1. Mukonda diahi amba kuila Jihova muene o Mukunji ua dikota, ua dianga?

O MUKUNJI, muthu u tula o njimbu iambote. O Mukunji ua dikota, ua dianga, Jihova Nzambi. Mu ku bhita kithangana kioso o ji tata jetu ja dianga kia bhukumuka, Jihova uambe kuila o nhoka—Satanaji o Diabhu—a-nda ku i buika. (Dim. 3:15) Ku hama javulu Jihova ua bhangesa o jiselevende jê ja fiiele ku soneka o ima ia lungu ni kiebhi kia-nda zelesa o dijina diê, ni kiebhi kia-nda batula o maka a lungu ni Satanaji, ni kiebhi o athu kia tena ku tambula o muenhu ua kalelaku, ua texi Adá ni Eva.

2. (a) Ihi i bhanga o ji-anju mu ukunji? (b) Phangu iahi ia xisa Jezú ku akunji mu ixi?

² O ji-anju akunji ué. Ene a tula ué o njimbu iambote, a kuatekesa athu ku sanzumuna o njimbu iambote. (Luka 1:19; 2:10; Ika. 8:26, 27, 35; Dij. 14:6) Ihi i tuamba ia lungu ni Mingedi kota dia ji-anju? Kioso kiexile mu ixi kala Jezú, o kikalakalu kiê kia betele-o-kota, o ukunji. O phangu iê i tu longa kuila o ukunji ua tokala u kala o kikalakalu kia beta-kota ku muenhu uetu.—Luka 4:16-21.

3. (a) Njimbu iebhi iambote i tua mu sanzumuna? (b) Ibhuidisu iebhi i tua tokala kuijiia etu tu akunji?

³ Jezú ua tumina o maxibulu’ê ku kala akunji. (Mat. 28:19, 20; Ika. 1:8) O poxolo Phaulu uambela Timote mukalakadi ni mukuâ: “Kalakala kia tokala o mukunji ua Njimbu Iambote, kumbidila kiambote o [ukunji] ué kua Nzambi.” (2 Tim. 4:5) Iebhi o njimbu iambote i boka, o akaiedi a Jezú? Tu boka o kidi kia kuila, o Tata ietu ia diulu, Jihova, ua tu zolo. (Nzuá 3:16; 1 Phe. 5:7) Jihova Nzambi u londekesa o henda iê bhu kaxi ka Utuminu uê. Mu kiki, tu tangela akuetu kuila, athu oso a xikina o Ungana iú, a belesela Nzambi ni ku bhanga ima ia iuka, a tena ku kala makamba mê. (Jisá. 15:1, 2) Mu kidi, Jihova ua-nda zubha o hadi. Muéne ua-nda zubha ué o ndolo ioso ijila mu hadi i tua bhitile na-iu mu ukulu.  Íii njimbu iambote! (Iza. 65:17) Mukonda tu akunji, tu di longe o itambuijilu ia ibhuidisu iiadi: Mukonda diahi o athu a tokala kuívua o njimbu iambote lelu? Ni kiebhi ki tu tena ku di tunda kiambote mu ku kalakala kala kia tokala o mukunji ua njimbu iambote?

4. Ebhi o makutu a tangela o athu a lungu ni Nzambi?

⁴ Xinganeka muthu u ta makutu kuila, tat’enu ua ku xisa eie ni muiji uê. O muthu iú u ku tangela ué kuila tat’enu ka mesenene ku kuijiia, ua ku suekela ima iavulu, ni kuila muéne muthu ua iibha. Saí iâ a kuambela kuila kana ku sota tat’enu mukonda muéne uafú kiá. Mu kidi, athu avulu a a tangela ué a makutu kála iá, a lungu ni Nzambi. Athu avulu a a tangela kuila, Nzambi ka tena ku muijiia, ni kuila muéne muthu ua iibha. Mu kifika, saí atuameni a ji ngeleja a longa kuila Nzambi, ua-nda kaxtikala o athu mu ku a zukutisa mu túbhia. Saí ia amba kuila, Nzambi muéne uene mu bheka o mavuua phala ku kaxtikala o athu. Sumbala o mavuua iá, a jibha o athu a mbote ni athu a iibha, ene amba kuila kaxtiku ka Nzambi.

