Se kiki kibhita, o kilunga kyandamona kuma o ukaza wokulu wabatuka, o wa ubhe wene kya wavalela. Phala kutendela mukonda dyahi tubanza kiki, tumone o izwelu ya Jezú yalungu ni kudixisa, kifwa, kubhwisa o ukaza ni kukazala dingi.

Kala kilondekesa Matesu 19:9, Jezú watumbula kima kimoxi ngó kizubha o ukaza. Mwene wambe: “Woso usenga muhatu wê mukonda dya kikuma kyengi, o kya undumbu kikyene, anga ukazala ni muhatu wengi, mwene uta phánda.” O izwelu ya Jezú itulonga kuma (1) o undumbu wene ngó ubatula o ukaza, kala kilonga o Bibidya, (2) o diyala dizubha o ukaza ni muhatwe sé kikuma kya undumbu, anga ukazala ni muthu wengi, wamuta phánda. *

O izwelu ya jezú ilombolola kuma, o diyala uta phánda anga uxisa muhatwe, wala ni ufolo wakukazala ni muthu wengi? Kana. Se muthu wakazala uta phánda, o mukwa wakambe o kikuma wala ni ujitu wakusola se wandaloloka munumyê mba kana. Se o muhatu udituna kuloloka anga abatula o ukaza, kiyadi kyâ andakala ni ufolo wakukazala ni muthu wengi kyoso kyandatambula o mikanda ya divosyu.

Kumbandu yengi, o muhatu wakambe o kikuma utena kusola kuloloka mwadiwe phala o ukaza ki ubhwe. Ihiphe itwamba, se o diyala wate o phánda kaxikina o muloloki wa muhatwe, anga ubatula o ukaza ubheka wê? Kuma o muhatu wamuloloka, maji o diyala ngwe o muloloki, anga usuluka mu wendelu we katé kya kazala ni muthu wengi, mwene wamuta phánda, atena kumufundisa kwolo tufunga.—Mál. 10:11, 12.

Se diyala uxisa muhatwe sé kikuma, anga ukazala ni muthu wengi, o kilunga kitala kyebhi o ukaza wokulu ni ukaza wobhe? O kwila bhukaxi ka Bibidya, o ukaza wokulu kiwabatuka luwa? O kwila o muhatu wakambe o kikuma utena hanji kusola se wandaloloka mba kudituna mwadiwe wokulu? O kwila mukilunga, o ukaza wa ubhe anda umona kala ukaza wa jiphánda?

M’ukulu, o kilunga kyexile mutala o ukaza ukala kiki, kala ukaza wa jiphánda, se o muhatu wakambe o kikukama wala hanji kumwenyu, kakazala ni muthu wengi, kate phánda. Maji, Jezú katumbula o dikaza wakambe o kikuma kyoso kyazwela o maka alungu ni kuzubha o ukaza ni kukazala dingi lwamukwa. Muveji dya kiki, mwene wajimbulula kuma, se diyala uxisa muhatwe sé kikuma kya undumbu, anga ukazala ni muthu wengi, mwene wate phánda. Mu maka ya, o kubatula o ukaza ni kukazala ni muthu wengi, kwasokesa Jezú ni kuta phánda, kuzubha o ukaza wokulu.

Se o ukaza ubatuka mukonda dya phánda, anga o wate o kituxi ukazala ni muthu wengi, o wakambe o kikuma kala dingi ni ufolo wakusola se wandaloloka mba kana. Kyenyikphe, mwene kandabhinga dingi kubhanga o kima kyaneme: O kusola se wandaloloka inga wandadituna mwadiwe wokulu. Kupholo, yoso ibhita ni muhatu wakambe o kikuma—kikale se ufwa, ukazala  ni muthu wengi mba uta phánda—yoso yiyi ki ilungulula dingi o ukexilu wakilunga kutala o ukaza wa ubhe. *

Kate bhabha twazwela se diyala uta phánda anga uxisa muhatwe. Ihi itwamba se o diyala kate phánda, maji ubatula o ukaza anga ukazala ni muthu wengi? Mba ihi itwamba se o diyala katé phánda ande dya kuzubha o ukaza, maji ukibhanga kyoso kya ubatula anga ukazala ni muthu wengi, sumbala muhatwe wamuloloka? Mu maka oso ya, o kubatula o ukaza ni kukazala ni muthu wengi kuzubha o ukaza wokulu. O A Sentinela 1.º de fevereiro de 1980, difwe 32 yajimbulula kiki o maka ya: “O diyala dyamateka ukaza wa ubhe. Kyenyikiphe, katokala dingi kuvutukila mu ukaza wokulu mukonda wabhu kyoso kya ubatula yú wakazala ni muthu wengi.”

O ukexilu wa ubhe wakutendela o maka ya, kiwatokala kusosolola o valolo itubhana ku ukaza kala kima kikola, kiwatokala we kutubhangesa kuxinganeka kwila, o kuta phánda ki kituxi kyadikota. O diyala dixisa muhatwe wakambe o kikuma, anga ukazala ni muthu wengi, atokala kumufundisa kwolo tufunga, mukonda wate phánda. (Se o muthu wakazala ne Kidistá we, atokala kumufundisa kwolo tufunga, mukonda wate we phánda.) Sumbala o kilunga kikyanda tala o ukaza wa ubhe kala ukaza wajiphánda, wene ki ukaza walungu ni milongi ya Bibidya, kana. O diyala dyanda laleka mivu ni mivu phala kutambula maujitu akatunda mu kilunga. Né mwene se kubhita mivu yavulu, o tufunga andasota kumona hanji se o jiphange mu kilunga jamumuxila kya. O tufunga andasota kumona we kyebhi kyala o muhatu ni twana twabwazeka mukonda dya kukamba o ufiyele.—Mal. 2:14-16.

Kuma kuzubha o ukaza sé kikuma ni kukazala lwamukwa kubhekela ibhidi yavulu, o Jikidistá ni unjimu woso, asota kukayela o phangu ya Jihova, axila kyavulu o ukaza, mukonda kima kikôla.—Ndo. 5:4, 5; Jih. 13:4.