1. Ihi yabhange Jihova phala etwenyoso?

ETWENYOSO atu sungu kwala Jihova phala tukale tu makamba mê. (Nzwá 6:44) Kiki kilombolola ihi? Kilombolola kwila, Jihova watonginina o mazunda ni mazunda a athu ku mundu woso, yu wamono kima kyavalolo kokwe. Wamono muxima wabeleketa, weji tena kumuzola. (1 Mal. 28:9) Jihova wa kwijiya kyambote, ukutendela, wakuzolo kyavulu. Kwijiya o maka yá, kutuximbakatesa kyavulu!

2. Kyebhi Jezú kya tu kwatekesa kutendela o ukexilu wa Jihova kulanga muthu ni muthu?

² Jihova ukulanga kyambote, ulanga we o jiphange jé joso mu nzumbi. Phala kutukwatekesa kutendela o maka yá, Jezú wasokesa Jihova ni mubhidi. Se mukibhanga kya 100 ya jimbudi kujimbila mbudi imoxi, ihi yeji bhanga o mubhidi? Mwene wandaxisa “o makwinyi’ivwa n’ivwa ala mù kúdya ku mulundu, n’aye mu sota yiyi ya jimbidila.” Kyoso o mubhidi kya sanga o mbudi, mwene kanda ikwatela njinda mukonda dya kujimbila. Maji wandasanguluka. Kiki kitulonga ihi? Kitulonga kwila, o jimbudi joso jala ni valolo kumesu a Jihova. Jezú wambe: “Ki kyala mu vondadi ya Tat’enu wene mu dyulu; k’andala kwila ku twana tutu bhu texika kamoxi.”—Mat. 18:12-14.

3. Ihi itwandadilonga mu mbandu yiyi?

³ Se phata etu kitumesenena kuzwela mba kubhanga kima kiluwalesa mba kizozesa phangyetu mu nzumbi. Ihi itwatokala kubhanga phala kituluwalese akwetu? Ihi itwatokala kubhanga se kukala phange utuluwalesa? Twandatambwijila o ibhwidisu yiyi mumbandu yiyi. Maji kyadyanga tudilonge hanji yalungu ni “twana tutu” twatumbula mudivulu dya Matesu kibatulu 18.

4. O kizwelu “twana tutu” kilombolola ananyi?

⁴ O kizwelu “twana tutu” kilombolola o maxibulu a Jezú a itala yoso. Kikale se adyakime mba minzangala, ene edi kala “anandenge” mu ukexilu wa kwila, axikina kwa alonga kwala Jezú. (Mat. 18:3) Sumbala ene atungu mu jixi javulu, ala ni idifwa ki idifu, o ijila ni ibanzelu ki idifu, enyoso ala ni kixikanu kwa Kidistu. O Kidistu wa azolo kyavulu.—Mat. 18:6; Nzwá 1:12.

5. Kyebhi kidivwa Jihova se kukala muthu uluwalesa selevende yê?

⁵ O “twana [twoso] tutu” twala ni valolo kumesu a Jihova. Phala kutendela kyebhi Jihova kyadivwa, tumone kyebhi kitudivwa yalungu ni anandenge. Etu twa azolo kyavulu, tumesena kwa alanga mukonda ene kala luwa ni nguzu, kwijiya mba unjimu wasoko, kala adyakime. Etu kitwawabhela kumona muthu utalesa hadi kwa mukwa. Maji tudivwa dingi kyayibha kyoso kitumona muthu wamutalesa hadi kwa mona ndenge. Kyene we kimoxi, Jihova wamesena kutulanga. Mwene udivwa kyayibha, kate udizangala kyoso kyamona muthu ubhangesa selevende yê kudibhukana mba kumuluwalesa!—Iza. 63:9; Mál. 9:42.

6. Kala kilondekesa 1 Kolindu 1:26-29, kyebhi o athu kumundu kyatala o maxibulu a Jezú?

⁶ Mu ukexilu webhi dingi o maxibulu a Jezú edi kala “anandenge”? Xinganeka hanji. Kumundu ananyi a abhana dingi valolo? O jimvwama, yó afumana, ni yó ala ni kutena kwavulu. Maji o maxibulu a Jezú a amona kala athu kate kima, “anandenge” akambe o valolo. (Tanga 1 Kolindu 1:26-29.) Maji Jihova wa atala mu ukexilu wengi.