5, 6. Ihi ia bhangesa ku athu o milongi ia kuila o muthu ua moneka ngó, ni milongi ia makutu ia jingeleja?

⁵ Saí iá amba kuila ki kuene Nzambi. Xinganeka iene mu zuela o athu kuila o athu a moneka ngó. O athu a xikina mu milongi íii, amba kuila, ki kuene Mubhangi ua ima ioso iene ni muenhu ku mundu. Saí iá amba kuila o athu a difuangana ni iama, mu kiki, ki tu tokala ku diuana se muthu u bhanga ima i bhanga o iama, kála o usuéia mba o ku di banza ngó mudiâ. O ió a xikina kuila o athu a moneka ngó, kala ni kidielelu. Ene amba o athu a lenduka ene mu ku a tumina ku athu ala ni kutena, mukonda a tu bhange ni ukexilu iú. Ki tu tokala ku diuana se saí athu a banza kuila o hadi ia-nda nangenena. Mu kiki, o ió a xikina kuila o athu a moneka ngó, kala ni kidielelu

⁶ Sé phata, o milongi ia kuila o muthu ua moneka ngó, ni milongi ia makutu ia jingeleja, iene mu bhangesa ué o athu ku tala hadi mu izuua íii ia sukidila-ku. (Loma 1:28-31; 2 Tim. 3:1-5) O milongi íii, milongi ia athu, ki njimbu iambote. Kala kia soneka poxolo Phaulu, ene a ta o ‘ilunji athu mua vundu. anga a a sandula ku muenhu u tunda kua Nzambi’ (Efezo 4:17-19) O milongi ia kuila o athu a moneka ngó ia fidisa o athu kuívua o njimbu iambote Nzambi.—Tanga Efezo 2:11-13.

7, 8. Uebhi o ukexilu uambote ua athu kuijiia o njimbu iambote?

⁷ Phala o athu ku bhanga dingi o ukamba ni Jihova, kia dianga ene a tokala kuxikina kuila kuene Nzambi, ni kuila kuene ima iambote ia a bhangesa ku zukama kua muéne. Tu tena ku a kuatekesa kuxikina Nzambi mu kua suínisa ku di longa o ima ia bhange. Se o athu a xinganeka mu ima iene mu mona ia bhange Nzambi, ene a tena kuijiia o unjimu ni kutena kua Nzambi. (Loma 1:19, 20) Phala ku kuatekesa o athu kuijiia o ima ia bhange Nzambi, tua tokala ku a londekesa o tudivulu tuiadi, A Vida—Teve um Criador? ni A Origem da Vida—Cinco Perguntas Que Merecem Respostas. Maji né kiki, o ió a di longa ngó o ima ia bhange Nzambi, ka tena ku tambuijila ibhuidisu kála íii: Mukonda diahi Nzambi uehela o hadi? Iebhi o vondadi ia Nzambi phala o ixi? O kuila Nzambi u ngi suua?

 ⁸ O athu a tena kuijiia ngó o njimbu iambote ia Nzambi, ni vondadi iê, se ene a di longa o Bibidia. Ujitu ua dikota phala etu, o ku kuatekesa o athu kuijiia o njimbu iambote! Maji se tua mesena ku kuatekesa o athu ku xikina Nzambi ni muxima uoso, ki tu tokala ngó kua a longa o kidi, maji tua tokala kua xikinisa o kidi. (2 Tim. 3:14) Tu tena ku xikinisa o athu, se tu kaiela o phangu ia Jezú. Mukonda diahi muéne ua kexile hete mu ku xikinisa o athu? Mukonda muéne ua kexile hete ia ku longa bhu kaxi ka ku bhanga ibhuidisu. Kiebhi ki tu tena ku kaiela o phangu iê?

