1. Ihi ituxinganeka kyoso kitwivwa o izwelu mukwa kukwatela henda?

KYOSO kitwivwa o kizwelu mukwa kukwatela henda, tuxinganeka muthu wambote, ulendukila akwa, mukwa kubhana. Kiki kitubhangesa we kubanza kumusoso wa Jezú yalungu ni mukwa Samadiya. O diyala didi dyatokalele ku kifuxi kyengi mwene wa “kwatela o henda” ku Judé amubetele ya amunyanene. O mukwa Samadiya “henda ya mu kwata” yu wambata o Jude amukwamene yu wamulange ni henda yoso. (Luka 10:29-37) O kifika kiki kitulonga yalungu ni kidifwa kyafwama kya Nzambi yetu—o kukwatela henda. Jihova utukwatela henda, mukonda watuzolo. Mwene utulondekesa o henda yê mu maukexilu avulu mu kizuwa ni kizuwa.

2. Webhi o ukexilu wamukwa wakukwatela o henda?

² Webhi dingi o ukexilu wamukwa wakukwatela o henda kumuthu? O ukexilu wamukwa, o kukamba kubazela mba kukaxtikala muthu wate o kituxi. Mu ukexilu yú, Jihova se phata, wene mutukwatela henda yavulu, mukonda “ka tu bhanga kala kya fwama mu ikuma yetu,” kala kyambe o mukwa jisálamu. (Jisá. 103:10) Maji sayi ithangana, Jihova utena kubazela o muthu wate o kituxi.

3. Ibhwidisu yebhi itwandadilonga?

³ Mu milongi yiyi, twandadilonga ibhwidisu itatu: Mukonda dyahi Jihova wene mutukwatela henda? O kwila o kubazela kwalungu we ni kukwatela henda? Ihi itena kutukwatekesa kulondekesa henda kwa akwetu? Tumone o itambwijilu ibhana o Mak’a Nzambi ku ibhwidisu yiyi.

4. Mukonda dyahi Jihova wene mutukwatela henda?

⁴ Jihova wazolo kutukwatela o henda. Bhukaxi ka nzumbi ikola, poxolo Phawulu wasoneka kwila Nzambi ‘mukwa kuloloka.’ Mu kibatululu kiki, Phawulu wexile mujimbulula kwila, Nzambi  mukwa kukwatela henda, mukonda mwene wabhana o kidyelelu kya kukala ni mwenyu wayuka kudyulu kujiselevende a undu, sumbala akwa ituxi. (Efe. 2:4-7) Maji Jihova kakwatela ngó henda kujiselevende a undu. O mukwa jisálamu wasoneka: “Jihova ene oso u a bhanga mwene mbote, ikalakalu yê yoso u i tambula konda mu henda yê.” (Jisá. 145:9) Kuma Jihova wazolo o athu, mwene ukwatela jinga o henda kyoso kyamona kima phala kubhanga kiki.

5. Kyebhi Jezú kyadilongo kukwatela henda kala kibhanga Jihova?

⁵ Jezú wabetakota mukwijiya kuma, Jihova wazolo kyavulu kukwatela henda. Kala Tata ni Mona, ene atungile kumoxi mu mivu yavulu, ande dya Jezú kwiza mu ixi. (Jisa. 8:30, 31) Muveji javulu, Jezú wamono kyebhi Tat’ê kyakwatela henda ku athu, akwa ituxi. (Jisá. 78:37-42) Mu ilongesu yê, Jezú watumbula kyavulu o kidifwa kiki kyafwama kya Tata yê.

