ATHU avulu ejiya o musoso wa Jezú, amuphaphela ku taka mwaxaxi ka ifumbe iyadi. (Mat. 27:35-38) Maji sayi athu kaxikina kwila o musoso wa Bibidya, walungu ni kusokejeka o kimbi kya Jezú, phala ku kifunda mu mbila, wakidi mwene.—Mál. 15:42-46.

Sayi athu axongwena o misoso yala mu divulu dya Matesu, Máluku, dya Luka ni dya Nzwá, amba kwila o muthu amuphaphela kutaka katokalele ku mufunda ni kijingu, kala o kufunda o kimbi kyê mu mbila. O athu yá amba kuma, yó exile mwajibha kala ifumbe, exile mwa atalatala mu ukexilu wayibha. Sayi diyala amwixana Ariel Sabar, wajimbulula kiki mu divulu dyê, se mukonda dyahi sayi athu abanza kiki: “O kuphaphela muthu kexile o kaxtiku phala o athu exile mwamona kala ayibha kyavulu. Mu kiki sayi athu adilonga o Bibidya kaxikina kwila o akwa Loma ejitena kufunda ni kijingu muthu amumono mu ukexilu yú.” O akwa Loma amesenene mwene kulondekesa ku athu oso kwila, azembele kyavulu o madifundu enyó. O imbi yâ, eji ku ixisa ku taka phala ku idya ku yama yamuxitu. O ima yejisubhuka, eji ku itakula mu mbila mwexile kyá imbi yavulu.

Maji o akwa kukanda o ima koxi amavu, atungununa ima yengi yalungu ni Jijudé a ajibhile. Ku muvu wa 1968, ene atungununa ifuba yasubhuka ya diyala amujibhile ku hama yadyanga. O ifuba yiyi, a isange mu mbila ya mwiji umoxi wa Jijudé. O mbila yiyi yazukama ku mbanza ya Jeluzaleme. O yene yakexile mu kaxa ya kubhakamu o ifuba. O kasende kexile mwaxaxi ka ifuba ya mukwá. Kene a kaphaphele ku dibaya dimoxi, mu kasende mwakexile pheleku yexile ni 11.5 ya jisentimentru mu kulebha. O mukwa minangu amwixana Ariel Sabar wambe: “O kasende kexile ka diyala amwixanene Yehochanan, kalondekesa kwila o musoso wa Jezú wala mu divulu dya Matesu, Máluku, dya Luka ni dya Nzwá walungu ni ku mufunda mu mbila, wakidi mwene. O kasende kaka kalondekesa diyala mu izuwa ya Jezú amuphaphele, maji o akwa Loma ehela ku mufunda kala kyexile mu tendelesa o ijila ya Jijudé.”

Mukonda dya kasende kaka, lelu kwala ibanzelu yavulu yalungu ni kyebhi kya phaphele Jezú ku taka. Maji kiki kilondekesa ni kidi kyoso kwila, sayi ifumbe exile mwene mwafunda ni kijingu, mu veji dya kwatakula ngó mu ididi mwexile kyá ifuba yavulu. Sé phata, o kima kilonga o Bibidya kyalungu ni Jezú ku mufunda mu mbila ni kijingu kyoso, kya kidi mwene. O yatungununa o akwa kukanda o ima koxi amavu, ilondekesa kwila o izwela o Bibidya yakidi mwene.

O kyabeta dingi kota, Jihova wakanena kwila Jezú eji mufunda kumoxi ni mvwama. Seku kima kyejifidisa o mak’â Nzambi kudikumbidila.—Iza. 53:9; 55:11.