1-2. Ihi yejibhangesa Máluku ni Timote kubanza kwila kafwamene kubhanga dingi mu sidivisu ya Jihova?

 MINZANGALA, o kwila enu mwamesena kubhanga dingi mu sidivisu ya Jihova ni kukwatekesa dingi o kilunga? Twadyelela kwila kyene mwene ki mwamesena. Tusanguluka kyavulu mu kumona jiphange javulu minzangala ala polondo phala kusidivila akwa! (Jisá. 110:3) Maji nange umona kwila kubhonza kyavulu kubhanga kiki. O kwila eye wala ni hele ya kumesena kubhanga dingi mu sidivisu ya Jihova, mukonda kwijiye se kyebhi kyanda kala o mwenyu wé se ubhanga kiki? Mba waditunine kya kikalakalu mukonda wamonene kwila kiweji tena ku kibhanga? Se kyene, k’eye ngo wene mudivwa kiki.

² Máluku ni Timote kyene we kyadivwile. Maji ene kehela o woma ni kukamba kwijiya o kima, kwa afidisa kubhanga dingi mu sidivisu ya Jihova. Nange Máluku watungile hanji ni many’â, ene exile ni mwenyu wambote, kyoso kyamwixana kwa poxolo Phawulu ni Balanabé phala kwenda o njila ya akunji a jixi jengi. (Ika. 12:​12, 13, 25) Máluku waxisa o mwiji wê phala kubhanga dingi mu sidivisu ya kuboka. Kyadyanga, mwene wayi ku Andiyokiya. Mu kusuluka wayi ni Phawulu ni Balanabé mu ididi ya mukwa. (Ika. 13:​1-5) Timote nange watungile we kumoxi ni jitata jê kyoso Phawulu kyamubhingile phala kumukwatekesa kuya mubhanga o kikalakalu kya kuboka. Mukonda dya kukala munzangala ni kwila kexile ni mauhete avulu, Timote weji banza kwila kafwamene kubhanga o kikalakalu  kiki. (Sokesa ni 1 Kolindu 16:​10, 11 ni 1 Timote 4:12.) Né kiki mwene waxikina o kixanu kya Phawulu, yu wasangulukile kyavulu ku mwenyu mu kusidivila Jihova.—Ika. 16:​3-5.

3. (a) Kyebhi kitwejiya kwila Phawulu wazolele kyavulu Máluku ni Timote? (2 Timote 4:​6, 9, 11) (Tala we o jifoto.) (b) Ibhwidisu yebhi i twanda tambwijila mu milongi yiyi?

³ Máluku ni Timote atambwile ikalakalu yavulu kyoso kyexile hanji minzangala. Phawulu wa azolele kyavulu. Tumona o kidi kiki, mukonda ande dya kufwa, Phawulu wabhingi phala ene kuya kumumona. (Tanga 2 Timote 4:​6, 9, 11.) Idifwa yebhi yamono Phawulu kwa Máluku ni Timote? Lelu, kyebhi o minzangala kyatena kukayela o phangu yâ? Kyebhi o itendelesu ya Phawulu itena kukwatekesa o minzangala, lelu?

MÁLUKU WEXILE POLONDO PHALA KUSIDIVILA AKWA

4-5. Kyebhi Máluku kyalondekesa kwila wexile polondo phala kukwatekesa akwa?

⁴ Sayi divulu dijimbulula kwila phala kusidivila akwetu twabhingi kuswina, kukolokota mu kwa akwatekesa né mwene mu ithangana yabhonzo. Máluku wexile phangu yambote mu maka enya. Nange mwene waluwalele kyavulu kyoso Phawulu kaxikinine kuya-nê kumoxi mu njila yê yakayadi. (Ika. 15:​37, 38) Maji kiki ki kyazozesa Máluku mu kukwatekesa o jiphange jê.

⁵ Máluku wayi musidivila mu kididi kyengi ni mon’a sekulu’ê, Balanabé. Mu kubhita 11 dya mivu, Phawulu wexile mu kaleya mu Loma, wabhindamene kikwatekesu. Máluku wexile-nê kumoxi phala kumuswinisa. (Filim. 23, 24) O kikwatekesu kiki kyaswinisa kyavulu Phawulu, mu kiki mwene wambe kwila Máluku wexile mu mu “konda o malamba.”—Kol. 4:​10, 11.

