1. Kala kilondekesa Matesu 7:13,14 mukonda dyahi tutena kuzwela kwila twamubhanga njila?

ETWENYOSO twamubhanga njila. Ombambe yetu okutunga kumundu waubhe, kwandatumina Jihova onguvulu ya henda. Izuwa yoso, tusota kwendela munjila itwambata kumwenyu. Maji kala kyambe Jezú, onjila yofele sayi ithangana kubhonza ku ikayela. (Tanga Matesu 7:13, 14.) Kuma twakwa ituxi, kutubhonza dingi kwenda munjila yenyi.—Nga. 6:1.

2. Ihi itwandadilonga mumilongi yiyi? (Tala okaxa “ Okulenduka Kutukwatekesa Kulungulula Oixinganeku Yetu.”)

² Se twamesena kusuluka ni kwendela munjila yamwenyu, twatokala kukala polondo phala kulungulula oixinganeku yetu, oukexilu wetu ni ibhangelu yetu. Phoxolo Phawulu waswinisa o Jikidista atungile ku Kolindu, phala n’asuluke mukulungulula “oixinganeku ya.” (2 Kol. 13:11) Oitendelesu yiyi yalungu we n’etu. Mumilongi yiyi, twandadilonga kyebhi o Bibidya itena kutukwatekesa kulungulula omyenyu yetu, ni kyebhi omakamba akulu mu nzumbi atena kutukwatekesa kusuluka kwendela munjila yamwenyu. Twandamona we ihi itena kutubhonzesa kukayela oitendelesu ibhana okilunga kya Jihova. Twandamona we kyebhi okulenduka kutena kutukwatekesa kulungulula oixinganeku yetu ni kusuluka ni kusidivila Jihova ni kusanguluka.

3. O Mak’â Nzambi atena kutukwatekesa kyebhi?

³ Kutonginina oixinganeku yetu ni kyebhi kitudivwa, kutena kubhonza. Mukonda dyahi? Mukonda omuxima wetu ubhomba kinene, sayi ithangana kutubhonza kwijiya se yamutwambatela kwebhi. (Jel. 17:9) Kikibhonzo phala etu kudinganala ni “ixinganeku yamakutu.” (Tiya. 1:22) Mukiki twabhingi kutanga o Mak’â Nzambi  phala kuditonginina mudyetu. Mukonda o Mak’â Nzambi atena kutungula “omabamzelu ni jivondade” ja mixima yetu. (Jihe. 4:12, 13) O Mak’â Nzambi adifu ni makakina ya kukatula o Raio-X, yene itena kulondekesa ihi yala moxi dyetu. Maji phala kuxikina oitendelesu ya Bibidya ni yayo a asolo kwa Nzambi phala kutukwatekesa, twabhingi kukala tu athu alenduka.

4. Ihi ilondekesa kwila Sobha Sawulu wakituka mukwa lwimbi?

⁴ Ophangu ya Sobha Sawulu ilondekesa ihi itena kubhita se tukamba okulenduka. Olwimbi lwexile nawu Sobha Sawulu lwamubhangesa kukamba kuxikina okidi kya kwila, wabhingile kulungulula oukexilu we wakuxinganeka ni ibhangelu yê. (Jisá. 36:1, 2; Haba. 2:4) Kiki kyadimonekena kyoso Sawulu kyabhwikisa akwa Amaleke. Jihova wabhana kwa Sawulu itendelesu kiyabhonzele kuikumbidila. Maji mwene kaibelesela. Kyoso polofeta Samwele kyayi muzwela ni Sawulu yalungu ni maka enya, mwene kaxikinine kwila walweza. Muveji dya kiki, mwene wasotoko kusweka oima yayibha yabhangele, phala kalondekese kwila oima yabhangele yexile kituxi, yu wamateka kutatela akwa. (1 Sam. 15:13-24) M’ukulu mwene wabhangele kya kima kyadifu kiki. (1 Sam. 13:10-14) Okyayibha okwijiya kwila Sawulu wehela olwimbi kukala kumuxima wê. Mwene kaxikina kulunglula oixinganeku yê, mukiki Jihova kamuxikina dingi kala Sobha.

5. Ihi itudilonga ni phangu ya Sobha Sawulu?

⁵ Phala kukatula mbote mu phangu ya Sawulu twabhingi kudibhwidisa: ‘Kyoso kingamutanga o Mak’â Nzambi okwila ngisota kusweka oixinganeku yami yayibha? Okwila ngixinganeka kwila oitondalu yami kiyayibha kinene? Okwila kyoso kingitondala ngisota kutatela akwetu?’ Se sayi kibhwidisu kimoxi kitwatambwijila kyene, twabhingi kulungulula oukexilu wetu wakuxinganeka. Se kitubhange kiki anga twehela olwimbi kukula kumuxima wetu, Jihova kandaxikina kwila tukala tumakamba mê.—Tiya. 4:6.

