1-2. Mu ithangana yavulu, ihi yene mubhita kyoso o muthu kya mu batizala? Ni ihi iwatokala kuxinganeka?

 O KWILA eye wa mwene kya athu ala polondo phala kwa batizala? Eye wevu o izwelu yâ ya kixikanu, kyoso kyatambwijila o ibhwidisu ya abhange ande dya kwa batizala. Eye wamono o kisangusangu kya jindandu jâ ni makamba mâ. Kyoso kya azawula mu menya, eye wevu jibuya ja athu amuphupha o maku mu kwasangesa. Wamono we o kisangusangu ku pholo dya yó a abatizala. Semana joso, jimidi ja athu ene mubhakula o myenyu yâ kwa Jihova, ni kwabatizala kala Jimbangi jê.

² Abha eye? Se wamuxinganeka ku kubatizala, eye u muthu wambote ku mundu yú wayibha, mukonda ‘wa xikina kusota Nzambi.’ (Jisá. 14:1, 2) O milongi yiyi a isoneka phala eye, kikale se u munzangala mba u mwadyakime. Maji o yó bhukaxi k’etu a abatizala kya, amesena we kubandekesa o vondadi yâ ya kusidivila Jihova katé ku hádya ni hádya. Kyenyiki, mu ima yavulu itubhangesa kusidivila Jihova, twanda dilonga ima itatu.

3. Mukonda dyahi o jiselevende ja Jihova a zolo o kidi, ni kubhanga ima yambote? (Jisálamu 119:128, 163)

³ Jihova wa tendelesa o mundu wê phala ‘kuzola o kidi.’ (Zak. 8:19) Jezú wa tendelesa o akayedi’ê kusota o kuyuka. (Mat. 5:6) Kiki kilombolola kwila twabhingi kukala ni hanji ya kubhanga o ima yambote, yayuka ni yazele ku mesu a Jihova. O kwila eye wazolo o kidi ni kuyuka? Twejiya kuma, eye wazolo. Eye wazembe o makutu ni ima yoso yayibha. (Tanga Jisálamu 119:128, 163.) O makutu, alondekesa o ukexilu wa Satanaji, o nguvulu ya mundu yú. (Nzw. 8:44; 12:31) Kima kimoxi kyamesena Satanaji, o kuxidisa o dijina dikôla dya Jihova Nzambi. Satanaji wene mu mwanga makutu alungu ni Nzambi tunde mu jaludim ya Edene. Mwene ubhangesa o athu kubanza kwila Jihova ki Nguvulu yambote, mukwa makutu, ni kwila  usweka o ima yambote phala o athu. (Dim. 3:1, 4, 5) O makutu alungu ni Jihova, ene muzwela Satanaji, ene mu funyisa o ilunji ni mixima ya athu. Kyoso o athu kya sola kukamba ‘kuzola o kidi,’ Satanaji utena kwa funyisa phala kubhukumukina Nzambi, ni kubhanga o ima yoso yayibha.—Lom. 1:25-31.

4. Ihi yene mubhanga Jihova ilondekesa kwila mwene o “Nzambi ya kidi”? (Tala we ofoto.)

⁴ Jihova mwène o “Nzambi ya kidi,” mukonda dya kiki mwene ulonga o kidi kwa yó oso a mu zolo. (Jisá. 31:5) Mu kubhanga kiki, Jihova wa akwatekesa phala k’a nganale kumakutu a Satanaji. Jihova ulonga we o jiselevende jê, kukala athu ambote, ni akwa kidi. Kiki kya akwatekesa kudizola mudya ni kukala ni kutululuka. (Jisa. 13:5, 6) Ihi i ubanza? O kwila Jihova wene mu kukwatekesa mu ukexilu yú kyoso ki wene mudilonga o Bibidya? Eye wene mudilonga kwila, o ukexilu wa Jihova wakubhanga o ima, wene wabeta kota phala o athu oso ni phala eye we. (Jisá. 77:13) Mu kiki, eye wamesena kubhanga o ima isangulukisa Nzambi. (Mat. 6:33) Eye wamesena kuzokela o kidi, ni kulondekesa kwila, o yazwela Satanaji yalungu ni Nzambi yetu Jihova, makutu. Kyebhi ki utena kubhanga Kiki?

5. Kyebhi ki utena kulondekesa kuma, eye uzokela o kidi ni kubhanga o mbote?

⁵ Eye utena kusola kwambata o mwenyu wé, mu ukexilu ulondekesa ku athu oso kwila, wene mu dituna o makutu a Satanaji, ni kwila wene muzokela o kidi. Eye utena kulondekesa kwila, wamesena kukutumina kwa Jihova, ni kubhanga o vondadi yê. Maji kyebhi ki utena kubhanga kiki? Utena ku kibhanga mu kusamba kwa Jihova, ni kumukanena kwila wanda musidivila katé ku hádya ni hádya, ni kulondekesa o kikanenu kiki bhukaxi ka batizu. O kima ki kubhangesa kudibatizala, o kuzola o kidi, ni kubhanga o mbote.

