1-2. (a) Ihi i mona Jihova kyoso mazunda a athu a dyongeka mu Lembalasa ya kufwa kwa Jezú? (Tala o foto ya kapa.) (b) Ihi i twa-nda dilonga mu milongi yiyi?

XINGANEKA ngó! Ihi i mona Jihova kyoso mazunda a athu kya dyongeka ku mundu woso phala o Lembalasa ya kufwa kwa Jezú? Mwene ka mono ngó o kibuka kya athu kya dyongeka, u mona kala muthu ni muthu. Mu kifika, mwene u mona o jifiyele jene muya mivu yoso. Bhu kaxi kâ nange sayi athu aya sumbala a mu a zukutisa. Amukwa kene muya mu yônge yoso, maji ene a mona o Lembalasa kala kima kya beta kota kya tokala kubhanga. Jihova u mona we yó nange aya mu Lembalasa mu veji ya dyanga, mukonda a mesena kwijiya ihi yene mu bhita mu kyônge kiki.

² Sé phata Jihova u sanguluka mu ku mona athu avulu mu Lembalasa. (Luka 22:19) Maji Jihova ka dyanga ku di kwatenena mu kuvula kwa athu a moneka. Phala Jihova o kima ki a bhangesa kuya-ku kyene o kima kya beta dingi kota. Mu milongi yiyi, twa-nda zwela ya lungu ni ibhwidisu yala ni valolo ya dikota: Mukonda dyahi ki twene muya ngó mu Lembalasa mivu yoso maji tuya wê mu yônge ya semana ya bhana Jihova kwa yó a mu zolo?

3-4. Mukonda dyahi twene muya mu yônge? (b) Idifwa yebhi i di monekena ko kwetu kyoso ki tuya mu yônge? (c) Kala ki tanga 1 Kolindo 11:23-26, mukonda dyahi ki twa tokala kufonga mu kizuwa kya Lembalasa?

³ Twene muya mu yônge mukonda yene i bhanga mbandu mu ubhezelu wetu. Twene muya we mu yônge mukonda Jihova wene mu tu longa bhu kaxi ka yônge yiyi. Akwa ukumbu, a dituna o kixinganeku kya kwila a bhingi kwa longa. (3 Nzwá 9)  Maji etu tu kala ni hanji ya ku tu longa kwa Jihova ni kilunga kyê.—Iza. 30:20; Nzwá 6:45.

⁴ Kyoso ki tuya mu yônge tu londekesa kwila twa lenduka, twala polondo phala ku tu longa. Etu ki twene muya ngó mu usuku wa Lembalasa ya kufwa kwa Jezú, mukonda twa tokala kuya, maji kyoso ki tuya tu londekesa we o kulenduka kwetu mu kubelesela o kitendelesu kya Jezú kyoso kyambe: ‘Mu bhanga jinga kyenyiki mu ku lembalala Eme.’ (Tanga 1 Kolindo 11:23-26.) O kyônge kiki ki tu swinisa, ki tu bhana kidyelelu kya lungu ni hádya ki tu bhangesa kulembalala o henda ya Jihova ko kwetu. Mu kiki, Jihova wejiya kwila twa bhindamena o kyônge kiki phala ku tu swinisa izuwa yoso. Mukonda dya kiki mwene u tu bhana o kyônge mu ji semana joso, u tu swinisa kuya-ku. O kulenduka kwene ku tu bhangesa kuya mu yônge. Semana joso twene mu xisa ji ola phala kupelepalala o yônge ni kuya mu yônge.

5. Mukonda dyahi o athu a lenduka a xikina o kixanu kya Jihova?

⁵ Mu mivu yoso, athu avulu a lenduka ene mu xikina o kixanu phala kudilonga. (Izaya 50:4) Ene a wabhela kyavulu kuya mu Lembalasa ni kumateka kuya mu yônge yengi. (Zak. 8:20-23) Kumoxi, tu sanguluka kyavulu mu ku tu longa ni ku twendesa kwala Jihova, “mukwatekexi [wetu], mubhuludi [wetu].” (Jisá. 40:17) Mu kidi, se-ku kima kya beta dingi kota ku tu bhekela kusanguluka, o ku tu longa kwala Jihova ni Jezú, mon’ê wa kazola ndenge.—Mat. 17:5; 18:20; 28:20.

