MBANDU YAKUDILONGA 15
MWIMBU 30 Kamba Dyami, Nzambi Yami, Tat’etu
“O Kuzukama Kwa Nzambi” Kima Kyambote Phala Etu!
“Eme-phe kya ngi wabhela o kuzukama kwa Nzambi.”—JISÁ. 73:28.
ITWANDADILONGA
Twanda mona se kyebhi ki tutena kukala ni ukamba wambote ni Jihova ni mukonda dyahi kima kyambote kukala ni ukamba wambote ni mwene.
1-2. (a) Phala kukala ni ukamba wambote ni muthu, ihi itwatokala kubhanga? (b) Ihi itwanda dilonga mu milongi yiyi?
EYE wala ni dikamba dya kazola? Kyebhi kyamateka o ukamba wenu? Nange eye wabhiti ithangana yavulu ni mwene ni kwila eye wejiya o ibhidi yoso yadibhana nayu ku mwenyu, wejiya we o ima yawabhela mwene ni ima yazembe, eye wamono kwila o Kamba dyé wala ni idifwa yambote anga eye wamesena kukayela o phangu yê. Mu kubhita kithangana eye wamateka kumuzola.
2 Phala kukala ni ukamba wambote ni muthu, kubhinga kithangana ni nguzu. Kyene we kimoxi ni ukamba wetu ni Jihova. Mu milongi yiyi twanda mona kyebhi kitutena kukala ni ukamba wambote ni Jihova ni mukonda dyahi kima Kkyambote phala etu kukala ni ukamba wambote ni mwene. Maji, kya dyanga tumone se mukonda dyahi kima kyambote kuzukama kwa Kamba dyetu dya kazola, Jihova.
3. Mukonda dyahi twabhingi kuxinganeka mu mbote ijila mu kuzukama kwa Jihova? Bhana kifika.
3 Se Phata eye uxikina kwila o kuzukama kwa Jihova kima kyambote. O kuxinganeka ku maka enya, kwanda kukwatekesa kuzukama dingi kwa mwene. (Jisá. 63:6-8) Mukifika phala kukala ni sawidi ya mbote, kubhinga kudyâ kwa wabha, kutungitisa o mukutu, kunwa menya avulu ni kuzeka ji ola jasoko. Maji athu avulu kala ni kifwa kiki yeji kwa akwatekesa kukala ni sawidi yambote. Mu kidi kyoso kituxinganeka mu mbote ijila mu kukala ni sawidi yambote, twanda mesena dingi kubhanga o ima yanda tukwatekesa kukala ni sawudi yambote. Kyene we kimoxi, etu twejiya kwila o kuzukama kwa Jihova kima kyambote phala etu. Maji o kuxinganeka mu mbote ijila mu kukala ni ukamba wambote ni mwene, kwanda tukwatekesa kuzukama dingi ku Kamba dyetu dya kazola Jihova.—Jisá. 119:27-30.
4. Ihi yazwela o mukwa Jisálamulu mu Jisálamu 73:28?
4 Tanga Jisálamu 73:28. O musoneki wa Jisálamu 73 wexile levita amusolo phala kukala ngimbidi mu tembulu ya Jihova. Nange mwene wexile kya musidivila Jihova ni ufiyele woso mu mivu yavulu, maji mwene wamono kwila wabhingile kudilembalala ni kulembalala akwa kwila kima kyambote “kuzukama kwa Nzambi.” Mbote yebhi itukatula mu kubhanga kiki?
“O KUZUKAMA KWA NZAMBI KUTUSANGULUKISA”
5. (a) Mukonda dyahi o kuzukama kwa Jihova kutusangulukisa? (b) Kyebhi o unjimu wa Jihova wa kukwatekesa ni kukulanga? (Jisabhu 2:6-16)
5 Kyoso kituya ni kuzukama kwa Nzambi, etu tusanguluka dingi. (Jisá. 65:4) Kwala ima yavulu itubhangesa kuzwela kiki. Mu kifika, kyoso ki tutanga o ima izwela Jihova mu Bibidya anga tu ikumbidila, o unjimu wetu idibandekesa. O ima itulonga Jihova mu Bibidya itulanga mu ima ya ibha, itulanga we phala kitute kituxi kya dikota. (Tanga Jisabhu 2:6-16.) Mukonda dya kiki o Bibidya yamba: “Wazediwa o muthu woso wa bongo o unjimu, ni muthu woso wa tambula o kwijiya.”—Jisa. 3:13.