6. Milongi yebhi itusanga mu Jisálamu 45:4, itubhangesa kuzola Jezú Kidistu?

⁶ Mukonda dyahi eye wazolo Jezú Kidistu? Mu Jisálamu 45:4, tusangamu milongi yambote itubhangesa kumu zola. (Tanga.) Jezú wazolo kidi, muthu wayuka, walenduka. Se eye wazolo o kidi ni kuyuka, sé phata wanda zola we Jezú Kidistu. Xinganeka kyebhi Jezú kya zokela o kidi, ni kubhanga o mbote ni kuswina kwoso. (Nzw. 18:37) Maji kyebhi Jezú kyalondekesa kuma twatokala kukala tu athu alenduka?

7. Ihi iwawabhela mu phangu ya kulenduka kwa Jezú?

 ⁷ Bhukaxi ka phangu yê, Jezú walondekesa kuma twatokala kulenduka. Mu ithangana yoso mwene wexile mubhana kijingu kwa Tat’ê, muveji dya kudijingisa mudyé. (Mál. 10:17, 18; Nzw. 5:19) Kyebhi ki udivwa mukumona o phangu ya kulenduka ya Jezú? Sé phata kwila, o phangu yê ikuswinisa dingi kumuzola ni ku mu kayela. Maji mukonda dyahi Jezú muthu walenduka? Mukonda Jihova muthu walenduka. Jezú phe wazolo Tat’ê, yú wene mu kayela o phangu yê. (Jisá. 18:35; Jih. 1:3) O kwila kiki ki kubhangesa kumesena kwijiya dingi kyambote Jezú, yó wene mu kayela o phangu ya Jihova ni kuyuka kwoso?

8. Mukonda dyahi twawabhela Jezú kala Sobha yetu?

⁸ Etu twawabhela Jezú kala Sobha yetu, mukonda mwène o Nguvulu yabeta kota. Jihova mwene walongo Mon’ê, yú wamutumbika kala nguvulu. (Iza. 50:4, 5) Kumbandu yamukwá xinganeka mu ima yavulu yabhange Jezú phala kulondekesa o henda yê kokwetu. (Nzw. 13:1) Kuma mwene o Sobha yetu, twatokala kumu zola. Jezú wajimbulula kwila, mwene umona kala makamba mê o athu yó amuzolo, ni kwila alondekesa o henda yiyi, mu kubelesela o itumu yê. (Nzw. 14:15; 15:14, 15) Ujitu wadikota kukala dikamba dya Mon’â Nzambi!

9. Kyebhi o batizu yetu yadifu ni ya Jezú?

⁹ O kitumu kimoxi kya Jezú kya kwila, o akayedi’ê atokala kwa batizala. (Mat. 28:19, 20) Mwene phe wabhana o phangu mu maka ya. Kidi kwila o batizu ya Jezú ya ditungula bhofele kubatizu yetu. (Tala o kaxa “ Kyebhi o Batizu ya Jezú ki Yadifu ni Batizu ya Akayedi’ê.”) Maji né kiki kikale o batizu yetu mba o batizu ya Jezú, yadifu mu mawukexilu avulu. Kyoso Jezú kya mu batizala, mwene wadibhakula phala kubhanga o vondadi ya Tat’ê. (Jih. 10:7) Kyene kimoxi we, kyoso kya tubatizala, tulondekesa ku athu oso kwila twabhakula o myenyu yetu kwa Jihova. Tunde o kithangana kyókyo, tulondekesa kwila o kima kyabeta dingi kota ku mwenyu wetu, o kubhanga o vondadi ya Nzambi kana o vondadi yetu. Mukubhanga kiki, eye ukayela o phangu ya Jezú.

10. Ihi yatokala ku kubhangesa ku kubatizala?

¹⁰ Xinganeka mu ima iwejiya kya yalungu ni Jezú, eye wejiya kuma Jezú mwene o Mona umoxyelele wa Nzambi. Ni kwila mwène amusolo kala Sobha phala kutumina o ixi. Eye wejiya kwila Jezú ukayela o phangu ya Tat’ê ni kuyuka kwoso. Wadilongo kwila Jezú wadisa o athu exile ni nzala, wa kondo o malamba a yó exile ni kikote ku muxima, katé mwene wa sake o jihaxi. (Mat. 14:14-21) Eye utena kumona kyebhi Jezú kya mu kwendesa o ilunga lelu. (Mat. 23:10) Eye wejiya kwila, kala Sobha ya Utuminu, mwene wandabhanga dingi ima yavulu ku hádya. Kyenyiki, mu kuxinganeka mu ima yoso yiyi, kyebhi ki utena kulondekesa kwila wazolo Jezú? Utena kubhanga kiki mukukayela o phangu yê. (Nzw. 14:21) O kima kyadyanga ki watokala o kubhanga, o kubhakula o mwenyu wé kwa Jihova ni ku kubatizala.

