1. Maka ebhi a beta o kota, a zwela Jezú ni maxibulu mê mu usuku wa sukina?

MU USUKU wa sukina ni maxibulu mê and dya kufwa, Jezú wa tumbula o kizwelu henda 30 a ithangana. Mwene wambela o maxibulu mê kwila, a tokalele ‘kudizola mudyâ.’ (Nzwá 15:12, 17) O henda yâ yeji di londekesa kyambote, yeji bhangesa athu ku a ejiya kwila, ene akayedi a kidi a Kidistu. (Nzwá 13:34, 35) O henda ya kexile mu zwela Jezú, ki ya kuzwela ngó mu kanu kana, maji kidifwa kyala ni kutena ki di monekena mu ibhangelu ni ima i xisa muthu kudima. Jezú wambe: “Kana-ku henda ya tundu yiyi, se muthu u bhana mwenyu wê bhu kididi kya makamba-mê. Enu mu makamba mami se mu bhanga ima yoso i nga mi tumu.”—Nzwá 15:13, 14.

2. (a) Lelu o jiselevende ja Nzambi a ejiya kyebhi? (b) Ibhwidisu yebhi ya-nda tambwijila o milongi yiyi?

² O jiselevende ja Jihova lelu a ejiya mukonda dya henda yâ ya kidi ni ukexilu wâ wa kukala ni ixinganeku imoxi. (1 Nzwá 3:10, 11) Twene mu londekesa o henda yiyi, sé kutala o jixi, o  miji, o dimi di tu zwela o kididi ni kyebhi kya tu sase. O jiselevende ja Jihova ku mundu woso, a dizolo mudyâ ni kidi kyoso. Mukonda dyahi twa bhingi dingi henda lelu? Kyebhi Jihova ni Jezú kya tu swinisa ni henda? Kyebhi ki tu tena kuswinisa akwetu ni henda yiyi?—1 Kolindo 8:1.

3. O “izuwa i sukidila-ku” yene mu bhangesa o athu kubhanga ihi?

³ Etu twala mu “jithembu jabhonzo,” o mwenyu wa zala ngó ni ‘hadi ni mukôndo.’ (2 Timote 3:1-5; Jisálamu 90:10) Say athu mukonda dya hadi yavulu a banza ku di jibha. 800.000 a athu ndenge ene mu dijibha ku muvu umoxi; kifwa mu 40 a tu ithangana muthu umoxi u di jibha. Katé mwene ni jiphange jetu a dibhana ni maka enyá, amukwa a di jibha mwene.

4. A nanyi a a tange mu Bibidya kwila a mesenene kufwa?

⁴ Say ji selevende ja fiyele ja Nzambi m’ukulu a divu kyayibha mukonda dya maka akexile na-u, a mesenene kufwa. Mu kifika, mu ku dibhana ni maka kala yá, Jobe wambe: “Mwenyu wami wa ngi kumu, ngwami kukola mwenyu izuwa yoso kiki.” (Jobe 7:16; 14:13) Jona wa luwalele kyavulu, mwene wambe: “Nga ku dyondo-phe, u Jihova, ngi batule mwenyu wami, mbata kota ngafu kulaya kiki, kana.” (Jona 4:3) Kyene we kya divu polofeta Ilija, mwene wambe: ‘Kwabhu kyá, eye u Jihova! Katula o mwenyu wami kindala.’ (1 Jisobha 19:4) Maji Jihova wa zolele kyavulu o jiselevende jê ja fiyele jojo, ka mesenene kwila afwa. Mwene ka a fika kyayibha mukonda dya ku divwa kiki. Mu veji dya kiki, mwene wa a kwatekesa kukolesa o vondadi yâ ya kukala ku mwenyu ni kusuluka ni ku mu sidivila ni ufiyele.

5. Mukonda dyahi o jiphange jetu a bhingi mwene o henda yetu lelu?

⁵ Jiphange javulu lelu a mu dibhana ni ibhidi i katula o kilunji, a bhingi o henda yetu. Say ya a mu a xongwena mba ku a zukutisa. Amukwa ene mu a lokalala ni ku a ta jimbwembwe ku salu. Amukwa a tohoka mwene mukonda a kalakala ola javulu mba ala ni salu ya bhonzo. Say ya, ala ni maka a dikota ku mwiji. Nange a kazala ni muthu ka mu sidivila Jihova, ene mu a xongwena ithangana yoso. Mukonda dya ima yiyi ni ibhidi yamukwa, avulu a divwa kwila kala dingi ni nguzu ya kusuluka. Nange a matekeka kudibhwidisa se ala mwene ni valolo. Nanyi u tena ku a kwatekesa?

