1. Kyebhi avulu mudyetu kyene musota kubhanga dingi musidivisu ya Jihova?

 ETU twala ni ikalakalu yavulu phala kubhanga kate kibhixila o dizubhilu dya mundu yú. (Mat. 24:14; Luka 10:2; 1 Phe. 5:2) Etwenyoso twamesena kubhanga yoso musidivisu ya Jihova. Avulu amusanzumuna o ukunji wâ. Sayi ya amesena kusidivila kala aboki athembu yoso. Amukwa amesena kusidivila ku Betele mba kukwatekesa mukutunga o Ididi ya Ubhezelu. Jiphange javulu jamala ala ni jimbambe jakukalakala kala akwatekexi atufunga mba tufunga. (1 Tim. 3:1, 8) Jihova usanguluka kyavulu kyoso kyamona kwila, o mundu wê wala polondo phala kubhanga dingi musidivisu yê!—Jisá. 110:3; Iza. 6:8.

2. Kyebhi kitudivwa se kitwamutena kukumbidila o jimbambe jetu musidivisu ya Jihova?

² Maji avulu mudyetu tuluwala mukonda twalembwa kukumbidila o jimbambe jitwaxindi musidivisu ya Jihova mukubhita mivu yavulu. Mba tuluwala mukonda dya kitala mba ima ibhita kumwenyu itufidisa kukumbidila o jimbambe jetu, mukonda sayi maujitu katutokala dingi. (Jisa. 13:12) Kiki kyene kyabhi ni phange Melisa. * Mwene wamesenene kyavulu kusidivila ku Betele mba kubhanga o Xikola ya Akunji a Utuminu, maji mwene wambe: “O kitala kyami kikingehela dingi. Kindala o maujitu yá nzoji kya ngó. Sayi ithangana ngiluwala.”

3. Sayi yá abhingi kubhanga ihi phala kutambula maujitu musidivisu ya Jihova?

³ Maji sayi minzangala ala ni sawidi maji abhingi hanji kukula mu nzumbi ni kulondekesa o idifwa itena kwa abhangesa kutambula maujitu musidivisu ya Jihova. Mukifika ene atena kukala jinjimu, asola ni lusololwoso, ala polondo phala kubhanga o  kikalakalu. Maji ene abhingi kulondekesa dingi mwanyu, kubhanga kyambote o kikalakalu kyawu ni kuxila dingi akwa. Se ubhanga nguzu phala kulondekesa o idifwa iwabhindamena, o jiphange atena kukubhana ujitu kyoso ki uya ni kukingila. Tala o phangu ya phange Phetele. Kyoso mwene kya kexile ni 20 amivu, mwene waluwalele kyavulu mukonda kamusolele phala kukala mukwatekexi watufunga. Mwene wambe: “Eme ngadivwile kwila sayi kima kyayibha kingabhangele.” Maji phange Phetele kabhwila kana. Mwene wabhange yoso yatenene mukilunga ni mukikalakalu kya kuboka. Lelu ubhanga mbandu mu Kibuka kya Filiyale.

4. Ihi itwandadilonga mumilongi yiyi?

⁴ O kwila eye waluwala mukonda ki wakumbidila hanji mbambe iwaxindi? Se kyene samba kwa Jihova, mutangele kyebhi ki wamudivwa. (Jisá. 37:5-7) Kumbandu yengi, bhinga kujiphange ala ni uhete na kukwatekese kubhanga dingi musidivisu ya Nzambi. Mukusuluka, bhanga yoso phala kukumbidila o jindunge jandakubhana. Se kyene ki ubhanga, wandatena kutambula ujitu mba kukumbidila o jimbambe jé. Maji kala phange Melisa, twamutumbula kudimatekenu, nange kindala eye ki utena dingi kubhanga iwamesenene kubhanga musidivisu ya Jihova. Abha se kyene? Kyebhi ki utena kusanguluka jinga? Phala kutambwijila o ibhwidisu yiyi o milongi yiyi yandazwela, (1) kwebhi ku utena kusanga o kusanguluka, (2) kyebhi ki utena kubandekesa o kusanguluka kwé, ni (3) jimbambe jebhi ji utena kusola jandabandekesa o kusanguluka kwé.