9. Se tua mesena ku kuatekesa o athu ihi i tua tokala ku bhanga?

⁹ Mukonda diahi, etu tua tokala ku bhanga ibhuidisu mu ukunji, kála kia bhangele Jezú? Xinganeka mu kifika kiki: O dotolo iê u ku tangela kuila muéne uala ni njimbu iambote. Muéne u kuambela kuila u tena ku saka o uhaxi ué se u xikina ku u bhanga pelasá. Nange u xikina mu kidi kiki. Abha se muéne u ku kanena kuila ua-nda ku saka, ande dia ku ku bhanga ibhuidisu ia lungu ni uhaxi uê? Nange eie kueji mu dielela. Né muene se o dotolo íii hete, muéne ua tokala ku kuibhuidisa, ni kuívua kiebhi ki ua mu divua, ande dia ku u kuatekesa. Kiene kimoxi ué, se tua mesena ku kuatekesa o athu ku xikina o njimbu iambote ia Utuminu, tua tokala ku di longa o uhete ua ku bhanga ibhuidisu. Mukonda tua-nda tena ngó ku a kuatekesa, se tuijiia o maka ala nau.

10, 11. Ihi i tua-nda tena o ku bhanga, se tu kaiela o phangu ia Jezú ia ku longa?

¹⁰ Jezú ua kijidile kuila o mesene ka bhange ngó ibhuidisu phala kuijiia o maka ala nau o dixibulu, maji muéne u bhanga ué ibhuidisu phala ku kuatekesa o dixibulu ku xinganeka, ni kuzuela o ima ia mu kala ku muxima. Mu kifika, kioso Jezú kia mesenene ku longa o kulenduka ku maxibulu mê, kia dianga, muéne ua a bhangele ibhuidisu phala na xinganeke. (Mar. 9:33) Phala ku bhangesa Phetele ku xinganeka bhu kaxi ka Mak’â Nzambi, muéne ua mu bhangele kibhuidisu. (Mat. 17:24-26) Mu kithangana kia mukuá, Jezú ua mesenene kuijiia ia kexile ku muxima ua maxibulu’ê, mu kiki muéne ua a bhangele ibhuidisu. (Tanga Matesu 16:13-17.) Jezú ka tangela ngó o athu ihi ia tokalele ku bhanga, maji ua a bhangele ibhuidisu phala kuijiia ihi ia tokalele o ku bhanga. Kiki kia a bhangesa ku xikina o njimbu iambote ni ku lungulula o ukexilu uâ ua muenhu.

¹¹ Se tu kaiela o phangu ia Jezú ia ku bhanga ibhuidisu, tua-nda bhanga ima itatu: Tua-nda kuijiia o ukexilu uambote ua ku kuatekesa o athu, tua-nda kuijiia kuzuela ni athu ka xikina mu milongi ietu, tua-nda longa o athu a lenduka, kiebhi kia tena ku katula o mbote. Tua-nda di longa ifika itatu, i tu londekesa kiebhi ki tu tena ku bhanga ibhuidisu ni uhete.

12-14. Kiebhi ki u tena ku kuatekesa mon’ê ku tula o njimbu iambote sé hele? Bhana kifika.

¹² Kifika 1: Ihi i ueji bhanga se o mon’ê u kala ni uôma ua kuzuela ni jikoleka jê ja xikola, ia lungu ni kixikinu kiê mu ima ia bhange Nzambi? Sé phata, ueji mu kuatekesa ku tula o njimbu iambote ku jikoleka jê ja xikola. Mu veji dia ku mu bazela mba ku mu tangela o ima ia tokala kuzuela, mukonda diahi ku mu bhange ibhuidisu phala ku mu kuatekesa kuzuela o ima ia mu kala ku muxima, kála kia bhangele Jezú? Kiebhi ki u tena o ku bhanga kiki?