6. Ihi yabhangesa o mukwa jisálamu kuluwala?
6 Kidi kwila kate mwene o makamba a Jihova ene muluyala. O musoneki wa Jisálamu kibatulu 73 mukonda dya kwehela o ixinganeku ya ibha ku muxima wê mwene waluwalele. Mwene wexile ni njinda ni lwimbi lwa athu ayibha, mukonda phala mwene o yo kazolo Nzambi ni itumu yê exile ni mwenyu wambote. O mukwa Jisalamu wexile ni kixinganeku kyayibha kya kwila o akwa usweya ni akwa ukumbu, abetele kota mu kukala ni umvwama, exile ni sawidi yambote ni kwila kexile mutala hadi yavulu. (Jisá. 73:3-7, 12) Mukonda dya kuluwala kwê wexile mu dibwidisa se o nguzu yexile mubhanga phala kusidivila Jihova yexile mwene ni valolo. Tutena kumona o kuluwala kwê kyoso mwene kyambe: “Kifwa-ze eme nga tale ngó hadi ya ku di zelesa o muxima ni kusukula o maku’ami n’a bhwe o maxaka.”—Jisá. 73:13.
7. Kyoso kituluwala, ihi itwatokala o kubhanga? (Tala we yakapa.)
7 Sumbala waluwalele kyavulu, o mukwa Jisálamu wabhange kima, walungulula o kibanzelu kyê. “Mwene wabokona mu tembulu ya Nzambi”. Bhenyobho Jihova walungulula o ibanzelu yê. (Jisá. 73:17-19) Lelu we Jihova kamba dyetu dya kazola. Mwene utumona kyoso kituluwala. Se tumubhinga o unjimu we ni kuxikina o kikwatekesu kya tubhana bhukaxi ka maka mê ni kilunga kyê, twanda kala ni nguzu phala kukolokota sumbala ni kuluwala kwetu. Se tutandanganya kyavulu, a nga tukamba kwijiya itwanda bhanga, Jihova wanda tuswinisa yu wanda tutululukisa —Jisá. 94:19. a
O Levita wasoneka o divulu dya Jisálamu 73, wemana ‘ku kalatodyu ka Nzambi’ (Tala okaxi 7)
“KUKALA TUMAKAMBA A NZAMBI” KUTUSANGULUKISA NI KWILA KUTUBHANA KIDYELELU
8. Mbote yebhi ijila mukukala tu makamba a Nzambi?
8 Sayi ima iyadi itubhangesa kukala tumakamba a Nzambi. O kyadyanga kitubhana kusanguluka kwa kidi. Kyakayadi, kitubhana kidyelelu kya kidi. (Jel. 29:11) Twanda zwela bhofele mu mbote ijila bhukaxi ka ima iyadi yiyi.
9. Mukonda dyahi kukala tumakamba a Jihova kutukwatekesa kubhana valolo ku mwenyu?
9 Athu avulu lelu amba kwila kikwene Nzambi. Mu kiki ene amona kwila o mwenyu kiwale ni valolo, mba ku hádya athu oso andafwa. Maji kukala tumakamba a Jihova kutubhangesa kubhana valolo ku mwenyu. O kudilonga o Bibidya kutuxikinisa kwila kwene Nzambi, ni kwila “Nzambi mukwa kubesowala oso amusota ni kidi kyoso.” (Jih. 11:6) Ku mbandu yengi Jihova watubhange ni kibhindamu kya kumusidivila, kyoso kitubhanga kiki tusanguluka dingi ku mwenyu wetu.—Mate. 10:12, 13.
10. Kala kizwela o divulu dya Jisálamu 37:29, ihi yakanena Jihova phala yo adyelela kwa mwene?
10 Lelu athu avulu kala ni kidyelelu kya kidi phala o hádya, ene abanza kwila o mwenyu walungu ngo ni kukalakala, kukazala, kukala ni twana ni kubhaka o kitadi phala kuhádya, kyoso kyanda kuka. Phala ene, kikwene Nzambi. Maji o jiselevende ja Jihova alunga o kidyelelu kya kwa mwene. (Jisá. 25:3-5; 1 Ti. 6:17) Etu twadyelela kwa Nzambi yetu ni Kamba dyetu, twadyelela we kwila mwene wanda kumbidila o ima yoso yakanena. Etu twamu kingila ima yavulu yambote ku hádya, bhenge-bhenge twanda tena kubheza Jihova kate kuhádya ni hádya mu Palayizu.—Tanga Jisálamu 37:29.
