1-2. (a) O jipoxolo ja Jezú a atumina kubhanga ihi, ni kyebhi ene kyatambwijila? (b) Ihi itwandadilonga mu milongi yiyi?

KYOSO kyabhiti o Pendekoxi ya muvu wa 32 K.K., o jipoxolo Tiyaku, Nzwá ni Phetele amono kisumwa. Ku mulundu wadileka, nange wa Hezemone, Jezú amukitulula. O Bibidya yamba: “O pholo yê i di mwika kala dikumbi, izwatu yê izela kala mwanya.” (Mat. 17:1-4) Ande dya kisumwa kubhita o jipoxolo evu o dizwi dya Nzambi kwa atangela: “Mwenyú Mon’ami wózole, wene mu ngi sangulukisa. Yoso ya zwela, mu ivyenunu mwene.” (Mat. 17:5) O jipoxolo jitatu jojo evu mwene Jezú. Etu twamesena kukayela o phangu yâ.

² Mu milongi yatundumu twamono kwila, kwivwa Jezú kwalungu ni kudituna kubhanga o ima yatufidisa mwene. Mu milongi yiyi, twandamona ima iyadi itwatokala kubhanga kala kyatutumina Jezú.

3. Kala kilondekesa Matesu 7:13, 14, ihi itwatokala kubhanga?

³ Tanga Matesu 7:13, 14. Tala kwila Jezú watumbula jinjila jiyadi kijidifu: O njila “yazanze” ni kanjila “kòfele.” Kikwala njila ya katatu. Etu twatokala kusola se njila yebhi itwandakwendela. Kiki kyene o kima kyabetakota kitwatokala o kubhanga mukonda kitena kutubhekela mwenyu wakalelaku.

4. Kyebhi kiweji jimbulula o njila “yazanze”?

⁴ Twabhingi kulembalala kwila o jinjila jiyadi jiji, kijidifu.  Mu njila “yazanze” mwendela athu avulu mukonda ki ibhonzo kwendalamu. Mukidi avulu asuluka mukwendelamu mukonda dyakukayela ngó o mundu. Ene katonginina kwila Satanaji o Dyabhu mwéne wamusungila o athu mu njila yiyi, kudisukilu o njila yiyi yambata kwalunga.—1 Kol. 6:9, 10; 1 Nzw. 5:19.

5. Nguzu yahi yene mubhanga amoxi phala kusanga o kanjila “kòfele” ni kwendelamu?

⁵ O kanjila “kòfele,” kikadifu ni njila “yazanze.” Jezú wambe kwila atolo eji kasanga. Mukonda dyahi? Mu velusu yakayela Jezú wadimuna o akayedyê yalungu ni jipolofeta ja makutu. (Mat. 7:15) Sayi athu amba kwila kwene jimidi ja jingeleja, jene joso jamba kwila jilonga o kidi. Mukonda dya kiki mazunda a athu kasoto dingi o ubhezelu wakidi, mba athandanganya ni ilongesu ya jingeleja. Maji tutena kusanga o njila yambata ku mwenyu wakalelaku. Jezú wambe: “Se mu xalela mu mambu mami, mu kala mu kidi mu jixibulu jami; o kidi mwa-nda ku k’ijiya, o kidi anga ki mi bhana ufôlo.” (Nzwá 8:31, 32) Se wasange o njila yakidi, anga waditunu kukayela o mundu, eye wazediwa. Eye wadilongo kyavulu o Mak’â Nzambi, wadilongo ihi yamesena Nzambi kwila tu ibhanga, eye wamateka kwivwa o dizwi dya Jezú. Bhukaxi ka ima yavulu eye wadilongo kwila, Jihova ukingila kwila tudituna o ilongesu yamakutu ya jingeleja ni kweha kubhanga mbandu mu jifesa jofidise mu Bibidya. Eye wadilongo we kwila o kubhanga o ima ituma Jihova ni kudituna kubhanga o ima yazembe mwene, kitena kubhonza. (Mat. 10:34-36) Nange kyakubhonzele kulungulula ima ku mwenyu wé. Maji né kiki, eye wasuluka mukonda wazolo Tat’ê ya dyulu ni kwila eye wamesena kumusangulukisa. Se phata, kiki kyasangulukisa kyavulu Jihova!—Jisa. 27:11.

