1-2. Ihi itwandilonga mumilongi yiyi?

KYEBHI ki udivwa se wamukingila kutambula kima kiwabhindamena maji kikibhixila mukithangana kiwaxindi? O kwila weji luwala? Nange wejidivwa kala kizwela o divulu dya Jisabhu 13:12: “Kudyelela kwa kokoloka, ku sukisa o muxima.” Maji kyebhi kiweji divwa se akutangela kwila sayi kima kyabhangesa kulaleka o kima kiwexile mukingila kubhixila mukithangana kyatokala? Nange eye mukwivwa o njimbu yiyi weji kingila ni mwanyu woso.

² Mumilongi yiyi twandamona jivelusu javulu ja Bibidya jandatena kutukwatekesa kukala ni mwanyu ni kusuluka ni ‘ukexilu wa kukinga.’ (Mik. 7:7) Mukusuluka twandamona maukexilu ayadi andatukwatekesa kukala ni mwanyu kyoso kituya ni kukingila kwa Jihova. Mukusukaku, twandamona o mabesá amubhaka Jihova phala yó ala polondo mukumukingila.

3. O divulu dya Jisabhu 13:11 ditulonga ihi?

³ O divulu dya Jisabhu 13:11, ditulonga se mukonda dyahi twatokala kukala ni mwanyu. Dyene dyamba: “Umvwama utunda mu kubhongolola ngoho kyosokyoso, ki unange kubhita; wosophe ututumba ni kwongeka kamwanukamwanu, sôwa yê iya ni kudibandekesa.” O velusu yiyi itulonga ihi? Itulonga kwila o mukwa unjimu ubhanga o ima ni mwanyu woso.

4. O itendelesu itusanga mudivulu dya Jisabhu 4:18 itulonga ihi?

⁴ Jisabhu 4:18 ditutangela kwila “o njila ya athu a yuka-phe i di bhanga mukwa ni mukengeji wa kimene, uya ni ku di bandekeza mu kuzela katé kuma ki ku zubha o kúkya.” O izwelu  yiyi itulonga kwila Jihova ukwatekesa o mundu wê kutendela o vondadi yê, kamwanyu, kamwanyu. O velusu yiyi itukwatekesa kutendela kyebhi o Kidistá kyalungulula o ima kumwenyu ni kyebhi kyakolesa o ukamba wê ni Jihova. Kubhinga kithangana kyasoko phala muthu kukala ni ukamba wambote ni Jihova. Se tudilonga o Bibidya ni mwanyu woso ni kukumbidila o itendelesu itutambula mu kilunga kya Jihova, twandaya ni kukula kate kitukala ni idifwa ya Kidistu. Twandabhandekesa o kwijiya kwetu kwalungu ni Nzambi. Tala o kifika kyate Jezú kilondekesa o kidi kiki.

5. Kifika kyahi kyate Jezú kyalungu ni kukula kamwanyukamwanyu?

⁵ Jezú wate kifika kijimbulula kyebhi o njimbu ya Utuminu ituboka yedi kala o mbutu itukuna anga iya ni kukula kamwanyu kamwanyu kumuxina wa yó wazolo o mbote. Mwene wambe: “O mbutu-phe kyoso ki i sabhuka, ki i ku la, mwéne [o mukuni] ka k’ijiya. O mavu a di imina ene, ku dyanga o kixina, kwiza o disa, hé ku kayela o jimbundu jadisanza ku disa.” (Mál. 4:27, 28) Ihi ilombolola o izwelu yiyi ya Jezú? Mwene wexile mujimbulula kwila kala kikula o muxi bhofelebhofele kyene kimoxi kyoso muthu kyaxikina o njimbu, uya ni kukula munzumbi bhofelebhofele. Mukifika, kyoso o maxibulu metu kyamateka kubhanga ukamba ni Jihova, etu tumona ima yavulu yalungulula kumyenyu yâ. (Efe. 4:22-24) Maji twatokala kulembalala kuma Jihova mwene ukudisa o mbutu yiyi.—1 Kol. 3:7.

6-7. Ihi itutena kudilonga ni ukexilu wa Jihova wabhange o ixi?

⁶ Mu ima yabhange, Jihova wayibhange ni mwanyu mukubhita o ithangana yabhindamene phala kuzubha o ikalakalu yê. Mwene wabhange kiki phala kuximanesa o dijina dyê ni kubheka mbote kwa akwa. Mukifika, xinganeka ngó kyebhi Jihova kya pelepalala o ixi ni mwanyu woso phala o athu kutungamu.