11. Kima kyahi kyabeta dingi kota ki tubhangesa kudibatizala? Ni mukonda dyahi?

¹¹ Kima kyahi kyabeta dingi kota ki tubhangesa kudibatizala? Jezú wabhana o kitambwijilu kyoso kya zwela, se kitumu kyebhi kya Nzambi kyabeta dingi kota, mwene wambe: “Zola Jihova Nzambi yé, ni muxima wé woso, ni mwenyu wé woso, ni kilunji kyé kyoso ni nguzu yé yoso.” (Mál. 12:30) O kwila eye wazolo Jihova mu ukexilu yú?

12. Mukonda dyahi eye wazolo Jihova? (Tala we ofoto.)

¹² Kwene ima yavulu itubhangesa ku zola Jihova. Mu kifika, eye wa dilongo kuma Jihova, ‘fixi ya mwenyu’ ni kwila, ‘mawujitu moso mambote mayuka atunda kwa mwene.’ (Jisá.  36:9; Tiy. 1:17) Jihova o Nzambi yetu ya henda mukwa kubhana, mwène wa kubhana o ima yoso yambote iwala nayu ku mwenyu.

13. Mukonda dyahi o sata yakukula ujitu wakatunda?

¹³ O sata yakukula ya Jezú, ujitu wakatunda watubhana Jihova. Mukonda dyahi tuzwela kiki? Mu kifika, xinganeka o ukamba wadikota wala nawu Jihova ni Moné. Jezú wambe: ‘O tata wa ngizolo,’ eme we “ngazolo o Tata.” (Nzw. 10:17; 14:31) Jezú wabhiti mazunda ni mazunda a mivu ni Tat’ê, mukonda dya kiki ala ni ukamba wambote. (Jisa. 8:22, 23, 30) Kyenyiki xinganeka mu ndolo yevu Jihova kyoso kyehela Mon’ê kutala hadi ni kufwa. Jihova wehela kwila o Mon’ê wa kazola amujibha, phala ku tujikwila o njila ni tu tambule o mwenyu wakalelaku. Ima yoso yiyi ilondekesa kwila Jihova wazolo o athu, n’eye we. (Nzw. 3:16; Nga. 2:20) O sata yakukula, wene o ujitu wabeta kota utubhangesa kuzola Jihova.

14. Kima kyebhi kyabeta kota ki twatokala kusola ku mwenyu wetu?

¹⁴ Mukudilonga dingi yalungu ni Jihova, o henda yé kwa mwene ya dibandekesa. Sé phata kwila, eye wamesena kumuzukama katé ku hádya ni hádya. Eye utena kubhanga kiki. Jihova ukubhinga phala u sangulukise o muxima wê. (Jisa. 23:15, 16) Eye utena kubhanga kiki, kana ngó bhukaxi ka izwelu, maji we bhukaxi ka ibhangelu yé. Kyenyiki o ukexilu wa  mwenyu wé, wene wanda londekesa se wa zolo mwene Jihova mu kidi. (1 Nz. 5:3) Kiki kyene o kima kya beta kota ki watokala kusola ku mwenyu wé.

15. Kyebhi ki utena kulondekesa kwila wazolo Jihova?

¹⁵ Kyebhi ki utena kulondekesa o henda yé kwa Jihova? Kyadyanga, dibhakule kwa mwene bhukaxi ka musambu ni umukanene kumubheza ngó mwène. (Jisá. 40:8) Mukusuluka, londekesa o kudibhakula kwê ku athu oso, bhukaxi ka batizu. Kala kitwamono kya mu milongi yiyi, o kizuwa kya batizu, kithangana kyakatunda ku mwenyu wé. Eye wanda mateka ukexilu wengi wa ubhe wa mwenyu, mukubhanga kana dingi o vondadi yé, maji o vondadi ya Jihova. (Lom. 14:8; 1 Ph. 4:1, 2) Kiki kitena kumoneka kala kima kyadikota phala kukisola, kidi kima kyadikota mwene. Maji o batizu ijikula o njila phala kukala ni mwenyu wabeta dingi kota. Kyebhi kyene?

