1-2. Kyebhi kitutena kukayela omakanda a Jezú? Bhana phangu.

XINGANEKA kwila eye wala mukibuka kyamukwenda mukikangalakata, omuseke wabete ni kwila mwala ilwezu yavulu. Omwendexi wamidyangela wala ni uhete wavulu. Kyoso kyaya ni kwenda mwene uxisa omakanda mê bhwadyota. Ubhixila kithangana eye kiwamumona dingi omwendexi! Maji eye kuthandanganya. Muveji dyakiki, eye ni akwenu uwamukwendanawu, mwandakayela omakanda axisa mwene!

² Omundu yu wayibha mutwatungu lelu, wedi kala okikangalakata kyala ni ilwezu yavulu, o Jikidistá jakidi jedi kala okibuka kiki kyamukwendelamu. Muhenda yê, Jihova watubhana Mwendexi wayuka, Mon’ê Jezú Kidistu. Etu tutena kukayela omakanda mê. (1 Phe. 2:21) Sayi Bibidya yambe kwila Phetele bhabha wasokesa Jezú ni mwendexi. Kala omwendexi uxisa omakanda mê, Jezú watuxila omakanda mê, phala tutene kumukayela. Twandadilonga ibhwidisu itatu yalungu ni kukayela omakanda mê. Ihi ilombolola kukayela omakanda a Jezú? Mukonda dyahi twatokala kubhanga kiki? Ni kyebhi kitwatokala kubhanga kiki?

3. Ihi ilombolola kukayela omakanda amuthu?

³ Ihi ilombolola kukayela omakanda amuthu? Mu Bibidya okizwelu “kwenda” mba “makanda” sayi bhabha kilombolola o ukexilu wamwenyu wamuthu. (Dim. 6:9; Jisa. 4:26) Ophangu yaxisa omuthu tutena ku isokesa ni makanda axisa kyoso kyakexile mukwenda. Kyenyiki okukayela omakanda amuthu, kulombolola kukayela ophangu yê phala kubhanga o ima kala kyabhange mwene.

4. Ihi ilombolola okukayela omakanda a Jezú?

 ⁴ Mukikiphe, ihi ilombolola kukayela omakanda a Jezú? Kilombolola kukayela ophangu yê. Muvelusu yamilongi yetu, poxolo Phetele wazwela phangu yambote yatuxila Jezú, yakukolokota. Maji sayi hanji mawukexilu amukwa ututena kukayela Jezú. (1 Phe. 2:18-25) Mukidi, omwenyu wa Jezú walungu ni ima yoso yazwela ni yabhange, yene ophangu yatuxila phala ku ikayela.

5. Kuma tu akwa ituxi, okwila tutena kukayela mwene ophangu ya Jezú? Jimbulula.

⁵ Kuma tu akwa ituxi, okwila tutena mwene kukayela ophangu ya Jezú? Xe tutena. Phetele katutangela kwila “twandakayela” ophangu ya [Jezú]” ni kuyuka kwoso. Muveji dyakiki, mwene watuswinisa kukayela ophangu ya Jezú katé bhowso bhututena. Se tukayela kyambote omakanda a Jezú mukubhanga yoso itutena sumbala tu akwa ituxi, twandabelesela o izwelu ya Nzwá, yambe: “Ufwama kwenda kala kyendele [Jezú].”—1 Nzwá 2:6.

6-7. Mukonda dyahi tuzwela kwila, mukukayela omakanda a Jezú, tuzukama dingi kwa Jihova?

⁶ Okukayela omakanda a Jezú kwandatuzukamesa dingi kwa Jihova. Mukonda dyahi tuzwela kiki? Kyadyanga, Jezú watuxila phangu yambote yakwijiya se ukexilu webhi wamwenyu usangulukisa Nzambi. (Nzwá 8:29) Mukiki, okukayela ophangu ya Jezú kwandasangulukisa Jihova. Tutena kudyelela kwila o Tata yetu ya dyulu wandazukama kwa yó abhanga yoso phala kukala makamba mê.—Tiya. 4:8.

⁷ Kayadi, Jezú wakayela ophangu ya Tatê ni kuyuka kwoso. Mukonda dyakiki, Jezú watena kuzwela: “Woso wangimono eme wamono we Tata.” (Nzwá 14:9) Etu tutena kukayela o idifwa ya Jezú, ni ukexilu wê watalatala akwâ. Mukifika, mwene wakwatela henda kumukwa dibhute, wevu ondolo ya muhatu wexile ni uhaxi wabhonzo, mwene wakwatela henda kwa yó  afundu jindandu jâ jakazola. Kyoso kitukayela ophangu ya Jezú, etu twamukayela kyambote ophangu ya Jihova. (Mál. 1:40, 41; 5:25-34; Nzwá 11:33-35) Kyoso kitulondekesa o idifwa ya Jihova, o ukamba wetu ni mwene ukola dingi.