6. Mukonda dyahi Máluku wabhange kyambote mu kukala ni jiphange jengi ja fiyele? (Tala ku lwiji.)

⁶ Máluku wexile mu kala ni Jikidistá jengi ja fiyele, mukonda dya kiki wadilongo ima yavulu. Mu kifika kyoso kyaxisa Phawulu mu Loma, mwene wayi ku Babilonya phala kukalakala kumoxi ni poxolo Phetele. Ene exile ni ukamba wambote, katé mwene Phetele wexana Máluku kwila ‘monami’. (1 Ph. 5:13) Kyoso kyexile mu kalakala kumoxi, Phetele nange wajimbulula kwa Máluku ima yavulu yambote  yalungu ni mwenyu ni ukunji wa Jezú. Mukusuluka Máluku wasoneka o ima yiyi mu Bibidya, mu divulu dyambata o dijina dyê. a

7. Kyebhi manu Seung-Woo kyakayela o phangu ya Máluku? (Tala we ofoto.)

⁷ Máluku wakexile mudikwatenena mu sidivisu yê kwa Jihova, ni kukala ni jiphange akudile mu nzumbi. Kyebhi ki utena kukayela o phangu yê? Nange eye wamesena kubhanga dingi mu sidivisu ya Jihova, nange wamesena kukala u mukwatekexi wa tufunga mba kafunga, maji kwale luwa ni ujitu yu. Se kiki kyamubhita n’eye, kana kuzoza, kala ni mwanyu. Sota maukexilu a kusidivila dingi Jihova ni kukwatekesa o kilunga. Tala yabhiti ni manu Seung-Woo, kindala wamusidivila kala kafunga. Kyoso kyexile munzangala, wexile mudisokesa ni minzangala ni akwa. Avulu mudya atambwile maujitu ande dya mwene kwa atambula. Manu Seung-Woo waluwalele kyavulu mukonda wafikile kwila amujimbile. Ku disukilu mwene wajimbulula ku tufunga, kyebhi mwene kyexile mudivwa. Sayi kafunga wamubhana ndunge ya kukwatekesa dingi akwa, né mwene se kikweji kala muthu weji mona o ima yambote yexile mubhanga. Manu Seung-Woo wakayela o kitendelesu kyamubhanene, wamateka kukwatekesa o jiphange akukile kya, ni kwambata jiphange mu dikalu dyê phala kuya mu yonge. Mu kuxinganeka mu ima yabhiti mwene wambe: “Eme ngatendela kyambote se ihi ilombolola kusidivila akwetu. Ngamono we kwila kukwatekesa akwetu, kutusangulukisa kyavulu.”

TIMOTE WATANDANGANYELE NI AKWA

8. Mukonda dyahi Phawulu wasolo Timote phala kwenda-nê njila? (Filipe 2:​19-22)

⁸ Phawulu wabhindamene o kikwatekesu kya jiphange, phala kuvutuka mu jimbanza mwamuzukutisile kyavulu. Kyadyanga mwene wasolo phange amwixana Sila, wexile kya musidivila Jihova mu mivu yavulu. (Ika. 15:​22, 40) Mu kusuluka, mwene wexana we Timote phala kwenda-nê o njila yoyo. Maji mukonda dyahi mwene wexana Timote? Mukonda Timote wakexile ni wendelu wambote. (Ika. 16:​1, 2) Timote wexile we mutandanganya ni akwa.—Tanga Filipe 2:​19-22.

9. Ihi ilondekesa kwila Timote wexile musuwa o jiphange?

⁹ Kyoso kyamateka kwenda njila ni Phawulu, Timote walondekesa kwila kexile mudisuwa ngo mwene, maji wexile musuwa dingi akwa. Mukonda dya kiki kyoso Phawulu kyaxisa Timote ku Beleya, mwene wadyelele kwila Timote weji langa kyambote o maxibulu a ubhe. (Ika. 17:​13, 14) Sila waxala we ku Beleya.  Sé phata, Timote wadilongo ima yavulu ku phangu ya Sila. Ku pholo dya kwenda, Phawulu watumikisa Timote ku Tesalonika phala kuswinisa o jiphange mu mbanza yenyoyo. Maji mu veji yiyi, Timote wayi ubheka wê. (1 Te. 3:​2, nota) Mu 15 dya mivu ku pholo, Timote wadilongo kwivwa o ndolo yexile mukwivwa o jiphange ni ‘kudila kumoxi ni yó exile mudila.’ (Lom. 12:15; 2 Ti. 1:4) Kyebhi o minzangala lelu, kyatena kukayela o phangu ya Timote?