6. Kyebhi Jezú kyatukwatekesa kutendela o henda yatukwatela Tat’ê?

⁶ Kala kyakitumbula mumilongi yatundumu, mukifika kyalungu ni mona wajimbidile, Jezú watukwatekesa kutendela kyambote kwila, Jihova wazolo kutukwatela o henda. O mona waxisa o dibhata “anga u zangazanga itadi yê mu ulaji.” (Luka 15:13) Mukubhita kithangana, wadyela o wendelu we wabolo, waditulula yu wavutuka kubata dya tate. Kyebhi tat’e kyamutambulula? O munzangala wadiyala kabhingile kukingila lwavulu phala kumona kyebhi tat’e kyeji mutambulula. Jezú wambe: “Kyala mù kwizaphe, [o mona] hanji wala dikanga, tat’â wamumono. Anga henda ya mon’ê imukwata, ulenga lusolo, udibhubhalanê, umubhana jibeju.” O Tata ka sebhulula mon’a, muveji dya kiki, wamuloloka ni henda yoso, wamutambulula kubhata. O mona wajimbidile, watele kituxi kyadikota, maji tat’e wamuloloka mukonda dya kudyela kwe. Mukifika kiki, o Tata waloloka o mona, ulombolola Jihova. Mu ukexilu yu wakatunda Jezú walondekesa kwila, Jihova wala polondo phala kuloloka oso ate o kituxi, maji adyela ni muxima woso.—Luka 15:17-24.

7. Kyebhi Jihova kyalondekesa o unjimu we mu ukexilu watukwatela o henda?

⁷ Jihova utukwatela henda mukonda dya unjimu we wabetakota. O unjimu wa Jihova, kiwalungu ni kukala ni kwijiya kwavulu, mba kukamba kusuwa o athu, kana. Muveji dya kiki, o Bibidya yamba kwila, “o unjimu-phe utunda bhulu . . . uvula kukwatela henda, ubhekela kubhongolola ibundu ya ibhangelu yambote.” (Tiya. 3:17) Kuma Jihova tata ya henda, mwene wejiya kwila, o kukwatela henda kubhekela mbote kutwana twe. (Jisá. 103:13; Iza. 49:15) O muloloki wa Nzambi ubhana kidyelelu kumundu wê,  sumbala ene akwa ituxi. Kyenyikiphe, o unjimu we wakatunda ubhangesa Jihova kukwatela henda mu ithangana yoso yamona kwila, wabhingi kubhanga kiki. Maji Jihova wejiya we se kithangana kyebhi katokala kukwatela henda. Kuma Jihova mukwa unjimu mwene kandakwatela henda ku muthu uya ni kuta ituxi mulwelu.

8. Sayi ithangana kubhinga kubhanga ihi ni mukonda dyahi?

⁸ Xinganeka kwila, o selevende ya Nzambi, usola kuta kituxi kyadikota mulwelu, anga unangenena mu kituxi kiki. Ihi itweji bhanga? Bhukaxi ka nzumbi ikola, Phawulu wasoneka: “Kana kuditambululanâ.” (1 Kol. 5:11) O muthu uta kituxi kyadikota anga ukamba kudyela, amuta mukamukonde mu kilunga. Kwabhingi mwene kubhanga kiki phala kulanga o jiphange jafiyele ni kukayela o ukexilu wazele wa Jihova. Maji sayi athu axinganeka mukuta muthu mukamukonde mu kilunga, Nzambi kamumukwatela henda. O kwila kiki kidi? Tumone.

9-10. Kala kilondekesa Jihebelewu 12:5, 6, mukonda dyahi tutena kuzwela kwila, o kuta o muthu mukamukonde kilondekesa henda? Bhana phangu.

⁹ Kyoso kitwivwa ngolokela mukilunga kwila, muthu utwejiya, utwazolo, “ki Mbangi ya Jihova dingi,” tululwala kyavulu. Tutena kudibhwidisa: O kwila abhingile mwene kumuta mukamukonde? O kwila kuta muthu mu kamukonde kumukwatela mwene henda? Xe, kyene. Kukamba kubazela o muthu atokala kumubazela, ki unjimu, kikumukwatela we henda, kana. (Jisa. 13:24) O kwila o kamukonde katena kukwatekesa o muthu kulungulula o ukexilu we ni kudyela? Katena. Jiphange javulu exile muta ituxi yamakota, ambe kwila, o ku ata mukamukonde, kwa akwatekesa kutonginina kwila abhingile kulungulula o ukexilu wâ ni kudyela ni kuvutuka kwa Jihova.—Tanga Jihebelewu 12:5, 6.