6. Kyebhi o kulenduka kwa kwatekesa diyala kuya mu Lembalasa?

⁶ Mivu yoso, twene mu bhanga nguzu phala kwixana athu avulu, phala kwiza mu kizuwa kya lembalasa ya kufwa kwa Jezú Kidistu. Athu avulu a lenduka ene mu katula mbote yavulu mu kuxikina o kixanu kyetu. Tala ngó o kifika kiki. Mivu kudima, sayi diyala wa tambula kixana phala o Lembalasa, maji mwene wambela o phange ya mu bhana o kixanu kwila, ka-nda tena kuya mu Lembalasa. Maji, mu kizuwa kya Lembalasa, o phange wa di sange ni diyala didi mu Kididi kya Ubhezelu. O diyala didi dya wabhela kyavulu o ukexilu wa mu tambwijila katé wa mateka we kwiza mu yônge semana joso. Mu kidi, mu muvu wa muvimba, wa fongo ngó kyônge kimoxi tunde kya mateka. Ihi ya mu kwatekesa kuya mu yônge yoso? Kuma mwene wa lendukile ku muxima, wa tena ku lungulula o kixinganeku kyê. Kupholo dya kwenda, o phange wa mwixanene wambe: “Mwene diyala dya lenduka kinéne.” Sé phata, Jihova mwene wa mwixana phala kwiza ku mu bheza. Kindala mwene a mu batizala kyá.—2 Sam. 22:28; Nzwá 6:44.

7. Kyebhi o ima i tu dilonga mu yônge ni ima i tu tanga mu Bibidya i tu kwatekesa kulenduka?

⁷ O ima i tu dilonga mu yônge i tu kwatekesa kulenduka. Kyene we kimoxi ni ima i tu dilonga mu kutanga o Bibidya. Mu ji semana ande dya kizuwa kya Lembalasa, o yônge yetu ya-nda zwela kyavulu ya lungu ni phangu ya kulenduka kwa londekesa Jezú mu ku bhana o mwenyu wê kala sata ya kukula. Mu izuwa ande dya Lembalasa, ene mu tu swinisa phala kutanga o izulukutu ya lungu ni kufwa ni difukunukinu dya Jezú mu Bibidya. O ima i tu dilonga mu yônge yiyi, ni i tu tanga mu misoso ya Bibidya, i bandekesa o kisakidilu kyetu mu sata ya tu bhana Jezú. I tu bhangesa we kukayela o kulenduka kwê ni kubhanga o vondadi ya Jihova, né mwene se ki tu bhonza.—Luka 22:41, 42.

8. Kyebhi Jezú kya londekesa kuswina?

⁸ Etu we twene mu sota kukayela Jezú mu kulondekesa o kuswina. Xinganeka mu  kuswina kwa londekesa mu izuwa ande dya kufwa kwê. Mwene wejidile kwila o jinguma jê eji ku mu sebhulula, ku mu beta ni ku mu jibha. (Mat. 20:17-19) Né kiki, mwene wa kexile polondo phala kufwa. Kyoso kya bhixila o kithangana mwene wambela ku jipoxolo ja fiyele, exile kumoxi ni mwene mu jaludim ya Ngetesemane: ‘Balumukenu, tu yetu. Mukonda o muthu wa-nda ngi sumbisa, yú wiza kyá.’ (Mat. 26:36, 46) Kyoso o kibuka kya athu kyeza phala ku mu kwata mwene wa di te kupholo yu wa dilondekesa, wa tangela ku masoladi phala kwehela o jipoxolo kuya. (Nzwá 18:3-8) Kwala o kuswina kwa londekesa Jezú! Lelu,o Jikidistá a a undu ni jimbudi ja mukwá a bhanga yoso phala kukayela Jezú mu kulondekesa o kuswina. Kyebhi?

