O BIBIDIA izuela o kidi kuila: O diiala, “a zole muhatu’ê kala kia di zolo muène.” O muhatu ué, “a xile munumi’ê.” Kiiadi kiâ a tokala ku di bhana kiambote mukonda, “xitu imoxi ngó.” (Efe. 5:33; Dim. 2:23, 24) Mu ku bhita kithangana, o ukamba uâ u suína dingi, o henda iâ i suína ué kiavulu. Nange u ki sokesa ni jindanji ja mixi iiadi ia di zukama. O ku sanguluka kua muhatu ni muadi’uê a zediua, ku di bandekesa mu ku bhita o ithangana.

Abha se o diiala mba o muhatu ufuá? O ukamba iú ua mivu iavulu u batuka. O mutudi ua xala, u kala ni ndolo iavulu ku muxima, u xala ni ubheka, nange u kala ni njinda mba u kuata ku di tatela. Daniella uexile dikaza mu 58 dia mivu, uejidile athu avulu a fundile o makaza mâ. * Maji kioso kiafu muadi uê, muéne uambe: “Eme nuka ngejidile o ndolo íii. Ku tena kuijiia o ndolo íii, se ku fundu luua.”

Saí jingijiie akua ku tokuesa, amba kuila, se-ku kima ki beta-kota ku thandanganhesa o muthu, kála o ku funda o dikaza. Athu avulu a fundu o makaza mâ amba kuila, kiki kidi. O phange Millie ua fundu muadi’uê ku mivu ia bhiti. Kioso kia jimbulula o ku kala mutudi, muéne uambe kuila: “Ngi divua kála ngi kinema.” Muéne ua mesenene ku jimbulula kiebhi kia divua, mu ku funda muadi’uê, ua kazele nê mu 25 kia mivu.

O phange Susan, ua kexile mu banza kuila ki kima kia mbote o ahatu a fundu ku kala ni  malamba, sumbala kua bhitile kiá mivu iavulu. Mu ku bhita kithangana, muadi uê ua kazele nê mu 38 dia mivu, uafú. Kioso kia bhiti 20 a mivu, muéne uambe: “Ngi mu banza izuua ioso.” O masoxi a lauka mu mesu mê ithangana ioso mukonda muéne u kala ni ngunzu iavulu.

O Bibidia ilondekesa kuila o ku funda kaza diê, ndolo i nangenena. Kioso kiafú Sala, o muadi uê Mbalahamu, anga “uiza kudila thambi ia Sala.” (Dim. 23:1, 2) Sumbala Mbalahamu ua dielele ku difukunukinu, maji uevu ndolo iavulu kioso kiafú muhatu uê ua kazola. (Jihe. 11:17-19) Kioso kiafu muhatu’ê Lakele, Jakobo ka mu jimbi ni lusolo. Muéne ua mu tumbula ku an’ê ni henda ioso.—Dim. 44:27; 48:7.

Milongi iahi i tu tena ku katula mu phangu ia Bibidia? O atudi a kala ni malamba ku mixima iâ mu mivu iavulu, mukonda dia ku funda makaza mâ. Ki tu tokala ku banza kuila o muthu u dila mukonda dia ku luuala dilele, maji ene a dila mukonda kalá dingi ni makaza mâ. Nange ene a bhindamena ku a londekesa o henda ietu, ni kikuatekesu kietu mu ithangana iavulu.

O Mutudi ua fundu, muéne ka vutuka ku ukudi. Mukonda kioso o muthu kia kazala, mu ku bhita mivu iavulu mu ukaza, o diiala u tululukisa muhatu’ê ni ku mu suínisa kioso kia luuala. Se o diiala didi di fuá, o henda ni kutululuka kua kexile mu tambula kufuá ué. Kiene kimoxi ué ni muhatu, mu ku bhita kithangana, o muhatu u di longa o ku bhangesa muadi’ê ku mu dielela ni ku zediua. Se-ku kima ki beta-kota mu ima ioso ia mu bhangela, phala ku langa o ibhindamu iê. Se muhatu iú ufuá, o diiala didi nange u divua kála kua kambe kima ku muenhu uê. Mukonda dia kiki, oso a fundu, a kala ni uôma ua ima i tena ku bhita ku hádia. Milongi iahi ia Bibidia, ia a kuatekesa ku kala ni kidielelu ni kutululuka?