¹⁰ Tala o kifika kiki: Kafunga ka jimbudi umona kwila, sayi mbudi yamukata. Mwene wejiya kwila, phala kusaka o mbudi yakate, yene kiyatokala kukala kumoxi ni kibhanga kyoso. Maji o jimbudi jawabhela kukala mukibhanga, jidivwa kyayibha se jidikexidila kujimbudi jamukwa. Se o kafunga usondolola o mbudi yakate phala ku italatala mu kididi kyengi, kilombolola kwila mwene ka ikwatela henda? Kana ngana. Mwene wejiya kwila, se wehela o mbudi yakate kukala kumoxi ni kibhanga kyoso, o uhaxi wandadimwanga. Mukutula o mbudi yakate mukididi kyengi, o kafunga wandalanga o kibhanga kyoso.—Sokesa ni Ijila 13:3, 4.

11. (a) Mu maukexilu ebhi o muthu amute kamukonde mukilunga tutena kumusokesa ni mbudi yakate? (b) Ima yebhi itena kukwatekesa o muthu amute mu kamukonde?

¹¹ Tutena kusokesa o Kidistá amute mu kamukonde ni mbudi yakate. Kuma o ukamba we ni Jihova kiwala kyambote, mwene wasoko ni muthu wamukata. (Tiya. 5:14) O uhaxi munzumbi, kala kibhita ni uhaxi muxitu, utena kusambukila. Kyenyikiphe, sayi ithangana kubhinga kukatula mukilunga o muthu wakate mu nzumbi. O kibazelu kiki, kilondesu kya henda yakwatela Jihova kujiselevende jê ja fiyele mu kibhanga Kyê. Kutena kukwatekesa o muthu wate o kituxi kutonginina o njila yayibha yasolo ni kudyela o kituxi kyê. Kyoso muthu kyamuta mu kamukonde, utena kuya muyônge, mwene mwandatambula o milongi itena kukolesa o kixikanu kyê. Mwene utena we kutambula o madivulu abhindamena phala kudilonga ubheka, ni kutala o minangu ya JW Broadcasting^®. Kyoso o tufunga kyamona kwila mwene wamulungulula kya o ima kumwenyu we, atena kumubhana itendelesu mu ithangana ni ithangana, yandamukwatekesa kukala dingi ni ukamba wambote ni Jihova, kuhadya na vutuka kukala Mbangi ya Jihova. *

12. Webhi o ukexilu wabetakota watufunga kulondekesa o henda ya kwa yo wadyela o ituxi yê?

 ¹² Kima kyambote kulembala kwila, o muthu amuta mukamukonde mu kilunga, yo ngo wakambe kudyela o ituxi yê. O tufunga ejiya kwila, ene abhingi kuxinganeka mwene kyambote ande dya kusola se andata mukamukonde o muthu wate o kituxi. Ene ejiya kwila, Jihova ubazela “mu kizongelu kya fwama,” amesena we kubhanga kiki. (Jel. 30:11) Kuma azolo o kilunga, o tufunga kamesena kubhanga kima kyosokyoso kitena kuzanga o ukamba wa jiphange jâ ni Jihova. Sayi ithangana o kuzola ni kukwatela henda kubhangesa kuta mu kamukonde o muthu wate o kituxi.

13. Mukonda dyahi sayi Kidistá mu kilunga kya Kolindu abhingile kumuta mu kamukonde?

¹³ Tumone kyebhi Phawulu kyatalatala o muthu wakambe kudyela o ituxi, mu hama yadyanga. Sayi kidistá mu kilunga kya mbanza ya Kolindu, wexile muta phanda ni muhatu wa tat’ê! Kiki kyexile kima kyayibha kinene. Yalungu ni maka ya, Jihova wambelele akwa Izalayele kwila: “Se bhukala diyala uzeka muhatu’angene wa phayi’â; kiyadi kyá afwe mwene sé phata.” (Iji. 20:11) Phawulu katangela o kilunga phala kujibha o diyala dyodyo. Maji wa atendelesa phala kumuta mukamukonde. O wendelu wabolo wadiyala didi, wexile mufunyisa we akwa mukilunga, amoxi exile muxinganeka kwila, kikituxi kyadikota kubhanga kiki!—1 Kol. 5:1, 2, 13.