7. Jihova wamesena kwila tudivwa kyebhi yalungu ni jiphange jetu?

⁷ Jihova wazolo o jiselevende jê joso, kikale yó ene mumusidivila kya mumivu yavulu mba yó amateka kindala. O jiphange jetu joso, ala ni valolo kumesu a Jihova. Kyenyikiphe, atokala we kukala ni valolo kumesu metu. Etu twamesena ‘kuzola o jiphange jetu joso,’ kana ngó amoxi. (1 Phe. 2:17) Twatokala kubhanga yoso itutena phala kwa alanga ni kwa asuwa. Se tumona kwila twaluwalesa phange mu kilunga, kitwatokala kwila wila kikwabhitye kima, mba kuxinganeka kwila mwene we wamuvudisa kya o ima. Ihi itena kubhangesa phange kuluwala mukonda dya ima itubhanga mba ituzwela? Mukonda dya ukexilu wa asase, nange sayi jiphange adimona kutola, ni kwila kejiya ima yavulu. Amukwa amateka kubheza Jihova kindala, kadilongo luwa kwila atokala kuloloka akwa kyoso kya aluwalesa. Kabasa o ukexilu utuluwalesa akwetu, twatokala kubhanga paze ni jiphange jetu. Maji twatokala kulembalala we kwila, o muthu wala ni kifwa kya kuluwala ni kima kyosokyoso kizwela akwa, wabhingi kulungulula o ukexilu wê. Mwene wabhingi kubhanga kiki phala n’a kale ni kutululuka kwa muxima ni ukamba wambote ni jiphange.

8. Ukexilu webhi wa athu wafunyisa o maxibulu a Jezú?

⁸ Ihi yabhangesa Jezú kuzwela yalungu ni “twana tutu”? Mwene wazwela o maka ya mukonda o maxibulu mê amubhangele o kibhwidisu kiki: “Nanyiphe wà kala kota mu Utuminu wa Dyulu?” (Mat. 18:1) Jijudé javulu amesenene kwila, akwa a axila. Sayi Erudito wambe: “Kutambula o ujitu, kuxila, o fuma ni ku axikina kwa akwa, kyexile o kima kyabetelekota phala ene.”

9. Ihi yatokalele kubhanga o maxibulu a Jezú?

⁹ Jezú wejidile kuma, Jijudé javulu exile mubanza kwila, kima kyambote se ene abetakota, o akwa ndenge. Kyenyiki, o maxibulu mê abhingile kubhanga nguzu phala  kulungulula o ukexilu wâ wa kuxinganeka. Mwene wa ambela: “Mudyenu woso wa beta o ukota, a kale kala mwène o ndenge; o woso u tumina, a kale kala mwène ala ku mu tumina.” (Luka 22:26) Etu tuditala kala tu ‘anandenge,’ se tukita ‘akwetu abetakota’ etu ndenge. (Fil. 2:3) Se tukala ni kixinganeku kiki, kyanda tubhonza kuluwalesa akwetu.

10. Kitendelesu kyebhi kya Phawulu kitwatokala kukumbidila ku mwenyu wetu?

¹⁰ Sayi ima, o jiphange jetu ala dingi ni mauhete, etu ndenge. Tutena kumona o kidi kiki kyoso kitulunga o muxima wetu mu idifwa yâ yambote. Twatokala kukumbidila kumwenyu wetu o kitendelesu kyabhana Phawulu kukilunga kya Kolindu: “Eye nanyi mwène wa kubhangesa kwila akwenu oso u a tunda mu unene? Ngana Nzambi ki mwène wa kubhana yoso i wala nayu? Abhaphe, phalahi eye u di zangeleka, kala o yoso iwala nayu, Nzambi ki mwène wa ku bhanayu?” (1 Kol. 4:7) Kyenyikiphe, twatokala kudilanga phala kitusote kudizangeleka mba kulondekesa kwila etu twabetakota, akwetu ndenge. Mukifika, o phange ya diyala wala ni uhete wakubhanga madiskulusu ambote, mba phange yamuhatu wala ni uhete wakumateka kulonga o Bibidya ku athu avulu, atokala kubhana o fuma kwa Jihova wa abhana o uhete yú.