“Kizuua kia mungu, kana ku ki kuatela hele. Mukonda o kizuua kia mungu kia di kalela ni hele íê. O hadi ia lelu ia soko ni kizuua kiê.” (Mat. 6:34) O izuelu íii ia Jezú, ia lungu ni ibhindamu ia muenhu, maji ia kuatekesa atudi avulu ku kolokota ni ku di bhana kiambote ni kalunga ka makaza mâ a kazola. Mu ku bhita jimbeji kioso kiafu muhatu’ê, saí mutudi a mu ixana Charles, ua soneka: “Ngala hanji ni ngunzu iavulu ia Monique, saí ithangana o ngunzu íii, i di bandekesa dingi. Maji nga mono kuila, o ku divua kiki ki kima kia iibha, mukonda mu ku bhita kithangana, bhofele-bhofele o ndolo íii ia-nda sosoloka.”

“Né muene kua bhitile kiá kithangana,” Charles ua tokalele hanji ku kolokota. Kiebhi kia tena o ku bhanga kiki? Muéne uambe: “Ni kikuatekesu kia Jihova nga tena ku di bhana ni maka enhá kizuua ni kizuua.” Charles ka zoza mukonda dia ku luuala. O ndolo iê ki i bhu mu usuku umoxi, maji ki i mu zozesa. Se ua fundu kaza diê, bhanga ioso phala ku di bhana ni ndolo, kimuanhu, kimuanhu. Eie kuijiia o mbote mba o kikuatekesu ki ua-nda tambula mungu.

Se u mutudi, kana ku di tatela. Lembalala kuila o kituxi, kiene kia bheka o kalunga, kiki kiene  kia bhangesa kaza diê kufuá. Nzambi ka bhange o muthu phala kufuá. Maji o kalunga ka tokala ku “ikalakalu iene mu bhanga Diabhu.” (1 Nzu. 3:8; Loma 6:23) Satanaji u katula mbote mu kalunga, mukonda ua mesena kuila o athu a kala ni uôma ua kalunga, phala ku kala abhika ni ku kamba o kidielelu. (Jihe. 2:14, 15) Satanaji ki mu uabhela se muthu u texi o kidielelu kia ku zediua, mba ku sanguluka, né muene ku mundu uobhe ua Nzambi. O ndolo ivua o mutudi mukonda dia ku funda kaza diê, iejila mu kituxi kia Adá ni ku bhukumuka kua Satanaji. (Loma 5:12) Jihova ua-nda zubha o ima ia iibha ia bheka Satanaji ni kalunga ué. Bhu kaxi ka ió a-nda ku a bhulula ku uôma uene mu ta Satanaji, bhuala ué ió a fundu o makaza mâ, nange bhene ué bhu ua-nda kala.

Oso a-nda fukunuka mu ixi, ima iavulu ia-nda lunguluka ku muenhu uâ. Xinganeka ku jitata, ni akuku a-nda vutuka ku muenhu, bhofele-bhofele a-nda kituka athu a iuka, kumoxi ni an’ê ni a laul’â. O athu ka-nda kuka dingi. O miji ia ubhe nange ka-nda mona o jikuku ja, kála kiene mu ku a mona lelu. O ima íii ia-nda kuatekesa o miji kuiuka.

Nange tuala ni ibhuidisu iavulu ia lungu ni difukunukinu. Mu kifika, ihi ia-nda bhita ni ió a fundu makaza aiadi? O jisaduseu, ebhuidisa ia lungu ni muhatu ua fundu o diiala dia dianga ni dia kaiadi, iu ua suluka mu ku funda, katé kia tenesa sambuadi. (Luka 20:27-33) Kiebhi kia-nda kala kioso kia-nda fukunuka? Ki tuijiia, ki tu tokala ué ku thandanganha phala kuijiia o maka enhá.  Tua tokala ngó ku dielela kua Nzambi kuabhu. Tu tena ku dielela kuila kima kioso-kioso kia-nda bhanga Jihova ku hádia, kia-nda uabha. Kima ki tua tokala o ku kingila, ki tu tokala ku kala ni uôma ua kima.