6. Kala kilondekesa Jisálamu 119:9, 10, 45, 133, ihi yandatukwatekesa kusuluka kwendela mu kanjila kofele?

⁶ Ihi yandatukwatekesa kusuluka kwendela mu kanjila kofele? Tala o kifika kiki. O ikoka ibhitila kumilundu, atula mu ifikidilu yafelu mba yamabaya ku jimbandu. Abhanga kiki phala o makalu katunde mu ikoka. O kifikidilu kiki akita phala kulanga o mwenyu wamwendexi phala kakale mu kilwenzu mba kubwa ni dikalu. Séku mwendexi wejizwela kwila o kifikidilu kiki kyamutanganesa ngó kyavulu! Kyene kimoxi we, o itumu ya Jihova itusanga mu Bibidya yedi kala o ifikidilu yiyi. O itumu yiyi itulanga, itukwatekesa kwendela mu njila yatolo.—Tanga Jisálamu 119:9, 10, 45, 133.

7. Enu minzangala, mukonda dyahi kimutokala kubanza kwila o kwendela mu kanjila kofele kwamumikatula o ufolo?

⁷ Minzangala, o kwila sayi ithangana mubanza kuma o itumu ya Nzambi imikatula o ufolo? Satanaji wamesena kwila eye ubanza kyenyiki. Mwene wamesena kwila eye ukala mu njila yazanze mwabhingi kwila athu oso abhanga yoso yamesena. Mwene utena kukubhangesa kuxinganeka kwila eye wamudibotesa o mwenyu wé, bhukaxi ka jikoleka jé ni athu udizwelesa nawu bhukaxi ka internete. Satanaji wanesena kuma eye uxinganeka kwila o itumu ya Jihova ki ikubhangesa kusanguluka kyavulu ku mwenyu. * Maji lembalala kwila Satanaji kamesena kuma o yó endela mu njila yê atendela kuma o njila yiyi, o  disukilu dye o kalunga. Maji kumbandu yengi, Jihova ulondekesa kwa yó asuluka kwendela mu njila yê kwila andatambula o mwenyu wakalelaku.—Jisá. 37:29; Iza. 35:5, 6; 65:21-23.

8. Ihi itena kudilonga o minzangala ku phangu ya Olaf?

⁸ Tala se ihi i utena kudilonga ku phangu ya munzangala a mwixana Olafi. * O jikoleka jê jaxikola jamuswinisa kubhanga o undumbu. Kyoso kya atangela kwila mwene Mbangi ya Jihova, ukayela o itumu ya Bibidya, o jikoleka jê amateka kumufunyisa dingi ni nguzu yoso phala kubhanga undumbu. Maji Olafi kabu mutendasá yiyi. Maji mwene wadibhana dingi ni kibhidi kyengi. Olafi wambe: “O alongexi ami asoto kungiswinisa kubhanga o xikola yakatunda phala o athu kungixila. Ene angambela kwila sé kingibhange kiki, kindakala ni salu ni mwenyu wambote.” Ihi yakwatekesa Olafi kudituna o jitendasá jiji? Mwene wambe: “Eme ngakexile ni ukamba wambote ni jiphange mu kilunga kyami. Ene adibhangele  mwiji wami. Eme ngamateka kudilonga we kyavulu o Bibidya. O kudilonga kyavulu o Bibidya kwangixikinisa kwila o kiki kyene mwene o kidi. Kyenyiki eme ngamesenene kyavulu kusuluka ni kusidivila Jihova.”

9. Ihi yabhingi kubhanga yó amesena kusuluka kwendela mu kanjila katolo?

⁹ Satanaji weji kiwabhela se eye uxisa o njila yambata ku mwenyu wakalelaku. Mwene wamesena kwila eye ukayela o athu endela mu njila yazanze “iya ku’alunga.” (Mat. 7:13) Maji etu twandasuluka ni kwendela mu kanjila katolo se twivwa Jezú ni kutala kwila o kanjila katolo katulanga. Kindala twandadilonga dingi kima kyamukwa kyatutumina kubhanga Jezú.