5. Phala kusanguluka kwebhi ku utena kulungila o mesu mé? (Ndongixi 6:9)

⁵ Ndongixi 6:9, ilombolola se kwebhi kututena kusanga o kusanguluka. (Tanga.) O muthu u sanguluka ‘ni ima itala o mesu’ kifwa mwene usanguluka ni yala nayu mukithangana kyenyokyo. Maji o muthu usuluka mukukingila o kima katena kukalanakyu mwene nuka wandasanguluka. Mu kikiphe disá dyebhi ditutena kudilonga? Phala kusanga o kusanguluka, twabhingi kulungila o mesu metu mu ima itwala nayu, o ima itwejiya kwila tutena ku ibhanga.

6. Kifika kyahi kitwandamona kindala ni ihi itutena kudilonga mu kifika kiki?

⁶ O kwila utena kusanguluka ni ima iwala nayu kyá? Athu avulu abanza kwila kitutena, mukonda etu twawabhela kudilonga ima ya ubhe. Maji mukidi eye utena kusanguluka, ni ima iwala nayu kindala. Kyebhi kitutena kubhanga kiki? Phala kwijiya se ihi itutena kubhanga, tala o kifika kya jitalendu kyate Jezú, kitusanga mudivulu dya Matesu 25:14-30. Twandadikwatenena mu ima itena kutulonga o kifika kiki ni kyebhi kitutena kubandekesa o kusanguluka ni mabesá utwala nawu.

7. Mu izwelu yofele jimbulula o kifika kya Jezú kya jitalendu.

⁷ Mu kifika kya Jezú, sayi diyala weji bhanga njila. Ande dyakutunda wexana o jiselevende jê yu wa abhana o jitalendu phala kubhanga wenji. * Mwene waxinganeka o mauhete ala nawu muthu ni muthu. Selevende imoxi wamubhana talendu jitanu, yakayadi jiyadi, o yakatatu imoxi. O jiselevende jiyadi ja dyanga akalakala ni nguzu yoso, ya abandekesa o kitadi kya patala yâ. Maji o selevende ya katatu kabhange kima ni kitadi kyamubhana, mwene waluwalesa o patala yê.

8. Ihi yejitena kusangulukisa o selevende ya dyanga mu kifika?

 ⁸ O selevende ya dyanga wadivu kwila ujitu mukumona kuma, o patala yê wamubhana jitalendu jitanu. Kiki kyexile kitadi kyavulu! Mukumubhana o kitadi kiki o patala yê walondekesa kwila wamudyelele kyavulu! Maji ihi twamba yalungu ni selevende ya kayadi? Mwene wejitena kuluwala mukonda katambula jitalendu javulu kala o selevende ya dyanga. Maji ihi yabhange mwene?

9. Jezú kazwela ihi yalungu ni selevende ya kayadi? (Matesu 25:22, 23)

⁹ Tanga Matesu 25:22, 23. Jezú, kambe kwila o selevende ya kayadi waluwalele mukonda dya kutambula ngó jitalendu jiyadi. Jezú kalondekesa we kwila o selevende wadikalanganza mba wajini mukwamba: ‘Mukonda dyahi o patala yami wangitolesa ? Eme ngene we mukalakala kyavulu. Se o patala yami kaxinganeka kwila eme ngimukalakadi wambote, o kitadi ngandakikandela bhoxi ni ngikalakale phala o mbote yami.’

10. Ihi yabhange o selevende ya kayadi ni jitalendu jê?

¹⁰ Kala o selevende ya dyanga, o selevende ya kayadi watendela kwila o kikalakalu kyamubhana o patala yê kikyakutonoka kana. Mukyenyiki mwene wakalakala ni nguzu yoso phala kusangulukisa o patala yê. Mukyenyiki kujitalendu jiyadi wambandekesaku dingi talendu jiyadi. Kyenyiki o patala wamubhana o futu yatokala mukikalakalu kyabhange, o patala wasangulukile ni mwene yu wamubhana dingi ikalakalu yamukwa!