14. Kyebhi Phawulu kyakwatela henda kudiyala amutele mu kamukonda mu kilunga kya Kolindu ni mukonda dyahi? (2 Kolindu 2:5-8, 11)

¹⁴ Mukubhita kithangana, Phawulu wevu kwila, o diyala dyodyo, dyexile mulungulula o ima kumwenyu we. Mwene wadyela ni kidi kyoso! Sumbala o diyala didi dyabhekele lusebhu kukilunga, Phawulu watendelesa o tufunga kwila, kamesenene ku ‘axina ni nguzu yavulu.’ Mwene wa atendelesa wixi: “Inda mu lunguluka kyá hé mu mu loloka.” Tala se mukonda dyahi Phawulu watangela kwila, abhingile kumuloloka: “Phala kabhondalale ni mukondo wavulu kinéne umubhekela kikôte.” Phawulu wakwatela henda kudyala dyodyo wadyela. Phawulu kamesenene kwila o diyala dyodyo diditatela kyavulu, mukwivwa ndolo kumuxima mukonda dya ima yabhangele, kate ukamba kusota o muloloki.—Tanga 2 Kolindu 2:5-8, 11.

15. Kyebhi o tufunga kyatena kubazela ni kukwatela henda mu kithangana kimoxi?

¹⁵ Mukukayela o phangu ya Jihova, o tufunga azolo we kukwatela henda. Ene andabazela o muthu watondala ni kuswinisa kwoso, se kubhinga, maji andamukwatela henda se kibhana. Kumbandu yengi, se akamba kubhanga kiki, kamukwatela henda, maji amulondekesa kwila  axikina o ima yayibha yamubhanga yo wate o kituxi. O kwila o tufunga ene ngó atokala kukwatela henda?

16. Kala kilondekesa Jisabhu 21:13, ihi yandabhanga Jihova kwa yó akamba kukwatela o henda?

¹⁶ O Jikidistá joso asota kukayela o ukexilu wa Jihova wakukwatela o henda. Mukonda dyahi? Mukonda Jihova kanda kwivwa o misambu ya yó akambe kukwatela henda kwa akwa. (Tanga Jisabhu 21:13.) Seku muthu mudyetu wamesena kwila, Jihhova ukamba kwivwa o misambu yê. Kyenyikiphe, twabhingi kudilanga phala kitukole o mixima, mukukamba kukwatela o henda kwa akwetu. Muveji dya kuxita o matwi kwa phange wamubhita ni ndolo, ithangana yoso twatokala kwivwa kyoso “ki dikola ngadyama.” Kyene we kimoxi, twatokala kukayela o kitendelesu kiki kyala mu Bibidya: “O Nzambi kya kà fundisa, ka kà lendukila athu yó a kambele kukala ni henda ya akwâ.” (Tiya. 2:13) Se tulenduka anga tulembalala kwila, etu we twabhingi kutukwatela henda, kikyandatubhonza kulondekesa we henda kwa akwetu. Kyabetakota, etu twamesena kukwatela o henda kwa yó adyela o ituxi anga avutuka mu kilunga.

17. Kyebhi Sobha Davidi kyakwatela o henda?

¹⁷ O jiphangu ja athu otumbule mu Bibidya, jitena kutukwatekesa kukwatela o henda ni kulenga o ukexilu wakukola o muxima. Mukifika tala o phangu ya Sobha Davidi. Muveji javulu, mwene wakwatela o henda kwa akwa. Sumbala Sobha Sawulu wamesenene kumujibha, Davidi wamukwatela henda mukonda Sawulu wexile o Sobha amu undu kwala Nzambi, mwene kavutula phonzo mba kumuzemba.—1 Sam. 24:9-12, 18, 19.

18-19. Mu ithangana iyadi yebhi Davidi wakambe kukwatela o henda kwa akwa?

¹⁸ Maji Davidi kexile mukwatela henda mu ithangana yoso. Mu kifika, kyoso o diyala dyayibha Nabale kyazwela ne se kumuxila yu waditunu kubhana ima ni kudya kwa Davidi ni masoladi mê, mwene wa divu kyayibha, wamesenene kujibha Nabale ni mayala oso kubhata dyê. Maji Abingayile, muhatu wa Nabale, wexile mukwa kubhanga mbote, mukwa mwanyu. Kyenyiki, ni lusolo lwoso, wabhekela kudya kwa Davidi. Kiki kyafidisa Davidi kujibha Nabale ni mayala oso kubhata dyê.—1 Sam. 25:9-22, 32-35.