6. Jimbulula kyebhi ophangu ya Sobha Sawulu kiyadifu ni ya Sobha Davidi?

⁶ Kindala tutale kyebhi ophangu ya Sobha Sawulu kiyadifu ni ya Sobha Davidi, odiyala wazolele “o itumu ya Jihova.” (Jisá. 1:1-3) Davidi wejidile kwila Jihova ubhulula oso alenduka anga utulula yo adizangeleka. (2 Sam. 22:28) Mukiki Davidi wehela o itumu ya Maka a Nzambi kulungulula oixinganeku yê. Mwene wasoneka: “Ngasakidila Jihova wangibhana phangu, kate ni muxima mu usuku wangilongo kilunji.”—Jisá. 16:7.

7. Se tukala tu athu alenduka ihi itwandabhanga?

⁷ Setukala tu athu alenduka, twandakwehela oMaka a Nzambi kulungulula oixinganeku yetu yayibha, ande dyakutubhangesa kubhanga ima yayibha. O Maka a Nzambi edi kala ombimbi itutangela: “Yiyi yene onjila, endelenu mwenyumu.” Yene yandatudimuna kyoso kitumateka kwenda munjila yayibha. (Iza. 30:21) Okwivwa Jihova kwandakutubhekela mabesa avulu. (Iza. 48:17) Mukifika kitwandabhinga kutondala phala kutubazela. Etu tuzukama dingi kwa Jihova mukonda twejiya kwila mwene utulanga kala otata ya henda.—Jihe. 12:7.

8. Kala kyotumbule mudivulu dya Tiyaku 1:22-25, Kyebhi oMaka a Nzambi adifu ni lumwenu phala etu?

⁸ O Maka a Nzambi edi kala lumwenu phala etu. (Tanga Tiyaku 1:22-25.) Athu avulu ala ni ukexilu wakuditala mulumwenu ande dyakutunda kubhata. Mukiki ene atena kumona ihi yabhingi kuyudika kupholo ya ande dya kwamona ku athu engi. Kyene kimoxi we, mukutanga o Bibidya etu tutena kwijiya ihi itwabhingi kulungulula m’ukexilu wetu wakuxinganeka ni kubhanga oima. Avulu amona kwila kota okutanga okibatulu kya Bibidya mukamene ande dyakutunda kubhata. Mukiki ene ehala omilongi ya Bibida kufunyisa oukexilu wâ wakuxinganeka. Mukizuwa kyamuvimba ene asota kukumbidila omilongi yadilongo mu Maka a Nzambi. Kumbandu yengi, twabhingi kutanga o  Bibidya ni kuxinganeka mu ima itwatange izuwa yoso. Kiki kitena kumoneka kala kikyabhonzwe, maji yala bhukaxi kaima yabetakota itukwatekesa kusuluka ni kwenda munjila yatolo itwambata kumwenyu.

9. Muithangana yebhi nange kamba dye ubhinga kukubazela?

⁹ Okwila eye wexile kyá mukwendela munjila yexile mukusandula kwa Jihova? (Jisá. 73:2, 3) Nange Kamba dye wakulu mu nzumbi ni kuswina kwoso wakubazela. Kyebhi kiwadivu? Okwila eye wevu yazwela mwene, eye wasoto kuikumbidila? Se kyene eye wabhange okima kyatokala. Se phata eye wasangulukile ni itendelesu iwatambula.—Jisa. 1:5.

10. Ihi iwandabhanga se kamba dye ukubazela?

¹⁰ O Maka a Nzambi atulembalesa: “Jifidila jitukwama odikamba, jidibhanga ijimbwete ya jihenda.” (Jisa. 27:6) Osabhu yiyi ilombolola ihi? Tala okifika kiki: Xinganeka kwila eye wamukingila kumatuka kikoka kibhita makalu avulu, maji eye ulanduka mukutala omutelembe we. Mukithangana kyenyiki kumoneka dikamba anga ukukwata bhulukwaku ni nguzu anga ukusunga. Sumbala mwene wakukwama kulukwaku mukonda dya nguzu yate phala kukusunga, maji okima kyabhange mwene kyabhulula omwenyu we phala kakuphuphu kudikalu. Ne mwene se wevu ojindolo muizwa yavulu, okwila weji luwala ni kamba dye mukonda wakukwama? Mukidi kana! Eye weji musakidila mukonda wabhulula omwenyu we. Kyene kimoxi we, kyoso odikamba kyatubazela mukonda dya kima kitwazwela mba twabhange, tutena kudivwa ndolo. Maji kiubhingi kuluwala, mukonda kubhanga kiki wowa. (Ndo. 7:9) Muveji dya kiki, sanguluka ni kamba dye mukonda dya nguzu yabhange phala kuzwela neye.