8. Jimbulula se mukonda dyahi okukayela omakanda a Jezú kutukwatekesa “kutolola” omundu yú?

⁸ Okukayela omakanda a Jezú kutukwatekesa phala kitulanduke kumundu yú wayibha. Mu usuku wasukina wamwenyu wê mu ixi, Jezú wambe: “Ngongo yiyi nga itolola kya.” (Nzwá 16:33) Kiki kilombolola kwila, mwene kehela o ibanzelu ya athu amundu yú, kufwinyisa o ibanzelu ni ibhangelu yê. Jezú nuka wajimbile okima kyamubhangesa kumutumikisa mungongo, okuzelesa odijina dya Jihova. Abha etu? Kumundu yú kwene ima yavulu itena kutulandukisa. Maji kala Jezú, tutena kusuluka kulungila omesu metu mukubhanga ovondadi ya Jihova, ni “kutolola we omundu yú.”—1 Nzwá 5:5.

9. Ihi itwatokala kubhanga phala kukala munjila yambata kumwenyu wakalelaku?

⁹ Se tukayela ophangu ya Jezú, twandatambula omwenyu wakalelaku. Kyoso omunzangala wexile mvwama kyebhwidisa, se ihi yatokalele kubhanga phala kunganyala omwenyu wakalelaku, Jezú wamutambwijila: ‘zá ungikayele.’ (Mat. 19:16-21) Sayi Jijudé kaxikinine kwila Jezú mwene Kidistu. Mukikiphe Jezú wambe: “O jimbudi jami . . . Jingikayela. Ngijibhana o mwenyu kiwabhwa.” (Nzwá 10:24-29) Nikodemu watokalele ku Inzo Yadikota Yakufundisa ya Jijudé, wamesenene kwijiya o ilongesu ya Jezú. Jezú wamutambwijila kwila, “oso amuxikana mwene” atena “kunganyala o mwenyu kiwabhwa.” (Nzwá 3:16) Etu tulondekesa okixikanu kyetu kwa Jezú, mukukumbidila o ima yalongo, ni kukayela o ima yabhange mwene. Se kiki tukibhanga, twandakala munjila yambata kumwenyu wakalelaku.—Mat. 7:14.

10. O “kwijiya” kyambote Jezú kwalungu ni ihi? (Nzwá 17:3)

¹⁰ Ande dyakukayela omakanda a Jezú katé bhwoso bhututena, twatokala kumwijiya hanji. (Tanga Nzwá 17:3.) “Kwijiya” Jezú kwalungu ni kusuluka ni kubhanga o ima yabhange mwene. Twabhingi kubandekesa okwijiya kwetu kwalungu ni mwene, mukudilonga o idifwa yê, o ukexilu wê wakuxinganeka ni itumu yê. Kikale se twala mumivu yavulu mukidi mba kana, twatokala kusuluka ni kwijiya Jihova ni Mon’ê.

11. Ihi itusanga mumadivulu a Matesu, Máluku, Luka ni Nzwá?

¹¹ Phala kutukwatekesa kwijiya kyambote Mon’ê, Jihova ni henda yoso watubhana madivulu awana: Matesu, Máluku, Luka, ni Nzwá azwela musoso wamwenyu wa Jezú. Omadivulu awana yâ, atutangela yazwela Jezú, atulondekesa we ihi yabhange, ni kyebhi kyadivu mwene. Ene atukwatekesa ‘kuxinganeka dingi’ muphangu ya Jezú. (Jihe. 12:3) Mumadivulu yâ,  mwene mutusanga omakanda atuxila Jezú phala kumukayela. Kyenyiki, mukudilonga Omadivulu yâ, twandatena kwijiya dingi kyambote Jezú. Mukubhanga kiki, twandatena kukayela kyambote omakanda mê.

12. Kyebhi kitutena kukatula mbote mumadivulu a Matesu, Máluku, Luka ni Nzwá?

¹² Phala kukatula mbote yasoko mumadivulu a Matesu, Máluku, Luka ni Nzwá, kitwatokala ngó kwatanga, maji twatokala we kubhanga dingi kima kyengi. Etu twabhingi kukatula kithangana kyasoko, phala kudilonga ni kuxinganeka kyambote mu ima itwadilongo. (Sokesa ni Josuwé 1:8.) Twandamona jindunge jiyadi jandatukwatekesa kuxinganeka mumadivulu awana yâ, ni kukumbidila o ima itutangamu.