¹³ Tanga ni mon’ê o ibhuidisu itanu iala mu divulu A Origem da Vida—Cinco Perguntas Que Merecem Respostas, mu ku suluka mu ibhuidise se kiebhi o kibhuidisu kia beta ku mu uabhela.  Mu suínise ku xinganeka mu ima ia mu bhangesa ku xikina ku Mubhangi ua ima ioso, ni ku mesena ku sidivila Nzambi. (Loma 12:2) Jimbulula kua mon’ê kuila, kala muthu saí kima kia mu bhangesa ku xikina ku Mubhangi ua ima ioso, ni ku mesena ku mu sidivila.

¹⁴ Tangela mon’ê kuila muéne u tena ku zuela ni koleka iê ia xikola mu ukexilu u ua zuela nê. Muéne u tena ku jimbulula ku koleka iê ia xikola o ima ia lungu ni ima ia bhange Nzambi, mu ku suluka u mu ibhuidisa se ihi ia banze. Mu kifika, muéne u tena ku bhinga ku koleka iê ia xikola phala ku tanga o kaxi 21 mu kadivulu A Origem da Vida. O mon’ê u tena ku bhanga o kibhuidisu kiki, ‘O kuila o DNA e tena ku bhaka milongi iavulu, o komputadolo ndenge?’ Nange koleka iê ua-nda tambuijila, kiene. Mu ku suluka o mon’ê u tena kuibhula, ‘Se kiene, ki tu tokala ku xikina kuila, se kuene muthu ua bhange o komputadolo, kuene ué muthu ua bhange o DNA?’ Phala ku kuatekesa mon’ê ku zuela ni akuâ ia lungu ni kixikanu kiê sé hele, ua tokala kufikisa kiebhi kia tokala ku bhanga. Se u mu longa kiebhi kia tokala ku bhanga ibhuidisu ni uhete, eie ua-nda mu kuatekesa ku kala mukunji ua mbote.

15. Kiebhi ki tu tena ku bhanga ibhuidisu, phala ku kuatekesa muthu ka xikina kuila kuene Nzambi?

¹⁵ Kifika 2: Mu sidivisu ietu ia ku boka tu sanga athu ene ni phata se kuene Nzambi. Mu kifika, nange muthu u tu tangela kuila, ka xikina kuila kuene Nzambi. Mu veji dia ku batula o maka, tu tena ku mu ibhuidisa se thembu kuxi muéne ua mateka ku banza kiki, ni mukonda diahi muéne ka xikina kuila kuene Nzambi. Mu ku suluka tuívua o kitambuijilu kiê ni ku mu sakidila, anga tu mu ibhuidisa se ua mesena ku tanga kadivulu ka londekesa kuila saí muthu ua bhange o muenhu. Se muéne u uabhela o kadivulu kaka, nange muéne uamba kuila, ki kima kiambote ku dituna o milongi íii.  Mu kiki, tu tena ku mu bhana o kadivulu A Vida—Teve um Criador? mba o kadivulu ka kamukuá A Origem da Vida—Cinco Perguntas Que Merecem Respostas. Se tu bhanga o ibhuidisu mu ukexilu uambote, tu tena ku tula o njimbu iambote ku muxima ua muthu.

16. Mukonda diahi ki tu tokala kuehela o maxibulu metu a Bibidia ku tanga ngó o ibhuidisu iala mu divulu di tua mu mu longa?