11. Ihi itena kufidisa omuthu kuxikina okibazelu kimubhana kamba dye dyakazola?

¹¹ Ihi itena kufidisa omuthu kuxikina okibazelu kimubhana kamba dye dyakazola? Olwimbi. Omukwa lwimbi wedi “kala yo usola yandala o kwivwa.” Ene “a ka katula matwi ma mukwivwa o kidi.” (2 Tim. 4:3, 4) Ene abanza kwila, kabhingi kutambula kibazelu mukonda ene axinganeka kwila jinjimu mba abetakota akwa ndenge. Mukiki poxolo Phawulu wasoneka: “Kuma se omuthu wadifika kukula, manyi mwene kikima, mwene wadinganala.” (Nga. 6:3) Sobha Soloma wajimbulula kyambote omaka enya. Mwene wasoneka: “O munzangala wa ngadyama wala njimu, wa beta kota; kwindi o mwadyakime wa kuka, wa kambe o kilunji, yu wala ku usobha, wa bhingi ka xikina dingi ku mu bazela kwala muthu woso-woso.”—Ndo. 4:13.

12. Kala kilondekesa Ngalásya 2:11-14, kyebhi kyadivu poxolo Phetele kyoso kyamubazela? Ihi itutena kudilonga muphangu yê?

¹² Tala ophangu ya poxolo Phetele. Mwene amubazela kwala poxolo Phawulu bhupholo dya athu avulu. (Tanga Ngalásya 2:11-14.) Phetele hinu wadizangala ni Phawulu mukonda dya ukexilu wazwelane ni mukonda dya kumubazela kupholo dya athu. Maji Phetele walondekesa unjimu. Mwene waxikina okibhazelu, kadizangalele, ne kuluwala. Muveji dya kiki mwene wexana Phawulu kala ‘phangyetu ya kazola.’—2 Phe. 3:15.

13. Mukubazela akwetu ihi itwatokala kwijiya?

¹³ Se eye wabhingi kubazela kamba dye, ihi iwatokala kudilembalala? Ande dya kuzwela ni mwene, kima kyambote okudibhwidisa: ‘Okwila ngidimona kala ngi “muthu wambote kinéne” mba ngayuka? (Ndo. 7:16) Omuthu udimona kala wayuka, mwene kakayela oitendelesu ya Jihova, maji ukayela okilunji kye phala kufundisa akwa. Kyoso kyabhanga kiki, mwene kalondekesa henda. Mu kuditonginina m’ukexilu yú, se umona kwila wabhingi mwene kuzwela ni kamba  dye, sota kwijiya omaka, bhanga ibhwidisu ni unjimu m’ukexilu ubhangesa kamba dye kumona oitondalu yê. Sota kwijiya se oitendelesu iwamubhana yamutunda mu Bibidya. Lembalala kwila keye watokala kufundisa kamba dye, maji wabhingi kumukwatekesa kwijiya kyebhi kyamudivwa Jihova ni ima yamubhanga mwene. (Loma 14:10) Dyelela mu unjimu utusanga mu Maka a Nzambi. Kyoso kiuya mubazela mukwenu, londekesa henda kala kyabhange Jezú. (Jisa. 3:5; Mat. 12:20) Mukonda dyahi? Mukonda Jihova wandatutalatala m’ukexilu umoxi ututalatala we akwetu.—Tiya. 2:13.

14. Ihi yenemutubhana okilunga kya Nzambi?

¹⁴ Jihova utwendesa munjila ya mwenyu bhukaxi kakilunga kye, Jividyu, madivulu ni yônge itukwatekesa kukumbidila oitendelesu itunda mu Maka a Nzambi. Tutena kudyelela mumilongi yiyi, mukonda yatundu mu Mikanda Ikôla. Kyoso o Kibuka kya Utuminu kyasola milongi yalungu ni kyebhi kitutena kuboka, ene adyelela mu nzumbi ikola. Maji ne kiki o Kibuka kya Utuminu ithangana yoso atonginina oitendelesu yasolo kya, phala kumona se kwabhingi dingi kulungululabhu kima. Mukonda dyahi? Mukonda “o funza ya mundu yu, ki waliki, ki i nange kubhita” ni kwila okilunga kya Nzambi kya bhingi kwijya kyebhi kyamukwenda oima mu ngongo.—1 Kol. 7:31.