¹⁹ Mukithangana kyamukwa, polofeta Natane watangela kwa Davidi kwila, sayi diyala dyexile mvwama, watambula o kambudi kamoxi elele kavizinyu ye wexile ngadyama. Ni njinda yoso Davidi watambwijila wixi: “Nga loka mwene kwa Jihova wene ni mwenyu, kuma muthu wa tena kubhanga kiki, wa tokala kúfwa!” (2 Sam. 12:1-6) Davidi wejidile kyambote o Kijila kya Mozé. Mu kijila kiki, o muthu unyana o mbudi yatokala kwa mukwawu, watokalele kufuta jimbudi jiwana. (Mak. 22:1) Kifundisu kya kujibha? Kiki kikyexile kifundisu kya henda, kana. Mukusuluka, polofeta Natane walondekesa kwila, mwene watele ngo o kifika kiki phala kulondekesa ituxi yabetele dingi kota, yabhitile mu Izalayele. Watele o ituxi yiyi, Sobha Davidi mwene! Jihova walondekesa kwila,  mwene walondekesa dingi henda kwa Davidi, o henda yakwatela Davidi kumwiyi wambudi mu kifika kya polofeta Natane ndenge.—2 Sam. 12:7-13.

20. Ihi itutena kudilonga kuphangu ya Sobha Davidi?

²⁰ Kyoso Davidi kyexile ni njinda yavulu, mwene wasolo kujibha Nabale ni mala oso kubhata dyê. Mukubhita kithangana, mwene wafundisa kwila, o diyala dya nyana o mbudi imoxi mu kifika kya Natane, watokalele kufwa. Mukifika kya kayadi, tutena kudibhwidisa se mukonda dyahi o diyala dya henda, Davidi, wafundisa se henda o diyala mu kifika kya Natane. Tala yoso yexile mubhita. Mukithangana kiki, Davidi wexile kya ni kitongolwelu kyaneme. Se muthu wenda ni kufundisa akwawu se henda, kitena kulondekesa kwila, o ukamba we ni Jihova kiwala kyambote. Ni kuswinsa kwoso, Jezú wadimuna o akayedye: “Ki mu fike, enu wenu phala ka mi fike. Mbata, o kubatula kwoso ku mu batwila naku akwenu, enu wenu kyene Nzambi kya kà mi batwila.” (Mat. 7:1, 2) Kyenyikiphe, twatokala kubhanga yoso phala kitufundise akwetu se henda ni kubhanga yoso phala kukayela o phangu ya Nzambi yetu ‘mukwa kuloloka.’

21-22. Ebhi o maukexilu ututena kukwatela o henda kwa akwetu?

²¹ O kukwatela o henda kikima kikala ngó kumuxima, kana. Mukidi, o athu a henda abhanga kima phala kukwatekesa akwa. Etwenyosophe, tutena kusota kudikila o ibhindamu ya jindandu jetu muxitu, o jiphange jetu mu kilunga ni athu mudyembu dyetu. Se phata kwala maukexilu avulu akukwatela henda kwa akwetu! O kwila sayi muthu wabhindamena kiswinisu? O kwila utena kumukwatekesa nange mu kumubhana kakudya mba kubhanga kikalakalu kyabhindamena? O kwila utena kubhita dingi ithangana ni Kidistá wavutuka mu kilunga wabhindamena makamba ambote andamuswinisa? O kwila utena kubokela akwenu o njimbu yambote iximbakatesa? O kuboka kwala bhukaxi ka maukexilu abetakota akukwatela o henda ku athu utwejiya.—Jobe 29:12, 13; Loma 10:14, 15; Tiya. 1:27.

²² Se tutonginina kyambote o ibhindamu yiyi twandamona kwila, kwala maukexilu avulu akukwatela o henda kwa athu atukondoloka. Kyoso kitukwatela henda kwa akwetu, twamusangulukisa o muxima wa Tata yetu ya dyulu, o Nzambi ‘mukwa kuloloka’ kyavulu!