11. Ihi yatulongo Jezú mu kifika kya sobha ni selevende yê?

¹¹ Mukubhita tu ithangana, Jezú wadimuna o akayedyê phala kabhangese akwa kudibhukana, mukwatela kifika kya sobha ni selevende yê. O sobha waloloka dikongo dyadikota dyatele selevende yê. O selevende nuka weji tena kufuta o dikongo didi. Mukusuluka, o selevende yenyiyi, se henda kaxikina kuloloka o dikongo dyofele dyamudi selevende ni mukwa. Kudisukilu o sobha wate mu kaleya o selevende yiyi ya kambele o henda. Disá dyebhi ditudilonga? Jezú wambe: “Ni Tata yami mu dyulu, kyene kya kà mi bhanga enu, se ku mixima yenu mu kamba kuloloka mu kidi mukwenu wosowoso u mi bhanga kima kyayibha.”—Mat. 18:21-35.

12. Kyebhi kituluwalesa akwetu se tukamba kwa aloloka?

¹² O kyabhange o selevende wakambe o kuloloka, ki kyaluwalesa ngó mwene, maji kya luwalesa we akwa. Kyadyanga, mwene kalondekesa henda, kaxikina kuloloka selevende ni mukwa ‘mukumutesa mu’aleya, katé kyamufuta o dikongo dyadi.’ Kayadi, mwene waluwalesa we o jiselevende jamukwa amwene yoso yabhangele. Kyoso “akwáphe kya zubha ku ki mona, kya bhang’iki, kya a yibhila kyavulu.” Kyene we kimoxi. O ima itubhanga itena kusangulukisa mba kuluwalesa akwetu. Mukifika, se muthu ukutalatala kyayibha, anga eye udituna kumuloloka, ihi itena kubhita? Kyadyanga, etu tumuluwalesa mukonda twaditunu kumuloloka, nange tukamba kumusuwa ni kumulondekesa o henda. Kayadi, tubhangesa akwetu mukilunga kudivwa kyayibha, kyoso kyamona kwila, etu kitwamudibhana kyambote, kitwala ni kutululuka.

13. Ihi itwadilongo ku phangu ya muboki wathembu yoso?

¹³ Kyoso kituloloka akwetu, etu tudivwa kyambote, akwetu adivwa we kyambote. Kiki kyene kyabhiti ni phange Cristal, muboki wathembu yoso. Sayi phange mu kilunga wamuluwalesa. Phange Cristal wambe: “Sayi ithangana o izwelu ya phange yú yexile mungikwama kala phoko. Kate mwene mu ukunji kingamesenene kutunda ne. O nguzu yami yakuboka, ni kisangusangu kyamateka kuzoza.” Cristal wexile mudivwa kwila, walungilye mwene mu kudivwa kiki. Maji mwene kabhake phonzo, kadikwatenena we mu kuluwala kwê.  Mukonda dyahi? Mukonda mwene walendukile, wakumbidila o kitendelesu kya Bibidya mu milongi “Perdoem de coração” mu Mulangidi wa 15 wa Kamusasadi, wa 1999 mu phutu. Mwene waloloka phangye. Cristal wambe: “Kindala ngatonginina kwila, etwenyoso twamubhanga nguzu phala kukala athu a ubhe, ni kwila Jihova wene mutuloloka jinga izuwa yoso. Ngidivwa kala angi katula dibunda dya neme mu isuxi. O kusanguluka kwami kweza dingi.”

14. Kala kilondekesa Matesu 18:21, 22, makahi exile mudibhana nawu poxolo Phetele, ihi itutena kudilonga mu kitambwijilu kya Jezú?