¹⁶ Kifika 3: Kioso ki tua mu longa o Bibidia ku xibulu dietu, nange tu muehela ku tambuijila o ibhuidisu kála kiala mu divulu. Se tu bhanga kiki, o dixibulu dietu ka-nda kula mu nzumbi. Mukonda diahi? Mukonda se o dixibulu diê u tanga ngó o itambuijilu kála kiala mu divulu, sé ku xinganeka mu itambuijilu, muéne ua-nda difuangana ni muxi ki uala ni jindanji koxi a mavu. Ki bhonza o dixibulu didi ku kolokota mu kidi se o athu a mu zukutisa. (Mat. 13:20, 21) Phala ku kuatekesa o dixibulu dietu tua tokala ku mu ebhuidisa ihi ia banze ia lungu ni milongi ia mu di longa. Bhanga nguzu phala kuijiia se muéne ua mu xikina mu milongi ia mu di longa. Kia beta-o-kota, mu ibhuidise se mukonda diahi muéne u xikina, mba kana, mu milongi ia mu di longa. Mu ku suluka, mu kuatekese bhu kaxi ka Bibidia, phala o kixikinu kiê ki kala kia Bibidia. (Jihe. 5:14) Se tu bhanga o ibhuidisu ni uhete, o maxibulu metu a-nda kolokota mu kidi, a-nda kolokota ué mu ufiiele uâ kioso kia a zukutisa ku athu, ni kioso kia-nda moneka o athu a mesena o kua nganala. (Kol. 2:6-8) Ihi dingi i tu tena ku bhanga phala tu kale tu akunji ambote?

17, 18. Kioso ki tuia mu boka ni phang’etu, kiebhi ki tu tena ku mu kuatekesa kioso kia zuela ni muthu?

¹⁷ Jezú ua tumikisa o maxibulu mê mu ibuka iiadi ia athu. (Mar. 6:7; Luka 10:1) Mu ku bhita kithangana o poxolo Phaulu ua zuela ia lungu ni ‘a mukuá dingi a kalakala ni muéne,’ a ‘bhangele nguzu phala ku mu kuatekesa mu sidivisu ia ku sanzumuna o Njimbu Iambote.’ (Fil. 4:3) Ku muvu ua 1953, o kilunga kia bhana milongi ku aboki a Utuminu phala ku longa akuâ mu ukunji.

¹⁸ Kioso ki uia mu boka ni phang’ê, ihi i u bhanga phala ku mu kuatekesa kioso kia mu zuela ni muthu? (Tanga 1 Kolindu 3:6-9.) Sota mu Bibidia iê, o kibatulu kia mesena ku tanga phang’ê. Ivuidila kiambote o ima ia mu zuela phang’ê, ni ima ia mu zuela o muthu. Se ku bhinga, kuatekesa phang’ê. (Ndo. 4:12) Maji di lange mu ima íii: Kana ku batula phang’ê se muéne ua mu kuatekesa o muthu ku xinganeka bhu kaxi ka Bibidia, ni kioso o muthu kia mu zuela. Se u batula phang’ê ua mu zuela, muéne ka-nda divua kiambote, o muthu ka-nda kuijiia se uivua nanhi. Saí kithangana, kima kiambote ku kuatekesa mu ku zuela ué kima. Maji, se u sola ku zuela kima, kana ku zuela kiavulu. Ehela phang’ê ku suluka.

19. Ihi i tua tokala ku lembalala ni mukonda diahi?

¹⁹ Kiebhi ki u tena ku di kuatekesa ni phang’ê mu kithangana ki mu tunda ku dibhata dia muthu mu kuia ku dibhata dia muthu uéngi? Mukonda diahi ki mu zuela kiebhi ki mu tena ku boka mu ukexilu uambote? Dilangienu, kana kuzuela ima ia iibha ia lungu ni athu a tungu bhu kididi bhu mua mu boka. Kana ku longolola ué o jiphange. (Jisa. 18:24) Tua tokala ku lembalala kuila etu enioso tua akua ituxi. Jihova ua tu bhana o ujitu ua ku boka, ua tu longo ué kiebhi ki tu tena ku bhanga o sidivisu íii. (Tanga 2 Kolindu 4:1, 7.) Mu kiki, tu bhane valolo ku njimbu iambote mu ku di suínisa phala tu kale tu akunji ambote.