16. Kala kilondekesa Jisálamu 41:12, kyebhi Jihova kyanda besowala yó abhakula o myenyu yá kwa mwene?

¹⁶ Jihova mwene o Muthu wabeta dingi kota mu kubhana. Né mwene se tumubhana mba tubhanga ima yavulu mu sidivisu yê, mwene wanda tuvutwila dingi, o itwamubhana mba itwabhange ndenge. (Mál. 10:29, 30) Mwene wanda kubhana o mwenyu wabeta kota né mwene ku mundu yu wayibha, wala kya kudisukilu. O didi phe dimatekenu ngó. O mwenyu wanda mateka kyoso kyanda kubatizala, utena ku kwambata katé ku hádya ni hádya. Eye utena kusidivila o Tata yé ya henda, katé ku hádya ni hádya. O henda bhukaxi ké ni Tat’ê Jihova, yanda suluka ni kudibandekesa, eye phe wanda kala ni mwenyu wakalelaku, kala mwene.—Tanga Jisálamu 41:12.

17. Kima kyebhi ki watokala kubhana kwa Jihova, mwene kala nakyu hanji?

¹⁷ Kyoso ki ubhakula o mwenyu wé kwa Nzambi, anga akubatizala, eye ukala ni ujitu wa kubhana kima kyakatunda kwa Jihova. Ima yoso iwala nayu, ni ithangana yoso yambote iwabhiti kya kumwenyu wé, Jihova mwene wakubhanayu. Eye utena kubhana kwa Ngana ya dyulu ni ixi, kima kala nakyu hanji, o kumukala fiyele ni kumusidivila ni muxima woso. (Jobe 1:8; 41:11; Jisa. 27:11) Mu kidi, yú wene  o ukexilu wabeta kota wa kwambata o mwenyu wetu. Sé phata o henda yê kwa Jihova, kyene o kima kya tokala ku kubhangesa kudibatizala.

18. Ibhwidisu yebhi i ututena kudibhanga?

¹⁸ Kyebhi ki weji tambwijila o kibhwidisu, wamesena ku kubatizala? Eye ngó watokala kutambwijila o kibhwidisu kiki. Maji kima kyambote kudibhwidisa, ‘ihi ingamukingila?’ (Ika. 8:36) Xinganeka mu ima itatu itwadilongo mu milongi yiyi. Kyadyanga, kuzola o kidi ni ima yayuka. O kwila wamesena kutunga mu kididi mwandakala ngó athu a zwela o kidi, ni kubhanga o ima yayuka? Kayadi, kuzola Jezú Kidistu. Dibhwidise, ‘o kwila ngamesena kuma o Mon’a Nzambi ukala Sobha yami, ni kukayela o phangu yê?’ Katatu, kyabeta dingi kota, o kuzola Jihova Nzambi. Dibhwidise, ‘o kwila ngamesena kusangulukisa Jihova mu kumusidivila?’ Se watambhwila kyene mu ibhwidisu yiyi, mukonda dyahi k’a kubatizala luwa? Ihi iwamukingila?—Ika. 16:33.

19. Mukonda dyahi ki ubhingi kukala ni hele ya ku kubatizala? Ta kifika. (Nzwá 4:34)

¹⁹ Se eye wala ni hele ya ku kubatizala, xinganeka mu kifika kyate Jezú. (Tanga Nzwá 4:34.) Jezú wasokesa o kubhanga o vondadi ya Nzambi, ni kudya. Mukonda dyahi? Mukonda, o kudya ku tubhanga kyambote. Jezú wejidile kwila, yoso ibhinga Nzambi phala etu kubhanga, kima kyambote phala etu we. Jihova kamesena kwila tubhanga kima ki tubhekela ibhidi. Maji o kwila o batizu ibhanga we mbandu mu vondadi ya Jihova? Kyene mwene. (Ika. 2:38) Kyenyiki, utena kudyelela kwila o kudibatizala, kwanda kubhekela we mbote. Eye ki weji kala ni hele ya kudya, o kudya ku uwawabhela dingi, mba kwabeta kota. Kyenyiki phe, mukonda dyahi ukala ni hele ya ku kubatizala?

20. Ihi itwandamona mu milongi yakayela?

²⁰ Ihi iwamukingila? Sayi athu amba kwila, “Eme ki ngala luwa polondo.” Mu kidi, o kusola kudibhakula ni kudibatizala, kyene o kima kyabeta dingi kota ki wanda bhanga ku mwenyu wé. Kyenyiki, eye wandabhinga kuxinganeka mwene kyambote yalungu ni maka enyá, nange kwanda bhinga mwene kubhita kithangana ni kubhanga nguzu yavulu, katé ki udivwa kwila wala polondo phala kudibatizala. Maji phe, se wamesena kudibatizala, ihi i utena kubhanga phala kudipelepalala? Twandamona o kitambwijilu kya kibhwidisu kiki mu milongi yakayela.