11. Kyebhi kitutena kubandekesa o kusanguluka kwetu?

¹¹ Kyene kimoxi we, tutena kusanguluka dingi kyoso kitubhanga yoso itutena mukikalakalu  kyatubhana. Eye watokala “u jijila” mukubhanga o kikalakalu kya kuboka ni kukalakala ni kilunga. (Ika. 18:5; Jihe. 10:24, 25) Mukuya muyônge dipelepalale kyambote phala kubhana itambwijilu iswinisa ni kukumbidila o jimbandu ji utambula. Bhana valolo mujimbandu ji utambula mukyônge kyakaxi kasemana. Se a kubhana kikalakalu mukilunga, sota kubhixila mu ola yatokala, londekesa kwila eye umuthu wakukudyelela. Kana kubanza kwila o kikalakalu kyakubhana kyamuzanga ngó o kithangana kyé. Sota kubandekesa o mauhete mé mukikalakalu kiwatambula. (Jisa. 22:29) Kyoso ki ubhanga nguzu mu kikalakalu kyé kwa Jihova, o kusanguluka kwé kwandadibandekesa, o ukamba wé ni mwene wandadibandekesa we. (Gal. 6:4) Mukiki, eye kiwandaluwala kyoso akwenu kyandatambula o ujitu uwamesenene.—Loma 12:15; Nga. 5:26.

12. Ihi yakwatekesa phange Melisa ni phange Phetele kusanguluka dingi?

¹² Wamulembalala Melisa, twamutumbula mukaxi ka kayadi wamesenene kusidivila ku Betele mba kubhanga o Xikola ya Akunji a Utuminu? Sumbala mwene katenene kubhanga o ima yamesenene, mwene wambe: “Ngasoto kudikwatenene dingi mukikalakalu kyami kya muboki wathembu yoso ni kubandekesa dingi o mauhete mami akuboka. O kiki kyangisangulukisa kyavulu.” Kyebhi Phetele kyadibhana ni kuluwala kyoso kyakambele kumusola kala mukwatekexi watufunga? Mwene wambe: “Eme ngadikwatenene mumaujitu ungexile nawu—o kuboka ni kubhana itambwijilu iswinisa muyônge. Ngasoneka we petisá phala kukalakala ku Betele, mukubhita muvu angixana.”

13. Ihi yandabhita se udikwatenena mukikalakalu ki wala nakyu kindala? (Ndongixi 2:24)

¹³ O kwila se udikwatenena mukikalakalu ki wala nakyu kindala wandatambula ikalakalu yavulu kuhádya? Kiki kitena kubhita kala kyalondekesa o musoso wa Phetele. Maji se kibhita kala kyabhiti ni Melisa? Eye utena kubandekesa o kusanguluka kwé mukudikwatenena muyoso iwamubhanga kindala phala Jihova. (Tanga Ndongixi 2:24.) Kupholo, eye wandasanguluka kyavulu mukwijiya kwila o nguzu iwabhange yasangulukisa Patala yé, Jezú Kidistu.

14. Mu ithangana yoso ihi itwatokala kulembalala, kyoso kituxinganeka o jimbambe jetu musidivisu ya Jihova?

¹⁴ Se kindala twamubhanga kyá yoso itutena musidivisu ya Jihova, o kwila kiki kilombolola kwila kitutokala kusuluka ni kubhanga dingi? Kana ki kyene! Tutena kusola jimbambe jitukwatekesa kubandekesa o uhete wakuboka ni kulonga ni kukwatekesa o jiphange jetu. Tutena kukumbidila o jimbambe jiji se tudikwatenena mukukwatekesa akwetu muveji dya kudikwatenena kokwetu.—Jisa. 11:2; Ika. 20:35.

15. Jimbambe jebhi jitena kukwatekesa kubandekesa o kisangusangu kyé?

¹⁵ Jimbambe jebhi ji utena kusola? Bhinga kwa Jihova phala kukukwatekesa kwijiya se jimbambe jebhi ji utena kukumbidila. (Jisa. 16:3; Tiya. 1:5) O kwila utena kusuwa o jimbambe  jotumbule mukaxi ka dyanga mumilongi yiyi—kala o kukala muboki wa ithangana ni ithangana, muboki wathembu yoso, kusidivila ku Betele, mba kukwatekesa kutunga o Ididi ya Ubhezelu? Mba utena kudilonga dimi dyengi phala kusanzumuna o jimbu yambote mba kubokela mu mbambe muzwela dimi dya kwa jixi jengi? Eye utena kudilonga dingi yalungu ni jimbambe jiji mukutanga o kibatulu 10 kyadivulu Organizados para Fazer a  Vontade de Jeová ni kuzwela ni tufunga twakilunga kyé. * Kyoso ki ubhanga yoso i utena, akwenu andatena kumona kwila eye wamukula mu nzumbi; o kisangusangu kyé kyandadibandekesa dingi.