10. Ihi yabhangesa phange Woo Jae kusuwa dingi o jiphange?

¹⁰ Sayi phange amwixana Woo Jae wadilongo kusuwa dingi akwa. Kyoso kyexile munzangala, kyamubhonzele kyavulu kudizwelesa ni jiphange akukile kya. Mwene wexile mumenekena o jiphange mu yonge maji kexile mudizwelesa nawu kyavulu. Mu kusuluka, sayi kafunga wabhana ndunge kwa manu Woo Jae phala kuzwela ni jiphange ni kwa atangela o kima kyawabhela dingi kwa ene. Mu kubhanga kiki mwene weji tena kudizwelesa nawu. O kafunga wamutangela we phala kuxinganeka mu ima yawabhela akwa. Lelu o phange Woo Jae kafunga, mwene wakayela o ndunge yamubhana kafunga ni mukwa. O phange Woo Jae wambe: “Lelu ngitena kudizwelesa kyambote ni ana-ndenge, minzangala ni adyakime. Kima kyambote kwijiya o ibhidi yene mudibhana nayu o jiphange jetu. Kiki kitubhangesa kwa akwatekesa mu ukexilu watokala.”

11. Kyebhi o minzangala kyatena kusuwa dingi o jiphange ni kwa akwatela henda? (Tala we ofoto.)

¹¹ Enu mu minzangala mutena we kusuwa dingi o jiphange ni kwa akwatela henda. Kyebhi kimutena kubhanga kiki? Mu yonge, dizwelese ni ana-ndenge, o minzangala ni akwenu, ni adyakime. Wa ebhwidisa kyebhi kyala, anga wa evwa kyambote. Mu kifika, eye utena kukwatekesa dikaza akuka kya, kwijiya kukalakala ni mutelembe wa kafwetele mba utena kudibhakula phala kuboka nawu. Mu kubhanga kiki, wanda tena kwa akwatekesa kyambote. Kyoso ki udibhakula phala kukwatekesa o jiphange mu kilunga kyé, wanda kala u phangu yambote phala ene.

O ITENDELESU YA PHAWULU ITENA KU KUKWATEKESA

12. Kyebhi o itendelesu yabhana Phawulu kwa Timote itena kukwatekesa o minzangala?

¹² O tata ya henda ubhana itendelesu yambote ku twana twê. Kyene we kyabhange Phawulu kwa Timote. Mwene wamubhana itendelesu yamukwatekesa kusanguluka ku  mwenyu ni kukalakala ni nguzu yoso phala Jihova. (1 Ti. 1:18; 2 Ti. 4:5) Eye u munzangala, o itendelesu ya Phawulu itena we ku kukwatekesa. Kyebhi? Tanga o mikanda iyadi yasoneka Phawulu kwa Timote, kala wa isoneka phala eye, anga tala se ihi i utena kukumbidila ku mwenyu wé.

13. Ihi yanda kuzukamesa dingi kwa Jihova?

¹³ “Dilonge phala ulondekese kwila wa muxila Nzambi.” (1 Ti. 4:7b) Ni izwelu yiyi poxolo Phawulu wexile mutendelesa Timote phala kukala fiyele kwa Jihova ni ku musangulukisa. Kyoso Phawulu kyatumbula o kizwelu “dilonge” mwene wexile muzwela yalungu ni yó exile mutungutisa o mukutu, mu kudisokejeka phala o jijoko. O athu yá phala kunganyala, abhingile kuditumina o jihânji, kexile mubhanga yoso yamesenene. Etu we twabhingi kuditumina o jihânji phala kukala ni idifwa yambote yanda tuzukamesa dingi kwa Jihova.

14. Mukonda dyahi tutanga o Bibidya? Bhana kifika.

¹⁴ O kifwa kyambote kitwatokala kukala nakyu, o kutanga o Bibidya izuwa yoso. Maji watokala kulembalala kwila, etu tutanga o Bibidya mukonda twamesena kuzukama dingi kwa Jihova. Mu kifika, xinganeka kyoso Jezú kyadizwelesa ni munzangala wexile mvwama. O musoso yú ukulonga ihi yalungu ni Jihova? (Mál. 10:​17-22) O munzangala yu waxikinine kwila Jezú wexile o Mexiya, maji kexile ni kixikanu kyakolo phala kukayela Jezú. Né kiki, Jezú “wa mu kwatela henda,” yu wazwela-nê ni kilendu kyoso. Jezú wamesenene kwila mwene ukala mukayedi wê. Jezú walondekesa we kwila Jihova wazolele o munzangala yu. (Nzw. 14:9) Mu kutanga o musoso yu, xinganeka ku mwenyu wé, anga dibhwidise: ‘Ihi ingatokala kubhanga phala kuzukama kwa Jihova ni kukwatekesa dingi o jiphange mu kilunga?’

