Mu Kilunga, ki tu tokala ku thandanganha kiavulu ni kididi bhu xikama o muthu a mu kaie mu kilunga. O mulangidi iú uene mu suínisa kiavulu o jitata Jikidistá ku kuatekesa mu nzumbi mon’ê a mu kaie mu kilunga, ua tungu hanji bhu bhata, se ku bhinga. Kala ki tu tanga o Mulangidi ua 15 ua Kamoxi ua 1988, mu jimbandu ja 20 ni 21 mu phutu, o jitata a tokala ku longa o Bibidia ku mona ndenge uala hanji bhu bhata, a mu kaie mu kilunga. O mona ua tokala ku tambula kikuatekesu kia bhingi phala ku lungulula o ukexilu uê. *

Kioso kia xikama mu Kilunga, ki kima kia iibha o mona a mu kaie mu kilunga ku xikama ni jitata jê, se muéne u dixibha. Mukonda mu kilunga ki muala kitumu ki zuela kuila o muthu a mu kaie mu kilunga ua tokala ku xikama ku dima, ki kima kia iibha se o mona a mu kaie mu kilunga u xikama ni jitata jê bhu kididi kiéngi. Mukonda o jitata, a langa o mona mu nzumbi ene a mesena ku bhanga ioso phala o mona ku katula mbote mu iônge. Mu kiki, o ku xikama ni mona mu veji dia ku muehela ubheka kima kiambote, mukonda a tena ku mu langa.

Abha se o mona a mu kaie mu kilunga ka tungu dingi ni jitata jê? O kuila muéne ka tena dingi ku xikama ni jitata jê? Mu mivu ia bhiti o mulangidi iú ua jimbulula kiambote ihi ia tokala ku bhanga o Kidistá, ia lungu ni ukamba ni ndandu a mu kaie mu kilunga, ka tungu dingi ku bhata. * Maji o kuehela o mona ndenge a mu kaie mu kilunga ku xikama kumoxi ni jindandu jê mu iônge, ki ku difu ni ku kala nê mu ukamba. Se o muiji ua fiiele uala ni ndandu a mu kaie mu kilunga a mu suína phala ku belesela o kitendelesu kia Bibidia kia lungu ni kiebhi kia tokala ku dibhana ni ndandu iâ, a mu kaie mu kilunga, o jiphange mu kilunga ka tokala ku thandanganha.—1 Kol. 5:11, 13; 2 Nzuá 11.

Mu kiki, o jiphange mu kilunga, ka tokala ku fidisa muthu a mu kaie mu kilunga ku xikama ni ji ndandu jê mu iônge, mba phange ia mukua mu kilunga, se muéne ua tululuka, ka mu zuelesa muthu. Ku moneka maka avulu se a fidisa o muthu ku xikama bhu kididi kia mesena. Se athu oso, né muene ni muiji, a bhanga nguzu phala ku belesela o itumu ia Bibidia ia lungu ni muthu a mu kaie mu kilunga, se kiki ué ki ki bhalesa o jiphange, o athu ka tokala ku thandanganha kiavulu ni kididi bhu xikama uoso-uoso ueza mu iônge. *