu enioso tua mu mona o kidi kia kikanenu kia Jezú ku muenhu uetu.”—Tanga Matesu 6:33.

²² Kolokota! Sola ku sidivila Jihova ni ku mu dielela. O henda iê kua Jihova, ni ku kaza diê, ni ku an’ê, ia tokala ku ku bhangesa ku kumbidila o kikalakalu kiê kia ku dikila o ibhindamu ia muiji uê mu nzumbi. Se u bhanga kiki, ua-nda mona kuila, ‘Jihova mukuatekexi uê.’