6. Kyebhi o henda ya Jihova i kolesa o jiselevende jê?

⁶ Jihova u dyelelesa o jiselevende jê kwila wa a zolo, wa-nda suluka ni ku a zola katé ku hádya. Xinganeka kyebhi kya divu akwa Izalayele kyoso Jihova kya ambela wixi: “Eye wa te kyavulu ku mesu mami, wala-phe ditala dya ujitu, eme nga ku zola.” Mwene wambe dingi: ‘Ku kale-phe ni woma, kuma eme ngala bhwamoxi n’eye’! (Izaya 43:4, 5) Twejiya kwila kala muthu mu dyetu wala ni valolo ku pholo ya Jihova. * (Tala ku lwiji.) O Bibidya i kanena: “U ku bhulula ni kutena kwê, mwene u kala jinga mu sangulukila momwe-é-eye; u batama jinga mu henda yê ya ku kwatela kizuwa ni kizuwa, u tana jinga momwé ni ngalasa yavulu, kala mu izuwa ya fesa.”—Sofoniya 3:16, 17.

7. Mu ukexilu webhi o henda ya Jihova ya difu ni henda ya mama ya mu kwamuysa? (Tala o foto ya dyanga.)

 ⁷ Jihova u kanena kuswinisa ni kukonda o malamba a athu né mwene se a mu dibhana ni maka a bhonzo. Mwene wambe: “Kyenokyo mwa k’ámwa kala kamona bhu jihata, a mi ambatela bhu maku, a mi tela bhu jihata. Kala mona kya mu bhombesa kwala mam’â, kyene we ki Nga kà mi bhomba enu.” (Izaya 66:12, 13) Xinganeka kyebhi kya divwa o kabwetele kyoso kya mwondeleka kwa manyá anga u tonoka-nê! Jihova wa kuzolo kyavulu, mwene wa mesena kwila u divwa kyambote. Kana kukala ni phata, eye wala ni valolo ya dikota ku pholo ya Jihova.—Jelemiya 31:3.

8, 9. O henda ya Jezú i tu kolesa kyebhi?

⁸ O kima kya mukwa ki twijidisa kwila Jihova wa tu zolo kiki: “Nzambi wa zola o mundu, katé kya suku mu kubhana Mon’ê umoxi-èlele, phala woso u mu xikana mwène, káfwe, maji a kale ni mwenyu ki wábhwa.” (Nzwá 3:16) O sata ya kukula ya Jezú ilondekesa kwila mwene wa tu zolo we, o henda yiyi, i tu kolesa. O Bibidya yamba kwila né mwene ‘jiphaxi mba izudidiku’ ki i tena ‘ku tu sondolola ku henda ya Kidistu.’—Loma 8:35, 38, 39.

⁹ Say ithangana, tu di bhana ni ibhidi i tu zozesa mu mawukexilu oso mba i tu katula o kisangu-sangu kya kusidivila Jihova. Maji kulembalala kwila Kidistu wa tu zolo kyavulu, ku tena ku tu bhana o nguzu phala kukolokota. (Tanga 2 Kolindo 5:14, 15.) O henda ya Jezú i tu bhana vondadi ya kukala ku mwenyu ni kusuluka ni kusidivila Jihova. Yene i tena ku tu kwatekesa phala ki tu bhwile, sumbala ni hadi i tu tala mukonda dya mavuwa, izukutisu, itondalu ya akwetu, mba héle.

10, 11. A nanyi ala ni kikalakalu kya kukolokotesa o jiphange ja zoza? Jimbulula.