11. Mabesá ebhi dingi ejila mu kukala tumakamba a Jihova?
11 O kukala tumakamba a Nzambi kitubhekela mabesá engi. Mu kifika, kyoso kituta kituxi anga tudyela, Jihova ukanena kutuloloka. (Iza. 1:18) Kyenyiki tutena kukala ni kitongolwelu kya zele, kitwanda ditatela mukonda dya ima ya ibha itwabhange mu ukulu. (Jisá. 32:1-5) Ku mbandu yengi twala ni ujitu wa kusangulukisa Jihova. (Jisa. 23:15) Mu kidi eye utena kuxinganeka mu mabesá amukwa ejila mu kukala tu makamba a Nzambi. Maji kyebhi ki tutena kusuluka mu kuzukama kwa Jihova?
SULUKA “MU KUZUKAMA KWA NZAMBI”
12. Ihi iwabhange kya phala kukituka u dikamba dya Nzambi?
12 Se eye ukidistá akubatizala kyá, eye wabhange kyá ima yavulu phala kukituka u dikamba dya Nzambi. Eye wadilongo ima yavulu yalungu ni Jihova, ni Jezú, wadyela o ituxi yê, walondekesa o kixikanu kye kwa Nzambi eye wabhange nguzu phala kubhanga o vondadi ya Nzambi. Maji phala o ukamba wetu ni Nzambi ukole dingi, twatokala kusuluka mu kubhanga o ima yiyi.—Kol. 2:6.
13. Tumbula ima itatu itena kutukwateseka kuzukama dingi kwa Jihova?
13 Ihi yanda tukwatekesa kusuluka mu kuzukama kwa Jihova? (1) Twatokala kusuluka mu kutanga ni kudilonga o Bibidya. Ki twatokala kudilonga ngo o ima yabhebhuluka yalungu ni Nzambi, twatokala kusota kutendela kyebhi Nzambi kya banza, ihi yamesena mwene kwila tu ibhanga ni kukumbidila o ima yiyi kumwenyu wetu. (Efe. 5:15-17) (2) Twatokala kukolesa o kixikanu kyetu mu kuxinganeka mu maukexilu avulu wene mutulondekesa henda. (3) Twatokala kusuluka mukuzemba o ima yazembe Jihova ni kwila kitwatokala kubhanga ukamba ni athu abhanga o ima yiyi.—Jisá. 1:1; 101:3.
14. Ihi itwatokala kubhanga kizuwa ni kizuwa phala kusangulukisa Jihova? (1 Ko. 10:31) (Tala we o jifoto.)
14 Tanga 1 Kolindu 10:31. Twatokala kubhanga nguzu phala kubhanga o ima yawabhela Jihova. Kiki ki kyalungu ngo ni kuboka, ni kuya mu yonge, yalungu we ni ima itubhanga mu kizuwa ni kizuwa. Mukifika, kyoso kituzwela o kidi mu ima yoso anga tukala ni ukexilu wa kubhana, etu tusangulukisa Jihova. (2 Ko. 8:21; 9:7) Mwene we wamesena kwila tuxila o ujitu wa mwenyu. Etu tuzukama kwa yo watubhana o mwenyu, kyoso ki tudya ni kyoso kitunwa ni kilunji kyoso ni kulanga kyambote o sawidi yetu mu maukexilu amukwa. Kyoso ki tubhanga nguzu phala kusangulukisa Jihova ne mwene mu kubhanga o ima yofele, o henda yê kokwetu idibhandekesa dingi.—Luk. 16:10.
Yá maukexilu ututena kusangulukisa Jihova kwendesa kyambote o dikalu, kutungutisa o mukutu, kudya kudya kwambote ni kukala mukwa kubhana (Tala okaxi 14)
15. Kyebhi kitwatokala kutalatala akwetu?
15 Jihova ulondekesa henda ku athu ambote, ni ku athu ayibha. (Mat. 5:45) Mwene wamesena kwila etu we tubhanga kiki. Mu kifika, etu kitwene ‘mulokalala muthu, ki twa akwa jimvunda, tu athu alenduka, tulondekesa o kubatama ku athu oso.’ (Tit. 3:2) Ne mwene se muthu kale ni kixikanu kwa Jihova etu kitubanze kwila etu twabeta dingi kota o muthu yu ndenge. (2 Ti. 2:23-25) Kyoso kitulondekesa henda, anga tutalatala kyambote akwetu, tuzukama dingi kwa Nzambi yetu.
