Nzambi wa bhange o mukutu wetu ni kutena kwa kudisaka mudyê. Kyoso o mukutu kya u batula, a u xúwa mba a u kubula, “wene wala ni ukexilu wa kudisanza ni ku jika o itoto, kikale yonene mba yofele-fele.” (Johns Hopkins Medicine) O mukutu mu kithangana kyenyókyo u kalakala phala ki u bhubhe manyinga, mu kukudisa o mixibha a manyinga mu kwalukisa o fidila ni kukolesa o mukutu.

XINGANEKA: Se Nzambi wa bhange o mukutu wetu ni uhete wa kusaka mudyê o jifidila, ki twa tokala kudyelela kwila mwene u tena ku tu kula mu jiphaxi joso kala kya kanena? “O mukwa Jisálamu wa soneka: “Akexe ni kikote kya muxima u a saka, hé u a tumba o italákanya ya malamba mâ.” (Jisálamu 147:3) Se wa mu dibhana ni uhaxi wa kikote, mukonda dya jiphaxi, kyebhi ki u tena kudyelela kwila, Jihova wa-nda tumba o jifidila jé lelu ni ku hádya?

Nzambi wa kanena: “Kana kukala ni woma, kuma eme ngala bhwamoxi n’eye; kana kubhuwama, mbata eme ngala ngi Nzambi yé; eme nga-nda ku swinisa, hé ngi ku kwatekesa.” (Izaya 41:10) O muthu wejiya kwila Jihova u mu langa, wala ni kutululuka, kwa muxima ni nguzu ya kudibhana ni ibhidi yavulu. O kutululuka kuku, Phawulu wa kwixana “kutululuka kwa Nzambi kwa somboka o kitongolwelu kyoso.” Mwene wambe dingi; “Ima yoso nga soko na-yu mwa Kidistu yó mukwa ku ngi bhana o kutena.”—Filipe 4:4-7, 9, 13.

O Mikanda ikola i tu kwatekesa kukolesa kixikanu kyetu mu ikanenu ya Jihova ya lungu ni mwenyu wa athu ku hádya. Mu kufika, Dijingunwinu 21:4, 5 (yo londekese mu mbandu ya kayela) I zwela se ihi ya-nda bhanga mwene ni mukonda dyahi etu tu tena kudyelela kwila mwene wa-nda kumbidila o kikanenu kiki:

• “Mwène u a kondona o masoxi moso.” Jihova wa-nda zubha o jiphaxi ni héle yetu yoso, né mwene yóyo i moneka ku akwetu kala ibhindamu yofele.

• “Wa xikama bhu kyandu” mu fuma yê ku dyulu, o Sobha Mubhangi ni Muteni-a-yoso, wa ka londekesa o kutena ni ungana we phala kuzubha o hadi ni ku tu bhana o kikwatekesu ki twa bhindamena.

• Jihova ulondekesa kwila o kikanenu kiki ‘kya kidi, kya fiyele.’ Kiki kilombolola kwila Nzambi wa-nda kumbidila o kikanenu kyê mukonda dya dijina dyê.

O ukexilu wa ngôngo ni Bibidya ilondekesa o idifwa ni ukexilu wa Tata yetu ya dyulu. Phala kuzukama kwa Jihova bhu kaxi ka ibhangelu, kwa bhingi ku i tonginina ni ku i xinganeka kyambote. Maji o Bibidya mu ukexilu wa bhebhuluka i twixana phala kusidivila Jihova ni izwelu: “Zukamenu kwa Nzambi, mwène n’a mi zukama enu.” (Tiyaku 4:8) O Divulu dya Ikalakalu 17:27 dyamba: “Mwène kana muthu wa mu kala dikanga.”

Kyoso ki u katula kithangana phala kudilonga ya lungu ni Nzambi, wa-ndaya ni kuxikina dingi kwila “Mwene u ku langa.” (1 Phetele 5:7) Mbote yebhi ijila mu ku dyelela kwa Jihova?

Talesa o phangu ya Toru ku Japão. Mwene a mu sase kwa manya Kidistá, né kiki mwene wa kituka Kiswéya, wa di-te mu kibuka kya usweya ku ixi ya Japão a kixana yakuza. Mwene wambe: Nga xikinine ni kidi kyoso kwila Nzambi wa ngi zembe, nga divwile kwila o kufwa kwa jindandu jami kotelele kya mwene u nga zolele kyavulu, kwexile kaxtiku phala eme.” Toru wa xikina kwila kudilunga ni ima yiyi ya mu bhekela malamba, mwene wa kituka muthu wa kolo muxima, kévu o ndolo ya akwâ.” Mwene u lembalala o ifwa yê, u zwela: “Eme nga mesenene kujibha muthu wa betele kota mu kufumana eme ndenge, ni ngi kala ni fuma.”

 Mu kusuluka, kyoso Toru kya dilongo o Bibidya kumoxi ni muhat’wê Hannah, Toru wa lungulula o mwenyu ni ibanzelu yê. Hannah wambe: “Eme nga mono mwadi wami kubhilula o ukexilu wê.” Lelu, Toru u zwela sé héle: “Sayi-ku Nzambi u tu langa. Mwene ka mesena kwila athu afwa. Wala wé polondo phala kuloloka oso a dyela o ituxi ni kidi kyoso. Mwene wívwa o ima muthu woso woso ka xikina ku ivwa, né kiki mwene u i tendela. Ku hádya Jihova wa-nda zubha o ima yoso yayibha, o jiphaxi joso ni jindolo. Né mwene kindala, mwene u tu kwatekesa mu mawukexilu avulu ki tu a xinganeka. Mwene u tu langidila, u tu bhulula kyoso ki tu kamba nguzu.”—Jisálamu 136:23.

Kala kilondekesa o musoso wa Toru, o kwijiya kwila kwa kambe ngó Nzambi wa-nda zubha o mavuwa oso ni kukondona o masoxi moso, ki ku tu bhana ngó kidyelelu phala o hádya, maji ku tu kwatekesa we kukala ni mwenyu wambote kindala kiki. Se phata, né mwene ku mundu yú wezala ni jiphaxi, eye u tena kukatula mbote mu kilangidilu kya henda ya Nzambi.