9. (a) Mukonda dyahi kubhinga kuswina phala kuya mu yônge semana joso? (b) Kyebhi o phangu yetu i swinisa o jiphange ala mu kaleya mukonda dya kixikanu kyâ?

⁹ Phala kuya mu yônge semana joso twa bhingi kulondekesa o kuswina mu ithangana ya bhonzo. Sayi jiphange jetu aya mu yônge sumbala ni kuluwala, kuzoza mba maka a lungu ni sawidi. Akwa ni kuswina kwoso aya mu yônge sumbala ni kifunyisu kya jindandu mba kya unguvulu. Xinganeka hanji bhofele kyebhi o kukolokota kwetu kuswinisa o jiphange jetu ala mu kaleya mukonda dya kixikanu kyâ. (Jihe. 13:3) Kyoso ene kyévwa kwila twa mu kolokota mu kusidivila Jihova sumbala ni ibhidi, ene a-nda swina dingi mu kixikanu ni ufiyele wâ. O poxolo Phawulu wa bhiti we mu ibhidi ya difu kiki. Kyoso kyexile mu kaleya ku Loma wa sangulukile mu kwijiya kwila o jiphange exile mu sidivila Nzambi ni ufiyele wâ. (Fil. 1:3-5, 12-14) Kyoso kya mu katula mu kaleya, Phawulu wa sonekena mukanda phala akwa Jihebelewu. Mu mukanda wenyó mwene wa swinisa o Jikidistá ja fiyele: “kudizola ni jiphange ki mu ku ehe.” Wa a swinisa phala ka fonge kudyongeka kumoxi.—Jihe. 10:24, 25; 13:1.

10-11. (a) A nanyi u twa tokala kwixana phala o Lembalasa? (b) Kala kilondekesa Efezo 1:7 mukonda dyahi twa tokala kubhanga kiki?

¹⁰ Etu tu londekesa o kuswina kyoso ki twixana o jindandu, jikoleka ja salu ni jivizinyu jetu phala o Lembalasa ya kufwa kwa Jezú. Mukonda dyahi twa exana? O kisakidilu kyetu kya dikota kwa Jihova ni kwa Jezú kyene ki tu bhangesa kwixana akwetu se kufula phala kuya mu Lembalasa. Twa mesena kwila, ene a tambula we mbote ku ‘kyadi kya tu bhana Nzambi,’ bhu kaxi ka sata ya kukula.—Tanga Efezo 1:7; Dij. 22:17.

¹¹ Kyoso ki tu londekesa o kuswina mu ku dyongeka, twa mu londekesa we kidifwa kya ka mu kwa kya Nzambi ni Mon’ê.

12. (a) O yônge i bandekesa kyebhi o henda yetu kwa Jihova ni Jezú? (b) Phala kukayela Jezú, ihi i twa tokala kubhanga kala ki tu swinisa 2 Kolindo 5:14, 15?

¹² O kima kya mukwá ki tu bhangesa kuya mu yônge o henda yetu kwa Jihova ni Jezú.  Yoso i tu dilonga mu kyônge, kupholo dya kwenda, i bandekesa dingi o henda yetu kwa Jihova ni kwa Mon’ê. Mu yônge, ene mu tu lembalesa ithangana yoso, o ima yene mu bhanga ene phala o mbote yetu. (Loma 5:8) Maji, mu Lembalasa ene mu tu lembalesa o kuvula ni kuzonga kwa henda ya tu kwatela ene, katé kwa yó kejiya luwa o valolo ya sata ya kukula. Kuma twezala ni kisakidilu ku muxima, tu sota kukayela Jezú mu ukexilu u twambata o mwenyu wetu kizuwa ni kizuwa. (Tanga 2 Kolindo 5:14, 15.) Kyenyiki, o muxima wetu u tu bhangesa kuximana Jihova mukonda dya ku tu bhana o sata ya kukula. O ukexilu umoxi wa kuximana Jihova o ku tambwijila mu yônge ni muxima woso.