16. Ihi itutena kubhanga se sayi jimbambe kitutena kujikumbidila kindala?

¹⁶ Maji ihi i utena kubhanga se sayi jimbambe jitwatumbula mumilongi yiyi eye kutena kujikumbidila? O ndunge bhabha o kutala jimbambe jengi ji utena kukumbidila. Tala o jindunge jakayela.

17. Kala kilondekesa 1 Timote 4:13, 15, kyebhi o kukalakala ni jiphange kutena kukukwatekesa kukala mulongexi wambote?

¹⁷ Tanga 1 Timote 4:13, 15. Se eye uphange yadiyala akubatizala kyá, utena kubhanga yoso phala kubandekesa o uhete wê wakubhanga madiskulusu ni kulonga. Mukonda dyahi? Mukonda se u “suwa” o mbambe yakutanga kyambote, kubhanga madiskulusu ni kulonga, wandakwatekesa yó akwivwa. Sota kukala ni mbambe yakukumbidila o milongi yoso yakadivulu Ta O Muxima Wé Mu kutanga ni Kulonga. Dilonge o milongi imoxi, imoxi, fikisa o jindunge jiwadilongo kubhata, kumbidilaju kyoso ki uya ni kubhanga o madiskulusu. Bhinga kumukwatekexi wa kayadi mba tufunga twengi, “a kalakala mu kuboka o Njimbu Yambote ni kulonga.” * (1 Tim. 5:17) Kana kukumbidila ngó o ima iwadilongo, maji sota kukwatekesa we o jingivwidi jé ni kukolesa o kixikanu kyâ ni kwakwatekesa kukumbidila o ima yamudilonga.  Mukubhanga kiki eye wandabandekesa o kusanguluka kwé ni kwa akwenu.

18. Ihi itena kutukwatekesa kukumbidila o jimbambe jetu mu ukunji?

¹⁸ Etunyoso twala ni kikalakalu kyakulonga ni kubhanga maxibulu. (Mat. 28:19, 20; Loma. 10:14) Kyebhi ki utena kubandekesa o uhete wé mukikalakalu kiki kyakatunda? Suwa jimbambe jiwamesena kudilonga ni kukumbidila mukadivulu Mu Kulonga. Eye utena kwijiya dingi jindunge jakuboka mu Ukexilu wa Ukidistá ni Ukunji Wetu—Milongi Phala o Yônge ni mu jividyu phala kubhana umbangi jalondekesa muyônge yakaxi kasemana. Sota kwijiya jindunge javulu jandakukwatekesa kubhanga kyambote o kikilakalu kyakuboka. Kyoso ki ukayela o jindunge jiji eye wandakituka umuboki wambote, o kiki kyandabandekesa o kusanguluka kwé.—2 Tim. 4:5.

19. Kyebhi ki utena kukala ni idifwa yambote yandakukwatekesa kukala u Kidistá wakulu mu nzumbi?

¹⁹ Kana kujimba o jimbambe jabeta kota jandakukwatekesa kukala ni idifwa ya wabhela Nzambi. (Nga. 5:22, 23; Kol. 3:12; 2 Phe. 1:5-8) Ihi yandakukwatekesa kukumbidila o jimbambe jé? Xinganeka kwila eye wamesena kukolesa o kixikanu kyé. Phala kubhanga kiki, eye utena kutanga mumadivulu metu milongi ibhana jindunge phala kukolesa o kixikanu kyé. Eye utena kukatula mbote mukutala o milongi ya JW Broadcasting^® izwela misoso ya jiphange abhana phangu yambote yakixikanu mukudibhana ni maka avulu. Mukusuluka tala o maukexilu akixikanu kyâ, u utena kukayela kumwenyu wé.

20. Ihi itwatokala kubhanga phala kubandekesa o kusanguluka kwetu ni kusosolola o kuluwala?

²⁰ Sé phata tutena kubhanga dingi musidivisu ya Jihova o itwamubhanga lelu ndenge. Kumundu wobhe twandatena kubhanga yoso itwandala musidivisu ya Nzambi. Kate kibhixila o kizuwa kiki, se tubhanga yoso itutena kindala, twandabandekesa o kusanguluka kwetu, twandasosolola o kuluwala kwetu. O kima kyabeta kota o kubhana kinjingu ni kuximana Jihova, o ‘Nzambi wa sanguluka.’ (1 Tim. 1:11) Mukikiphe, tusotyenu kusanguluka ni maujitu utwala nawu!