¹⁰ Jihova u swinisa we ni henda yê bhu kaxi ka kilunga. Kyoso ki tu zola o jiphange jetu, twa mu londekesa kwila twa zolo Jihova. Etu tu bhanga yoso i tu tena phala kukwatekesa o jiphange jetu kwijiya kwila ala ni valolo, ni kwila Jihova wa a zolo. (1 Nzwá 4:19-21) Poxolo Phawulu wa soneka: “Di longese jingyenu mudyenu, ni kudikwatekesa, mu di sokejeke kumoxi, kala ki mwene kubhanga jinga kyá katé kindala.” (1 Tesalonika 5:11) Ko tufunga ngó a tena kubhanga kiki. Kala muthu mu dyetu u tena kukayela o phangu ya Jihova ni Jezú, mu kukonda o malamba a jiphange jetu.—Tanga Loma 15:1, 2.

¹¹ Say jiphange mu kilunga a toloka o mixima, mba ala ni héle nange a bhindamena kikwatekesu kya asaki ni milongo. (Luka 5:31) O tufunga ni jiphange jamukwá mu kilunga ejiya kwila, sumbala ene ki asaki mu xitu, o kikwatekesu ni kiximbakatesu ki bhana ene kyala ni valolo ya dikota. O jiphange joso mu kilunga a tena kukayela o kitendelesu kiki: “Swinisenu oso a toloka mixima, kwatekesenu oso a bhwila mu kuxikana, athu a lendukidyenu ene oso.” (1 Tesalonika 5:14) Etu tu sota kwijiya kyebhi kya mu divwa o jiphange jetu. Twa bhingi ku a londekesa mwanu. Se a luwala mba a zoza, tu zwela na-u mu ukexilu u konda o malamba mâ. Eye wene mu kolokotesa akwenu? Ihi i u tena kubhanga phala kukonda dingi o malamba a akwenu ni ku a swinisa?

12. Phana phangu ya phange a mu swinisa bhu kaxi ka henda ya jiphange mu kilunga

¹² Say phange ku Europa wambe: “Say ithangana Ngexile mu banza ku di nyenga,  maji Ngala ni kikwatekesu kyambote. O kilunga ki Nga tokala kya ngi bhulula. O jiphange ene mu ngi londekesa henda ni ku ngi swinisa ithangana yoso. Sumbala phange javulu kejiya kwila muxima wami wa toloka, maji o kilunga kyoso kyene mu kwiza mu Ngi menekena ithangana yoso. Say dikaza, a di bhange jitata jami mu nzumbi. Ene a ngi langa, ala polondo phala ku ngi kwatekesa kizuwa kya muvimba.” Mu kidi ko jiphange joso eji kwatekesa kala kya bhange ene. Maji etwenyoso tu tena kubhanga dingi phala kukwatekesa o jiphange. * (Tala ku lwiji.)

13. Ihi i twa bhingi kubhanga phala kukonda o malamba a akwetu?

¹³ Ivwa kyambote akwenu. (Tiyaku 1:19) Tu londekesa henda, kyoso ki tu mona o maka a mu bhita ni akwetu kala etu twa mu bhita na-u. Bhanga ibhwidisu ni henda ya-nda ku kwatekesa ku tendela kyebhi phang’yê kya mu divwa. Katé mwene ni pholo yé ya tokala kulondekesa kwila eye wa mesena o mbote yê. Se mwene wa mu zwela, kala ni mwanyu, mwehele a zwele yoso ya mu kala ku muxima, kana ku mu batula o dízwi. Se wivwa kyambote, wa-nda tena ku mu tendela kyambote, mwene we wa-nda kudyelela. Ki kwa-nda mu bhonza dingi kwivwa ima i wa-nda mu tangela, kyoso ki wa-nda ya ni ku mu kwatekesa. Kyoso ki u mesena ku kwatekesa akwenu ni henda yoso, u tena ku a konda o malamba.

14. Mukonda dyahi ki tu tokala kulongoloa?

¹⁴ Kana kuxongwena. O muthu wa toloka o muxima se u mona kwila twa mu mu longolola, wa-nda divwa dingi kyayibha. Kwa-nda tubhonza-phe kyá ku mu kwatekesa. ‘Say athu, uzwelelu wâ u toma ku mixima kala jiphondo ja xibhata; dimi-phe dya jihete ja kuzwela, di bheka kudisanza.’ (Jisabhu 12:18) Né mwene se ki twa mesena kutalakanya o muthu wa toloka o muxima ni izwelu yetu, tu tena ku mu bhekela dingi ndolo se tu zwela sé kubanza. Phala kukwatekesa phangi’êtu, twa tokala ku mu dyelelesa kwila, twa mesena mwene kutendela ya mu bhita ni mwene.—Matesu 7:12.