⁷ Mu kujimbulula kyoso Jihova kyabhange o ixi, o Bibidya izwela yalungu ni kuta o “izongelu yê,” kuxikika o “ixikamenu yê,” ni kuxikika o “ditadi dya thungi.” (Jobe 38:5, 6)  Mwene wakatula mwene kithangana phala kutonginina o ikalakalu yê. (Dim. 1:10, 12) Xinganeka kyebhi kyadivu o jianju kyoso kyamono o ima ya ubhe yabhange Jihova? Ene asangulukile kyavulu! Mukonda dya kiki “akala mu tana.” (Jobe 38:7) Ihi itwadilongo? Twadilongo kwila kwa bhingile mazunda ni mazunda amivu phala Jihova kubhanga o ixi, o jithethembwa, o ima yoso yenda bhoxi, bhulu ni mu kalunga. Kyoso Jihova kyakatula o kithangana phala kutonginina o ibhangelu yê ni mwanyu woso, mwene wambe: “Ya wabha mwene kyavulu.”—Dim. 1:31.

8. Ihi itwandazwela kindala?

⁸ Kala kitwamono mu ifika kudima, etu tutena kusanga itendelesu yavulu mu Mak’â Nzambi itulonga kwila etu twabhingi kukala ni mwanyu. Kindala twandamona we maukexilu ayadi utwatokala kukala polondo mukukingila Jihova.

9. Ukexilu webhi umoxi utwabhingi kukingila kwa Jihova?

⁹ Etu twabhingi kukingila o kitambwijilu kya misambu yetu. Kyoso kitusamba phala kukolokota mu ibhidi mba phala kutolola o jihanji jetu, tutena kumateka kudivwa kwila o itambwijila ya misambu yetu yamulaleka. Mukonda dyahi Jihova katambwijila o misambu yetu mu ukexilu umoxi?

10. Mukonda dyahi twatokala kukala ni mwanyu kate Jihova kyatambwijila o misambu yetu?

¹⁰ Jihova wivwa o misambu yetu ni mwanyu woso. (Jisá. 65:2) O misambu itubhanga ni muxima woso ilondekesa kwila twala ni kixikanu kwa mwene. (Jihe. 11:6) Kyoso kitusamba kwa Jihova mukumubhinga kikwatekesu phala kumusangulukisa, mwene umesena kumona o nguzu itubhanga phala kubhanga ovondadi yê. (1 Nzw. 3:22) Kyenyiki kyoso kitubhinga phala Jihova kutukwatekesa kutolola kima mba kweha kima kyamu ibhila, etu twabhingi kukala ni mwanyu ni kubhanga yoso itutena phala kulungulula ima kumwenyu wetu. Jezú wambe kwila sayi misambu yetu itena kulaleka phala ku itambwijila. Mwene wambe: “Bhinga, nda a ku bhane; sota, nda u sange; phupha, nda a ku jikwile. Mbata woso u bhinga, a mu bhana; woso u sota, u sanga; o woso u phupha, a mu jikwila.” (Mat. 7:7, 8) Kyoso kitukayela o itendelesu ni ‘kukolokota mu kusamba,’ tutena kudyelela ni kidi kyoso kwila o Tata yetu ya dyulu wandakwivwa ni kutambwijla o misambu yetu.—Kol. 4:2.

11. Kyebhi o mukanda ku akwa Jihebelewu 4:16 utukwatekesa kyoso itambwijilu ya misambu yetu ila kala yamulaleka?

¹¹ Sumbala o misambu yetu ila kala yamulaleka, maji Jihova wakanena kutambwijila o misambu yetu “mu kumbi dya kubhondalala mba mukithangana kyatokala.” (Tanga Jihebelewu 4:16.) Kyenyiki kitwatokala kutatela Jihova se mwene katambwijila o misambu yetu kala kitwaxinganekene. Mukifika, avulu enemusamba kya mumivu yavulu phala kumona o Utuminu wa Nzambi kubwika o mundu yú wayibha. Kate mwene Jezú wambe kwila twatokala kusamba phala o Utuminu wize kyá. (Mat. 6:10) Maji kyeji kala wowa wadikota se o muthu wehela o kixikanu kyê kuzoza mukonda Jihova kabheka luwa o dizubhilu dya mundu yú mukithangana kyexile mukingila o athu! (Haba. 2:3; Mat. 24:44) Twandalondekesa unjimu se tusuluka ni kukingila kwa Jihova ni kusamba ni kixikanu kya kwila mwene wandatutambwijila. O dizubhilu dya mundu yú dyandakwiza mukithangana kyatokala, mukonda Jihova wasolo kyá o ‘kizuwa ni kithangana.’ Kiki kyandakala kizuwa kyabetakota phala etwenyoso.—Mat. 24:36; 2 Phe. 3:15.