13. Kyebhi ki utena kubhangesa kwila omusoso wa Jezú ukala wakidi mwene phala eye?

¹³ Kyadyanga, bhangesa omusoso wa Jezú kukala wakidi mwene phala eye. Sota kuxinganeka, phala umone, wivwe o ima yexile mubhitamu. Phala kubhanga kiki, wandabhinga kutokwesa mumadivulu metu atubhana okilunga kya Jihova. Tonginina ojivelusu jala kudima ni jala kupholo jajivelusu jiwamutanga, sota kwijiya o ima yabhiti ande, mba kusota kwijiya o ima yabhiti kupholo dyamilongi iwamudilonga. Sota kwijiya dingi milongi yengi yalungu ni athu ni ididi yotumbule mumusoso. Sokesa omilongi iwamudilonga ni milongi yadifu yala mumadivulu engi. Sayi kithangana omusoneki wadivulu dimoxi utena kujimbulula mba kuzwela dingi kima, omusoneki wadivulu dyamukwa kana.

14-15. Ihi itutena kubhanga phala kukumbidila kumwenyu wetu o ima itwadilongo yalungu ni mwenyu wa Jezú?

¹⁴ Kyakayadi, kumbidila o ima izwela Omadivulu awana ya, kumwenyu wé. (Nzwá 13:17) Kyoso ki uzubha kudilonga omadivulu awana ya, dibhwidise: ‘Okwila sayi disá mumilongi yiyi ingitena kukumbidila kumwenyu wami? Kyebhi omilongi yiyi ingadilongo itena kukwatekesa we akwetu?’ Sota kuxinganeka ku muthu. Kyenyiki mukithangana kyatokala, ni henda yoso ni kuxila kwoso, mutangele o ima iwadilongo.

 ¹⁵ Tumone kyebhi kitutena kukumbidila ojindunge jiyadi jiji. Twandamona omusoso wamutudi wangadyama wamono Jezú mutembulu.

16. Jimbulula o ima yabhiti itusanga mudivulu dya Máluku 12:41.

¹⁶ Bhangesa omusoso kukala wakidi mwene phala eye. (Tanga Máluku 12:41.) Xinganeka o ima yabhiti. Muvu wa 33 K.K., mukizuwa kya 11 kyambeji ya Nizá, mukukamba tu izuwa ande dya Jezú kufwa. Jezú wabhiti kizuwa ni kulonga mutembulu. Maji o atwameni ajingeleja amuzukutisa. Kikwalaleka, sayi athu amwibhudisa se nanyi wamubhele o ufolo wakubhanga o ima yexile mubhanga. Amukwa asoto kubhanga ibhwidisu yabhonzo phala kumona se wejitena kutambwijila. (Mál. 11:27-33; 12:13-34) Kindala Jezú wamutunda kumbandu yengi yatembulu anga uya kumbandu yamukwa. Mwene watenene kumona odizaku mwakexile musangela okitadi, nange mwene wakexile mukididi akixana Kithadi kya Ahatu. Mwene waxikama yu wamateka kutala o athu akexile musangela okitadi. Mwene wamono jimvwama javulu akexile mutamu kitadi kyavulu. Nange mwene wazukamene bhofele phala kwivwa ojibuya jajibela jakexile mutula mudizaku.

17. Ihi yabhange omutudi wangadyama amutumbula mu divulu dya Máluku 12:42.

¹⁷ Tanga Máluku 12:42. Mukubhita kithangana Jezú wamono muhatu. Mwene wexile “mutudi wangadyama.” (Luka 21:2) Omwenyu wê wabhonzele kyavulu. Nange mwene kexile ni kitadi kyasoko, phala kusumba ima yabhindamene kumwenyu. Nekiki, mukaswekele, mwene wazukama kudizaku dimoxi, yu watemu tumilambongo tuyadi. Otumilambongo tutu, nange kitwabhange jibuya javulu, kala akwa kyexile mutamu okitadi. Jezú wejidile kwila, mwene watemu tumilambongo tuyadi, kitwexile ni valolo yavulu muthembu yenyoyo. Otumilambongo tutu, kitusokele nengo phala kusumba kanjila kamoxi, mujinjila kijitele kalu yavulu jakexile mujisumbisa phala kudya.