13. Kyebhi ki tu tena kulondekesa henda ya kidi kwa Jihova ni Mon’ê? Jimbulula

¹³ Tu londekesa o kuzonga ni kuvula kwa henda yetu kwa Jihova ni Mon’ê, mu kukala polondo phala kuxisa kima kyoso-kyoso mukonda dya ene. Mu veji javulu, kwene mu bhinga kuxisa ima kudima phala kwiza mu yônge. Ilunga yavulu yene mu bhanga o yônge mu usuku, kyoso athu a bhwila, a tundu kusalu. O yônge ya mukwa ene mu i bhanga mu masukilu a semana, kyoso athu amukwá a mu nyoha. O kwila Jihova wene mu mona kyoso ki tuya mu yônge yetu, sumbala twa bhwila? Sé phata, mwene u tu mona! Mu kidi, Jihova u bhana valolo, wa wabhela o nguzu yoso i tu bhanga phala kwiza mu yônge yoso.—Marku 12:41-44.

14. Kyebhi Jezú kya tu xila phangu ya kulondekesa o henda?

¹⁴ Jezú wa tu xila phangu, ya kulondekesa o henda, sé ku ta o ji vondadi jê kupholo. Mwene wa londekesa o henda yiyi mu kukala polondo phala kufwa mukonda dya maxibulu mê, ni kuta ku pholo o ima ya mesenene o jipoxolo jê izuwa yoso. Mu kifika, sumbala ni kubhwila ni kuthandanganya kwa muxima mukonda dya ima yeji bhita, mwene wa dyongeka ni jipoxolo jê. (Luka 22:39-46) Mwene wa lungu o muxima mu ima ya tokalele kubhana kwa akwa, mu veji dya kulunga o muxima mu ima yeji tambula. (Mat. 20:28) Se o henda yetu kwa Jihova ni ku jiphange ivula, twa-nda bhanga yoso phala kuya mu Lembalasa ya kufwa kwa Jezú ni mu yônge ya mukwá ya kilunga.

15. A nanyi u twa mesena kwa kwatekesa dingi?

 ¹⁵ Etu tu bhanga mbandu ku kilunga kya kidi kya Jikidistá. Twa wabhela kubhita kithangana mu kwixana akwetu phala ku dyongeka n’etu. Maji-phe, etu twa mesena kukwatekesa benge-benge yó “a tokala mu dyanda [dyetu] dya kuxikana,” maji a xisa o kikalakalu kya kuboka. (Nga. 6:10) Tu londekesa kwila twa a zolo ni kidi kyoso, mu ku a swinisa phala kwiza mu yônge yetu, kotelele mu Lembalasa. Kala Jihova ni Jezú, tu sanguluka kyavulu kyoso ki tu kwatekesa muthu wa zozele mu nzumbi kuvutuka kwa Tat’etu Jihova, o Kafunga ka henda.—Mat. 18:14.

16. (a) Kyebhi ki tu tena ku di swinisa mudyetu? Mbote yahi ya-nda tu bhekela o yônge yetu? (b) Mukonda dyahi kiki kyene o kithangana kya tokala ku muvu phala kulembalala o izwelu ya Jezú i tu sanga mu divulu dya Nzwá 3:16?

¹⁶ Mu jisemana kupholo, exana oso u wa tena phala kwiza mu Lembalasa ya kufwa kwa Jezú, ya-nda bhita kya Sesa, 19 ya mbeji ya Kasamanu ka 2019. (Tala o kaxa “ O Kwila Wa-nda Kwa Exana?”) Muvu woso yú, twa mesena kubhanga yoso i tu tena phala kudiswinisa mudyetu, mu kwiza mu yônge yoso yene mu tu bhana Jihova. Kuma disukilu dya mundu yú dya zukama, twa bhindamena o yônge yetu phala kukala tu athu a lenduka, a swina, akwa henda. (1 Tes. 5:8-11) Tu londekese ni muxima wetu woso kyebhi ki tu divwa mukonda dya Jihova ni mon’ê ku tu zola kyavulu!​—Tanga Nzwá 3:16.