12. Kithangana kyebhi kitena kutubhonza dingi kukala ni mwanyu?

 ¹² Nange kubhinga mwanyu ni kukolokota kyoso kyatutalatala se kuyuka. Muveji javulu athu kumundu atutalatala se kuyuka mukonda dya kukamba kudifwa, kala o kikonda kyetu, o mwiji wetu, ijila ni kididi bhwa tuvwalela. Akamukwa hanji a atalatala kyayibha mukonda dya kukala inema mba kukala ni masambisambi. Avulu amukilunga kya Jihova, ene mwa atalatala kyayibha mukonda dya kuxikina mu Bibidya. Kyoso kyatutalatala kyayibha twatokala kulembalala o ima yazwela Jezú. Mwene wambe: “Wosophe u kolokota katé bhu dizubhilu, mwène wà bhuluka.” (Mat. 24:13) Maji ihi iwatokala kubhanga se utandanganya mukonda dya kima kyakubhange phange mukilunga? Se o tufunga atangela kyá, o kwila wandakwehela o maka enya bhumaku mâ ni kukingila ni mwanyu woso kwila ene andabatula o maka mu ukexilu wa Jihova? Ihi yatokala kubhanga o tufunga kyoso o muthu kyata o kituxi kyadikota?

13. Jihova wamesena kwila o tufunga abhanga ihi kyoso o muthu kyata o kituxi kyadikota?

¹³ Kyoso o tufunga kyeza mukwijiya kwila sayi muthu wate kituxi kyadikota ene asamba, abhinga kwa Jihova phala kwa bhana ‘o unjimu u tunda bhulu’ kyenyiki ene atena kutendela o maka mu ukexilu wa Jihova. (Tiya. 3:17) O mbambe ya tufunga o kukwatekesa ni ku “bheka dingi mu njila mukwa ituxi wa jimbidile,” se kibhana. (Tiya. 5:19, 20) Ene amesena kubhanga yoso phala kulanga o kilunga ni kukolokotesa yó a aluwalesa. (2 Kol. 1:3, 4) Kyoso o tufunga kyamubatula maka alungu ni muthu wate kituxi kyadikota, kya dyanga ene asota kutendela yoso yabhiti, o mukubhanga kiki kubhinga kithangana. Mukusuluka ene asamba, ni uhete woso abhana itendelesu bhukaxi ka Bibidya, abazela o muthu wate o kituxi “mu kizongelu kya fwama.” (Jel. 30:11) Sumbala ene kalaleka thembu yavulu mukubatula o maka enya, maji ka abatula we ni lusolo. Kyoso o tufunga kya kayela o itendelesu ya Jihova, o kilunga kyoso kyandakala kyambote. Maji némwene kyoso o tufunga kyabatula o maka mu ukexilu watokala o muthu amuluwalesa kwa yó wate o kituxi utena hanji kudivwa kyayibha. Se kiki kyamubhita neye ihi i utena kubhanga phala kudibhana ni ndolo yiyi?

14. Phangu yebhi ya Bibidya itena kukukwatekesa se sayi phange mu kilunga wakuluwalesa kyavulu?

 ¹⁴ O kwila sayi kya phange mba muthu wakuluwalesa kyavulu? Eye utena kusanga phangu jambote mu Mak’â Nzambi andakulonga kukingila kwa Jihova mu kubatula o maka mu ukexilu watokala. Mukifika, sumbala Zuze watale hadi bhumaku a jiphange jê, maji mwene kehela kwila o ituxi yâ imulwalesa o muxima mba kukala muthu wayibha. Muveji dya kiki mwene wasuluka ni kubhanga yoso yatenene mu sidivisu ya Jihova, kyenyiki Jihova wamubesowala mukonda dya mwanyu ni kukolokota kwê. (Dim. 39:21) Mukusukaku, Zuze watenene kutolola o ndolo yamubhekele o jihange jê, Jihova wamubesowala. (Dim. 45:5) Kala Zuze, etu tuswina dingi kyoso kituzukama kwa Jihova ni kwehela o maka bhumaku mê.—Jisá. 7:17; 73:28.