15. Jifalamenda jebhi ji tena ku tu kwatekesa kukonda o malamba a akwetu?

¹⁵ Konda o malamba a akwenu ni kikwatekesu kya Makâ Nzambi. (Tanga Loma 15:4, 5.) O Bibidya ya Nzambi yó “mukwa kubhana o kinyenge ni kubhwisa o wôma.” Ki tu sasumuka dingi kusanga kiswinisu kya dikota mu izuwelu yê. Twala wê ni Índice das Publicações da Torre de Vigia, ni Kadivulu ka ku Tokwesa Phala o Jimbangi jya Jihova. Ku kalakala ni jifalamenda jiji, ku tena ku tu kwatekesa kusanga jivelusu ja Bibidiya ni madivulu mu tu sanga milongi phala kukonda o malamba ni kuximbakatesa o jiphange jetu.

16. Idifwa yebhi ya-nda tu kwatekesa kuswinisa muthu wa zoza?

¹⁶ Londekesa henda. Jihova mwene “Nzambi yó athu oso kwene mú tambula o dikwatekesu.” Mwene u kwatela ‘henda’ ku jiselevende jê. (Tanga 2 Kolindo 1:3-6; Luka 1:78; Loma 15:13) Phawulu wa tu xila phangu yambote ya lungu ni maka yá, mukonda mwene wa kayela o phangu ya Jihova.  Mwene wa soneka: “Etu ki twa kexile mu’axaxe kenu, twa lendukile mukwâ ni mama ya kiledi, ki âkata o twana twê. Ni etu we kyene, mukonda etu twa mi kwatela vondadi yavulu, twendile tu mi bana kana ngó o Njimbu Yambote ya Nzambi, maji ni myenyu yetu-èlele yene. Mukonda twa mi zola kyavulu.” (1 Tesalonika 2:7, 8) Kyoso ki tu lendukila akwetu kala Jihova, tu tena kubhana o kiswinisu ki bhinga o jiphange jetu mu musambu!

17. Ukexilu webhi wa kutala jiphange jetu u tena ku a swinisa?

¹⁷ Kana kukingila kuyuka ku jiphange jé. Kala ni ibanzelu yambote. Se u kingila kuyuka ku jiphange jê, wa-nda luwala. (Ndongixi 7:21, 22) Lembalala kuma Jihova, wejiya kwila tu akwa ituxi. Mu kiki twa bhingi kukala ni mwanyu wa akwetu. (Efezo 4:2, 32) Ki tu mesena kubhangesa o jiphange jetu kudivwa kwila kene mu bhanga yoso ya tokalele kubhanga mba ku a sokesa ni akwa. Mu veji dya kiki, tu ximana o ima yambote yene mu bhanga kyá. Kubhanga kiki ku tena ku a kwatekesa kusanguluka mu kusidivila Jihova.—Ngalásya 6:4.

18. Mukonda dyahi twa mesena kuswinisa akwetu ni henda?

¹⁸ O jiselevende joso ja Jihova ala ni valolo ya dikota ku pholo yê ni ya Jezú. (Ngalásya 2:20) Etu twa zolo o jiphange jetu ni muxima woso, mu kiki twa tokala ku a talatala ni kilendu kyoso. Tu “kayedyenu o ima i bheka paze, ima i bhekela kutungiwa mudyetu.” (Loma 14:19) Kisangu-sangu kya dikota kuxinganeka o mwenyu mu Palayzu, mukonda ki kwa-nda kala dingi kima kya-nda bhangesa muthu kuluwala! Ki kwa-nda kala dingi kukata, né ita. O athu ka-nda fwa dingi mukonda dya kituxi ki twa lundula, ki kwa-nda kala dingi izukutisu, maka ku miji mba kuluwala. Ku disukilu dya midi ya mivu, athu oso a-nda yuka. Oso a ka bhita ni ufiyele mu polova ya sukina, a-nda kwa sola kwala Jihova, a ka kituka an’ê mu ngongo, a kà “bokona mu ufôlo wa fuma, wa an’a Nzambi.” (Loma 8:21) Etu enoso tu tena kulondekesa henda i swinisa ni ku di kwatekesa mudyetu katé ki tu bokona ku mundu wobhe wa Nambi.