15. Sayi aboki ene mudibhana ni ibhidi yebhi?

¹⁵ Kyoso okilunga kya Nzambi kitujimbulula milongi ya ubhe ya Bibidya mba itubhana itendelesu yalungu ni ukexilu wa mwenyu wa Ukidistá, etu tuxikina anga tuikumbidila. Kyebhi kitudivwa kyoso okilunga kya Nzambi kiilungulula ima m’ukexilu kituitendela kyambote? Mukifika, mumivu yatundumu okutunga ni kuyudika oididi ya ubhezelu yatele kalu yavulu. Mukiki o Kibuka kya Utuminu kya tendelesa kwila eji bunda ilunga yavulu mu kididi kimoxi kya ubhezelu. Kyenyiki sayi ilunga ene muitumikisa muididi ya ubhezelu yengi, oididi yamukwa ene muisumbisa. Okitadi kiki ene mu kiphopheka phala kukwatekesa kutunga ididi ya ubhezelu ya ubhe, muididi mwala dingi oibhindamu. Se eye watungu mumbanza mwamusumbisa oididi ya ubhezelu, ni kwila okilunga kye akitumikisa mukididi kyengi kya ubhezelu, nange kukubonza kuxikina oitendelesu yiyi ya ubhe. Sayi aboki abhinga kwenda kyavulu phala kuya mukyônge. Amukwa akalakala kyavulu phala kutunga ni kuyudika ididi ya ubhezelu, nange adibhwidisa se mukonda dyahi kindala amuisumbisa. Ene nange adivwa kwila okithangana  ni nguzu ya yabhange yaye ngo. Ne kiki, ojiphange jiji akayela oitendelesu ya ubhe. Mukonda dya kiki twabhingi kwaximana.

16. Kyebhi okukumbidila oitendelesu itusanga mudivulu dya Kolose 3:23, 24, kutukwatekesa kusuluka ni kusanguka?

¹⁶ Twandasuluka ni kusanguluka se tudilembalala kwila, ikalakalu yoso itubhanga phala Jihova. Twatokala kulembalala we kwila mwene wamukwendesa okilunga kye. (Tanga Kolose 3:23, 24.) Sobha Dividi watuxila phangu yambote kyoso kyasangela kitadi phala kutunga otembulu. Mwene wambe: “Mukonda eme-eme nanyi, omundu wami we ananyi, ni tukale ni kutena kwa kukubhana ni vondadi oima yadifu kiki? Mukonda oima yoso i tunda kokwe, etu we twaibhana bhu lukwaku lwe.” (1 Mal. 29:14) Kyoso kitusangela kitadi, kifwa twamubhana kwa Jihova oima yatubhana kya mwene. Maji ne kiki, Jihova usanguluka kyavulu kyoso kitungastala okithangana kyetu, nguzu ni kitadi kyetu phala kukwatekesa mukikalakalu kye.—2 Kol. 9:7.

17. Mukonda dyahi kikubhingi kuluwala se umona kwila kwabhingi kulungulula oixinganeku yé?

¹⁷ Phala kusuluka kwendela munjila yofele yambata kumwenyu, etwenyoso twabhingi kukayela ophangu ya Jezú. (1 Phe. 2:21) Se umona kwila kwabhingi kulungulula oukexilu we wakuxinganeka, kana kuluwala. Okwijiya kwila eye wabhingi kulungulula oixinganeku yé, kilondekesa kwila eye wamesana kukayela oitendelesu ya Jihova. Kana kudijimba kwila, Jihova wejiya kwila etu twakwa ituxi. Mukiki mwene kakingila kwila tukayela ophangu ya Jezú ni kuyuka kwoso.

18. ihi itwabhingi okubhanga phala kusuluka kwendela munjila yamwenyu?

¹⁸ Kuma etwenyoso twalungila omesu metu kuhándya, twala polondo phala kulungulula oixinganeku yetu, oukexilu wetu ni ibhangelu yetu. (Jisa. 4:25; Luka 9:62) Se tukala tu athu alenduka, twanda ‘kolokota mu kusanguluka, ni kulungulula o ixinganeku yetu.’ (2 Kol. 13:11) Se tubhanga kiki “o Nzambi ya henda ni paze wanda kala ni [etu].” Mwene wandatukwatekesa kusanguluka kindala, ni kutubhana mwenyu wakaleleka kumundu waubhe.