KOLESA O UKAMBA WE NI NZAMBI NE MWENE KYOSO KI UTONDALA
16. Kyebhi o musoneki wa Jisálamu kibatulu 73 wamateka kudivwa mukonda dya itondalu yê?
16 Sayi bhabha, mukonda dya itondalu yetu, etu tutena kumateka kubanza kwila Jihova ki Kamba dyetu dingi. O musoneki wa Jisálamu kibatulu 73 wamateka we kudivwa kiki. Ni kuluwala mwene wambe: “Makánda mami mandekele kyá kuxangumuka.” (Jisá. 73:2) Mwene wambe kwila o muxima wê “wamukatele” ni kwila “watobhele” kala “kyama”. (Jisá. 73:21, 22) Nange mwene wabanze kwila mukonda dya itondalu yê mwene kexile dingi ni valolo, ni kwila kikyamufwamene dingi kumu kwatela henda kwa Jihova.
17. (a) Mu kithangana kya bhonzo ku mwenyu wê, ihi yabhange o mukwa Jisálamu? (b) Ihi itulonga o phangu yê? (Tala we o jifoto.)
17 Se o mukwa Jisálamu wabanze kwila mwene kexile dingi dikamba dya Jihova, mukubhita tu ithangana mwene kexile dingi mudivwa kiki. Nange mukithanga kyê kyabhonzo, mwene wamono o valolo ya kuzukama kwa Nzambi mukonda dya kiki mwene wazwela kwa Jihova: “Suke kyene, hanji-phe izuwa yoso ngi kala jing’ami n’eye; mbata eye wa ngi kwata mu lukwaku lwa kadilu. Eye u ngi bhana kayula kyoso ki ngenda jinga kunu, hádya u ngi tambule mu kibúta kibenya ni fuma.” (Jisá. 73:23, 24) Kyoso kituzoza mba kyoso kituluwala, etu twatokala kusota o kikwatekesu kya Jihova, mwene o nguzu yetu itubhana o kutena. (Jisá. 73:26; 94:18) Ne mwene kyoso ki tudisondoloka kwa Jihova, etu tutena kuvutuka mu kukala makamba mê mukonda twejiya kwila mwene wala “polondo phala kuloloka”. (Jisá. 86:5) Twatokala kuzukama dingi kwa Nzambi yetu bhenge-bhenge mu ithangana yabonzo ku mwenyu wetu.—Jisá. 103:13, 14.
Kyoso kituzoza mu nzumbi, twatokala kuzukama dingi kwa Jihova mu kubhanga ikalakalu mu nzumbi (Tala okaxi 17)
“KOLESA O UKAMBA WE NI NZAMBI” KATE KUHÁDYA NI HÁDYA
18. Mukonda dyahi tutena kusuluka mukukolesa o ukamba wetu ni Jihova kate kuhádya ni hádya?
18 Etu tutena kusuluka mukukolesa o ukamba wetu ni Jihova kate kuhádya ni hádya. Twejiya o kidi kiki mukonda o Bibidya yamba kwila o jinjila, o unjimu ni kwijiya kwa Jihova kwazongo, kyenyiki twanda suluka mukudilonga yalungu ni Jihova.—Lom. 11:33.
19. Kidyelelu kyebhi kitusanga mu divulu dya Jisálamu 73?
19 O divulu dya Jisálamu 79:13 dyamba: “Phala etu, Ngana, tu [mundu wé], tu jimbudi jé ja kilunga, tu kale mu ku ku sakidila jinga, ni kutumbula o diximanu dyé ku miji yoso.” Kyoso ki uya ni kuzukama dingi kwa Nzambi, eye we utena kudyelela kwila Nzambi wanda kubesowala kate kuhádya ni hádya. Kala o mukwa Jisálamu, eye we wanda zwela: “Nzambi-phe mwene nguzu ya muxima wami, mwene undundu wami u nangenena.”—Jisá. 73:26.
MWIMBU 32 Tu Kale ku Mbandu ya Jihova!
a O yo atandanganya kyavulu mba aluwala mu ithangana yavulu, nange abingi kusota o kikwatekesu kya musaki. Phala kwijiya dingi yalungu ni maka enya, tanga o Mulangidi, No. 1 2023.