10. Kala kilondekesa Matesu 5:23, 24, ihi yambe Jezú itwatokala o kubhanga?

¹⁰ Tanga Matesu 5:23, 24. Bhabha Jezú wazwela kima kyadikota phala Jijudé jexile kumwivwa. Xinganeka muthu wala kya phala kubhakula o kibhaku kyê kala sata mu tembulu ku mukunji. Se mu kithangana kyonyókyo ulembalala kwila sayi phange walulwala mukonda dya kima kyabhange mwene, mwene uxisa o sata yê anga ‘uya.’ Mukonda dyahi? Ihi yabeta dingi kota o kubhana o sata kwa Jihova ndenge? Jezú wajimbulula: “[Uya] hanji udilwulule mba ubhange o paze ni mukwenu.”

11. Jimbulula o nguzu yabhange Jakobo phala kubhanga o paze ni Izawu.

¹¹ Etu tutena kukatula madisá ambote mukudilonga yabhiti ku mwenyu wa Jakobo. Jakobo wabhiti 20 amivu mu ixi yengi, kudisukilu Nzambi wamutumina phala na vutuke mu ixi yê, bhukaxi ka anju. (Dim. 31:11, 13, 38) Maji kwexile maka. Kotadyê Izawu wamesenene kumujibha. (Dim. 27:41) Jakobo “woma wa mu kwata kyavulu, ukala ni hele,” mukonda dya kuxinganeka kwila nange phangyê wamukwatela hanji njinda. (Dim. 32:7) Ihi yabhange Jakobo phala kubhanga o paze ni phangyê? Kya dyanga, mwene watangela o maka kwa Jihova bhukaxi kamusambu. Mukusuluka mwene watumikisa maujitu kwa Izawu. (Dim. 32:9-15) Mukusukaku, kyoso kyadisange pholo ni pholo Jakobo walondekesa kuxila kwa Izawu. Mwene wafukamena Izawu, kilumoxi mba luyadi kana, maji musambwadi dya jiveji! Jakobo watena kubhanga o paze ni phangyê mukonda dya kulenduka ni kuxila.—Dim. 33:3, 4.

12. Ihi itutena kudilonga kuphangu ya Jakobo?

¹² Etu tutena kudilonga disá mu ukexilu wadisokejeka Jakobo phala kudisanga ni phangyê ni ima yabhange kyoso kyadisange ni Izawu. Ni kulenduka kwoso Jakobo wabhingi o kikwatekesu kwa Jihova. Mukusuluka wakumbidila yoso yabhingi mumusambu, wadisokejeka phala kudisanga ni phangyê sé kulaleka. Kyoso kyadisange ni phangyê, Jakobo kalondekesa kwila mwéne walungile. O mbambe ya Jakobo yexile o kubhanga o paze ni phangyê. Kyebhi kitutena kukayela o phangu ya Jakobo?

13-14. Se tuluwalesa phange ihi itwatokala o kubhanga?

¹³ Etu twamukwendela mu kanjila kofele kambata ku mwenyu, twatokala kudibhana kyambote ni akwetu. (Loma 12:18) Ihiphe itwatokala o kubhanga se tumona kwila twabhange kima kyaluwalesa phangi’etu? Kala Jakobo, twatokala we kubhinga kikwatekesu kwa Jihova bhukaxi kamusambu. Tutena kumubhinga na besowala o nguzu itwandabhanga mukusota o paze ni phange.

 ¹⁴ Tutena we kukatula kithangana phala kutonginina yatukala ku muxima wetu. Tutena kudibhwidisa kiki: ‘O kwila ngala mwene polondo phala kuditulula, kubhinga muloloki ni kubhanga o paze? Kyebhi kyandadivwa Jihova ni Jezú se ngibhanga yoso ingitena phala kubhanga paze ni phange yadiyala mba yamuhatu?’ O itambwijilu yetu yandatukwatekesa kwivwa Jezú, kuditulula phala kubhanga o paze ni phangi’etu. Mu maka yá twatokola kukayela o phangu ya Jakobo.