O Bibidia i tu longa kuila o athu oso u tua zolo, a-nda vutuka ku muenhu. O misoso ia Bibidia ia lungu ni difukunukinu dia bhitile mu ukulu, i tu bhana kidielelu kuila, ‘oso ala mu jimbila a-nda kuívua o dízui diê [Jezú], ni ku tunda-mu.’ (Nzuá 5:28, 29) O athu a-nda kala ku muenhu mu kithangana kieniókio, a-nda sanguluka kiavulu kioso kia-nda di sanga ni ió a-nda ku a bhulula ku kalunga. Etu ki tu tena ku xinganeka o ku zediua kua-nda kala na-ku ió a-nda fukunuka.

Kioso kia-nda mateka o difukunukinu, o ixi ia-nda zediua. Mazunda ni mazunda a athu a-nda vutuka ku muenhu, a-nda kala dingi kumoxi ni ió a-nda kala ku muenhu. (Mar. 5:39-42; Dij. 20:13) O ku xinganeka mu madiuanu enhá, ku tululukisa etu enioso tua fundu o jindandu.

O kuila saí muthu ua-nda luuala kioso kia-nda bhita o difukunukinu didi? O Bibidia iamba kuila, kana. Kála kia soneka Izaia 25:8, kuila: Jihova, “o kalunga ua ka ká buisa-ku muene nzaká.” Kiki kilombolola ku zubha o malamba a bheka o kalunga, mukonda o kikanenu ki suluka: “Jihova ua kà kondona o masoxi mu pholo joso.” Se ua luuala mukonda dia ku funda kaza diê, ua-nda zediua kioso kia-nda kuíza o difukunukinu.

Se-ku muthu u tendela o ima ia-nda bhanga Nzambi ku mundu uobhe. Jihova uamba kuila: “Kala kia di-leka maúlu ku thandu dia’xi, kiene kia di-leka jinjila jami, ji ja tundu o jinjila jenu, o mabanzelu mami ue ia a tundu o mabanzelu menu.” (Iza. 55:9) O kikanenu kia bhange Jezú kia lungu ni difukunukinu, ki tu bhangesa ku dielela kua Jihova, kála kia dielele Mbalahamu. O kima kia tokala o ku bhanga o Kidistá lelu o ku belesela Nzambi phala ‘ku lundula o ixi ia ubhe.’—Luka 20:35.

Se u kala ni kidielelu kiki kia-nda ku kuatekesa phala ku xinganeke kiavulu ku ima ia-nda bhita ku hádia. Athu avulu a kambe kidielelu ku hádia. Maji Jihova u tu bhana kidielelu kiambote. Etu ki tu tena kuijiia ihi ia-nda bhanga Jihova phala ku zubha o ibhindamu ietu, maji né kiki, ki tuala ni phata ia ima ia-nda bhanga. O poxolo Phaulu ua soneka: “Maji se tua mono kiá kioso ki tua mu bhinga, o kudielela-phe kua moneka kiá, ki kudielela, dingi. Kuma kima ki ua mono kiá, u ki dielela dingi kiebhi? Maji ue se tua dielela kima kiluua tu ki mona, tu ki kinga ni kinhenge.” (Loma 8:24, 25) O kidielelu kia suína mu ikanenu ia Nzambi kia-nda ku kuatekesa o ku kolokota. Se u kolokota, hádia Jihova ua-nda “ku bhana ki ua solo mu muxima.” Muéne ua-nda bhangesa o ‘mienhu ioso kúdia ni kuikuta ni ima iambote.’—Jisá. 37:4; 145:16; Luka 21:19.

Kioso kia zukamene o kithangana phala Jezú kufuá, o jipoxolo ja luualele kiavulu, a kexile ni uôma. Jezú ua a tululukisa ni izuelu íii: “Muxima ki u mi titile, anga mu tandanganha ni malamba. Dielelenu Nzambi; eme uami ngi dielelienu.” Muéne ua a ambela: “Ki nga-nda ku mi xisa ubheka kala mu jihukunhu, hinu ngi mi sanga ni ngi kale jinga ni enu.” (Nzuá 14:1-4, 18, 27) O izuelu ia Jezú, ieji bhangesa o akaiedi’ê a a undu, ku dielela ni ku kolokota ku hama ia mivu javulu. O ió a mesena kiavulu ku mona o miji iâ ia kazola kioso kia-nda kuíza o difukunukinu, a tokala ué ku kala ni kidielelu kiki. Jihova ni Mon’ê ka-nda ku a xisa. O ió afú a-nda ku a fukununa. Kua kambe ngó bhofele, ua-nda diongeka dingi ni athu oso u ua kuatela ngunzu.