O Jijudé m’ukulu akexile ni uôma ua dibhute dia kexile mu izuua iâ. O uhaxi iú u bhangesa o muthu kukamba kuívua ndolo, u kumbukisa o idiandu ia mukutu. Ki kuexile milongo phala kusaka o dibhute. Mukonda dia kiki, oso akexile ni uhaxi uenhó a tokalele kutunga dikanga dia ió a disanzele, a tokalele uá kutangela o athu kuila ene jihaxi.​—Ijila 13:45, 46.

O Jijudé, atuameni a ngeleja, a bhangele ijila ia lungu ni uhaxi ua dibhute. O ijila ia bhangele ki i tundile mu Mikanda Ikôla, mukonda dia kiki oso a katele o uhaxi uenhó akexile mu tala hadi iavulu. Mu kifika, o ijila ia Jijudé ia tangele kuila kana muthu ua tokalele kuzukama métulu jiiadi ku muthu uala ni dibhute. Maji se kua kexile mu bhusa, kana muthu ua tokalele kuzukama 45 a jimétulu kuâ mukua dibhute. Saí athu akuâ kutanga o divulu dikôla dia Jijudé, a lombolola o kitumu kia Mikanda Ikôla kia kuila akua dibhute a tokalele kutunga “dikanga dia diembu,” mu kuila ene ka tokalele kukala moxi a jimbanza. Mukonda dia kiki, o atuameni a ngeleja se a monene mukua dibhute moxi dia mbanza, akexile ku mu takula matadi ni ku mu tangela: “Ndé ku kididi kiê, kana kusambukila o uhaxi uê ku akuenu.”

Maji ki kiene kia kexile mu bhanga Jezú! Mu veji dia kukaia akuâ dibhute, muéne ua kexile mu a kuata ni ku a saka.​—Matesu 8:3.

O maka alungu ni kudisenga, akexile mu bheka ibhidi iavulu bhu kaxi ka atuameni a jingeleja ku hama ia dianga K.K. Mu kiki, saí kithangana, Jifalizeu jebhuidisa Jezú: “Manhi mu Kitumu kietu ki kôla diiala kusenga muhatu’ê mukonda dia kikuma kioso-kioso?”​—Matesu 19:3.

Mu Kitumu kia Mozé, se muhatu “uala ni kisemu kioso-kioso kiaiibha,” o diiala muéne ua kijidile se u mu bhana mukanda ua kusenga mba kana. (Matendelelu 24:1) Mu izuua ia Jezú, kua kexile xikola jiiadi. Kála xikola ia kexile mu longa kima kiéngi kia lungu ni kitumu. O xikola ia Shamai, ia tundile o jixikola ja mukuá, ia kexile mu longa kuila o diiala ua tokalele ngó kuxisa muhatu’ê se o muhatu ua te “phánda.” Maji o Xikola ia Hilele, ia kexile mu longa kuila o diiala uala ni ufolo ua kusenga muhatu’ê se bhu moneka maka oso-oso mu ukaza, kikale maka a dikota mba ofele. O xikola íii ia kexile mu longa kuila o muhatu se ka lambié kiambote, mba se o diiala ua sange muhatu uéngi ua beta o kuuabha, muéne u tena kusenga muhatu’ê.

Kiebhi-phe Jezú kia tambuijila o kibhuidisu kia Jifalizeu? Muéne uambe: “Muthu uoso u senga muhatu’ê ua fiiele mukonda dia kikuma kiengi, o kia phànda ki kiene, anga u sakana muhatu uéngi, muenhú ua te phànda.”​—Matesu 19:6, 9.