15. Kyebhi o kukumbidila o izwelu itusanga mu mukanda kwa akwa Efezu 4:2, 3 kutukwatekesa kubhanga o paze ni phangi’etu?

¹⁵ Xinganeka ihi yejibhita se Jakobo kalondekesele kulenduka kyoso kyadisange ni phangyê! Nange kweji moneka maka. Kyoso kituya mubhanga o paze ni phangi’etu twabhingi kulenduka. (Tanga Efezu 4:2, 3.) Jisabhu 18:19 yamba: “O kubhomba phange waluwala kubeta kubhonza, kutambula o mbonge ya imbaka ndenge; o jinzaya ja kuzokazoka jasoka ni jisabhi ja felu ku dizemba.” Kyoso kitubhomba phange ni kulenduka kwoso mwene wandakala polondo phala kubhanga o paze.

16. Ihi itwatokal’o kuxinganeka ni mukonda dyahi?

¹⁶ Etu twakokala kuxinganeka ni mwanyu woso mu ima itwandazwela ni kyebhi kitwandazwela. Kyoso kitwandakala polondo etu tutena kuya kuzwela ni phange waluwala ni mbambe yakubhanga paze ni kumukwatekesa phala tukale dingi ni ukamba wambote. Nange kudimatekenu mwene utena kuzwela ima ituluwalesa. O kiki kitena kutubhekela njinda mba kumesena kudizokela. Maji o kwila o kukayela o ukexilu yú kwandatukwatekesa kubhanga paze? Mukidi kana. Lembalala kwila o kubhanga o paze ni phangi’etu, kyene o kima kyabetakota o kusota se nanyi walungu ndenge.—1 Kol. 6:7.

17. Ihi itutena kudilonga ku phangu ya Jilibetu?

¹⁷ Sayi phange amwixana Jilibetu wabhange nguzu yavulu phala kubhanga o paze ni mon’ê wamuhatu. Mwene wambe: “Kyangibhonzele kukala ni ukamba wambote ni mwene. Ngabhiti mivu iyadi ni kusota kuzwelane ni kutululuka kwoso phala kubhanga o paze.” Ihi dingi yabhange phange Jilibetu? “Ande dyakuzwela ni monami, ngabhingile kusamba ni kupelepalala o kilunji kyami yalungu ni kima kyosokyoso kyayibha kyeji  zwela, phala kingiluwale. Ngabhingile kukala polondo phala kuloloka. Ngadilongo kwila, kingitokalele kusota kulondekesa kwila ngalungu, maji o mbambe yami yexile o kubhanga o paze ni monami.” Ihi yabhiti? Jilibetu wambe: “Lelu ngala ni muxima watululuka mukonda ngala ni paze ni athu oso ku mwiji wami.”

18-19. Se waluwalesa muthu ihi iwatokala o kubhanga ni mukonda dyahi?

¹⁸ Ihi iwatokala o kubhanga kyoso ki utonginina kwila sayi phange wamuluwalesa? Kayela o itendelesu ya Jezú yakubhanga paze. Zwela kwa Jihova yalungu ni maka enyá, dyelela kwila o nzumbi ikôla yê yandakukwatekesa kubhanga o paze. Se kiki kyene ki ubhanga, wandasanguluka, wandalondekesa kwila eye wamukwivwa Jezú.—Mat. 5:9.

¹⁹ Etu tusakidila kyavulu Jihova mukutubhana o itendelesu yiyi yahenda bhukaxi ka ‘mubhuludi wa kilunga,’ Jezú Kidistu. (Efe. 5:23) Etu twatokala kukala polondo phala ku ‘mwivwe mwene!’ kala kyabhangele poxolo Phetele, Tiyaku ni Nzwá, (Mat. 17:5) Twadilongo kyebhi kitutena kubhanga paze ni phange utwamuluwalesa. Mukubhanga kiki twandasuluka mukwendela mu njila yatolo yambata ku mwenyu, twandatambula mabesá avulu kindala, o kuhádya twandasanguluka jinga kyavulu.