15. Mukonda dyahi o minzangala abhingi kukala phangu yambote phala o jiphange mu kilunga? (1 Timote 4:​12, 13)

¹⁵ “Ubhana phangu yambote kwa yó ala jifiyele.” (Tanga 1 Timote 4:​12, 13.) Kidi kwila Phawulu waswinisa Timote phala kukala ni mauhete kala o kutanga ni kulonga kyambote. Maji wamuswinisa we kukala ni idifwa kala o henda, o kixikanu ni kuzela. Mukonda dyahi? Mukonda o ibhangelu ya muthu yala dingi ni valolo, o izwelu yê ndenge. Xinganeka kwila eye wanda bhanga diskulusu di wanda zwela yalungu ni kuswina mu kuboka. Wanda divwa kyambote kuzwela yalungu ni maka enyá se eye waswina mu kuboka. Ki kyanda bhonza phala o athu kukumbidila o ima i wanda zwela, se amona kwila eye we wene mubhanga kiki.—1 Ti. 3:13.

16. (a) Mu ima yebhi o munzangala utena kukala phangu yambote? (b) Kyebhi o munzangala kyatena kukala phangu yambote “mu kuzwela”?

¹⁶ Mu mukanda wa 1 Timote 4:​12, Phawulu wambe kwila o munzangala utena kukala phangu yambote mu ima itanu. Ubheka wé, eye utena kudilonga dingi yalungu ni ima itanu yiyi. Mu kifika, se eye umesena kukala phangu yambote “mu kuzwela”, utena kuswinisa akwenu ni izwelu yé. Se watungu hanji ni jitata jé, utena kwa asakidila dingi mu mbote yoso yene mubhanga phal’eye. Kudisukilu dya yonge, utena kusakidila phange wabhange mbandu. Mutangele se kima kyahi ki wawabhela mu mbandu yê. Utena we kudisokejeka kyambote phala kutambwijila mu yonge. Kyoso ki ubhanga nguzu phala kukala phangu yambote mu kuzwela, athu oso anda mona kwila wamukula mu nzumbi.—1 Ti. 4:15.

17. Ihi yanda kwatekesa o munzangala kukalakala dingi mu kilunga kya Jihova? (2 Timote 2:22)

¹⁷ “O jihânji ja unzangala, lenga-ju. Maji sota o kuyuka.” (Tanga 2 Timote 2:22.)  Phawulu waswinisa Timote phala kulenga o ima yeji mufidisa kukula mu nzumbi, ni kuta o ukamba wê ni Jihova mu kilwezu. Nange umona kwila wamungastala kithangana kyavulu ni itonokenu, mukonda dya kiki kwamutena dingi kubhanga ima yavulu mu nzumbi. O kwila utena kungastala o kithangana kiki mu kubhanga kikalakalu kyalungu ni kilunga kya Jihova, mba mu kukwatekesa akwenu? Nange utena kukwatekesa kuyudika Kididi kya Ubhezelu mba kuboka ni kadikalu ka madivulu. Se ubhanga o ima yiyi, wanda kala ni makamba anda kuswinisa ni ku kukwatekesa kukalakala dingi mu kilunga kya Jihova.

O KUKWATEKESA AKWENU KWANDA KUBHEKELA MABESÁ

18. Mukonda dyahi twejiya kwila Máluku ni Timote asangulukile kyavulu ku mwenyu?

¹⁸ Máluku ni Timote adibhakula mu kikalakalu kya Jihova mu kukwatekesa akwa, mu kiki asangulukile ku mwenyu, atambwile we mabesá avulu. (Ika. 20:35) Máluku wende jinjila ja makanga phala kukwatekesa o jiphange, mwene we wasoneka divulu dizwela yalungu ni mwenyu ni ukunji wa Jezú. Timote wakwatekesa poxolo Phawulu kubhanga ilunga ya ubhe ni kuswinisa o jiphange. Jihova wamono kwila Máluku ni Timote exile polondo phala kukalakala kyavulu mu kilunga kyê. Kiki kya musangulukisa kyavulu.

19. Mukonda dyahi o minzangala atokala kukayela o itendelesu yabhana Phawulu kwa Timote, ni ihi yanda bhita se abhanga kiki?

¹⁹ Mu mikanda yasoneka Phawulu kwa Timote, tutena kumona kwila Phawulu wamuzolele kyavulu. O mikanda yiyi ilondekesa we kwila Jihova wamizolo kyavulu, enu mu minzangala! Mwene wamesena kwila musanguluke ku mwenyu. Kyenyiki bhangenu yoso phala kukayela o itendelesu ya Phawulu ni kukwatekesa akwenu. Se mubhanga kiki mwanda sanguluka ku mwenyu kindala ni ku “dikwatenena ku mwenyu wa kidi” utwamukingila kutambula ku hádya.—1 Ti. 6:​18, 19.