¹⁴ Twejiya kwila twabhingi kuloloka. Kyene o kima kitwatokala kubhanga. Maji kitena kutubhonza kubhanga kiki. Sayi ithangana, poxolo Phetele wexile we mudivwa kiki. (Tanga Matesu 18:21, 22.) Ihi itena kutukwatekesa? Kyadyanga, xinganeka o jiveji jene mukuloloka Jihova. (Mat. 18:32, 33) Kikyatufwama kutambula o muloloki, maji mwene wene mutuloloka ni muxima woso. (Jisá. 103:8-10) Kyene we kimoxi, “etu wetu twa fwama tu di zola mudyetu.” Kyenyiki, o kuloloka, kikima kya kusola, kana. Mukidi, twabhingi kuloloka, mukonda dikongo ditwate. (1 Nzwá 4:11) Kayadi, xinganeka mu ima itena kubhita kyoso kituloloka mukwetu. Tutena kukwatekesa o muthu watutalatala kyayibha, tutena kukwatekesa o kilunga kukala ni muxima umoxi, tulanga o ukamba wetu ni Jihova, tukatula dibunda dyaneme mu isuxi yetu. (2 Kol. 2:7; Kol. 3:14) Mukusukaku, samba kwa Jihova, wene mutubhinga phala tuloloke akwetu. Kana kwehela Satanaji kadyaphemba, kuzanga o kutululuka ni ukamba u uwalanawu ni jiphange jê. (Efe. 4:26, 27) Phala kukala ni kutululuka mukilunga, twabhindamena o kikwatesu kya Jihova.

15. Kala kyamba Kolose 3:13, ihi iwatokala kubhanga se phange ubhanga kima kikuluwalesa?

¹⁵ Abha se phange mu kilunga ubhanga kima kikuluwalesa? Ihi iwatokala kubhanga?  Bhanga yoso i utena phala mukale dingi ni kutululuka. Tangela kwa Jihova kyebhi kiwamudivwa. Mubhinge phala n’a besowala o muthu yó wakuluwalesa. Bhinga we kikwatekesu kwa Jihova phala utene kumona o idifwa yambote ya phange yo wakuluwalesa, o idifwa yabhangesa Jihova kumusola. (Luka 6:28) Se kiwamutena kujimba o kima kya kubhange phangyé, sota kuxinganeka webhi o ukexilu wambote phala uzwelene. Kima kyambote kuxinganeka kwila, muveji javulu, o phange kamesenene kukuluwalesa. (Mat. 5:23, 24; 1 Kol. 13:7) Kyoso ki uya mu zwelane, kana kumufundisa kyayibha. Abha se mwene kamesene kubatula o maka ni kutululuka? Suluka ni ‘kumulendukila.’ Mukwatele mwanyu. (Tanga Kolose 3:13.) O kyabeta dingi kota, kana kubhaka phonzo kumuxima. Mukonda kubhanga kiki, kutena kuzanga o ukamba we ni Jihova. Kana kwehela kima kukubhangesa kudibhukana. Se ubhanga kiki, wandalondekesa kwila, eye wazolo dingi Jihova, kima kyosokyoso ndenge.—Jisá. 119:165.

16. Kikalakalu kyahi kitwala nakyu etwenyoso?

¹⁶ Etu twala ni ujitu wakusidivila Jihova kala “kilunga kimoxi” amu kyendesa ku “mubidi umoxi”! (Nzwá 10:16) O divulu Organizados Para fazer a Vontade de Jeová, mu difwe 165, dyamba: “Kuma eye wene mukatula we mbote mu ukamba ni kutululuka wala mu kilunga kya Jihova, wala we ni kikalakalu kya kukwatekesa kulanga o kutululuka kuku.” Twabhingi we “kudilonga kutala o jiphange jetu, kala kya atala Jihova.” Mukonda, kumesu a Jihova etwenyoso twedi kala tu “anandenge,” twala ni valolo yavulu. O kwila kyene we kiwene mutala o jiphange jê? Jihova umona, ubhana valolo mu yoso i ubhanga phala kukwatekesa ni kulanga o jiphange jetu.—Mat. 10:42.

17. Ihi itwamesena o kubhanga?

¹⁷ Etu twazolo o jiphange jetu. Kyenyiki, twandabhanga yoso phala kitute ‘kidibhukanu mu njila ya phangyetu, mba kima kimubhangesa kudibhala mu kituxi.’ (Loma 14:13) Etu tutala o jiphange jetu kwila, ene abetakota etu ndenge. Twamesena we kwa aloloka ni muxima wetu woso. Kyenyikiphe, tubhange yoso phala kitudibhukane mukonda dya ima ibhanga akwetu. Muveji dya kiki, “tu kayedyenu o ima i bheka paze, ima i bhekela kutungiwa mudyetu.”—Loma 14:19.