18. Kala kilondekesa Máluku 12:43, 44, ihi yambe Jezú yalungu ni kitadi kyasangela omutudi?

¹⁸ Tanga Máluku 12:43, 44. Jezú wadiwana kyavulu ni mutudi yú. Mukiki, mwene wexana omaxibulu mê nazukame dingi, natale omutudi, yu wambe: “Kota kyatemu omuhatu yu mutudi wangadyama, enyoso ndenge ate kitadi mukizaku.” Kyenyiki, mwene wa ajimbulula: “Kuma oso [kotelele ojimvwama], akatula ngo kukiki kya asubhuka kunzungule, mwenephe muwadyama we kamono dingi bhwanomona yu watemu ohuta ye yoso.” Kyoso omutudi yu wakixikanu kyabhana okitadi kyê kyoso kyexile nakyu, mwene wadyelela kwila Jihova weji mulanga.—Jisá. 26:3.

19. Disá dyebhi dyadikota ditutena kudilonga mu izwelu ya Jezú yalungu ni mutudi wangadyama?

¹⁹ Kumbidila omusoso yu kumwenyu wé. Dibhwidise: ‘Disá dyebhi dingitena kudilonga mu izwelu ya Jezú yalungu ni mutudi wangadyama?’ Xinganeka yalungu ni mutudi yú. Seku phata kwila, mwene wamesenene kubhana okima kyabetakota kwa Jihova. Mukiki, mwene wabhange okima kyatokalele okubhanga, wabhana kwa Jihova okima kyê kyabetakota. Jezú wejidile kwila, okitadi kyasangela, kyexile ni valolo yavulu kumesu ya Tata yê Jihova. Bhabha tudilongaku disá dyadikota. Jihova usanguluka kyavulu kyoso kitumubhana okima kyetu kyabetakota musidivisu yê, kyoso kitukibhanga ni muxima wetu woso ni mwenyu wetu woso. (Mat. 22:37; Kol. 3:23) Jihova usanguluka kyoso mwene kyamona kwila, twamubhanga yoso itutena! Kiki kyalungu ni kithangana ni nguzu itubhakula mu ubhezelu wetu, kikale mu ukunji, kikale muyônge.

20. Kyebhi ki utena kukumbidila odisá dya musoso walungu ni mutudi? Bhana phangu.

 ²⁰ Kyebhi kitutena kukumbidila odisá ditudilonga mumusoso wamutudi? Xinganeka kumuthu utena kumuswinisa, mukumulembalesa kwila, Jihova usanguluka ni nguzu yabhanga phala kumusidivila. Mukifika, okwila wejiya phange yamuhatu wakuka kya, wene muditatela, wene mudivwa kwila kala dingi ni sawidi mba nguzu yasoko phala kubhanga yoso yamesenene, kala kyexile mubhanga mukulu mu ukunji? Mbaphe utena kuxinganeka phange yadiyala wala ni uhaxi kiwivu milongi, wene mumuluwalesa mukonda wene mumufidisa kuya muyônge yoso Mukididi kya Ubhezelu? Tutena kukwatekesa o athu yâ, mukutumbula izwelu yambote ‘yakukwatekesa.’ (Efe. 4:29) Atangele odisá diswinisa diwakatula mumusoso wamutudi wangadyama. O izwelu yê yakiswinisu, itena kwadyelelesa kwila, Jihova usanguluka kyoso kitumubhana yoso itutena. (Jisa. 15:23; 1 Tes. 5:11) Kyoso ki uximana akwenu mukonda dyakubhana kwa Jihova yoso yatena, ne mwene kama kofele, eye wamukayela ophangu ya Jezú.

21. Ihi iwamesena okubhanga?

²¹ Tusakidila kyavulu Jihova, mukutubhana Omadivulu awana ajimbulula kyambote omusoso wa mwenyu wa Jezú. Ene atukwatekesa kumukayela, katé bhwoso bhututena! Sota kudilonga Omadivulu awana ya, mukudilonga ubheka wé mba mu Ubhezelu ku Mwiji. Twatokala kulembalala kwila, phala kukatula mwene mbote mukudilonga kuku, twabhingi kutendela kyambote omusoso wa Jezú, ni ku ikumbidila ku mwenyu wetu. Twatokala kukayela o ibhangelu, ya Jezú, maji twabhingi we kubelesela yoso yazwela. Mumilongi yakayela, twandamona se ihi itutena kudilonga mu izwelu yasukina ya Jezú, ande dyakufwa.