15. Ihi yakwatekesa phange yamuhatu kujimba o maka kyoso kya mu talatala se kuyuka?

¹⁵ Mukidi kitwandadibhana ni ibhidi yasokela ni yadibhana nayu Zuze, maji tudivwa kyayibha kyoso athu kyatutalatala se henda. Kyoso kitukala ni maka ni muthu katé mwene yó ki phangyetu tutena kukatula mbote se tukumbidila o itendelesu ya Bibidya. (Fil. 2:3, 4) Tala o kifika kiki. Sayi phange yamuhatu waluwalele kyavulu mukonda dya koleka yê yasalu wexile mumwanga jimbwembwe jalungu ni mwene. Muveji dya kubatula ni lusolo o maka, o phange yetu wakatula kithangana phala kuxinganeka mu phangu ya Jezú. Kyoso Jezú kyamulokalele mwene kexile muvutula phonzo kwa akwa. (1 Phe. 2:21, 23) Ni phangu yiyi mukilunji mwene kabhange kima ni maka abhitile mukithangana kyenyókyo. Mukusuluka mwene watonginina kwila o koleka yê wexile mudibhana ni uhaxi wabhonzo wathandanganyele ni ima yavulu. Kyenyiki o phange yetu wabanze nange o koleka yami wexile mu zwele ngó se kuxinganeka. O phange yetu wasangulukile kyavulu mukwijiya kwila mwene wakolokotele ni mwanyu woso kyoso kyamutalatala kyayibha yu wasange o kutululuka.

16. Ihi itena kukukwatekesa kuswina se amukutalatala kyayibha? (1 Phetele 3:12)

¹⁶ Se eye wamutala hadi mukonda amukutalatala se kuyuka mba kima kyengi, lembalala kwila Jihova wazukama kwa yó “a toloka mixima.” (Jisá. 34:18) Lembalala kwila mwene  wakuzolo mukonda dya mwanyu wé ni kumutakula o kimbamba kyamukuxina. (Jisá. 55:22) Mwéne o Mufundixi wa ngongo yoso. Mwene umona o ima yoso ibhita. (Tanga 1 Phetele 3:12.) Kyenyikiphe se eye wamudibhana ni maka abhonzo ki utena kwabatula lembalala kwila kima kyambote kukingila kwa Jihova kate kyabatula o maka.

17. Ihi yatudyelesa Jihova kala kilondekesa Izaya 30:18?

¹⁷ Kwakambe ngó bhofele o Tata yetu ya dyulu wandatubesowala ni mabesá akatunda bhukaxi ka Utuminu. Izaya 30:18 yamba: “Kyenephe kwanda ku kingila Jihova ku mi kwatela henda; kyene kyanda ku mi zangumwina phala ku mi lendukila, mukonda Jihova wene Nzambi ya kutetuluka; azediwa oso a kinga kwa Mwene.” Oso amukolokota ni kukingila kwa Jihova atambula mabesá kindala ni kumundu wobhe.

18. Ima yebhi yambote itwamukingila kutambula?

¹⁸ Kyoso o mundu wa Nzambi kiwandabokona ku mundu wobhe ene nuka dingi andadibhana ni maka adibhanawu kyá m’ukulu. O kuditalatala kyayibha ni ndolo kyandakalaku dingi. (Dij. 21:4) Twandakala ni ima yoso itwabhindamena, kyenyiki kikwandabhinga dingi kuthandanganya. (Jisá. 72:16; Iza. 54:13) O mabesá oso yá andatusangulukisa kyavulu!

19. Kindala kiki Jihova wamupelepalala ihi ni mwanyu woso phala etu?

¹⁹ Kindala Jihova wamutupelepalala phala kutunga mu Utuminu wê ni kutukwatekesa kutolola o idifwa yayibha ni kukala ni idifwa yambote imusangulukisa. Kana kuzoza, kana kweha o sidivisu yê kwa Jihova. O mwenyu wabetakota wamukwiza kupholo! Kyoso kituya ni kukingila o kithangana kyakatunda, tusuluke mukukingila ni mwanyu woso kwa Jihova phala na kumbidila o ima yoso kala kyakanena mwene!